ಸುಮ್ಮನಿರಲಾರದೆ ಸಿಂಹದ ಮರಿ ಜತೆ ವೆಡ್ಡಿಂಗ್​ ಫೋಟೋಶೂಟ್​ ಮಾಡಿಸಿಕೊಂಡ ದಂಪತಿ; ಕ್ರಿಯೇಟಿವಿಟಿ ತೋರಿಸೋಕೆ ಹೋಗಿ ಸಂಕಷ್ಟ ತಂದುಕೊಂಡ್ರು.. !

ಮದುವೆ ಎಂದಮೇಲೆ ಅಲ್ಲಿ ಫೋಟೋಶೂಟ್​ ಇರಲೇಬೇಕು..ಜಗತ್ತಿನಾದ್ಯಂತ ಹೀಗೊಂದು ಸಂಪ್ರದಾಯ ಬಲವಾಗಿ ಬೆಳೆದುನಿಂತಿದೆ. ಈಗಂತೂ ಪ್ರೀವೆಡ್ಡಿಂಗ್​ ಫೋಟೋಶೂಟ್​, ಪೋಸ್ಟ್ ವೆಡ್ಡಿಂಗ್​ ಶೂಟ್​ ಎನ್ನುತ್ತ ತರಹೇವಾರಿ ಫೋಟೋಶೂಟ್​ಗಳು ಶುರುವಾಗಿಬಿಟ್ಟಿವೆ. ಅದರಲ್ಲೂ ಇತ್ತೀಚಿನ ವರ್ಷಗಳಲ್ಲಂತೂ ಜೋಡಿಗಳು ಏನಾದರೂ ಹೊಸದಾಗಿ, ಕ್ರಿಯೇಟಿವ್​ ಆಗಿ ಫೋಟೋ ಶೂಟ್​ ಮಾಡಿಸಿಕೊಳ್ಳಬೇಕು.. ಈ ಮೂಲಕ ತಮ್ಮ ಮದುವೆಯನ್ನು ಸ್ಪೆಶಲ್​ ಆಗಿಸಿಕೊಳ್ಳಬೇಕು ಎಂದೇ ಯೋಚಿಸುತ್ತಾರೆ. ಈಗಾಗಲೇ ಕೆಲವು ಅಪರೂಪ ಎನ್ನಿಸುವ ಫೋಟೋಶೂಟ್​ ಬಗ್ಗೆ ನಾವೀಗಲೇ ಓದಿದ್ದೇವೆ. ಹಾಗೇ ಇಲ್ಲೊಂದು ದಂಪತಿ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಸಿಂಹದ ಮರಿಯೊಟ್ಟಿಗೆ ಫೋಟೋ ಶೂಟ್​ ಮಾಡಿಸಿಕೊಂಡು, ಇದೀಗ ಸಂಕಷ್ಟಕ್ಕೀಡಾಗಿದ್ದಾರೆ.

ಇದು ನಮ್ಮ ದೇಶದಲ್ಲಿ ಆಗಿದ್ದಲ್ಲ.. ಬದಲಿಗೆ ಪಕ್ಕದ ದೇಶ ಪಾಕಿಸ್ತಾನದಲ್ಲಿ ನಡೆದ ವಿಚಿತ್ರ ಫೋಟೋಶೂಟ್​. ಲಾಹೋರ್​ನ ಜೋಡಿಯೊಂದು ಹೀಗೆ ವಿಭಿನ್ನವಾಗಿ ಏನೋ ಮಾಡಲು ಹೋಗಿ ಈಗ ಸಿಕ್ಕಾಪಟೆ ಟೀಕೆಗೆ ಗುರಿಯಾಗಿದೆ. ದಂಪತಿ ಸಿಂಹದ ಮರಿಯೊಂದಿಗೆ ಫೋಟೋ ಶೂಟ್​ ಮಾಡಿಸಿಕೊಂಡ ಫೋಟೋ, ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದ್ದಂತೆ ನೆಟ್ಟಿಗರು ಗರಂ ಆಗಿದ್ದಾರೆ. ಇದು ಪ್ರಾಣಿ ಮೇಲಿನ ದೌರ್ಜನ್ಯ, ಹಿಂಸೆ ಎಂದು ಹೇಳಿದ್ದಾರೆ.

ಸಿಂಹದ ಮರಿ ತುಂಬ ಪುಟ್ಟಗಿದ್ದು, ಅದು ಬಹುತೇಕ ನಿದ್ದೆ ಮೂಡ್​ನಲ್ಲಿಯೇ ಇರುವುದು ವೈರಲ್​ ಆದ ಫೋಟೋಗಳಿಂದ ಸ್ಪಷ್ಟವಾಗುತ್ತಿದೆ. ಹೀಗೆ ನೆಲದ ಮೇಲೆ ಮಲಗಿದ ಸಿಂಹದ ಮರಿಯ ಅಕ್ಕಪಕ್ಕ ಕುಳಿತು ಫೋಟೋ ತೆಗೆಸಿಕೊಂಡ ದಂಪತಿ ಬಗ್ಗೆ ಪ್ರಾಣಿ ದಯಾ ಸಂಘಟನೆ, ಪ್ರಾಣಿ ಹಕ್ಕು ರಕ್ಷಣಾ ಕಾರ್ಯಕರ್ತರು ಸಿಟ್ಟಾಗಿದ್ದಾರೆ. ಅಲ್ಲದೆ, ಈ ಪುಟ್ಟ ಸಿಂಹದ ಮರಿಯ ಆರೋಗ್ಯದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಇದರ ವಿಡಿಯೋ ತುಣುಕೊಂದನ್ನು ಪಾಕಿಸ್ತಾನದ ಸೇವ್​ ದಿ ವೈಲ್ಡ್​ ಎಂಬ ಎನ್​ಜಿಒ ತಮ್ಮ ಟ್ವಿಟರ್​ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದೆ. ಇನ್ನೂ ಸರಿಯಾಗಿ ಕಣ್ಣುಬಿಡಲಾಗದ ಮರಿಯನ್ನು ಎದುರಿಗಿಟ್ಟುಕೊಂಡು ಈ ಜೋಡಿ ಫೋಟೋ ತೆಗೆಸಿಕೊಂಡಿದ್ದಾರೆ. ಇದು ಲಾಹೋರ್​ನ ಸ್ಟುಡಿಯೋವೊಂದರಲ್ಲೇ ಮಾಡಲಾದ ಫೋಟೋಶೂಟ್​. ಸಿಂಹದ ಮರಿಯನ್ನು ಅಲ್ಲೇ ಇಟ್ಟುಕೊಳ್ಳಲಾಗಿದೆ. ಯಾರಾದರೂ ಹೋಗಿ ಕಾಪಾಡಬೇಕು ಎಂದೂ ಬರೆದುಕೊಂಡಿದೆ.

ಹೀಗೆ ಸಿಂಹದ ಮರಿಯೊಟ್ಟಿಗೆ ಜೋಡಿಯ ಫೋಟೋ ತೆಗೆದುಕೊಟ್ಟ ಸ್ಟುಡಿಯೋ ಹೆಸರು ಸ್ಟುಡಿಯೋ ಅಫ್ಜಲ್​ ಎಂದಾಗಿದ್ದು, ಇನ್ಸ್ಟಾಗ್ರಾಂನಲ್ಲಿ 1,20,000 ಫಾಲೋವರ್ಸ್​ನ್ನು ಹೊಂದಿದೆ. ದಂಪತಿಯ ಫೋಟೋವನ್ನು #SherdiRani (Lioness Queen) ಎಂಬ ಹ್ಯಾಷ್​​ಟ್ಯಾಗ್​ನೊಂದಿಗೆ ಶೇರ್​ ಮಾಡಿಕೊಂಡಿದೆ. ಇದನ್ನು ನೋಡಿದ ಮೇಲೆ ಪ್ರಾಣಿಪ್ರಿಯರು ಕೆಂಡಾಮಂಡಲರಾಗಿದ್ದಾರೆ. ಪ್ರಾಣಿರಕ್ಷಣಾ ಸಂಘ-ಸಂಸ್ಥೆಗಳಂತೂ ಫೋಟೋ-ವಿಡಿಯೋ ಶೇರ್​ ಮಾಡಿಕೊಂಡು ಖಂಡನೆ ವ್ಯಕ್ತಪಡಿಸುತ್ತಿವೆ. ಇನ್ನು ಸಾಮಾನ್ಯ ಜನರೂ ಕೂಡ ಇದು ಇಷ್ಟವಾಗುತ್ತಿಲ್ಲ ಎಂದು ಖಡಾಖಂಡಿತವಾಗಿ ಹೇಳಿದ್ದಾರೆ.

ಇದನ್ನೂ ಓದಿ: ಜೊಮ್ಯಾಟೊ ಫುಡ್​ ಡೆಲಿವರಿ ಬಾಯ್ ಕಾಮರಾಜು​ ಪರ ನಿಂತ ಬಾಲಿವುಡ್​ನ ಖ್ಯಾತ​ ನಟಿ; ಆರೋಪ ಮಾಡಿದ ಮಹಿಳೆ ವಿರುದ್ಧ ಸೋಷಿಯಲ್ ಮೀಡಿಯಾದಲ್ಲಿ ಅಸಮಾಧಾನ

Gold Price | ಚಿನ್ನದ ದರ ಸತತ ಇಳಿಕೆ; ಖರೀದಿಗೆ ಮುಂದಾದ ಗ್ರಾಹಕರು

Published On - 2:51 pm, Sun, 14 March 21