ಭಾರತೀಯ ಮೂಲದ ರೆಸ್ಟೋರೆಂಟ್ ಮಾಲೀಕರೊಂದಿಗೆ ಅಮೆರಿಕ ಅಧ್ಯಕ್ಷರ ಮಾತುಕತೆ; ನಾನೂ ಬರಬಹುದಾ ಎಂದು ಪ್ರಶ್ನಿಸಿದ ಜೋ ಬೈಡನ್​

ವಾಷಿಂಗ್ಟನ್​: ಕೊರೊನಾ ಸಾಂಕ್ರಾಮಿಕ ರೋಗದಿಂದಾಗಿ ಜಗತ್ತಿನಾದ್ಯಂತ ಸಣ್ಣ ಉದ್ಯಮಗಳು ಸಂಕಷ್ಟದಲ್ಲಿವೆ. ಅದರಲ್ಲೂ ಹೋಟೆಲ್​, ರೆಸ್ಟೋರೆಂಟ್​ನಂಥ ಉದ್ಯಮಗಳು ಇವತ್ತಿಗೂ ಚೇತರಿಸಿಕೊಳ್ಳಲು ಪರದಾಡುತ್ತಿವೆ. ಈ ಮಧ್ಯೆ ಅಮೆರಿಕ ಅಧ್ಯಕ್ಷ ಜೋ ಬೈಡನ್​  (Joe Biden) ಭಾರತೀಯ ಮೂಲದ ರೆಸ್ಟೋರೆಂಟ್​​ಗೆ ಭೇಟಿ ನೀಡುವ ಇಂಗಿತ ವ್ಯಕ್ತಪಡಿಸಿದ್ದಾರೆ.. ! ಅಮೆರಿಕದ ನೂತನ ಅಧ್ಯಕ್ಷ ಜೋ ಬೈಡನ್ ಅವರು ಜಾರ್ಜಿಯಾದ ಅಟ್ಲಾಂಟಾ ನಗರದಲ್ಲಿರುವ ಇಂಡಿಯನ್​ ರೆಸ್ಟೋರೆಂಟ್​ ‘ನಾನ್​ಸ್ಟಾಪ್’ (Naan Stop)ನ ಮಾಲೀಕರ ಬಳಿ ವಿಡಿಯೋ ಮೂಲಕ ಮಾತುಕತೆ ನಡೆಸಿದರು. ಕೊವಿಡ್​ 19 ಸಾಂಕ್ರಾಮಿಕ ರೋಗದಿಂದ ಉದ್ಯಮದ ಮೇಲಾದ ಪರಿಣಾಮದ ಬಗ್ಗೆ ವಿವರಣೆ ಕೇಳಿದ್ದಲ್ಲದೆ, ಸಮಸ್ಯೆಗಳನ್ನು ಆಲಿಸಿದ್ದಾರೆ.

ಅಟ್ಲಾಂಟಾದಲ್ಲಿರುವ ಭಾರತೀಯ ಮೂಲದ ನಾನ್ ಸ್ಟಾಪ್​ (Naan Stop) ರೆಸ್ಟೋರೆಂಟ್​ ಮಾಲೀಕರಾದ ನೀಲ್​ ಮತ್ತು ಸಮೀರ್ ಇದ್ನಾನಿ ಜತೆಗೆ ಜೋ ಬೈಡನ್​ ವರ್ಚ್ಯುವಲ್ ಆಗಿ ಮಾತನಾಡಿದ ವಿಡಿಯೋವನ್ನು ವೈಟ್​ ಹೌಸ್ ಬಿಡುಗಡೆ ಮಾಡಿದೆ.  ನೀಲ್​ ಹಾಗೂ ಸಮೀರ್​ರನ್ನು  ಮಾತನಾಡಿಸಿದ ಜೋ ಬೈಡನ್,  ನೀವು  ಹೇಗಿದ್ದೀರಿ?, ನಿಮ್ಮ ಉದ್ಯಮ ಹೇಗೆ ಸಾಗುತ್ತಿದೆ?, ರೆಸ್ಟೋರೆಂಟ್ ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ನಿಮ್ಮ ಅಗತ್ಯತೆಗಳು ಏನು? ನಾನು ಅಟ್ಲಾಂಟಾಗೆ ಬಂದಾಗ ನಿಮ್ಮ ರೆಸ್ಟೋರೆಂಟ್​ಗೆ ಭೇಟಿ ಕೊಡಲು ಇಚ್ಚಿಸುತ್ತೇನೆ. ಬರಬಹುದಾ? ಎಂದು ಪ್ರಶ್ನಿಸಿದ್ದಾರೆ.

ಹಾಗೇ ಜೋ ಬೈಡನ್ ಜತೆ ಮಾತುಕತೆ ನಡೆಸಿದ ನೀಲ್​ ಮತ್ತು ಸಮೀರ್​ ತಮ್ಮ ಸಂಕಷ್ಟವನ್ನು ಹೇಳಿಕೊಂಡಿದ್ದಾರೆ. ಕೊರೊನಾ ಸಾಂಕ್ರಾಮಿಕದಿಂದ ನಮ್ಮ ಬಿಜಿನೆಸ್​ ಶೇ.75ರಷ್ಟು ಕಡಿಮೆಯಾಗಿದೆ. ನಮ್ಮಲ್ಲಿ ಮೊದಲು 20-25ರಷ್ಟು ಉದ್ಯೋಗಿಗಳಿದ್ದರು, ಈಗ ಅದು 15ಕ್ಕೆ ಇಳಿದಿದೆ ಎಂದೂ ಹೇಳಿದ್ದಾರೆ. ಅಷ್ಟೇ ಅಲ್ಲ, ಪ್ರತಿಯೊಬ್ಬರಿಗೂ ಕೊರೊನಾ ವ್ಯಾಕ್ಸಿನ್​ ಸಿಗುವಂತಾಗಲಿ. ಇದರಿಂದ ಜನರು ಧೈರ್ಯದಿಂದ ಹೊರಗೆ ಹೋಗಬಹುದು ಎಂದೂ ಕೇಳಿದ್ದಾರೆ.

ನೀಲ್​ ಮತ್ತು ಸಮೀರ್​ ತಮ್ಮ ಸಂಕಷ್ಟವನ್ನು ಹೇಳಿಕೊಂಡ ಬಳಿಕ ಪ್ರತಿಕ್ರಿಯೆ ನೀಡಿದ ಜೋ ಬೈಡನ್​, ಕೊರೊನಾದಿಂದ ಆರ್ಥಿಕ ಸಂಕಷ್ಟಕ್ಕೀಡಾದವರನ್ನು ಪಾರು ಮಾಡುವುದು ಹೇಗೆ ಎಂಬ ಬಗ್ಗೆ ಯೋಜನೆ ರೂಪಿಸುತ್ತಿರುವುದಾಗಿ ತಿಳಿಸಿದ್ದಾರೆ. ಹಾಗೇ, ಸಣ್ಣ ಉದ್ಯಮಗಳಿಗೆ ಹತ್ತಾರು ಶತಕೋಟಿ ಡಾಲರ್​ಗಳಷ್ಟು ನೆರವು ನೀಡುವ ಯೋಜನೆಯೂ ಇದೆ ಎಂದು ಹೇಳಿದ್ದಾರೆ.

ನಾನ್​ಸ್ಟಾಪ್​ ಕಳೆದ 10 ವರ್ಷಗಳಿಂದಲೂ ಅಟ್ಲಾಂಟಾದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಅಟ್ಲಾಂಟಾದಲ್ಲಿಯೇ ಒಟ್ಟು ಮೂರು ಕಡೆಗಳಲ್ಲಿ ಈ ರೆಸ್ಟೋರೆಂಟ್​ ಇದೆ.

PM Narendra Modi | ಅಮೆರಿಕದ ನೂತನ ಅಧ್ಯಕ್ಷರಿಗೆ ದೂರವಾಣಿ ಮೂಲಕ ಶುಭ ಕೋರಿದ ಪ್ರಧಾನಿ ನರೇಂದ್ರ ಮೋದಿ

Published On - 7:18 pm, Mon, 15 February 21