Amazon: 10 ಸಾವಿರ ಉದ್ಯೋಗಿಗಳನ್ನು ವಜಾಗೊಳಿಸಲು ಅಮೆಜಾನ್ ಸಂಸ್ಥೆ ಚಿಂತನೆ

ನವದೆಹಲಿ: ಅಮೆಜಾನ್ ಕಂಪನಿಯು ಸುಮಾರು 10 ಸಾವಿರ ನೌಕರರನ್ನು ಕೆಲಸದಿಂದ ವಜಾಗೊಳಿಸಲು ಚಿಂತನೆ ನಡೆಸಿದೆ. ಕಳೆದ ಕೆಲವು ತಿಂಗಳುಗಳಿಂದ ಅಮೆಜಾನ್​ಗೆ (Amazon) ಲಾಭ ಕಡಿಮೆ ಆಗಿರುವುದರಿಂದ ಅಮೆಜಾನ್ ಸಾವಿರಾರು ಉದ್ಯೋಗಿಗಳನ್ನು ವಜಾಗೊಳಿಸಲು ಮತ್ತು ವೆಚ್ಚವನ್ನು ಕಡಿತಗೊಳಿಸಲು ಅಗತ್ಯವಾದ ಕ್ರಮಗಳನ್ನು ಜಾರಿಗೆ ತರಲು ಚಿಂತಿಸಿದೆ. 2021ರ ಡಿಸೆಂಬರ್ ಅಂತ್ಯದ ವೇಳೆಗೆ ಅಮೆಜಾನ್​ನಲ್ಲಿ ಒಟ್ಟು 16 ಲಕ್ಷ ನೌಕರರು ಇದ್ದರು. ಈ ವರ್ಷ ಎಷ್ಟು ಜನರನ್ನು ವಜಾಗೊಳಿಸಲಾಗುತ್ತದೆ, ಯಾವ ದರ್ಜೆಯ ನೌಕರರನ್ನು ವಜಾಗೊಳಿಸಲಾಗುತ್ತದೆ ಎಂಬಿತ್ಯಾದಿ ಖಚಿತ ಮಾಹಿತಿ ಇನ್ನೂ ಲಭ್ಯವಾಗಿಲ್ಲ.

ಆದರೆ, ಈ ವಾರದಿಂದಲೇ ಅಮೆಜಾನ್ ಕಂಪನಿಯು 10,000 ಉದ್ಯೋಗಿಗಳನ್ನು ವಜಾ ಮಾಡಬಹುದು ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ. ಇದು ಅಮೆಜಾನ್ ಇತಿಹಾಸದಲ್ಲಿಯೇ ಅತಿದೊಡ್ಡ ವಜಾಗೊಳಿಸುವಿಕೆಯಾಗಿದೆ. ಈ ಉದ್ಯೋಗ ಕಡಿತ ರೀಟೇಲ್ ಮಾರಾಟ, ಕಾರ್ಪೋರೇಟ್, ಟೆಕ್ನಾಲಜಿ, ಮಾನವ ಸಂಪನ್ಮೂಲದ ವಿಭಾಗವನ್ನು ಕೇಂದ್ರವಾಗಿಟ್ಟುಕೊಂಡಿದೆ ಎನ್ನಲಾಗಿದೆ. ಆದರೆ, ಕಂಪನಿಯಿಂದ ಈ ಬಗ್ಗೆ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ.

ಇದನ್ನೂ ಓದಿ: Amazon Hiring: ಉದ್ಯೋಗಾಕಾಂಕ್ಷಿಗಳಿಗೆ ನಿರಾಸೆ; ನೇಮಕಾತಿ ಮುಂದೂಡಿಕೆ ಘೋಷಿಸಿದ ಅಮೆಜಾನ್

ಇ-ಕಾಮರ್ಸ್​ನ ದೈತ್ಯ ಸಂಸ್ಥೆಯಾದ ಅಮೆಜಾನ್ ಬಿಡುವಿಲ್ಲದ ರಜೆಯ ಋತುವಿನ ಬೆಳವಣಿಗೆಯಲ್ಲಿ ನಿಧಾನಗತಿಯ ಬಗ್ಗೆ ಎಚ್ಚರಿಕೆ ನೀಡಿದ ಕೆಲವೇ ವಾರಗಳ ನಂತರ ಈ ವರದಿ ಬಂದಿದೆ. ಇದು ಹೆಚ್ಚಿನ ಮಾರಾಟವನ್ನು ಉತ್ಪಾದಿಸುವ ಅವಧಿಯಾಗಿದೆ. ಏರುತ್ತಿರುವ ಬೆಲೆಗಳಿಂದಾಗಿ ಗ್ರಾಹಕರು ಕಡಿಮೆ ಹಣವನ್ನು ಖರ್ಚು ಮಾಡುತ್ತಿರುವುದು ಇದಕ್ಕೆ ಕಾರಣ ಎಂದು ಅಮೆಜಾನ್ ಹೇಳಿದೆ.

ಈ ವರ್ಷಾಂತ್ಯದ ಕ್ರಿಸ್‌ಮಸ್‌ ಮಾರಾಟದ ಅವಧಿಯಲ್ಲಿ ಅಮೆಜಾನ್ ಕಂಪನಿಯ ವ್ಯವಹಾರದ ಪ್ರಗತಿ ಇಳಿಕೆ ಕಾಣುವ ಸಾಧ್ಯತೆಯಿದೆ ಎಂದು ಅಮೇಜಾನ್‌ ಈ ಹಿಂದೆ ಎಚ್ಚರಿಕೆ ನೀಡಿತ್ತು. ಕ್ರಿಸ್‌ಮಸ್‌ ಋತುವಿನಲ್ಲಿ ಅಮೆಜಾನ್‌ ಕಂಪನಿಗೆ ಸಹಜವಾಗಿ ಅತ್ಯಧಿಕ ವಹಿವಾಟು ನಡೆಯಬೇಕು. ಆದರೆ, ಜನರು ಮತ್ತು ಕಂಪನಿಗಳು ಶಾಪಿಂಗ್​ಗೆ ವೆಚ್ಚ ಮಾಡುವಷ್ಟು ಹಣ ಹೊಂದಿಲ್ಲ. ಇದರ ಜೊತೆಗೆ ಸರಕುಗಳ ದರವೂ ದುಬಾರಿಯಾಗಿದೆ.

ಇದನ್ನೂ ಓದಿ: ಟ್ವಿಟರ್, ಮೆಟಾ ಆಯ್ತು ಈಗ ಅಮೆಜಾನ್ ಸರದಿ; ಉದ್ಯೋಗಿಗಳ ವಜಾ ಆರಂಭ

ಇತ್ತೀಚೆಗಷ್ಟೇ ಟ್ವಿಟ್ಟರ್‌ ಖರೀದಿ ಬಳಿಕ ಟ್ವಿಟ್ಟರ್​ ಸಂಸ್ಥೆಯಲ್ಲಿ ಭಾರೀ ಬದಲಾವಣೆ ಮಾಡುತ್ತಿರುವ ಎಲಾನ್‌ ಮಸ್ಕ್‌ ಭಾರತದಲ್ಲೂ ಭಾರೀ ಉದ್ಯೋಗ ಕಡಿತ ಮಾಡಿದ್ದಾರೆ. ಭಾರತದಲ್ಲಿ ಮಾರ್ಕೆಟಿಂಗ್‌ ವಿಭಾಗದಲ್ಲಿನ ಎಲ್ಲಾ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿದ್ದಾರೆ. ಟ್ವಿಟ್ಟರ್ ಸಂವಹನ ವಿಭಾಗ‌, ಎಂಜಿನಿಯರಿಂಗ್‌ ವಿಭಾಗ ಸೇರಿದಂತೆ ಹಲವು ವಿಭಾಗಳಲ್ಲಿ ಭಾರತದಲ್ಲಿ ಉದ್ಯೋಗ ಕಡಿತ ಮಾಡಲಾಗಿದೆ. ಟ್ವಿಟ್ಟರ್​ನ ಉದ್ಯೋಗಿಗಳ ಪೈಕಿ ಸುಮಾರು 50% ಉದ್ಯೋಗಿಗಳನ್ನು ಕೆಲಸದಿಂದ ವಜಾಗೊಳಿಸಲಾಗಿತ್ತು. ಫೇಸ್‌ಬುಕ್‌ನ ಮಾತೃಸಂಸ್ಥೆ ಮೆಟಾ ಕೂಡ 11,000 ಉದ್ಯೋಗಿಗಳನ್ನು ವಜಾಗೊಳಿಸಿತ್ತು.

ಇನ್ನಷ್ಟು ಅಂತಾರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 8:40 am, Tue, 15 November 22