ಮಾನವರ ಮೇಲೆ ಸ್ಪುಟ್ನಿಕ್ V ಲಸಿಕೆ ಟ್ರಯಲ್ಸ್ ಮುಂದಿನವಾರದಿಂದ!

ರಷ್ಯಾದಲ್ಲಿ ತಯಾರಾಗಿರುವ ಕೊವಿಡ್-19 ಲಸಿಕೆಯ ಮಾನವರ ಮೇಲಿನ ಸಾಮೂಹಿಕ ಟ್ರಯಲ್ ಮುಂದಿನವಾರದಿಂದ ಆರಂಭವಾಗಲಿದೆ. ಲಸಿಕೆಯ ಪರೀಕ್ಷಣೆಯು ಸುಮಾರು 40,000ಕ್ಕಿಂತ ಜಾಸ್ತಿ ಜನರ ಮೇಲೆ ರಷ್ಯಾದಾದ್ಯಂತ ಹರಡಿರುವ 45 ಲ್ಯಾಬ್​ಗಳಲ್ಲಿ ನಡೆಯಲಿದೆ. ಟ್ರಯಲ್ಸ್ ನಂತರ ಲಭ್ಯವಾಗುವ ಫಲಿತಾಂಶಗಳನ್ನು ಒಂದು ಶೈಕ್ಷಣಿಕ ಪತ್ರಿಕೆಯಲ್ಲಿ ಪ್ರಕಟಿಸಲಾಗುವುದೆಂದು ಈ ಲಸಿಕೆ ತಯಾರಿಸಿರುವ ಮಾಸ್ಕೊದ ಗಮಾಲಿಯಾ ರೀಸರ್ಚ್ ಇನ್​ಸ್ಟಿಟ್ಯೂಟ್​ನ ನಿರ್ದೇಶಕ ಕಿರಿಲ್ ಡಿಮಿಟ್ರಿವ್ ತಿಳಿಸಿದ್ದಾರೆ.

ಡಿಮಿಟ್ರಿವ್ ಹೇಳುವಂತೆ ಲಸಿಕೆಗೆ ಸಂಬಂಧಪಟ್ಟ ಮಾಹಿತಿಯನ್ನು ವಿಶ್ವ ಆರೋಗ್ಯ ಸಂಸ್ಥೆಯೊಂದಿಗೆ ಹಂಚಿಕೊಳ್ಳಲಾಗಿದೆ. ಭಾರತ, ಬ್ರೆಜಿಲ್, ಯುನೈಟೆಡ್ ಅರಬ್ ಎಮಿರೇಟ್ಸ್ ಹಾಗೂ ಸೌದಿ ಅರೇಬಿಯಾ ಸೇರಿದಂತೆ ಹಲವಾರು ದೇಶಗಳು ಲಸಿಕೆಯ ಟ್ರಯಲ್ಸ್​ನಲ್ಲಿ ಭಾಗವಹಿಸುವ ಇಚ್ಛೆ ವ್ಯಕ್ತಪಡಿಸಿವೆಯೆಂದು ಅವರು ಹೇಳಿದ್ದಾರೆ.

ಸ್ಪುಟ್ನಿಕ್ V ಎಂದು ಹೆಸರಿಡಲಾಗಿರುವ ಲಸಿಕೆಗೆ ಸಂಬಂಧಪಟ್ಟ ವೈದ್ಯಕೀಯ ಹಾಗೂ ಕಾನೂನು ಸಂಸ್ಥೆಗಳಿಂದ ಮಾನವರ ಮೇಲೆ ಪರೀಕ್ಷಣೆ ನಡೆಸಲು ಒಪ್ಪಿಗೆ ದೊರೆತಿದೆ. ಕೊವಿಡ್​ ಸೋಂಕಿನ ವಿರುದ್ಧ ಲಸಿಕೆ ತಯಾರು ಮಾಡಿದ ಪ್ರಪ್ರಥಮ ರಾಷ್ಟ್ರವೆಂಬ ಹೆಗ್ಗಳಿಕೆ ತನ್ನದಾಗಿಸಿಕೊಳ್ಳುವ ಸಮಯ ಹತ್ತಿರವಾಗಿದೆಯೆಂದು ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಹೆಮ್ಮೆಪಟ್ಟುಕೊಳ್ಳುತ್ತಿದ್ದಾರೆ.

ಆದರೆ, ಸ್ಪುಟ್ನಿಕ್ V ಲಸಿಕೆಯ ನೋಂದಣಿ ಪರೀಕ್ಷಣೆಯ ಅತಿ ದೊಡ್ಡ ಹಂತವೆಂದು ಕರೆಸಿಕೊಳ್ಳುವ ಮೂರನೇ ಹಂತ ಆರಂಭವಾಗುವ ಮೊದಲೇ ಆಗಿರುವುದು ಇತರ ರಾಷ್ಟ್ರಗಳ ಕೆಂಗಣ್ಣಿಗೆ ಗುರಿಯಾಗಿದೆ. ವಿಶ್ವದ ಬೇರೆ ಬೇರೆ ರಾಷ್ರಗಳಲ್ಲಿ ಕನಿಷ್ಠ ನಾಲ್ಕು ಕೊವಿಡ್-19 ಲಸಿಕೆಗಳು ಮೂರನೇ ಹಂತದ ಟ್ರಯಲ್ಸ್​ನಲ್ಲಿವೆ.

ರಷ್ಯಾದ ವೈದ್ಯಕೀಯ ಸಂಸ್ಥೆಗಳಿಂದ ಈಗಾಗಲೇ ಸುರಕ್ಷಿತ ಹಾಗೂ ಪರಿಣಾಮಕಾರಿ ಎನಿಸಿಕೊಂಡಿರುವ ಸ್ಪುಟ್ನಿಕ್ V ಲಸಿಕೆಗಾಗಿ ಒಂದು ಬಿಲಿಯನ್ ಡೋಸ್​ಗಳ ಬೇಡಿಕೆ ಬಂದಿದೆಯೆಂದು ಡಿಮಿಟ್ರಿವ್ ಹೇಳುತ್ತಾರೆ. ರಷ್ಯಾ ಪ್ರತಿ ವರ್ಷ 500 ಮಿಲಿಯನ್ ಡೋಸ್​ಗಳನ್ನು ತಯಾರಿಸುವ ಸಾಮರ್ಥ್ಯ ಹೊಂದಿದೆಯಂತೆ.