ಪುಟಿನ್ ಗರ್ಲ್ಫ್ರೆಂಡ್ಗೆ ಗೌರವಾರ್ಥವಾಗಿ ‘ಅಲೀನಾ ಫೆಸ್ಟಿವಲ್’ ನಡೆಸಿದ ರಷ್ಯಾ: ವರದಿ
ಉಕ್ರೇನ್ನ ಮೇಲೆ ಆಕ್ರಮಣ ಮಾಡಿದ್ದಕ್ಕಾಗಿ ಪುಟಿನ್ ಎದುರಿಸುತ್ತಿರುವ ಜಾಗತಿಕ ಟೀಕೆಗಳ ನಡುವೆ ಉತ್ಸವವನ್ನು ನಡೆಸಲಾಗುತ್ತಿದೆ. ನ್ಯೂಯಾರ್ಕ್ ಪೋಸ್ಟ್ನ ವರದಿಯ ಪ್ರಕಾರ ಈ ಉತ್ಸವಕ್ಕೆ "ಅಲೀನಾ ಫೆಸ್ಟಿವಲ್" ಎಂದು ಹೆಸರಿಸಲಾಗಿದೆ.
Updated on: Jun 03, 2022 | 6:34 PM
ರಷ್ಯಾ(Russia) ಜಿಮ್ನಾಸ್ಟಿಕ್ ಉತ್ಸವವನ್ನು ನಡೆಸುತ್ತಿದ್ದು ಇದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ (Vladimir Putin) ಅವರ ಗರ್ಲ್ಫ್ರೆಂಡ್ ಎಂದು ಹೇಳಲಾಗುತ್ತಿರುವ ಅಲೀನಾ ಕಬೇವಾ (Alina Kabaeva) ಅವರ ಗೌರವಾರ್ಥ ಉತ್ಸವವಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಉಕ್ರೇನ್ನ ಮೇಲೆ ಆಕ್ರಮಣ ಮಾಡಿದ್ದಕ್ಕಾಗಿ ಪುಟಿನ್ ಎದುರಿಸುತ್ತಿರುವ ಜಾಗತಿಕ ಟೀಕೆಗಳ ನಡುವೆ ಉತ್ಸವವನ್ನು ನಡೆಸಲಾಗುತ್ತಿದೆ. ನ್ಯೂಯಾರ್ಕ್ ಪೋಸ್ಟ್ನ ವರದಿಯ ಪ್ರಕಾರ ಈ ಉತ್ಸವಕ್ಕೆ “ಅಲೀನಾ ಫೆಸ್ಟಿವಲ್” ಎಂದು ಹೆಸರಿಸಲಾಗಿದೆ. ಉತ್ಸವವು ಕಳೆದ ತಿಂಗಳು ನಡೆಯಿತು. ಆದರೆ ಮಕ್ಕಳ ರಕ್ಷಣೆಗಾಗಿ ಅಂತರರಾಷ್ಟ್ರೀಯ ದಿನವಾದ ಬುಧವಾರ ಕ್ರೆಮ್ಲಿನ್ ಪರ ದೂರದರ್ಶನ ಚಾನೆಲ್ ರಷ್ಯಾ-1 ನಲ್ಲಿ ಪ್ರಥಮ ಪ್ರದರ್ಶನ ಪ್ರಸಾರವಾಗಿದೆ ಎಂದು ಅದು ಹೇಳಿದೆ. ಈವೆಂಟ್ನ ವಿಡಿಯೊ ಆನ್ಲೈನ್ನಲ್ಲಿ ಪ್ರಸಾರವಾಗುತ್ತಿದೆ, ನೂರಾರು ಮಕ್ಕಳು ಮತ್ತು ಜಿಮ್ನಾಸ್ಟ್ಗಳು ವೇದಿಕೆಯಲ್ಲಿ ಪ್ರದರ್ಶನ ನೀಡುತ್ತಿದ್ದು, ಸೋವಿಯತ್ ಒಕ್ಕೂಟದ ದೇಶಭಕ್ತಿಯ ಹಾಡುಗಳು ಹಿನ್ನೆಲೆಯಲ್ಲಿ ಪ್ಲೇ ಆಗುತ್ತಿರುವುದು ಕೇಳಿಸುತ್ತದೆ. ಈ ಉತ್ಸವವು ವಿಶ್ವ ಸಮರ II ಯುಗದ ಹಾಡುಗಳನ್ನು ಹಾಡುವ ಮಿಲಿಟರಿ ಗಾಯಕರನ್ನು ಒಳಗೊಂಡಿತ್ತು ಎಂದು ಪೋಸ್ಟ್ ತನ್ನ ವರದಿಯಲ್ಲಿ ತಿಳಿಸಿದೆ. ನ್ಯೂಸ್ ವೀಕ್ ವರದಿಯ ಪ್ರಕಾರ ಕಪ್ಪು ಮತ್ತು ಕಿತ್ತಳೆ ಪಟ್ಟೆ Z ಎಂದು ಬರೆದಿರುವ ಹಿನ್ನಲೆಯಲ್ಲಿ ಕಬೇವಾ ವಿಡಿಯೊದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದು ಉಕ್ರೇನ್ ಮೇಲೆ ರಷ್ಯಾದ ಆಕ್ರಮಣಕ್ಕೆ ಬೆಂಬಲದ ಸಂಕೇತವಾಗಿದೆ. ಅವರು ರಷ್ಯಾದ ಮಿಲಿಟರಿಯನ್ನು ಶ್ಲಾಘಿಸುತ್ತಿದ್ದಾರೆ ಮತ್ತು ಎರಡನೇ ಮಹಾಯುದ್ಧದಲ್ಲಿ ನಾಜಿ ಜರ್ಮನಿಯ ಸೋವಿಯತ್ ವಿಜಯವನ್ನು ಉಕ್ರೇನ್ನಲ್ಲಿ ಪ್ರಸ್ತುತ ಘಟನೆಗಳಿಗೆ ಲಿಂಕ್ ಮಾಡಲಾಗಿದೆ ಎಂದು ನ್ಯೂಸ್ ವೀಕ್ ಹೇಳಿದೆ.
69ರ ಹರೆಯದ ಪುಟಿನ್ ಕಬೇವಾ ಅವರೊಂದಿಗಿನ ಸಂಬಂಧವನ್ನು ಎಂದಿಗೂ ಒಪ್ಪಿಕೊಂಡಿಲ್ಲ. ಆದರೆ ಅಮೆರಿಕದ ಅಧಿಕಾರಿಗಳು 38 ವರ್ಷ ವಯಸ್ಸಿನ ಕಬೇವಾ ಮೂರು ಮಕ್ಕಳ ತಾಯಿ ಎಂದು ಹೇಳುತ್ತಾರೆ. “ರಷ್ಯಾದ ಫ್ಲೆಕ್ಸಿಬಲ್ ಮಹಿಳೆ” ಎಂದು ಕರೆಯಲ್ಪಡುವ ಕಬೇವಾ ಅವರು ಪುಟಿನ್ ಅವರ ಯುನೈಟೆಡ್ ರಷ್ಯಾ ಪಕ್ಷವನ್ನು ಪ್ರತಿನಿಧಿಸುವ ಸಂಸತ್ ಸದಸ್ಯರಾಗಿ ಆರು ವರ್ಷಗಳ ಕಾಲ ಕಳೆದಿದ್ದಾರೆ.
ಅವರು ಏಳು ವರ್ಷಗಳಿಗೂ ಹೆಚ್ಚು ಕಾಲ ಕ್ರೆಮ್ಲಿನ್ ಪರ ಮಾಧ್ಯಮ ಸಮೂಹವಾದ ನ್ಯಾಷನಲ್ ಮೀಡಿಯಾ ಗ್ರೂಪ್ನಲ್ಲಿ ನಿರ್ದೇಶಕರ ಮಂಡಳಿಯ ಅಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ದಿ ಡೈಲಿ ಮೇಲ್ ಪ್ರಕಾರ, ಅವರು ವರ್ಷಕ್ಕೆ ಸುಮಾರು 8 ಮಿಲಿಯನ್ ಪೌಂಡ್ ವೇತನವನ್ನು ಪಡೆಯುತ್ತಿದ್ದಾರೆ. ಕಬೇವಾ ಕೊನೆಯ ಬಾರಿಗೆ ಡಿಸೆಂಬರ್ನಲ್ಲಿ ಮತ್ತೊಂದು ಕಾರ್ಯಕ್ರಮಕ್ಕಾಗಿ ಅದೇ ವೇದಿಕೆಯಲ್ಲಿ ಸಾರ್ವಜನಿಕವಾಗಿ ಕಾಣಿಸಿಕೊಂಡರು. change.org ನಲ್ಲಿ ಪ್ರಾರಂಭಿಸಲಾದ ಅರ್ಜಿಯ ಪ್ರಕಾರ ಕಬೇವಾ ತನ್ನ ಮಕ್ಕಳೊಂದಿಗೆ ಸ್ವಿಟ್ಜರ್ಲೆಂಡ್ನ ಐಷಾರಾಮಿ ವಿಲ್ಲಾದಲ್ಲಿಇದ್ದಾರೆ.
ವಿದೇಶದ ಇತರ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ ಪ್ರಮುಖ ಸುದ್ದಿಗಳಿಗಾಗಿಇಲ್ಲಿ ಕ್ಲಿಕ್ ಮಾಡಿ
