Nuclear Disaster Fear: ಉಕ್ರೇನ್ ಅಣು ಸ್ಥಾವರದ ಮೇಲೆ ರಾಕೆಟ್ ದಾಳಿ; ವಿಶ್ವಸಂಸ್ಥೆ ಭದ್ರತಾ ಮಂಡಳಿ ತುರ್ತುಸಭೆ, ವಿಕಿರಣ ಸೋರಿಕೆ ಭೀತಿಯಲ್ಲಿ ಜಗತ್ತು
Zaporizhzhia: ಯೂರೋಪ್ನ ಅತಿದೊಡ್ಡ ಅಣುಸ್ಥಾವರದಲ್ಲಿ ನಡೆಯುತ್ತಿರುವ ಮಿಲಿಟರಿ ಕಾರ್ಯಾಚರಣೆಯಿಂದ ಅಣುವಿಕರಣ ಸೋರಿಕೆಯ ಭೀತಿ ಎದುರಾಗಿದೆ.
Updated on:Aug 12, 2022 | 8:47 AM
ನ್ಯೂಯಾರ್ಕ್: ರಷ್ಯಾ ವಶದಲ್ಲಿರುವ ಉಕ್ರೇನ್ನ (Russia Ukraine Crisis) ಝಪೊರಿಖ್ಝಿಯಾ (Zaporizhzhia) ಅಣು ಸ್ಥಾವರದ (Nuclear Reactor) ಮೇಲೆ ರಾಕೆಟ್ ದಾಳಿ ನಡೆದಿದೆ. ಯೂರೋಪ್ನ ಅತಿದೊಡ್ಡ ಅಣುಸ್ಥಾವರದಲ್ಲಿ ನಡೆಯುತ್ತಿರುವ ಮಿಲಿಟರಿ ಕಾರ್ಯಾಚರಣೆಯಿಂದ ಅಣುವಿಕರಣ (Nuclear Radiation) ಸೋರಿಕೆಯ ಭೀತಿ ಎದುರಾಗಿದ್ದು, ವಿಶ್ವಸಂಸ್ಥೆ ಭದ್ರತಾ ಮಂಡಳಿಯು (United Nations Security Council – UNSC) ತುರ್ತು ಸಭೆ ಕರೆದು, ಉಕ್ರೇನ್ ಮತ್ತು ರಷ್ಯಾ ತಕ್ಷಣ ಇಲ್ಲಿ ಮಿಲಿಟರಿ ಕಾರ್ಯಾಚಚರಣೆ ನಿಲ್ಲಿಸಬೇಕು ಎಂದು ತಾಕೀತು ಮಾಡಿತು. ವಿಶ್ವ ಸಮುದಾಯವು ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಬೇಕು. ಇಲ್ಲದಿದ್ದರೆ ವಿಕಿರಣ ದುರಂತಕ್ಕೆ ಜಗತ್ತು ಸಾಕ್ಷಿಯಾಗಬೇಕಾಗುತ್ತದೆ ಎಂದು ವಿಶ್ವಸಂಸ್ಥೆ ಎಚ್ಚರಿಸಿದೆ. ಅಣುಸ್ಥಾವರದ ಮೇಲಿನ ದಾಳಿಗೆ ಸಂಬಂಧಿಸಿದಂತೆ ಉಕ್ರೇನ್ ಮತ್ತು ರಷ್ಯಾ ದೇಶಗಳು ಪರಸ್ಪರರ ಆರೋಪ-ಪ್ರತ್ಯಾರೋಪದಲ್ಲಿ ತೊಡಗಿವೆ.
‘ಗಂಭೀರ ದುರಂತವೊಂದು ನಮಗೆ ಎದುರಾಗುವಂಥ ಸನ್ನಿವೇಶ ಇದು’ ಎಂದು ವಿಶ್ವ ಅಣುಶಕ್ತಿ ಸಂಸ್ಥೆಯ (International Atomic Energy Agency – IAEA) ಮುಖ್ಯಸ್ಥರಾದ ರಫೇಲ್ ಗ್ರೊಸಿ ಭದ್ರತಾ ಮಂಡಳಿಯನ್ನು ಎಚ್ಚರಿಸಿದರು. ವಿಶ್ವ ಅಣುಶಕ್ತಿ ಸಂಸ್ಥೆಗೆ ತುರ್ತಾಗಿ ಝಪೊರಿಖ್ಝಿಯಾ ಅಣುಸ್ಥಾವರ ಭೇಟಿಗೆ ಅವಕಾಶ ನೀಡಬೇಕು ಎಂದು ಆಗ್ರಹಿಸಿದರು.
ಅಣುಸ್ಥಾವರದ ಮೇಲಿನ ದಾಳಿ ಕುರಿತು ಉಕ್ರೇನ್ ರಾಜಧಾನಿ ಕೀವ್ನಲ್ಲಿ ಪ್ರತಿಕ್ರಿಯಿಸಿರುವ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ, ರಷ್ಯಾ ಪಡೆಗಳು ಇಡೀ ಜಗತ್ತಿಗೆ ’ಅಣುವಿಕಿರಣದ ಬೆದರಿಕೆ’ (Nuclear Blackmail) ಹಾಕಿವೆ. ಝಪೊರಿಖ್ಝಿಯಾ ಆಕ್ರಮಿಸಿಕೊಂಡಿರುವವರನ್ನು ಹೊರದಬ್ಬಲು ವಿಶ್ವ ಸಮುದಾಯವು ತಕ್ಷಣ ಪ್ರತಿಕ್ರಿಯಿಸಬೇಕು ಎಂದು ಕರೆ ನೀಡಿದ್ದಾರೆ. ‘ಉಕ್ರೇನ್ನಿಂದ ರಷ್ಯನ್ನರು ಸಂಪೂರ್ಣವಾಗಿ ಹಿಂದೆ ಸರಿಯುವುದು ಮಾತ್ರವೇ ಯೂರೋಪ್ಗೆ ಅಣುವಿಕಿರಣ ದುರಂತದಿಂದ ರಕ್ಷಣೆ ನೀಡುವ ಖಾತ್ರಿ ಸಿಗಲು ಸಾಧ್ಯ’ ಎಂದು ಝೆಲೆನ್ಸ್ಕಿ ವಿಡಿಯೊ ಸಂದೇಶದಲ್ಲಿ ತಿಳಿಸಿದರು.
ಝಪೊರಿಖ್ಝಿಯಾ ಅಣುಸ್ಥಾವರದ ಮೇಲಿನ ದಾಳಿಗೆ ಸಂಬಂಧಿಸಿದಂತೆ ರಷ್ಯಾ ಮತ್ತು ಉಕ್ರೇನ್ ಪರಸ್ಪರ ಆರೋಪ ಪ್ರತ್ಯಾರೋಪ ಮಾಡಿಕೊಂಡಿವೆ. ಕಳೆದ ಐದು ತಿಂಗಳಿನಿಂದ ನಡೆಯುತ್ತಿರುವ ಉಕ್ರೇನ್ ಸಂಘರ್ಷದಲ್ಲಿ ಇದು ಅತ್ಯಂತ ಅಪಾಯಕಾರಿ ಸನ್ನಿವೇಶ ಎಂದು ವಿಶ್ಲೇಷಿಸಲಾಗಿದೆ. ಅಣುಸ್ಥಾವರದಲ್ಲಿ ರೇಡಿಯೊ ವಿಕಿರಣ ವಸ್ತುಗಳನ್ನು ಸಂಗ್ರಹಿಸಿಟ್ಟಿರುವ ಪ್ರದೇಶದಲ್ಲಿ ಎರಡೂ ಪಡೆಗಳು ರಾಕೆಟ್ ದಾಳಿ ಮಾಡಿವೆ. ತುಸು ಹೆಚ್ಚುಕಡಿಮೆಯಾದರೂ ವಿಕಿರಣ ಸೋರಿಕೆಯಾಗಿ ಇಡೀ ಜಗತ್ತು ಅಪಾಯದಲ್ಲಿ ಸಿಲುಕಬಹುದು ಎಂಬ ಆತಂಕ ವ್ಯಕ್ತವಾಗಿದೆ.
ಶೆಲ್ ದಾಳಿಯ ನಂತರ ಸ್ಥಾವರದ ಆರು ರಿಯಾಕ್ಟರ್ಗಳಿಂದ ಅಧಿಕ ಪ್ರಮಾಣದ ಹೊಗೆ ಹೊರಬರುತ್ತಿದೆ. ವಿಕರಣಗಳನ್ನು ಅಳೆಯುವ ಹಲವು ಸೆನ್ಸಾರ್ಗಳು ಹಾಳಾಗಿವೆ. ಉಕ್ರೇನ್ ದಾಳಿಯೇ ಇದಕ್ಕೆ ಕಾರಣ ಎಂದು ರಷ್ಯಾ ಪರ ಗುರುತಿಸಿಕೊಂಡಿರುವ ಪ್ರಾದೇಶಿಕ ಆಡಳಿತ ಮಂಡಳಿಯ ಸದಸ್ಯ ವ್ಲಾದಿಮಿರ್ ರೊಗೊವ್ ಹೇಳಿದ್ದಾರೆ.
ಉಕ್ರೇನ್ ಸರ್ಕಾರದ ನಿರ್ವಹಣೆಯಲ್ಲಿದ್ದ ಈ ಅಣು ಸ್ಥಾವರವು ಪ್ರಸ್ತುತ ರಷ್ಯಾ ಪಡೆಗಳ ನಿಯಂತ್ರಣದಲ್ಲಿವೆ. ಇದೇ ಸ್ಥಾವರದಲ್ಲಿ ರಷ್ಯಾ ದೇಶವು ತನ್ನ ಪಡೆಗಳು ಮತ್ತು ಯುದ್ಧೋಪಕರಣಗಳನ್ನು ಇರಿಸಿದೆ ಎಂದು ಉಕ್ರೇನ್ ಆರೋಪ ಮಾಡಿದೆ.
Published On - 8:47 am, Fri, 12 August 22
