Russia Ukraine War: ಅತಿದೊಡ್ಡ ದಾಳಿಗೆ ರಷ್ಯಾ ಸಿದ್ಧತೆ; ಉಕ್ರೇನ್ಗೆ ಟ್ಯಾಂಕ್ ರವಾನಿಸಲು ಅಮೆರಿಕ, ಜರ್ಮನಿ ಸಮ್ಮತಿ
Recession Fear: ವಿಶ್ವದ ಹಲವು ದೇಶಗಳು ನೇರವಾಗಿ ಭಾಗಿಯಾದರೆ ಜಾಗತಿಕ ಆರ್ಥಿಕತೆಗೆ ಮಾರಕ ಹೊಡೆತ ಬೀಳಲಿದೆ. ಆರ್ಥಿಕ ಹಿಂಜರಿತದ ಭೀತಿಯನ್ನು ಈ ಬೆಳವಣಿಗೆ ಹೆಚ್ಚಿಸಿದೆ.
Updated on:Jan 25, 2023 | 10:11 AM
ಬರ್ಲಿನ್ / ಕೀವ್: ರಷ್ಯಾ ಮತ್ತು ಉಕ್ರೇನ್ ಯುದ್ಧ (Russia Ukriane War) ಆರಂಭವಾಗಿ ಇದೇ ಫೆಬ್ರುವರಿ 24ಕ್ಕೆ ಒಂದು ವರ್ಷವಾಗಲಿದೆ. ಆರಂಭದಲ್ಲಿ ರಷ್ಯಾದ ಮೇಲುಗೈ ಕಂಡುಬಂದಿತ್ತು. ಆದರೆ ಸಾವರಿಸಿಕೊಂಡ ಉಕ್ರೇನ್ ಪ್ರತಿದಾಳಿ ಆರಂಭಿಸಿದ ನಂತರ ರಷ್ಯಾ ಹಿಮ್ಮೆಟ್ಟಬೇಕಾಯಿತು. ಉಕ್ರೇನ್ನ ಪೂರ್ವ ಮತ್ತು ದಕ್ಷಿಣ ಭಾಗದ ಸಾವಿರಾರು ಕಿಲೋಮೀಟರ್ಗಳಷ್ಟು ಅಂತರದಲ್ಲಿ ಸಮರಭೂಮಿ (War Zone) ವಿಸ್ತರಿಸಿಕೊಂಡಿದ್ದು, ಎರಡೂ ಸೇನೆಗಳು ಪರಸ್ಪರರ ಮೇಲಿನ ದಾಳಿ-ಪ್ರತಿದಾಳಿ, ಆಕ್ರಮಣ-ರಕ್ಷಣೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿವೆ. ಸದ್ಯಕ್ಕೆ ಪರಿಸ್ಥಿತಿ ಬೂದಿಮುಚ್ಚಿದ ಕೆಂಡದಂತಿದ್ದು, ಯಾವಾಗ ಏನು ಬೇಕಾದರೂ ಆಗಬಹುದು ಎಂಬ ಪರಿಸ್ಥಿತಿಯಿದೆ. ಫೆಬ್ರುವರಿ 24ಕ್ಕೆ ದಾಳಿಯ ವರ್ಷಾಚರಣೆ ಇರುವುದರಿಂದ ಅಷ್ಟರೊಳಗೆ ನಿರ್ಣಾಯಕ ಫಲಿತಾಂಶ ತೋರಿಸದಿದ್ದರೆ ರಷ್ಯಾದಲ್ಲಿ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ (Vladimir Putin) ಒಲವು ಕಡಿಮೆಯಾಗುವ ಭೀತಿ ಕಾಣಿಸಿಕೊಂಡಿದ್ದು, ರಷ್ಯಾ ಸೇನೆ ಮತ್ತೊಮ್ಮೆ ಹಠಾತ್ ದಾಳಿ ಮಾಡಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ.
ಸ್ವದೇಶ-ವಿದೇಶಗಳಲ್ಲಿ ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ರ ಜನಪ್ರಿಯತೆ ಕಡಿಮೆಯಾಗುತ್ತಿದ್ದರೆ, ಮತ್ತೊಂದೆಡೆ ಉಕ್ರೇನ್ ಅಧ್ಯಕ್ಷ ವೊಲಿಡಿಮಿರ್ ಝೆಲೆನ್ಸ್ಕಿ ಜನಪ್ರಿಯತೆ ಹೆಚ್ಚಾಗುತ್ತಿದೆ. ಇಂದು (ಜ 25) ಝೆಲೆನ್ಸ್ಕಿ ಹುಟ್ಟುಹಬ್ಬ. ಇದೇ ನೆಪದಲ್ಲಿ ಝೆಲೆನ್ಸ್ಕಿ ವಿಶ್ವದ ಇತರ ದೇಶಗಳ ನಾಯಕರೊಂದಿಗೆ ಮಾತನಾಡಿದ್ದು ಉಕ್ರೇನ್ಗೆ ಅಗತ್ಯವಿರುವ ಆರ್ಥಿಕ ಮತ್ತು ಸೈನಿಕ ನೆರವು ಒದಗಿಸುವಂತೆ ಮನವಿ ಮಾಡಿದರು. ‘ಚರ್ಚೆಗಳು ನಿರ್ಧಾರಗಳೊಂದಿಗೆ ಅಂತ್ಯವಾಗಬೇಕು. ಒಂದು ದೊಡ್ಡ ದೇಶದ ಬೆಂಬಲ ಇರುವ ಭಯೋತ್ಪಾದಕರು ಹಾಗೂ ಅವರ ಸಹವರ್ತಿಗಳ ವಿರುದ್ಧ ಜಯಗಳಿಸಲು ನಮಗೆ ಅಗತ್ಯ ನೆರವು ಒದಗಿಸಬೇಕು. ಮುಖ್ಯವಾಗಿ ಯುದ್ಧ ಟ್ಯಾಂಕ್ಗಳನ್ನು ಒದಗಿಸಬೇಕು’ ಎಂದು ಕೋರಿದರು.
ಉಕ್ರೇನ್ನ ಬೇಡಿಕೆ ಕುರಿತು ಹಲವು ದಿನಗಳಿಂದ ಚರ್ಚೆ ನಡೆಸುತ್ತಿದ್ದ ಅಮೆರಿಕ ಇದೀಗ ‘ಎಂ1 ಅಬ್ರಾಹಂ’ ಯುದ್ಧಟ್ಯಾಂಕ್ಗಳನ್ನು ರವಾನಿಸಲು ಸಮ್ಮತಿಸಿದೆ. ಮುಂದಿನ ಕೆಲವೇ ತಿಂಗಳುಗಳಲ್ಲಿ ಸುಮಾರು 30 ಟ್ಯಾಂಕ್ಗಳು ಉಕ್ರೇನ್ ತಲುಪುವ ಸಾಧ್ಯತೆಯಿದೆ ಎಂದು ಅಮೆರಿಕ ರಕ್ಷಣಾ ಇಲಾಖೆಯ ಉನ್ನತ ಅಧಿಕಾರಿಗಳನ್ನು ಉಲ್ಲೇಖಿಸಿ ರಾಯಿಟರ್ಸ್ ಸುದ್ದಿಸಂಸ್ಥೆಯು ವರದಿ ಮಾಡಿದೆ. ಈ ನಡುವೆ ಜರ್ಮನಿಯ ಚಾನ್ಸೆಲರ್ ಒಲಾಫ್ ಸ್ಕೊಲಾಜ್ ‘ಲೆಪಾರ್ಡ್-2’ ಯುದ್ಧಟ್ಯಾಂಕ್ಗಳನ್ನು ಉಕ್ರೇನ್ಗೆ ಕಳಿಸಲು ಸಮ್ಮತಿಸಿದ್ದಾರೆ. ಜರ್ಮನಿಯಿಂದ ಟ್ಯಾಂಕ್ಗಳನ್ನು ಖರೀದಿಸಿರುವ ಪೊಲೆಂಡ್, ಸ್ಕಾಂಡಿನೇವಿಯಾದಂಥ ಇತರ ದೇಶಗಳು ಟ್ಯಾಂಕ್ಗಳನ್ನು ಉಕ್ರೇನ್ಗೆ ಒದಗಿಸುವ ಬಗ್ಗೆ ಯಾವುದೇ ಆಕ್ಷೇಪಗಳಿಲ್ಲ ಎಂದು ಹೇಳಿದ್ದಾರೆ. ಜರ್ಮನಿಯು ಕನಿಷ್ಠ 14 ‘ಲೆಪಾರ್ಡ್’ ಯುದ್ಧಟ್ಯಾಂಕ್ಗಳನ್ನು ಉಕ್ರೇನ್ಗೆ ರವಾನಿಸಬಹುದು ಎಂದು ಹೇಳಲಾಗುತ್ತಿದೆ.
ಉಕ್ರೇನ್ನ ಪ್ರತಿಹೋರಾಟಕ್ಕೆ ಯುದ್ಧಟ್ಯಾಂಕ್ಗಳು ಅತ್ಯಗತ್ಯ. ಇದು ಈ ಸಂಘರ್ಷದ ಮಹತ್ವದ ಬೆಳವಣಿಗೆಯಾಗಲಿದೆ. ರಷ್ಯಾಕ್ಕೆ ಹೊಸ ಬಲದಿಂದ ಸರಿಯಾಗಿ ಗುದ್ದುತ್ತೇವೆ ಎಂದು ಉಕ್ರೇನ್ ಆಡಳಿತದ ಮುಖ್ಯಸ್ಥ ಅಂಡ್ರೀ ಯೆರ್ಮಕ್ ತಮ್ಮ ಟೆಲಿಗ್ರಾಮ್ ಸಂದೇಶದಲ್ಲಿ ತಿಳಿಸಿದ್ದಾರೆ.
ಲೆಪಾರ್ಡ್ಗೆ ಒಲವು
ಅಮೆರಿಕವು ತನ್ನ ‘ಅಬ್ರಾಹಂ’ ಟ್ಯಾಂಕ್ಗಳನ್ನು ಕಳಿಸುವುದಾಗಿ ಹೇಳಿರುವುದು ಉಕ್ರೇನ್ಗೆ ನೆರವು ನೀಡಲು ಬಯಸಿದ್ದ ಇತರ ದೇಶಗಳಿಗೆ ಮಾರ್ಗ ಸುಗಮಗೊಳಿಸಿದೆ. ಆದರೆ ಉಕ್ರೇನ್ಗೆ ಅಮೆರಿಕದ ಅಬ್ರಾಹಂ ಟ್ಯಾಂಕ್ಗಳಿಗಿಂತಲೂ ಜರ್ಮನಿಯ ಲೆಪಾರ್ಡ್ ಟ್ಯಾಂಕ್ಗಳು ಹೆಚ್ಚು ಅಗತ್ಯ ಎನಿಸಿದೆ. ಹೀಗಾಗಿ ಅದು ಸಾಧ್ಯವಾದಷ್ಟೂ ಹೆಚ್ಚು ಲೆಪಾರ್ಡ್ ಟ್ಯಾಂಕ್ಗಳನ್ನು ಸಂಪಾದಿಸಿಕೊಳ್ಳಲು ಯತ್ನಿಸುತ್ತಿದೆ. ಅಬ್ರಾಹಂ ಟ್ಯಾಂಕ್ಗಳಿಗೆ ಹೋಲಿಸಿದರೆ ಲೆಪಾರ್ಡ್ ಟ್ಯಾಂಕ್ಗಳ ತೂಕ ಕಡಿಮೆ, ಮೈಲೇಜ್ ಸಹ ಹೆಚ್ಚು. ತಾಂತ್ರಿಕ ನಿರ್ವಹಣೆಯು ಅಬ್ರಾಹಂನಷ್ಟು ಕಷ್ಟವಲ್ಲ, ಯುದ್ಧಭೂಮಿಗೆ ನಿಯೋಜಿಸುವುದೂ ಸುಲಭ ಎನ್ನುವುದು ಇದಕ್ಕೆ ಮುಖ್ಯ ಕಾರಣ.
1979ರಿಂದ ಉತ್ಪಾದನೆಯಾಗುತ್ತಿರುವ ‘ಲೆಪಾರ್ಡ್ 2’ ಟ್ಯಾಂಕ್ ಹಲವು ಬಾರಿ ಬದಲಾವಣೆಗೆ ಒಳಪಟ್ಟಿದೆ. ತಂತ್ರಜ್ಞಾನವನ್ನು ಮೇಲ್ದರ್ಜೆಗೆ ಏರಿಸಲಾಗಿದೆ. ಪೊಲೆಂಡ್, ಫಿನ್ಲೆಂಡ್ ಸೇರಿದಂತೆ ಹಲವು ದೇಶಗಳು ಈ ಟ್ಯಾಂಕ್ ಬಳಸುತ್ತಿವೆ. ಸುಮಾರು 2,000 ಟ್ಯಾಂಕ್ಗಳು ಯುರೋಪ್ನಲ್ಲಿ ಕಾರ್ಯನಿರ್ವಹಿಸುತ್ತಿವೆ. 120 ಎಂಎಂ ಸ್ಮೂತ್ಬೋರ್ ನಳಿಕೆ, 7.62 ಎಂಎಂ ಮಿಷಿನ್ಗನ್ ಹೊಂದಿರುವ ಈ ಟ್ಯಾಂಕ್ ಗಂಟೆಗೆ 70 ಕಿಮೀ ವೇಗದಲ್ಲಿ ಸಂಚರಿಸುವ ಸಾಮರ್ಥ್ಯ ಈ ಟ್ಯಾಂಕ್ಗೆ ಇದೆ.
ಹೀಗಾಗಿಯೇ ಲೆಪಾರ್ಡ್-2 ಟ್ಯಾಂಕ್ಗಳ ನಿಯೋಜನೆಯು ಅಂತರರಾಷ್ಟ್ರೀಯ ಮಟ್ಟದಲ್ಲಿ ದೊಡ್ಡ ಸುದ್ದಿಯಾಗಿದ್ದು, ರಷ್ಯಾದ ಯುದ್ಧತಂತ್ರಗಳು ಬದಲಾಗಬಹುದು ಎಂದು ಹೇಳಲಾಗುತ್ತಿದೆ. ಯುದ್ಧವು ಮತ್ತಷ್ಟು ತಿಂಗಳು ಅಥವಾ ವರ್ಷಗಳ ಅವಧಿಗೆ ಮುಂದುವರಿದರೆ, ವಿಶ್ವದ ಹಲವು ದೇಶಗಳು ನೇರವಾಗಿ ಭಾಗಿಯಾದರೆ ಜಾಗತಿಕ ಆರ್ಥಿಕತೆಗೆ ಮಾರಕ ಹೊಡೆತ ಬೀಳಲಿದೆ. ಆರ್ಥಿಕ ಹಿಂಜರಿತದ ಭೀತಿಯನ್ನು ಈ ಬೆಳವಣಿಗೆ ಹೆಚ್ಚಿಸಿದೆ.
ಇದನ್ನೂ ಓದಿ: Ukraine And Russia War: ಉಕ್ರೇನ್ ಮೇಲೆ ಸಾರಿರುವ ಯುದ್ಧ ನಿಲ್ಲಿಸಲು ರಷ್ಯಾ ಚಿಂತನೆ
ಮತ್ತಷ್ಟು ವಿದೇಶ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 10:11 am, Wed, 25 January 23
