ಕಾಂಗೋದ ವಸತಿ ಪ್ರದೇಶದ ಮೇಲೆ ಅಪ್ಪಳಿಸಿ ಧಗಧಗನೆ ಹೊತ್ತಿ ಉರಿದ ವಿಮಾನ: ಮಗು ಸೇರಿ 17 ಮಂದಿ ಸಾವು

ಕಾಂಗೋ, ಸೆಪ್ಟೆಂಬರ್ 27: ಮಧ್ಯ ಆಫ್ರಿಕಾದ ಕಾಂಗೋ ಪ್ರಜಾಸತ್ತಾತ್ಮಕ ಗಣರಾಜ್ಯದಲ್ಲಿ (DRC) ಭೀಕರ ವಾಯು ದುರಂತ ಸಂಭವಿಸಿದೆ. ಕ್ವಾಂಗೊ ಪ್ರಾಂತ್ಯದ ಕೆಂಗೆ ಪಟ್ಟಣದ ವಸತಿ ಪ್ರದೇಶದ ಮೇಲೆ ಸೇನಾ ವಿಮಾನ ಪತನಗೊಂಡು ಹೊತ್ತಿ ಉರಿದ ಪರಿಣಾಮ ಇಬ್ಬರು ಹಿರಿಯ ಲೆಫ್ಟಿನೆಂಟ್ ಜನರಲ್‌ಗಳು ಮತ್ತು ಒಂದು ಮಗು ಸೇರಿದಂತೆ ಕನಿಷ್ಠ 17 ಜನರು ಸಾವನ್ನಪ್ಪಿದ್ದಾರೆ.

ಘಟನೆ ಸಂಭವಿಸಿದ್ದು ಹೇಗೆ?

ಕಿಕ್ವಿಟ್ ನಗರದಿಂದ ರಾಜಧಾನಿ ಕಿನ್ಶಾಸಾ ಕಡೆಗೆ ತೆರಳುತ್ತಿದ್ದ ಕಾಂಗೋ ಸೇನೆಯ ಅಧಿಕೃತ ವಿಮಾನದಲ್ಲಿ ಹಾರಾಟದ ಮಧ್ಯೆಯೇ ಗಂಭೀರ ತಾಂತ್ರಿಕ ದೋಷ ಕಾಣಿಸಿಕೊಂಡಿತ್ತು. ತಕ್ಷಣವೇ ಪೈಲಟ್‌ಗಳು ಕೆಂಗೆ ಬಳಿ ತುರ್ತು ಲ್ಯಾಂಡಿಂಗ್ ಮಾಡಲು ಪ್ರಯತ್ನಿಸಿದರು. ಆದರೆ ಅಲ್ಲಿ ಸೂಕ್ತ ರನ್‌ವೇ ಅಥವಾ ಲ್ಯಾಂಡಿಂಗ್ ಸ್ಟ್ರಿಪ್ ಲಭ್ಯವಿಲ್ಲದ ಕಾರಣ, ನಿಯಂತ್ರಣ ಕಳೆದುಕೊಂಡ ವಿಮಾನವು ನೇರವಾಗಿ ವಸತಿ ಬಡಾವಣೆಯ ಕಟ್ಟಡಗಳ ಮೇಲೆ ಅಪ್ಪಳಿಸಿತು. ಡಿಕ್ಕಿಯ ರಭಸಕ್ಕೆ ವಿಮಾನಕ್ಕೆ ಬೆಂಕಿ ಹೊತ್ತಿಕೊಂಡು ಸ್ಥಳದಲ್ಲೇ ಹೊತ್ತಿ ಉರಿಯಿತು.

ಸಾವು-ನೋವಿನ ವಿವರ:

ಆರಂಭದಲ್ಲಿ 13 ಜನರು ಮೃತಪಟ್ಟಿರುವುದಾಗಿ ವರದಿಯಾಗಿತ್ತು. ರಕ್ಷಣಾ ಸಿಬ್ಬಂದಿ ಬೆಂಕಿಯನ್ನು ನಂದಿಸಿ ಅವಶೇಷಗಳನ್ನು ತೆರವುಗೊಳಿಸಿದಾಗ ಸಾವಿನ ಸಂಖ್ಯೆ 17ಕ್ಕೆ ಏರಿಕೆಯಾಗಿದೆ. ಮೃತರಲ್ಲಿ 16 ವಯಸ್ಕರು ಹಾಗೂ ಒಂದು ಅಮಾಯಕ ಮಗುವಿನ ಶವ ಪತ್ತೆಯಾಗಿದೆ ಎಂದು ಕ್ವಾಂಗೊ ಉಪ ಗವರ್ನರ್ ರೆಮಿ ಸಾಕಿ ಬೊಕಿಂಡಾ ಖಚಿತಪಡಿಸಿದ್ದಾರೆ.

ಮತ್ತಷ್ಟು ಓದಿ: Ajit Pawar Death: ಮಹಾರಾಷ್ಟ್ರದ ಬಾರಾಮತಿಯಲ್ಲಿ ವಿಮಾನ ಪತನ, ಡಿಸಿಎಂ ಅಜಿತ್ ಪವಾರ್ ಸಾವು

ಅಪಘಾತದಲ್ಲಿ ಕಾಂಗೋ ಸೇನಾ ನ್ಯಾಯಾಂಗ ವ್ಯವಸ್ಥೆಯ ಪ್ರಮುಖ ಇಬ್ಬರು ಹಿರಿಯ ಅಧಿಕಾರಿಗಳು ಪ್ರಾಣ ಕಳೆದುಕೊಂಡಿದ್ದಾರೆ. ಲೆಫ್ಟಿನೆಂಟ್ ಜನರಲ್ ಮುಟೊಂಬೊ ಕಟಲೈ ಟಿಯೆಂಡೆ ಜೋಸೆಫ್ , ಲೆಫ್ಟಿನೆಂಟ್ ಜನರಲ್ ಲಿಕುಲಿಯಾ ಬಕುಮಿ ಲೂಸಿಯನ್ ರೆನೆ.

ವಿಡಿಯೋ

ದೇಶದ ಅಧ್ಯಕ್ಷ ಫೆಲಿಕ್ಸ್-ಆಂಟೊಯಿನ್ ತ್ಶಿಸೆಕೆಡಿ ಅವರು ಈ ಘಟನೆಗೆ ತೀವ್ರ ಆಘಾತ ವ್ಯಕ್ತಪಡಿಸಿದ್ದು, ರಾಷ್ಟ್ರದ ರಕ್ಷಣೆಗಾಗಿ ಸೇವೆ ಸಲ್ಲಿಸಿದ ಹಿರಿಯ ಅಧಿಕಾರಿಗಳು ಮತ್ತು ಮೃತ ನಾಗರಿಕರಿಗೆ ಭಾವಪೂರ್ಣ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ. ವಿಮಾನದಲ್ಲಿ ಉಂಟಾದ ತಾಂತ್ರಿಕ ವೈಫಲ್ಯ ಹಾಗೂ ತುರ್ತು ಲ್ಯಾಂಡಿಂಗ್ ಸಂದರ್ಭದ ಲೋಪದೋಷಗಳ ಕುರಿತು ಪೂರ್ಣ ಪ್ರಮಾಣದ ಮಿಲಿಟರಿ ತನಿಖೆಗೆ ಆದೇಶಿಸಿದ್ದಾರೆ.

ಹಳೆಯ ವಿಮಾನಗಳ ಸುರಕ್ಷತಾ ಆತಂಕ: ಕಾಂಗೋ ಪ್ರಜಾಸತ್ತಾತ್ಮಕ ಗಣರಾಜ್ಯದಲ್ಲಿ ವಾಯುಯಾನ ಸುರಕ್ಷತಾ ವ್ಯವಸ್ಥೆಯು ಹಲವು ವರ್ಷಗಳಿಂದ  ಕಳಪೆ ಮಟ್ಟದಲ್ಲಿದೆ. ಸೂಕ್ತ ನಿರ್ವಹಣೆ ಇಲ್ಲದ ಹಳೆಯ ಸೋವಿಯತ್ ಕಾಲದ ಸರಕು ಮತ್ತು ಮಿಲಿಟರಿ ಸಾರಿಗೆ ವಿಮಾನಗಳನ್ನು ಹೆಚ್ಚಾಗಿ ಬಳಸುತ್ತಿರುವುದು ಇಂತಹ ಅಪಘಾತಗಳಿಗೆ ಪ್ರಮುಖ ಕಾರಣವಾಗಿದೆ.

ಯುರೋಪಿಯನ್ ಒಕ್ಕೂಟದ ನಿಷೇಧ: ಕಳಪೆ ನಿರ್ವಹಣೆ ಮತ್ತು ಸುರಕ್ಷತಾ ಮಾನದಂಡಗಳ ಉಲ್ಲಂಘನೆಯಿಂದಾಗಿ ಡಿಆರ್‌ಸಿಯ (DRC) ಬಹುತೇಕ ವಾಣಿಜ್ಯ ಹಾಗೂ ಸಾರಿಗೆ ವಿಮಾನಯಾನ ಸಂಸ್ಥೆಗಳು ಯುರೋಪಿಯನ್ ಒಕ್ಕೂಟದ (EU) ವಾಯುಪ್ರದೇಶದಲ್ಲಿ ಹಾರಾಟ ನಡೆಸದಂತೆ ಕಪ್ಪುಪಟ್ಟಿಗೆ (Blacklist) ಸೇರಿಸಲ್ಪಟ್ಟಿವೆ.

ನ್ಯಾಯಾಂಗ ಇಲಾಖೆಗೆ ಭಾರಿ ಹಿನ್ನಡೆ: ಹೈ ಮಿಲಿಟರಿ ಕೋರ್ಟ್ ಅಧ್ಯಕ್ಷರು ಮತ್ತು ಆಡಿಟರ್ ಜನರಲ್ ಇಬ್ಬರೂ ಒಟ್ಟಿಗೆ ಸಾವನ್ನಪ್ಪಿರುವುದು ದೇಶದ ಆಂತರಿಕ ಭದ್ರತೆ ಮತ್ತು ಬಂಡುಕೋರರ ವಿರುದ್ಧದ ಮಿಲಿಟರಿ ಕಾನೂನು ವಿಚಾರಣೆಗಳಿಗೆ ದೊಡ್ಡ ರಾಜತಾಂತ್ರಿಕ ಹೊಡೆತ ನೀಡಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ