ರಕ್ತ ಹೆಪ್ಪುಗಟ್ಟುವ ಭಯವಿಲ್ಲ! ಕೊವಿಶೀಲ್ಡ್​ ಚುಚ್ಚುಮದ್ದಿಗೆ ಸಿಕ್ತು ಅಮೆರಿಕದ ಹಸಿರು ನಿಶಾನೆ..

ಕಳೆದ ವಾರ ವಿಶ್ವ ಆರೋಗ್ಯ ಸಂಸ್ಥೆ ಆಕ್ಸಫರ್ಡ್ ವಿಶ್ವವಿದ್ಯಾಲಯ-ಆಸ್ಟ್ರಾಜೆನೆಕಾ ಅಭಿವೃದ್ಧಿ ಪಡಿಸಿದ ಕೊವಿಶೀಲ್ಡ್ ಚುಚ್ಚುಮದ್ದಿಗೆ ಈಗ ಅಮೇರಿಕಾದ ಒಪ್ಪಿಗೆ ಸಿಕ್ಕಿದೆ. ಸುಮಾರು 32,000 ಜನ ಭಾಗವಹಿಸಿದ ಮೂರನೇ ಹಂತದ ಪ್ರಯೋಗದಲ್ಲಿ ಸುಮಾರು 79 ಪ್ರತಿಶತ ಸುರಕ್ಷಿತ ಎಂದು ನಿರೂಪಿತವಾಗಿದೆ. ಈ ಚುಚ್ಚುಮದ್ದು ತುಂಬಾ ಪರಿಣಾಮಕಾರಿ ಮತ್ತು ಸುರಕ್ಷಿತ ಎಂದು ಅಮೆರಿಕದ ಎಫ್​ಡಿಎ ಅಧಿಕಾರಿಗಳು ಹೇಳಿದ್ದಾರೆ ಎಂದು ಬಿಬಿಸಿ ವರದಿ ಮಾಡಿದೆ. ಗಮನಿಸಬೇಕಾದ ಅಂಶವೇನೆಂದರೆ, ಪ್ರಯೋಗದಲ್ಲಿ ಭಾಗವಹಿಸಿದ ಪ್ರತಿ ಐದು ಜನರಲ್ಲಿ ಒಬ್ಬರು 65 ವರ್ಷಕ್ಕಿಂತ ಹೆಚ್ಚಿನ ವಯಸ್ಸಿನವರು. ಅವರಲ್ಲಿ ತೊಂದರೆ ಕಂಡುಬರಲಿಲ್ಲ.    

ನಾವ್ಯಾಕೆ ತಲೆಕೆಡಿಸಿಕೊಳ್ಳಬೇಕು? ಅಮೆರಿಕ ಈ ಚುಚ್ಚುಮದ್ದಿಗೆ ಒಪ್ಪಿಗೆ ಕೊಟ್ಟಿರುವುದರಿಂದ ವಿಶ್ವದ ಅನೇಕ ದೇಶಗಳು ಈ ಲಸಿಕೆ ಪಡೆಯಲು ಮುಂದೆ ಬರುವುದು ನಿಶ್ಚಿತ. ಈ ಚುಚ್ಚುಮದ್ದು ಸಹ ಭಾರತದಲ್ಲೇ ತಯಾರಿ ಆಗುತ್ತದೆ. ಒಂದೊಮ್ಮೆ ಅಮೆರಿಕ ತಕರಾರು ತೆಗೆದಿದ್ದರೆ ಭಾರತದಲ್ಲಿ ತಯಾರಾಗುವ ಈ ಚುಚ್ಚುಮದ್ದು ತಯಾರಿಕೆಗೆ ಬಹಳ ಹೊಡೆತ ಬೀಳುತ್ತಿತ್ತು. ಇದರ ಜೊತೆಗೆ ದೇಶದ ಒಳಗೆ ಕೂಡ ಈ ಚುಚ್ಚುಮದ್ದಿನ ಬಗ್ಗೆ ವಿರೋಧ ಪಕ್ಷದ ನಾಯಕರು ಸೇರಿ ಅನೇಕರು ಪ್ರಶ್ನೆ ಎತ್ತಿದ್ದರು. ಈಗ ಅಮೆರಿಕ ಹಸಿರು ನಿಶಾನೆ ತೊರಿಸಿರೋ ಹಿನ್ನೆಲೆಯಲ್ಲಿ, ಈ ಚುಚ್ಚುಮದ್ದನ್ನು ಹಾಕಿಸಿಕೊಳ್ಳಲು ನಮ್ಮ ದೇಶದಲ್ಲಿ ಕೂಡ ಜನ ಮುಂದೆ ಬರುವ ಸಾಧ್ಯತೆ ಇದೆ.

ವರದಿ ಇನ್ನೇನು ಹೇಳುತ್ತಿದೆ? ಬಿಬಿಸಿ ವರದಿ ಪ್ರಕಾರ, ಕೊವಿಶೀಲ್ಡ್ ಲಸಿಕೆಯನ್ನು ಅಮೆರಿಕಾ, ಪೆರು ಮತ್ತು ಚಿಲಿ ದೇಶದ 32,000 ಜನಕ್ಕೆ ನೀಡಲಾಗಿತ್ತು. ಸುಮಾರು 79 ಪ್ರತಿಶತ ಜನರಲ್ಲಿ ಈ ಚುಚ್ಚುಮದ್ದು ಕೊವಿಡ್ ಲಕ್ಷಣವನ್ನು ನಿಯಂತ್ರಣ ಮಾಡುವಲ್ಲಿ ಯಶಸ್ವಿಯಾದರೆ, ಕೊರೊನಾ ನಿಗ್ರಹ ಮಾಡುವಲ್ಲಿ ಈ ಚುಚ್ಚುಮದ್ದು 100 ಪ್ರತಿಶತ ಪರಿಣಾಮಕಾರಿ ಎಂಬುದು ನಿರೂಪಿತವಾಗಿದೆ ಎಂದು ವರದಿ ಹೇಳಿದೆ.

ಎಲ್ಲಕ್ಕಿಂತ ಮುಖ್ಯವಾಗಿ ಈ ಚುಚ್ಚುಮದ್ದಿನಿಂದ ರಕ್ತ ಹೆಪ್ಪುಗಟ್ಟುತ್ತೆ ಎಂಬುದು ನಿರೂಪಿತವಾಗಿಲ್ಲ ಎಂದು ಅಮೆರಿಕಾ ಸಾರಿದೆ. ಫ್ರಾನ್ಸ್, ಇಟಲಿ ಮತ್ತು ಇನ್ನು ಕೆಲವು ಯುರೋಪಿಯನ್ ದೇಶಗಳು ತಮ್ಮ ದೇಶದ ಹಿರಿಯ ನಾಯಕರಿಗೆ ಈ ಚುಚ್ಚುಮದ್ದು ನೀಡುವುದನ್ನು ನಿಲ್ಲಿಸಿ WHO ಒಪ್ಪಿಕೊಳ್ಳುವವರೆಗೆ ತಾವು ಒಪ್ಪಿಕೊಳ್ಳಲ್ಲ ಎಂದು ಹೇಳಿದ್ದವು. ಈಗ ಅಮೆರಿಕ ಹಸಿರು ನಿಶಾನೆ ಕೊಟ್ಟರುವುದರಿಂದ ಯುರೋಪಿನ ದೇಶಗಳು ಈ ಚುಚ್ಚುಮದ್ದನ್ನು ಒಪ್ಪಿಕೊಂಡು ತಮ್ಮ ತಮ್ಮ ದೇಶದ ಪ್ರಜೆಗಳಿಗೆ ಈ ಚುಚ್ಚುಮದ್ದು ನೀಡಲು ಮುಂದಾಗಬಹುದು ಎಂದು ಬಿಬಿಸಿ ಹೇಳಿದೆ.

ಈ ಚುಚ್ಚುಮದ್ದು ಅಭಿವೃದ್ಧಿಪಡಿಸುವಲ್ಲಿ ನಿರತರಾಗಿದ್ದ ಪ್ರಧಾನ ಸಂಶೋಧಕ, ಪ್ರೊ. ಆಂಡ್ರ್ಯೂ ಪೊಲಾರ್ಡ್ ಮಾತನಾಡಿ, ಅಮೆರಿಕದಿಂದ ಬರುತ್ತಿರುವುದು ಒಳ್ಳೇ ಸುದ್ದಿ. ಈ ಫಲಿತಾಂಶ ಏನನ್ನು ತೋರಿಸುತ್ತಿದೆ ಎಂದರೆ ಬಹಳ ದೊಡ್ಡ ಪ್ರಮಾಣದ ಜನಸಂಖ್ಯೆ ಮೇಲೆ ಈ ಚುಚ್ಚುಮದ್ದು ಪರಿಣಾಮಕಾರಿಯಾಗಿದೆ. ಮತ್ತು ಎಲ್ಲ ವಯಸ್ಸಿನ ಜನರ ಮೇಲೂ ಇದು ಪರಿಣಾಮಕಾರಿ ಎಂದು ನಿರೂಪಿತವಾದಂತೆ ಆಯ್ತು ಎಂದು ಹೇಳಿದ್ದಾರೆ. ಈ ಟೀಮಿನಲ್ಲಿ ಕೆಲಸ ಮಾಡಿರುವ ಮತ್ತೋರ್ವ ಸಂಶೋಧಕಿ ಪ್ರೊ. ಸಾರಾ ಗಿಲ್ಬರ್ಟ್ ಮಾತನಾಡಿ ಈ ಚುಚ್ಚುಮದ್ದು ತೆಗೆದುಕೊಂಡಾಗ ಕೆಲವರ ಆರೋಗ್ಯದಲ್ಲಿ ಏರುಪೇರಾಗಿರುವುದು ನಿಜ. ಆದರೆ, ಬಹಳ ಜನರಲ್ಲಿ ಕೊವಿಶಿಲ್ಡ್​ನಿಂದ ಬಂದಿದ್ದು ಎಂಬುದು ನಿರೂಪಿತವಾಗಿಲ್ಲ ಎಂದು ಹೇಳಿದ್ದಾರೆ.

ಇದನ್ನೂ ಓದಿ:

ಪ್ರಧಾನಿ ನರೇಂದ್ರ ಮೋದಿ ಪಡೆದ ಕೊವಿಡ್​ ವ್ಯಾಕ್ಸಿನ್ ಯಾವುದು? ಲಸಿಕೆ ಪಡೆದ ಬಳಿಕ ಪುದುಚೇರಿ, ಕೇರಳದ ನರ್ಸ್​ಗಳಿಗೆ ಹೇಳಿದ್ದೇನು?

ಕೊವಿಡ್​ ಲಸಿಕೆ ಬಗ್ಗೆ ನಿಮಗೆ ಗೊತ್ತಿರಬೇಕಾದ Top 9 ಸಂಗತಿಗಳು

Published On - 3:41 pm, Mon, 22 March 21