ಪರಿಸರ ರಕ್ಷಣೆಗೆ ಮುಂದಾದ ಬೀದರ್ ಕಲಾವಿದ: 400ಕ್ಕೂ ಹೆಚ್ಚು ಮಣ್ಣಿನ ಗಣಪತಿ ತಯಾರಿಸಿ ಮಾದರಿಯಾದ ಹನುಮಂತ ಮಲ್ಕಾಪುರೆ!
Updated on: Sep 09, 2026 | 2:15 PM
ಬೀದರ್ ತಾಲೂಕಿನ ಗುನ್ನಳ್ಳಿ ಗ್ರಾಮದ ಕಲಾವಿದ ಹನುಮಂತ ಮಲ್ಕಾಪುರೆ ಕಳೆದ 8 ವರ್ಷಗಳಿಂದ ಪರಿಸರ ಸ್ನೇಹಿ ಮಣ್ಣಿನ ಗಣೇಶ ಮೂರ್ತಿಗಳನ್ನು ತಯಾರಿಸುತ್ತಿದ್ದಾರೆ. ಅವರ ಕೈಯಾರ ತಯಾರಿಸಿದ 400ಕ್ಕೂ ಹೆಚ್ಚು ಗಣಪತಿಗಳಿಗೆ ಈಗಲೇ ಬೇಡಿಕೆ ಬಂದಿದ್ದು, ಪಿಒಪಿ ಗಣಪತಿಗಳಿಗೆ ಪರ್ಯಾಯವಾಗಿ ಇವು ಪರಿಸರ ರಕ್ಷಣೆಗೆ ನೆರವಾಗಿವೆ. ನೈಸರ್ಗಿಕ ಮಣ್ಣಿನಿಂದ ತಯಾರಿಸುವುದರಿಂದ ನೀರಿನಲ್ಲಿ ಸುಲಭವಾಗಿ ಕರಗಿ ಜಲಚರಗಳಿಗೂ ಹಾನಿಯಾಗುವುದಿಲ್ಲ.
ಗಣೇಶ ಚತುರ್ಥಿ ಹಬ್ಬಕ್ಕೆ ದಿನಗಣನೆ ಆರಂಭವಾಗಿರುವ ಈ ಸಂದರ್ಭದಲ್ಲಿ, ಬೀದರ್ ಜಿಲ್ಲೆಯಲ್ಲಿ ಪರಿಸರ ಸ್ನೇಹಿ ಗಣೇಶ ಮೂರ್ತಿಗಳ ಬಗ್ಗೆ ವ್ಯಾಪಕ ಪ್ರಚಾರ ನಡೆಯುತ್ತಿದೆ. ಗುನ್ನಳ್ಳಿ ಗ್ರಾಮದ ಕಲಾವಿದ ಹನುಮಂತ ಮಲ್ಕಾಪುರೆ ಅವರು ಕಳೆದ ಎಂಟು ವರ್ಷಗಳಿಂದ ನೈಸರ್ಗಿಕ ಮಣ್ಣಿನ ಗಣಪತಿ ಮೂರ್ತಿಗಳನ್ನು ತಯಾರಿಸುತ್ತಿದ್ದಾರೆ. ಈ ಬಾರಿ ಅವರು 400ಕ್ಕೂ ಹೆಚ್ಚು ಮಣ್ಣಿನ ಗಣೇಶ ಮೂರ್ತಿಗಳನ್ನು ಸಿದ್ಧಪಡಿಸಿದ್ದು, ಇವುಗಳಲ್ಲಿ ಬಹುತೇಕ ಈಗಾಗಲೇ ಮುಂಗಡವಾಗಿ ಕಾಯ್ದಿರಿಸಲ್ಪಟ್ಟಿವೆ.
ಹನುಮಂತ ಮಲ್ಕಾಪುರೆ ಅವರು ತಯಾರಿಸುವ ಗಣಪತಿಗಳು 4 ಇಂಚಿನಿಂದ 14 ಇಂಚಿನವರೆಗಿನ ವಿವಿಧ ಗಾತ್ರಗಳಲ್ಲಿ ಲಭ್ಯವಿವೆ. ಇವುಗಳಿಗೆ ಯಾವುದೇ ರಾಸಾಯನಿಕ ಬಣ್ಣಗಳನ್ನು ಬಳಸುವುದಿಲ್ಲ. ಕೇವಲ ಹಣೆಗೆ, ಕಿವಿಗೆ ಮತ್ತು ಕಣ್ಣುಗಳಿಗೆ ನೈಸರ್ಗಿಕ ಬಣ್ಣಗಳನ್ನು ಹಚ್ಚುವುದರಿಂದ ಮೂರ್ತಿಗಳು ಸಂಪೂರ್ಣವಾಗಿ ಪರಿಸರ ಸ್ನೇಹಿಯಾಗಿವೆ. ನೀರಿಗೆ ವಿಸರ್ಜನೆ ಮಾಡಿದಾಗ ಸುಲಭವಾಗಿ ಕರಗುವ ಈ ಗಣಪತಿಗಳು ಜಲ ಮಾಲಿನ್ಯವನ್ನು ತಡೆದು, ಜಲಚರಗಳ ರಕ್ಷಣೆಗೆ ಸಹಕಾರಿಯಾಗಿವೆ. ಇದರಿಂದ ಬೀದರ್ ಜಿಲ್ಲೆಯ ಜನರು ಪಿಒಪಿ ಗಣಪತಿಗಳಿಗೆ ವಿದಾಯ ಹೇಳಿ ಮಣ್ಣಿನ ಗಣಪತಿಗಳನ್ನು ಅಪ್ಪಿಕೊಳ್ಳುತ್ತಿರುವುದು ಉತ್ತಮ ಬೆಳವಣಿಗೆ.
ಮತ್ತಷ್ಟು ವಿಡಿಯೋ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
