ಜಗಳದಲ್ಲಿ ಗಂಡನ ನಾಲಗೆ ಕಚ್ಚಿದ ಹೆಂಡತಿ; ತುಂಡಾಗಿ ಕೆಳಗೆ ಬಿದ್ದ ನಾಲಗೆ

Viral News: ಗಂಡ ಹೆಂಡತಿಯ ಮಧ್ಯೆ ಜಗಳ!? ಅಚ್ಚರಿ ಪಡುವಂಥದ್ದೇನೂ ಇಲ್ಲ. ಏಕೆಂದರೆ ಇದು ತೀರಾ ಸಾಮಾನ್ಯ. ಎರಡು ಭಿನ್ನ ವ್ಯಕ್ತಿತ್ವ, ಭಿನ್ನ ಹಿನ್ನೆಲೆಯಿಂದ ಬಂದ ಮನಸುಗಳು ಜೀವನದುದ್ದಕ್ಕೂ ಒಂದೇ ಮನೆಯಲ್ಲಿ, ಒಮ್ಮತದಿಂದ ಕುಟುಂಬದ ನಿಯಮಗಳಿಗೆ ತಕ್ಕಂತೆ ವಾಸಿಸುವುದು ಎಂದರೆ ಅದೊಂದು ಸಾಧನೆಯೇ. ಬದಲಾದ ಜೀವನಶೈಲಿ, ಶೈಕ್ಷಣಿಕ ಅರಿವು, ನಿಲುವು, ನಿರೀಕ್ಷೆಗಳು, ಬದುಕಿನ ಗುರಿ ಹೀಗೆ ಎಲ್ಲವನ್ನೂ ತೂಗಿಸಿಕೊಂಡು ಹೋಗುವುದೆಂದರೆ ಸುಲಭದ ಮಾತಲ್ಲ. ಜಗಳಗಳ ಕಾರಣ, ಪರಿಣಾಮ ಕೇಳಿದಾಗ ಕೆಲವೊಮ್ಮೆ ನಗು ಬರಬಹುದು. ಆದರೆ ಅದರ ಹಿಂದೆ ಗಂಭೀರ ಕಾರಣಗಳಿರುತ್ತವೆ. ಇದೀಗ ವೈರಲ್ ಆಗಿರುವ ಈ ಸುದ್ದಿ ಗಮನಿಸಿ. ಹೆಂಡತಿಯೊಬ್ಬಳು ಜಗಳದಲ್ಲಿ ಗಂಡನ ನಾಲಗೆಯನ್ನೇ ಕಚ್ಚಿಬಿಟ್ಟಿದ್ದಾಳೆ, ಅದು ತುಂಡಾಗಿ ನೆಲಕ್ಕೆ ಬೀಳುವಷ್ಟು ಜೋರಾಗಿ!

ಇದನ್ನೂ ಓದಿ : ‘ನಾ ಬರದಿದ್ದರೆ ಶಾಲೆಯೇನು ಮುಚ್ಚಿ ಹೋಗುವುದಿಲ್ಲ’ ಉತ್ತರ ಪ್ರದೇಶದ ಬಾಲಕನ ರಜಾಚೀಟಿ ವೈರಲ್

ಈ ವಿಲಕ್ಷಣ ಘಟನೆ ಉತ್ತರ ಪ್ರದೇಶದ ಲಕ್ನೋದ ಠಾಕೂರ್​ಗಂಜ್​ನಲ್ಲಿ ನಡೆದಿದೆ. ಸಲ್ಮಾ ಎಂಬಾಕೆ ಮಕ್ಕಳೊಂದಿಗೆ ತನ್ನ ತವರಿಗೆ ಹೋಗಿದ್ದಾಳೆ. ಬಹಳ ದಿನಗಳಾದರೂ ಆಕೆ ಮರಳಿ ಬಾರದಿದ್ದಾಗ ಗಂಡ ಮುನ್ನಾ ಆಕೆಯ ತವರಿಗೆ ತೆರಳಿ ಅವರನ್ನು ವಾಪಾಸು ಕರೆತರಲು ಹೋಗಿದ್ದಾನೆ. ಅಲ್ಲಿ ಅವರಿಬ್ಬರ ನಡುವೆ ಮಾತು ತಾರಕಕ್ಕೇರಿ ಜಗಳಕ್ಕೆ ತಿರುಗಿದೆ. ಅವನು ಆಕೆಗೆ ಉಗಿಯುವ ಸಂದರ್ಭದಲ್ಲಿ ಆಕೆ ಬಲವಾಗಿ ಅವನ ನಾಲಗೆಯನ್ನು ಕಚ್ಚಿಬಿಟ್ಟಿದ್ದಾಳೆ. ಅದು ತುಂಡಾಗಿ ಕೆಳಗೆ ಬಿದ್ದಿದೆ. ತೀವ್ರ ರಕ್ತಸ್ರಾವದಿಂದ ಬಳಲುತ್ತಿದ್ದ ಅವನನ್ನು ಪೊಲೀಸರು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಸೇರಿಸಿದ್ದಾರೆ. ಸಲ್ಮಾ ಈಗ ಪೊಲೀಸರ ವಶದಲ್ಲಿದ್ದಾಳೆ.

ಇದನ್ನೂ ಓದಿ : ನಿದ್ದೆ ಬರ್ತಿದೆ ಅದಕ್ಕೆ ರೈಡ್​ ಕ್ಯಾನ್ಸಲ್​ ಮಾಡಿ; ಉಬರ್ ಡ್ರೈವರ್​ನ ಪ್ರಾಮಾಣಿಕತೆ ಮೆಚ್ಚುತ್ತಿರುವ ನೆಟ್ಟಿಗರು

ಪಶ್ಚಿಮ ವಿಭಾಗದ ಎಡಿಸಿಪಿ ಚಿರಂಜೀವ್ ನಾಥ್ ಸಿಂಘಾ, ‘ಈ ದಂಪತಿಯ ಮಧ್ಯೆ ಹಲವಾರು ವರ್ಷಗಳಿಂದ ಜಗಳಗಳು ನಡೆಯುತ್ತ ಬಂದಿವೆ. ಹೆಂಡತಿ ತನ್ನ ಗಂಡನಿಂದ ದೂರವಾಗಿ ತನ್ನ ತಂದೆತಾಯಿಯ ಮನೆಯಲ್ಲಿ ವಾಸಿಸುತ್ತಿದ್ದಳು. ಶುಕ್ರವಾರ ಗಂಡ ತನ್ನ ಮಕ್ಕಳನ್ನು ಭೇಟಿಯಾಗಲು ಇಲ್ಲಿ ಬಂದಾಗ ಈ ದುರ್ಘಟನೆ ನಡೆದಿದೆ. ತಕ್ಷಣವೇ ಪೊಲೀಸರು ಸ್ಥಳಕ್ಕೆ ಬಂದು ಆತನನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಈ ಪ್ರಕರಣದ ಹಿನ್ನೆಲೆಯಲ್ಲಿ ತನಿಖೆಯನ್ನು ಆರಂಭಿಸಲಾಗಿದೆ. ಆರೋಪಿ ಸಲ್ಮಾಳನ್ನು ಬಂಧಿಸಲಾಗಿದೆ’ ಎಂದಿದ್ದಾರೆ.

ಇದನ್ನು ಓದಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್​ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ