One Big Beautiful Bill: ಟ್ರಂಪ್​​ಗೆ ಜಯ, ಒನ್ ಬಿಗ್ ಬ್ಯೂಟಿಫುಲ್ ಬಿಲ್​ಗೆ ಯುಎಸ್ ಕಾಂಗ್ರೆಸ್ ಅನುಮೋದನೆ

ವಾಷಿಂಗ್ಟನ್, ಜುಲೈ 04: ಅಮೆರಿಕ ಅಧ್ಯಕ್ಷ ಡೊನಾಲ್ಡ್​​ ಟ್ರಂಪ್​(Donald Trump)ಗೆ ದೊಡ್ಡ ಜಯ ಸಿಕ್ಕಿದೆ. ಸಾಕಷ್ಟು ವಿರೋಧಗಳ ನಡುವೆ ಅಮೆರಿಕ ಸಂಸತ್ತಿನಲ್ಲಿ ಒನ್ ಬಿಗ್ ಬ್ಯೂಟಿಫುಲ್ ಮಸೂದೆ ಅಂಗೀಕಾರಗೊಂಡಿದೆ. ಹಾಗೆಯೇ ಯುಎಸ್ ಕಾಂಗ್ರೆಸ್​ ಕೂಡ ಅಂಗೀಕರಿಸಿದೆ. ಈ ಮಸೂದೆಯನ್ನು ತೆರಿಗೆ ವಿನಾಯಿತಿ ಮತ್ತು ವೆಚ್ಚ ಕಡಿತ ಮಸೂದೆ ಎಂದು ಕರೆಯಲಾಗುತ್ತದೆ. ಈ ಮಸೂದೆಗೆ ಅಮೆರಿಕ ಸಂಸತ್ತಿನ ಎರಡೂ ಸದನಗಳ ಅನುಮೋದನೆ ಸಿಕ್ಕಿದೆ. ಈಗ ಇದನ್ನು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಹಿಗಾಗಿ ಕಳುಹಿಸಲಾಗುವುದು. ಇದಾದ ನಂತರ ಇದು ಕಾನೂನಿನ ರೂಪ ಪಡೆಯಲಿದೆ. ಈ ಒನ್ ಬಿಗ್ ಬ್ಯೂಟಿಫುಲ್ ಮಸೂದೆಯನ್ನು 214 ವಿರುದ್ಧ 218 ಮತಗಳಿಂದ ಅಂಗೀಕರಿಸಲಾಯಿತು.

ವಿಳಂಬಕ್ಕೆ ಕಾರಣ ಏನು? ಡೆಮಾಕ್ರಟಿಕ್ ಪಕ್ಷದ ನಾಯಕ ಮತ್ತು ನ್ಯೂಯಾರ್ಕ್‌ನ ಸದಸ್ಯ ಹಕೀಮ್ ಜೆಫ್ರಿಸ್ ಮಸೂದೆಯ ವಿರುದ್ಧ ದಾಖಲೆಯ ಭಾಷಣ ಮಾಡುವ ಮೂಲಕ ಎಂಟು ಗಂಟೆಗಳಿಗೂ ಹೆಚ್ಚು ಕಾಲ ಸದನದಲ್ಲಿ ಮತದಾನವನ್ನು ವಿಳಂಬಗೊಳಿಸಿದರು. ಈ ಮಸೂದೆಯು ತೆರಿಗೆ ಕಡಿತ, ಮಿಲಿಟರಿ ಬಜೆಟ್, ರಕ್ಷಣಾ ಮತ್ತು ಇಂಧನ ಉತ್ಪಾದನೆಗೆ ಹೆಚ್ಚಿದ ಖರ್ಚು, ಹಾಗೆಯೇ ಆರೋಗ್ಯ ಮತ್ತು ಪೌಷ್ಟಿಕಾಂಶ ಕಾರ್ಯಕ್ರಮಗಳಲ್ಲಿನ ಕಡಿತದಂತಹ ಪ್ರಮುಖ ನಿಬಂಧನೆಗಳನ್ನು ಒಳಗೊಂಡಿದೆ.

ಇತರ ವಿರೋಧ ಪಕ್ಷಗಳು ಈ ಖರ್ಚು ದೇಶದ ಆರೋಗ್ಯ ಮತ್ತು ಶಿಕ್ಷಣದಂತಹ ಕ್ಷೇತ್ರಗಳ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ ಎಂದು ನಂಬಿದ್ದಾರೆ. ಅದಕ್ಕಾಗಿಯೇ ಕೈಗಾರಿಕೋದ್ಯಮಿ ಎಲೋನ್ ಮಸ್ಕ್ ಸೇರಿದಂತೆ ದೊಡ್ಡ ವರ್ಗವು ಈ ಮಸೂದೆಯನ್ನು ವಿರೋಧಿಸುತ್ತಿದೆ ಮತ್ತು ಅದನ್ನು ಟೀಕಿಸುತ್ತಿದೆ.

ಮತ್ತಷ್ಟು ಓದಿ: ಅಮೆರಿಕದಲ್ಲಿ ಹೊಸ ಪಕ್ಷ ಕಟ್ಟುವ ಎಚ್ಚರಿಕೆ ಕೊಟ್ಟ ಎಲಾನ್ ಮಸ್ಕ್

ಟ್ರಂಪ್ ಆಡಳಿತದ ಪ್ರಕಾರ, ಈ ಮಸೂದೆಯು 2017 ರ ತೆರಿಗೆ ಕಡಿತ ಮತ್ತು ಉದ್ಯೋಗ ಕಾಯ್ದೆಯನ್ನು ಶಾಶ್ವತವಾಗಿ ಜಾರಿಗೆ ತರುವುದರ ಜೊತೆಗೆ ಅವರ ಚುನಾವಣಾ ಭರವಸೆಗಳನ್ನು ಈಡೇರಿಸುವತ್ತ ಒಂದು ಪ್ರಮುಖ ಹೆಜ್ಜೆಯಾಗಿದೆ. ಆದಾಗ್ಯೂ, ಮಸೂದೆಯ ಅಂಗೀಕಾರವು ಕಾಂಗ್ರೆಸ್‌ನಲ್ಲಿ ಭಿನ್ನಾಭಿಪ್ರಾಯಗಳನ್ನು ಸೃಷ್ಟಿಸಿದೆ.

ಕಾನೂನಾತ್ಮಕವಾಗಿ ಒಬ್ಬ ವ್ಯಕ್ತಿ ವಲಸೆ ಬಂದಿದ್ದರೆ, ಆತನ ಜೊತೆ ಹೆಂಡತಿ ಮತ್ತು ಮಕ್ಕಳು ಮಾತ್ರವೇ ಬರಬಹುದು. ಕುಟುಂಬದ ಇತರ ಸದಸ್ಯರಿಗೆ ಬರಲು ಅವಕಾಶ ಇರುವುದಿಲ್ಲ. ಸಾಲ್ಟ್ ಡಿಡಕ್ಷನ್ ಕ್ಯಾಪ್ ಅನ್ನು ಮುಂದಿನ ಐದು ವರ್ಷಗಳಿಗೆ 10,000 ಡಾಲರ್​​ನಿಂದ 40,000 ಡಾಲರ್​​ಗೆ ಏರಿಸಲಾಗುತ್ತದೆ. ಸಾಲ್ಟ್ ಡಿಡಕ್ಷನ್ ಟ್ಯಾಕ್ಸ್ ಎಂದರೆ ರಾಜ್ಯ ಮತ್ತು ಸ್ಥಳೀಯ ತೆರಿಗೆಗಳು. ನೀವು ರಾಜ್ಯ ಮತ್ತು ಸ್ಥಳೀಯ ತೆರಿಗೆಗಳನ್ನು ಕಟ್ಟಿದ್ದರೆ, ಫೆಡರಲ್ ಟ್ಯಾಕ್​​​ಗಳಿಂದ ಡಿಡಕ್ಷನ್ ಪಡೆಯಬಹುದು.

ಜನರಿಗೆ ವೈದ್ಯಕೀಯ ಚಿಕಿತ್ಸೆಗೆ ಕವರೇಜ್ ನೀಡಲು ಆಗುವ ವೆಚ್ಚವನ್ನು ಭರಿಸಲು ರಾಜ್ಯ ಸರ್ಕಾರಗಳು ವಿವಿಧ ಆಸ್ಪತ್ರೆ ಇತ್ಯಾದಿಗಳ ಮೇಲೆ ಟ್ಯಾಕ್ಸ್ ಹಾಕುತ್ತವೆ. ಇದಕ್ಕೆ ಮೆಡಿಕ್​​ಏಡ್ ಟ್ಯಾಕ್ಸ್ ಎನ್ನುತ್ತಾರೆ. ಸದ್ಯ ಇದಕ್ಕೆ ಶೇ. 6 ತೆರಿಗೆ ಇದೆ. ಇದನ್ನು 2031ರೊಳಗೆ ಹಂತಹಂತವಾಗಿ ಶೇ. 3.5ಕ್ಕೆ ಇಳಿಸಲು ಯೋಜಿಸಲಾಗಿದೆ. ಇದು ಅಮೆರಿಕದ ಆಸ್ಪತ್ರೆಗಳ ಮೇಲಿನ ಹೊರೆ ತಗ್ಗಿಸಬಹುದು.

ಟ್ರಂಪ್ ಅವರ ಬಿಗ್ ಬ್ಯೂಟಿಫುಲ್ ಮಸೂದೆ ಭಾರತದ ಮೇಲೆ ಭಾರಿ ಪರಿಣಾಮ ಬೀರುತ್ತದೆ. ಈ ಮಸೂದೆಯಲ್ಲಿ ಹಣ ರವಾನೆ ತೆರಿಗೆಯನ್ನು 3.5% ರಿಂದ 1% ಕ್ಕೆ ಇಳಿಸುವ ನಿಬಂಧನೆ ಇದೆ. ಹಣ ರವಾನೆ ತೆರಿಗೆಯಡಿಯಲ್ಲಿ, ಬ್ಯಾಂಕ್ ಖಾತೆಗಳು, ಡೆಬಿಟ್, ಕ್ರೆಡಿಟ್ ಕಾರ್ಡ್‌ಗಳ ಮೂಲಕ ಕಳುಹಿಸುವ ಹಣಕ್ಕೆ ವಿನಾಯಿತಿ ನೀಡಲಾಗಿದೆ, ಆದರೆ ಈಗ ನಗದು, ಮನಿ ಆರ್ಡರ್, ಕ್ಯಾಷಿಯರ್ ಚೆಕ್ ಮೂಲಕ ಹಣವನ್ನು ಕಳುಹಿಸುವಾಗ ಹೆಚ್ಚಿನ ತೆರಿಗೆಯನ್ನು ಪಾವತಿಸಬೇಕಾಗುತ್ತದೆ.

ಅಧ್ಯಕ್ಷ ಟ್ರಂಪ್ ಮಸೂದೆಗೆ ಸಹಿ ಹಾಕಿದ ನಂತರ, ಅಮೆರಿಕಕ್ಕೆ ಹೊರಗಿನಿಂದ ಬರುವ ಹಣದ ಮೇಲಿನ ತೆರಿಗೆ 3.5% ರಿಂದ 5% ಕ್ಕೆ ಹೆಚ್ಚಾಗುತ್ತದೆ. ಇದು ಭಾರತದ ಮೇಲೆ ಪರಿಣಾಮ ಬೀರುತ್ತದೆ ಏಕೆಂದರೆ ಇದು ಸರ್ಕಾರಿ ವೆಚ್ಚವನ್ನು ಕಡಿಮೆ ಮಾಡುತ್ತದೆ, ಅಧಿಕಾರಶಾಹಿ ಸುಧಾರಿಸುತ್ತದೆ, ಆದರೆ ಖಾಸಗೀಕರಣವನ್ನು ಪ್ರೋತ್ಸಾಹಿಸಲಾಗುತ್ತದೆ.

ಟ್ರಂಪ್ ಅವರ ಈ ಮಸೂದೆಯು ಜಾಗತಿಕ ಆರ್ಥಿಕತೆಯ ಮೇಲೆ ಒತ್ತಡವನ್ನು ಹೆಚ್ಚಿಸುತ್ತದೆ ಏಕೆಂದರೆ ಅಮೆರಿಕದ ಸಾಲ ಹೆಚ್ಚಾಗುತ್ತದೆ, ಇದು ಡಾಲರ್ ಮೌಲ್ಯದ ಮೇಲೆ ಒತ್ತಡ ಹೇರುತ್ತದೆ ಮತ್ತು ಭಾರತ ಸೇರಿದಂತೆ ಹಲವು ದೇಶಗಳ ಕರೆನ್ಸಿಯ ಮೌಲ್ಯ ಕುಸಿಯುತ್ತದೆ. ಮಸೂದೆಯನ್ನು ಜಾರಿಗೆ ತಂದ ನಂತರ ಅಮೆರಿಕ ಶುದ್ಧ ಇಂಧನದಲ್ಲಿ ಹೂಡಿಕೆಯನ್ನು ಕಡಿಮೆ ಮಾಡಿದರೆ, ಜಾಗತಿಕ ತಾಂತ್ರಿಕ ಮತ್ತು ಹೂಡಿಕೆ ಹರಿವಿನ ಮೇಲೆ ಪರಿಣಾಮ ಬೀರುತ್ತದೆ. ಇದು ಭಾರತದ ಸೌರ ಪವನ ಯೋಜನೆಯ ಮೇಲೆ ಪರಿಣಾಮ ಬೀರುತ್ತದೆ. ಎಲೆಕ್ಟ್ರಾನಿಕ್ ವಾಹನ ಚಿಪ್‌ಗಳು ಮತ್ತು ಬ್ಯಾಟರಿಗಳನ್ನು ತಯಾರಿಸುವ ಉತ್ಪನ್ನಗಳಿಗೆ ಬೇಡಿಕೆ ಕಡಿಮೆಯಾಗುತ್ತದೆ, ಇದು ಭಾರತದ ಮೇಲೆ ಪರಿಣಾಮ ಬೀರುತ್ತದೆ.

ಎಲಾನ್ ಮಸ್ಕ್ ಹೊಸ ಪಕ್ಷ ಕಟ್ಟುತ್ತಾರಾ?

ಒಂದೊಮ್ಮೆ ಒನ್ ಬಿಗ್ ಬ್ಯೂಟಿಫುಲ್ ಬಿಲ್​ಗೆ ಅನುಮೋದನೆ ಸಿಕ್ಕರೆ ತಾವು ಮರುದಿನವೇ ಹೊಸ ರಾಜಕೀಯ ಪಕ್ಷವನ್ನು ಕಟ್ಟುವುದಾಗಿ ಎಲಾನ್ ಮಸ್ಕ್​ ಹೇಳಿಕೆ ನೀಡಿದ್ದರು. ಈಗ ಬಿಲ್​​ಗೆ ಅನುಮೋದನೆ ಸಿಕ್ಕಿದೆ, ಎಲಾನ್ ಮಸ್ಕ್​ ಹೊಸ ಪಕ್ಷ ಕಟ್ಟುತ್ತಾರಾ ಎಂದು ಕಾದು ನೋಡಬೇಕಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ