ಒಂದೇ ಇನ್ನಿಂಗ್ಸ್​ನಲ್ಲಿ 10 ವಿಕೆಟ್; ರಣಜಿಯಲ್ಲಿ ದಾಖಲೆ ಬರೆದ ಯುವ ವೇಗಿ; ವಿಡಿಯೋ ನೋಡಿ

ರಣಜಿ ಟ್ರೋಫಿಯಲ್ಲಿ ದಾಖಲೆಗಳ ಸರಣಿ ಮುಂದುವರಿದಿದೆ. ನಿನ್ನೆ ಒಂದೇ ದಿನ ಮೂವರು ಬ್ಯಾಟರ್ಸ್​ಗಳು ತ್ರಿಶತಕ ಸಿಡಿಸಿ ಮಿಂಚಿದ್ದರು. ಇದೀಗ ಯುವ ವೇಗಿಯೊಬ್ಬ ಎಲ್ಲ 10 ವಿಕೆಟ್ ಕಬಳಿಸಿ ದಾಖಲೆ ನಿರ್ಮಿಸಿದ್ದಾರೆ. ಪ್ರಸ್ತುತ ರಣಜಿಯಲ್ಲಿ ಎಲೈಟ್ ಗುಂಪಿನ ಐದನೇ ಸುತ್ತಿನ ಪಂದ್ಯಗಳು ನಡೆಯುತ್ತಿದ್ದು, ಆ ಪ್ರಕಾರ, ರೋಹ್ಟಕ್‌ನಲ್ಲಿ ಕೇರಳ ಮತ್ತು ಹರಿಯಾಣ ನಡುವೆ ಪಂದ್ಯ ನಡೆಯುತ್ತಿದೆ. ಈ ವೇಳೆ ಕೇರಳ ತಂಡದ ಮೊದಲ ಇನ್ನಿಂಗ್ಸ್‌ನಲ್ಲಿ ಹರಿಯಾಣದ ವೇಗದ ಬೌಲರ್ ಅಂಶುಲ್ ಕಾಂಬೋಜ್ ಎಲ್ಲಾ 10 ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ಇತಿಹಾಸ ನಿರ್ಮಿಸಿದ್ದಾರೆ. ಈ ಮೂಲಕ ಈ ಟೂರ್ನಿಯ ಇತಿಹಾಸದಲ್ಲಿ ಒಂದೇ ಇನ್ನಿಂಗ್ಸ್‌ನಲ್ಲಿ 10 ವಿಕೆಟ್ ಪಡೆದ ಮೂರನೇ ಬೌಲರ್ ಎಂಬ ಹೆಗ್ಗಳಿಕೆಗೆ ಅಂಶುಲ್ ಪಾತ್ರರಾಗಿದ್ದಾರೆ.

39 ವರ್ಷಗಳ ನಂತರ ದಾಖಲೆ

ಕೇರಳ ವಿರುದ್ಧದ ಈ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ 30 ಓವರ್‌ಗಳನ್ನು ಬೌಲ್ ಮಾಡಿದ ಅನ್ಶುಲ್ 49 ರನ್‌ಗಳನ್ನು ನೀಡಿ, ಎಲ್ಲಾ 10 ವಿಕೆಟ್​ಗಳನ್ನು ಪಡೆದರು. ಇದರೊಂದಿಗೆ ರಣಜಿ ಟ್ರೋಫಿ ಇತಿಹಾಸದಲ್ಲಿ 39 ವರ್ಷಗಳ ನಂತರ ಅನ್ಶುಲ್ ಈ ಸಾಧನೆಯನ್ನು ಪುನರಾವರ್ತಿಸಿದರು. ಇದಕ್ಕೂ ಮುನ್ನ 1985-86ರ ಸೀಸನ್​ನಲ್ಲಿ ರಾಜಸ್ಥಾನ ವೇಗಿ ಪ್ರದೀಪ್ ಸುಂದರಂ ವಿದರ್ಭ ವಿರುದ್ಧ ಒಂದೇ ಇನ್ನಿಂಗ್ಸ್‌ನಲ್ಲಿ 78 ರನ್‌ಗಳಿಗೆ 10 ವಿಕೆಟ್ ಪಡೆದಿದ್ದರು. ಮೊದಲ ಬಾರಿಗೆ,ಬಂಗಾಳದ ಪರ ಆಡಿದ್ದ ಪ್ರೇಮಾಂಗ್ಶು ಚಟರ್ಜಿ, 1956-57 ರ ಸೀಸನ್​ನಲ್ಲಿ ಅಸ್ಸಾಂ ವಿರುದ್ಧ ಕೇವಲ 20 ರನ್ ನೀಡಿ ಎಲ್ಲಾ ಬ್ಯಾಟ್ಸ್‌ಮನ್‌ಗಳನ್ನು ಔಟ್ ಮಾಡಿದ್ದರು.

6ನೇ ಬಾರಿಗೆ ಸಂಭವಿಸಿದೆ

ಭಾರತೀಯ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಒಂದೇ ಇನ್ನಿಂಗ್ಸ್​ನಲ್ಲಿ ಎಲ್ಲಾ 10 ವಿಕೆಟ್​ಗಳು ಒಬ್ಬನೇ ಬೌಲರ್ ಉರುಳಿಸಿರುವುದು ಇದು 6 ಬಾರಿ. ದೇಶೀಯ ಕ್ರಿಕೆಟ್‌ನಲ್ಲಿ ಕೊನೆಯ ಬಾರಿಗೆ ದೇಬಶಿಶ್ ಮೊಹಂತಿ ಈ ಕೆಲಸ ಮಾಡಿದರು. ದುಲೀಪ್ ಟ್ರೋಫಿಯ 2000-01ರ ಸೀಸನ್​ನಲ್ಲಿ ಅವರು 46 ರನ್‌ಗಳಿಗೆ 10 ವಿಕೆಟ್‌ಗಳನ್ನು ಪಡೆದಿದ್ದರು.

ಇನ್ನು ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ ಈ ಸಾಧನೆ ಮಾಡಿದ ಮೊದಲಿಗರು ಸುಭಾಷ್ ಗುಪ್ತೆ. ಅವರು 1954-55ರಲ್ಲಿ ಬಾಂಬೆ ಪರ ಆಡುತ್ತಿದ್ದಾಗ, ಪಾಕಿಸ್ತಾನದ ಕಂಬೈನ್ಡ್ ಸರ್ವಿಸಸ್ ವಿರುದ್ಧ 10 ವಿಕೆಟ್ ಕಬಳಿಸಿದ್ದರು. ಆದರೆ ಈ ಕೆಲಸವನ್ನು ಅನಿಲ್ ಕುಂಬ್ಳೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಮಾಡಿದ್ದಾರೆ. ಅವರು 1999 ರಲ್ಲಿ ಕೋಟ್ಲಾ ಟೆಸ್ಟ್‌ನಲ್ಲಿ ಏಕಾಂಗಿಯಾಗಿ ಪಾಕಿಸ್ತಾನದ 10 ವಿಕೆಟ್​ಗಳನ್ನು ಪಡೆದಿದ್ದರು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ