ಇರಾನ್ ಯುದ್ಧ ಶುರು ಮಾಡಿದ್ದು ನಾವಲ್ಲ, 47 ವರ್ಷಗಳ ಹಿಂದೆಯೇ ಸಂಘರ್ಷ ಆರಂಭವಾಗಿತ್ತು: ಪೀಟ್ ಹೆಗ್ಸೆತ್

ವಾಷಿಂಗ್ಟನ್, ನವೆಂಬರ್ 10: ಇರಾನ್ ವಿರುದ್ಧ ಅಮೆರಿಕ ನಡೆಸುತ್ತಿರುವ ಯುದ್ಧದ ವಿಚಾರವಾಗಿ ದೇಶದೊಳಗೆ ಟೀಕೆಗಳು ಹೆಚ್ಚುತ್ತಿರುವ ಬೆನ್ನಲ್ಲೇ, ಅಮೆರಿಕದ ಯುದ್ಧ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ತಮ್ಮ ಕ್ರಮಗಳನ್ನು ಸಮರ್ಥಿಸಿಕೊಂಡಿದ್ದಾರೆ. “ನಾವು ಇರಾನ್ ಯುದ್ಧವನ್ನು ಪ್ರಾರಂಭಿಸಲಿಲ್ಲ. ಇರಾನ್ 47 ವರ್ಷಗಳ ಹಿಂದೆಯೇ ಇದನ್ನು ಆರಂಭಿಸಿತ್ತು” ಎಂದು ಅವರು ಹೇಳಿದ್ದಾರೆ.

ಇದೇ ವೇಳೆ, ತಮ್ಮ ವಿರುದ್ಧ ದೋಷಾರೋಪಣೆ ನಿರ್ಣಯ ಮಂಡಿಸುವ ಪ್ರಯತ್ನವನ್ನು ರಾಜಕೀಯ ಪ್ರೇರಿತ ಕ್ರಮ ಎಂದು ಕರೆದಿದ್ದಾರೆ. ಕಾನೂನುಬದ್ಧ ಮಿಲಿಟರಿ ಕಾರ್ಯಾಚರಣೆಗಳನ್ನು ನಡೆಸಿದ್ದಕ್ಕಾಗಿ ಯುದ್ಧ ಕಾರ್ಯದರ್ಶಿಯನ್ನು ದೋಷಾರೋಪಣೆ ಮಾಡುವುದು ಅಮೆರಿಕದ ಸೈನಿಕರಿಗೆ ತಪ್ಪು ಸಂದೇಶ ನೀಡಿದಂತಾಗುತ್ತದೆ ಎಂದೂ ಅವರು ವಾದಿಸಿದ್ದಾರೆ.

ಕೆಂಟಕಿಯ ರಿಪಬ್ಲಿಕನ್ ಸಂಸದ ಥಾಮಸ್ ಮಾಸ್ಸಿ ಅವರು ಪೀಟ್ ಹೆಗ್ಸೆತ್ ವಿರುದ್ಧ ಎಂಟು ಅಂಶಗಳ ದೋಷಾರೋಪಣೆ ನಿರ್ಣಯವನ್ನು ಅಮೆರಿಕದ ಪ್ರತಿನಿಧಿಗಳ ಸಭೆಯಲ್ಲಿ ಮಂಡಿಸಿದ್ದಾರೆ. ಈ ನಿರ್ಣಯದಲ್ಲಿ ಇರಾನ್ ಯುದ್ಧ ಮಾತ್ರವಲ್ಲದೆ, ಯೆಮೆನ್ ಮತ್ತು ವೆನೆಜುವೆಲಾದಲ್ಲಿನ ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಗಳ ಬಗ್ಗೆಯೂ ಪ್ರಶ್ನೆ ಎತ್ತಲಾಗಿದೆ.

ಮಾಸ್ಸಿ ಅವರ ಪ್ರಮುಖ ಆರೋಪಗಳು ಹೀಗಿವೆ – ಕಾಂಗ್ರೆಸ್‌ನ ಅನುಮತಿ ಇಲ್ಲದೆ ಇರಾನ್ ವಿರುದ್ಧ ಯುದ್ಧ ಮುಂದುವರಿಸಿರುವುದು. – ಯುದ್ಧದಲ್ಲಿ ನಾಗರಿಕರ ರಕ್ಷಣೆಗೆ ಸಂಬಂಧಿಸಿದ ನಿಯಮಗಳನ್ನು ನಿರ್ಲಕ್ಷಿಸಿರುವುದು. – ಯೆಮೆನ್‌ನಲ್ಲಿ ಹೌತಿ ಬಂಡುಕೋರರ ವಿರುದ್ಧ ಕಾನೂನುಬಾಹಿರ ಮಿಲಿಟರಿ ಕ್ರಮ ಕೈಗೊಂಡಿರುವುದು. – ಕೆರಿಬಿಯನ್ ಸಮುದ್ರ ಮತ್ತು ಪೂರ್ವ ಪೆಸಿಫಿಕ್‌ನಲ್ಲಿ ಮಾದಕವಸ್ತು ಸಾಗಣೆ ಆರೋಪದ ದೋಣಿಗಳ ಮೇಲೆ ನಡೆಸಿದ ದಾಳಿಗಳಲ್ಲಿ ಕಾನೂನುಬಾಹಿರ ಹತ್ಯೆಗಳಿಗೆ ಹೊಣೆಗಾರರಾಗಿರುವುದು. – ವೆನೆಜುವೆಲಾ ಅಧ್ಯಕ್ಷ ನಿಕೋಲಸ್ ಮಡುರೊ ಅವರನ್ನು ಕಾಂಗ್ರೆಸ್ ಅನುಮತಿಯಿಲ್ಲದೆ ಬಂಧಿಸಿ ಕರೆತಂದ ಕಾರ್ಯಾಚರಣೆಯಲ್ಲಿ ಪಾತ್ರವಹಿಸಿರುವುದು. – ಅಮೆರಿಕದ ಸೆನೆಟರ್ ಮಾರ್ಕ್ ಕೆಲ್ಲಿ ವಿರುದ್ಧ ಪ್ರತೀಕಾರದ ಕ್ರಮಕ್ಕೆ ಮುಂದಾಗಿರುವುದು.

ಇದನ್ನೂ ಓದಿ: ಯುದ್ಧ ನಿಲ್ಲಿಸಲು ಅಬುಧಾಬಿಯಲ್ಲಿ ಉಕ್ರೇನ್-ರಷ್ಯಾ ಮಧ್ಯೆ ಇಂದು ಮತ್ತೆ ಶಾಂತಿ ಮಾತುಕತೆ; ಅಮೆರಿಕದ ಮಧ್ಯಸ್ಥಿಕೆ

ಹೆಗ್ಸೆತ್ ಪದಚ್ಯುತರಾಗುತ್ತಾರಾ? ದೋಷಾರೋಪಣೆ ನಿರ್ಣಯ ಮಂಡನೆಯಾಗಿದೆ ಎಂದ ಮಾತ್ರಕ್ಕೆ ಹೆಗ್ಸೆತ್ ತಕ್ಷಣ ಹುದ್ದೆ ಕಳೆದುಕೊಳ್ಳುವುದಿಲ್ಲ. ಮೊದಲು ಪ್ರತಿನಿಧಿಗಳ ಸಭೆಯಲ್ಲಿ ನಿರ್ಣಯಕ್ಕೆ ಮತದಾನ ನಡೆಯಬೇಕು. ಅಲ್ಲಿ ದೋಷಾರೋಪಣೆ ಅಂಗೀಕಾರವಾದರೆ ಸೆನೆಟ್‌ನಲ್ಲಿ ವಿಚಾರಣೆ ನಡೆಯುತ್ತದೆ. ಹುದ್ದೆಯಿಂದ ತೆಗೆದುಹಾಕಲು ಸೆನೆಟ್‌ನಲ್ಲಿ ಮೂರನೇ ಎರಡರಷ್ಟು ಸದಸ್ಯರ ಬೆಂಬಲ ಅಗತ್ಯ. ನವೆಂಬರ್ 11ರೊಳಗೆ ಪ್ರತಿನಿಧಿಗಳ ಸಭೆಯಲ್ಲಿ ಈ ನಿರ್ಣಯದ ಮೇಲೆ ಮತದಾನ ನಡೆಯುವ ಸಾಧ್ಯತೆ ಇದೆ ಎಂದು ವರದಿಗಳು ತಿಳಿಸಿವೆ. ಆದರೆ ಅಂತಿಮವಾಗಿ ಹೆಗ್ಸೆತ್ ಹುದ್ದೆ ಕಳೆದುಕೊಳ್ಳುತ್ತಾರೆಯೇ ಎಂಬುದು ಮತದಾನದ ಫಲಿತಾಂಶ ಮತ್ತು ಮುಂದಿನ ಪ್ರಕ್ರಿಯೆಯನ್ನು ಅವಲಂಬಿಸಿದೆ.

ಇರಾನ್ ಯುದ್ಧದ ಬಗ್ಗೆ ವಿವಾದ ಏಕೆ? ಅಮೆರಿಕದ ಇರಾನ್ ಕಾರ್ಯಾಚರಣೆ ಕಾಂಗ್ರೆಸ್‌ನ ಅನುಮತಿಯಿಲ್ಲದೆ ನಡೆಯುತ್ತಿದೆ ಎಂಬುದು ಮಾಸ್ಸಿ ಅವರ ಪ್ರಮುಖ ಆಕ್ಷೇಪ. ಅಮೆರಿಕದ ಸಂವಿಧಾನದ ಪ್ರಕಾರ ಯುದ್ಧ ಘೋಷಿಸುವ ಅಧಿಕಾರ ಕಾಂಗ್ರೆಸ್‌ಗೆ ಇದೆ. ಅಧ್ಯಕ್ಷರಿಗೆ ಕೆಲವು ಸಂದರ್ಭಗಳಲ್ಲಿ ಸೇನೆಯನ್ನು ಬಳಸುವ ಅಧಿಕಾರವಿದ್ದರೂ, ದೀರ್ಘಕಾಲದ ಮಿಲಿಟರಿ ಕಾರ್ಯಾಚರಣೆಗಳಿಗೆ ಕಾಂಗ್ರೆಸ್‌ನ ಅನುಮತಿ ಅಗತ್ಯವೇ ಎಂಬ ಚರ್ಚೆ ಇದೀಗ ತೀವ್ರಗೊಂಡಿದೆ.

ವಿಶೇಷವಾಗಿ, ಇರಾನ್‌ನ ಮಿನಾಬ್ ಪ್ರದೇಶದ ಬಾಲಕಿಯರ ಶಾಲೆಯ ಮೇಲೆ ಫೆಬ್ರವರಿ 28ರಂದು ನಡೆದ ದಾಳಿಯಲ್ಲಿ ಹಲವು ಮಕ್ಕಳು ಮೃತಪಟ್ಟಿರುವ ವಿಚಾರವನ್ನೂ ದೋಷಾರೋಪಣೆ ನಿರ್ಣಯದಲ್ಲಿ ಉಲ್ಲೇಖಿಸಲಾಗಿದೆ. ನಾಗರಿಕರ ಸುರಕ್ಷತೆಗೆ ಸಂಬಂಧಿಸಿದ ನಿಯಮಗಳನ್ನು ಹೆಗ್ಸೆತ್ ನಿರ್ಲಕ್ಷಿಸಿದ್ದಾರೆ ಎಂಬುದು ಮಾಸ್ಸಿ ಅವರ ಆರೋಪ.

ಟ್ರಂಪ್ ಬೆಂಬಲ, ರಿಪಬ್ಲಿಕನ್ ಪಕ್ಷದಲ್ಲಿ ಭಿನ್ನಾಭಿಪ್ರಾಯ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೆಗ್ಸೆತ್ ಅವರಿಗೆ ಬೆಂಬಲ ಸೂಚಿಸಿದ್ದಾರೆ. ಅವರ ವಿರುದ್ಧ ದೋಷಾರೋಪಣೆ ನಿರ್ಣಯ ಬಂದರೂ ತಾವು ಬೆಂಬಲವಾಗಿ ನಿಲ್ಲುವುದಾಗಿ ಟ್ರಂಪ್ ಹೇಳಿದ್ದಾರೆ. ಮತ್ತೊಂದೆಡೆ, ಮಾಸ್ಸಿ ಅವರು ಟ್ರಂಪ್ ಬೆಂಬಲಿತ ಅಭ್ಯರ್ಥಿಯ ವಿರುದ್ಧ ಪ್ರಾಥಮಿಕ ಚುನಾವಣೆಯಲ್ಲಿ ಸೋತಿದ್ದು, ಶೀಘ್ರದಲ್ಲೇ ಕಾಂಗ್ರೆಸ್‌ನಿಂದ ನಿರ್ಗಮಿಸಲಿದ್ದಾರೆ. ಇತ್ತೀಚಿನ ಮಧ್ಯಂತರ ಚುನಾವಣೆಗಳಲ್ಲಿ ರಿಪಬ್ಲಿಕನ್ ಪಕ್ಷಕ್ಕೆ ಹಿನ್ನಡೆಯಾಗಿರುವ ಹಿನ್ನೆಲೆಯಲ್ಲಿ ಇರಾನ್ ಯುದ್ಧದ ನಿರ್ವಹಣೆ ಟ್ರಂಪ್ ಆಡಳಿತಕ್ಕೆ ರಾಜಕೀಯ ಸವಾಲಾಗಿದೆ. ಯುದ್ಧದ ಬಗ್ಗೆ ಅಮೆರಿಕದ ಮತದಾರರಲ್ಲಿಯೂ ಅಸಮಾಧಾನವಿದೆ ಎಂದು ಸಮೀಕ್ಷೆಗಳು ಸೂಚಿಸಿವೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ