ಅಭಿನವ ಸ್ವಾಮಿಗೆ ಸೇರಿದ ರೂ. 60 ಲಕ್ಷ ನಗದನ್ನು ಹಾಲಶ್ರೀ ಮಠದಲ್ಲಿ ಇಟ್ಟುಹೋದ ಪ್ರಣವ್ ವರ್ತನೆ ಗೊಂದಲಮಯವಾಗಿದೆ!

ಬಳ್ಳಾರಿ: ಚೈತ್ರಾ ಕುಂದಾಪುರಳ ಕ್ಯಾಶ್-ಫಾರ್-ಟಿಕೆಟ್ (Chaitra Kundapura cash-for-ticket case) ಪ್ರಕರಣದಲ್ಲಿ ಜಿಲ್ಲೆಯ ಹಿರೇ ಹಡಗಲಿ ಹಾಲಾಶ್ರೀ ಮಠದ ಅಭಿನವ ಸ್ವಾಮಿಗೆ (Abhinava Swamy) ಒಂದೂವರೆ ಕೋಟಿ ರೂ. ಸಂದಾಯವಾಗಿದ್ದು ಹೆಚ್ಚು ಕಡಿಮೆ ಸಾಬೀತಾಗಿದೆ. ಇವರ ಹೆಸರು ಪ್ರಣವ್ (Pranav) ಅಂತ, ಮೈಸೂರಿನವರು. ಕೆಲ ದಿನಗಳ ಹಿಂದೆ ಸ್ವಾಮಿಯ ಕಾರು ಚಾಲಕ 60 ಲಕ್ಷ ರೂ. ನಗದನ್ನು ಪ್ರಣವ್ ಅವರ ಕಚೇರಿಯಲ್ಲಿ ಬಿಟ್ಟು ಹೋಗಿದ್ದನಂತೆ. ಆದರೆ ಹಣ ಇಟ್ಟು ಹೋದ ನಂತರ ವಾಪಸ್ಸು ತೆಗೆದುಕೊಂಡು ಹೋಗಲು ಡ್ರೈವರ್ ಆಗಲೀ ಆಥವಾ ಅಭಿನವ ಸ್ವಾಮಿಯಾಗಲೀ ಬಾರದ ಕಾರಣ ಖುದ್ದು ಪ್ರಣವ್ ಅವರೇ ಹಣವನ್ನು ಹಿಂತಿರುಗಿಸಲು ಮೈಸೂರಿಂದ ಬಳ್ಳಾರಿ ಜಿಲ್ಲೆಯ ಹಿರೇ ಹಡಗಲಿಯಲ್ಲಿರುವ ಹಾಲಶ್ರೀ ಮಠಕ್ಕೆ ಆಗಮಿಸಿದ್ದಾರೆ. ಮಠದಲ್ಲಿ ಅಭಿನವ ಸ್ವಾಮಿಯ ತಂದೆ ಇರುತ್ತಾರೆ ಅಂತ ಪ್ರಣವ್ ಗೆ ಗೊತ್ತಿತ್ತಂತೆ. ಆದರೆ, ಇವತ್ತು ಅವರು ಮಠಕ್ಕೆ ಬಂದಾಗ ಸ್ವಾಮಿಯ ತಂದೆ ಇರದ ಕಾರಣ ಹಣವನ್ನು ಮಠದ ಒಂದು ಭಾಗದಲ್ಲಿ ಇಟ್ಟು ಹೊರಬಂದಿದ್ದಾರೆ. ಹಣದ ಥೈಲಿ ಮಠದಲ್ಲಿಟ್ಟು ಹೊರಬರುವ ಮೊದಲು ಅವರು ಒಂದು ವಿಡಿಯೋ ಮಾಡಿಸಿದ್ದಾರೆ. ಅದರಲ್ಲಿ ಅವರು ಚೀಲದಲ್ಲಿರುವ ಹಣ ತೋರಿಸುತ್ತಾರೆ ಮತ್ತು ಜಿಪ್ ಎಳೆದು ಅದನ್ನು ಮುಚ್ಚಿ ಅದರ ಮೇಲೆ ಗೋಣಿಚೀಲ ಮುಚ್ಚಿದ ಬಳಿಕ ಕ್ಷೀಣವಾದ ಧ್ವನಿಯಲ್ಲಿ ‘ಹಾಲಶ್ರೀ ಅಭಿನವ ಸ್ವಾಮಿಗೆ ಸೇರಿದ ಹಣ ಇಲ್ಲಿಟ್ಟಿದ್ದೇನೆ’ ಅಂತ ಹೇಳುತ್ತಾರೆ.

ಪ್ರಣವ್ ನಡೆ-ನುಡಿ ಸಂಶಯಾಸ್ಪದವಾಗಿದೆ ಮಾರಾಯ್ರೇ. ಇವರು ಸ್ವಾಮಿ ಪರಿಚಯಸ್ಥರಾಗಿರಬೇಕು. ಇಲ್ಲವಾದರೆ, ಸ್ವಾಮಿಯ ಚಾಲಕ ಅಷ್ಟು ದೊಡ್ಡ ಮೊತ್ತ ಇವರಲ್ಲಿ ಯಾಕೆ ಇಡುತ್ತಾನೆ? ಅಲ್ಲದೆ ಸ್ವಾಮಿಯ ಬಗ್ಗೆ ಎಲ್ಲರಿಗೂ ಗೊತ್ತಾಗಿರುವುದರಿಂದ ಪ್ರಣವ್ ಹಣವನ್ನು ಪೊಲೀಸರಿಗೆ ತಲುಪಿಸುವ ಬದಲು ಮಠಕ್ಕೆ ಯಾಕೆ ತರುತ್ತಾರೆ? 60 ಲಕ್ಷ ರೂಪಾಯಿಗಳನ್ನು ಯಾರಾದರೂ ಹಾಗೆ ಅನಾಥವಾಗಿ ಬಿಟ್ಟು ಹೋಗುತ್ತಾರೆಯೇ? ಗೊಂದಲಮಯವಾಗಿದೆ ಪ್ರಣವ್ ವರ್ತನೆ!!

ಮತ್ತಷ್ಟು ವಿಡಿಯೋ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ