ಸಿರಿಯಾದಲ್ಲಿ ಫ್ರಾನ್ಸ್ ಅಧ್ಯಕ್ಷ ಮ್ಯಾಕ್ರನ್ ತಂಗಿದ್ದ ಹೋಟೆಲ್ ಬಳಿ ಬಾಂಬ್ ಸ್ಫೋಟ
ಫ್ರಾನ್ಸ್ ಅಧ್ಯಕ್ಷ ಮ್ಯಾಕ್ರನ್ ಸಿರಿಯಾದ ಡಮಾಸ್ಕಸ್ಗೆ ಭೇಟಿ ನೀಡಿದ್ದಾಗ, ಅವರು ತಂಗಿದ್ದ ಹೋಟೆಲ್ ಬಳಿ ಭೀಕರ ಬಾಂಬ್ ಸ್ಫೋಟ ಸಂಭವಿಸಿದೆ. ಅದೃಷ್ಟವಶಾತ್ ಮ್ಯಾಕ್ರನ್ ಸುರಕ್ಷಿತವಾಗಿದ್ದಾರೆ. 2024ರಲ್ಲಿ ಹೊಸ ಅಧ್ಯಕ್ಷ ಅಹ್ಮದ್ ಅಲ್-ಶರಾ ಅಧಿಕಾರಕ್ಕೆ ಬಂದ ನಂತರ ಸಿರಿಯಾಕ್ಕೆ ಭೇಟಿ ನೀಡಿದ ಮೊದಲ EU ಮುಖ್ಯಸ್ಥ ಮ್ಯಾಕ್ರನ್. ಈ ಘಟನೆಯು ಸಿರಿಯಾದಲ್ಲಿನ ನಿರಂತರ ಭದ್ರತಾ ಸವಾಲುಗಳು ಮತ್ತು ಉಗ್ರಗಾಮಿ ಬೆದರಿಕೆಗಳನ್ನು ಎತ್ತಿ ತೋರಿಸುತ್ತದೆ.
ಡಮಾಸ್ಕಸ್,ಜುಲೈ 07: ಸಿರಿಯಾ ದೇಶಕ್ಕೆ ಭೇಟಿ ನೀಡಿರುವ ಫ್ರಾನ್ಸ್ ಅಧ್ಯಕ್ಷ ಇಮ್ಯಾನುಯೆಲ್ ಮ್ಯಾಕ್ರನ್(Emmanuel Macron) ಅವರು ತಂಗಿದ್ದ ಡಮಾಸ್ಕಸ್ನ ಹೋಟೆಲ್ ಬಳಿಯೇ ಮಂಗಳವಾರ ಭೀಕರ ಬಾಂಬ್ ಸ್ಫೋಟ ಸಂಭವಿಸಿದೆ. ಅದೃಷ್ಟವಶಾತ್ ಈ ಸ್ಫೋಟದಲ್ಲಿ ಫ್ರೆಂಚ್ ಅಧ್ಯಕ್ಷರಿಗೆ ಯಾವುದೇ ಅಪಾಯ ಸಂಭವಿಸಿಲ್ಲ ಮತ್ತು ಅವರು ಸಂಪೂರ್ಣ ಸುರಕ್ಷಿತವಾಗಿದ್ದಾರೆ ಎಂದು ಫ್ರಾನ್ಸ್ ಅಧ್ಯಕ್ಷೀಯ ಭವನ ತಿಳಿಸಿದೆ.
ಸ್ಫೋಟದ ತೀವ್ರತೆ ಹೇಗಿತ್ತು?
ರಾಯಿಟರ್ಸ್ ಪ್ರತ್ಯಕ್ಷದರ್ಶಿಗಳ ಪ್ರಕಾರ, ಫ್ರೆಂಚ್ ಅಧ್ಯಕ್ಷರು ತಂಗಿದ್ದ ಹೋಟೆಲ್ನ ಸುತ್ತಮುತ್ತಲಿನ ಪ್ರದೇಶದಲ್ಲಿ ಭಾರಿ ಸ್ಫೋಟದ ಶಬ್ದ ಕೇಳಿಬಂದಿದ್ದು, ಆಕಾಶಕ್ಕೆ ದಟ್ಟವಾದ ಹೊಗೆ ಚಿಮ್ಮಿರುವುದು ಕಂಡುಬಂದಿದೆ. ಆದರೆ, ಹೋಟೆಲ್ ಒಳಗಿದ್ದ ಅಧ್ಯಕ್ಷ ಮ್ಯಾಕ್ರನ್ ಅವರಿಗೆ ಈ ಸ್ಫೋಟದ ಸದ್ದು ಕೇಳಿಸಲಿಲ್ಲ ಎನ್ನಲಾಗಿದೆ. ಘಟನೆ ನಡೆದ ತಕ್ಷಣ ಸಿರಿಯಾ ಭದ್ರತಾ ಪಡೆಗಳು ಹೋಟೆಲ್ನ ಸುತ್ತಮುತ್ತಲಿನ ರಸ್ತೆಗಳನ್ನು ಬಂದ್ ಮಾಡಿ, ಬಿಗಿ ಭದ್ರತಾ ಕ್ರಮಗಳನ್ನು ಕೈಗೊಂಡಿವೆ.
ಸಿರಿಯಾ ಅಧ್ಯಕ್ಷರೊಂದಿಗೆ ಮಹತ್ವದ ಭೇಟಿ
ಈ ಆತಂಕಕಾರಿ ಘಟನೆಯ ನಡುವೆಯೂ ಫ್ರೆಂಚ್ ಅಧ್ಯಕ್ಷ ಮ್ಯಾಕ್ರನ್ ಅವರು ತಮ್ಮ ನಿಗದಿತ ಪ್ರವಾಸವನ್ನು ಮುಂದುವರಿಸಿದ್ದು, ಸಿರಿಯಾದ ಹೊಸ ಅಧ್ಯಕ್ಷರಾದ ಅಹ್ಮದ್ ಅಲ್-ಶರಾ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಿದ್ದಾರೆ.
ಮತ್ತಷ್ಟು ಓದಿ: ಪ್ರಿಯ ಮಿತ್ರ ನರೇಂದ್ರ, ಜೈ ಹಿಂದ್; ಹಿಂದಿಯಲ್ಲೇ ಮೋದಿಗೆ ವಿದಾಯ ಹೇಳಿದ ಫ್ರೆಂಚ್ ಅಧ್ಯಕ್ಷ ಮ್ಯಾಕ್ರನ್
ಈ ಭೇಟಿ ಏಕೆ ಮುಖ್ಯ?
2024 ರಲ್ಲಿ ಬಂಡುಕೋರರ ನಾಯಕ ಅಹ್ಮದ್ ಅಲ್-ಶರಾ ನೇತೃತ್ವದ ಪಡೆಗಳು ಸಿರಿಯಾದ ದೀರ್ಘಕಾಲದ ಸರ್ವಾಧಿಕಾರಿ ಬಶರ್ ಅಲ್-ಅಸ್ಸಾದ್ ಅವರನ್ನು ಅಧಿಕಾರದಿಂದ ಪದಚ್ಯುತಗೊಳಿಸಿದ್ದವು. ಸಿರಿಯಾದಲ್ಲಿ ಆಡಳಿತ ಬದಲಾದ ನಂತರ ಅಲ್ಲಿಗೆ ಭೇಟಿ ನೀಡುತ್ತಿರುವ ಯುರೋಪಿಯನ್ ಒಕ್ಕೂಟದ (EU) ಮೊದಲ ಪ್ರಭಾವಿ ದೇಶದ ಮುಖ್ಯಸ್ಥ ಇಮ್ಯಾನುಯೆಲ್ ಮ್ಯಾಕ್ರನ್ ಆಗಿದ್ದಾರೆ. ಹೊಸ ಸರ್ಕಾರದ ಅವಧಿಯಲ್ಲೂ ಸಿರಿಯಾದಲ್ಲಿ ಭದ್ರತಾ ಸವಾಲುಗಳು ಮತ್ತು ಉಗ್ರರ ಉಪಟಳ ಎಷ್ಟು ಕಠಿಣವಾಗಿದೆ ಎಂಬುದಕ್ಕೆ ಮ್ಯಾಕ್ರನ್ ಹೋಟೆಲ್ ಬಳಿ ನಡೆದಿರುವ ಈ ಬಾಂಬ್ ಸ್ಫೋಟವೇ ಸಾಕ್ಷಿಯಾಗಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ