Apple: ಅ್ಯಪಲ್ ಕಾರ್ಡ್ನಲ್ಲಿ ಸೇವಿಂಗ್ಸ್ ಅಕೌಂಟ್; 10 ಪಟ್ಟು ಹೆಚ್ಚು ಬಡ್ಡಿ; ಅಮೆರಿಕದ ಹಣಕಾಸು ಕ್ಷೇತ್ರದಲ್ಲಿ ಸಂಚಲನ?
Apple Wallet App SB Account: ಆ್ಯಪಲ್ನ ವ್ಯಾಲಟ್ ಆ್ಯಪ್ನಲ್ಲಿ ಆ್ಯಪಲ್ ಕಾರ್ಡ್ದಾರರು ಸೇವಿಂಗ್ಸ್ ಅಕೌಂಟ್ ತೆರೆಯಬಹುದಾಗಿದ್ದು, ಇದರಲ್ಲಿನ ಹಣಕ್ಕೆ ಅಮೆರಿಕದ ರಾಷ್ಟ್ರೀಯ ಸರಾಸರಿಗಿಂತ 10 ಪಟ್ಟು ಹೆಚ್ಚು ಬಡ್ಡಿ ಕೊಡಲಾಗುತ್ತದೆ.
Updated on: Apr 18, 2023 | 4:32 PM
ಕ್ಯಾಲಿಫೋರ್ನಿಯಾ: ಭಾರತದಲ್ಲಿ ಮೊದಲ ಬಾರಿಗೆ ಸ್ಟೋರ್ಗಳನ್ನು ತೆರೆದಿರುವ ಆ್ಯಪಲ್ ಸಂಸ್ಥೆ (Apple) ಇದೀಗ ಅಮೆರಿಕದಲ್ಲಿ ಹಣಕಾಸು ಸೇವಾ ಉದ್ಯಮದಲ್ಲಿ ಇನ್ನಷ್ಟು ಸಂಚಲನ ಸೃಷ್ಟಿಸಲು ಸಿದ್ಧವಾಗಿದೆ. ಅಮೆರಿಕದಲ್ಲಿನ ಆ್ಯಪಲ್ ಕಾರ್ಡ್ ಬಳಕೆದಾರರಿಗೆ ಅಧಿಕ ಬಡ್ಡಿ ತರುವ ಹೊಸ ಉಳಿತಾಯ ಖಾತೆ (Savings Bank Account) ತೆರೆಯುವ ಯೋಜನೆಯನ್ನು ಆ್ಯಪಲ್ ಹಾಕಿಕೊಂಡಿದೆ. ಈ ಉಳಿತಾಯ ಖಾತೆಯಲ್ಲಿ ಜಮೆಯಾಗುವ ಹಣಕ್ಕೆ ವಾರ್ಷಿಕ ಶೇ. 4.15ರಷ್ಟು ಬಡ್ಡಿ ಕೊಡಲು ಆ್ಯಪಲ್ ನಿರ್ಧರಿಸಿದೆ. ಇದಕ್ಕಾಗಿ ಜಾಗತಿಕ ಹಣಕಾಸು ದೈತ್ಯ ಗೋಲ್ಡಮನ್ ಸ್ಯಾಕ್ಸ್ ಗ್ರೂಪ್ (Goldman Sachs Group) ಜೊತೆ ಆ್ಯಪಲ್ ಒಪ್ಪಂದ ಮಾಡಿಕೊಂಡಿದೆ.
ಶೇ. 4.15ರ ಬಡ್ಡಿ ದರ ಕಡಿಮೆ ಏನಲ್ಲ. ಅಮೆರಿಕದ ವಿವಿಧ ಕಂಪನಿಗಳು ತಮ್ಮ ಉಳಿತಾಯ ಖಾತೆಗಳಿಗೆ ನೀಡುವ ಬಡ್ಡಿ ದರ ಸರಾಸರಿಯಾಗಿ ಶೇ. 0.37 ಮಾತ್ರ. ಅಂದರೆ ಈ ರಾಷ್ಟ್ರೀಯ ಸರಾಸರಿ ಬಡ್ಡಿ ದರಕ್ಕಿಂತ 10 ಪಟ್ಟು ಹೆಚ್ಚು ಬಡ್ಡಿಯನ್ನು ಆ್ಯಪಲ್ ಕಾರ್ಡ್ ಬಳಕೆದಾರರು ತಮ್ಮ ಉಳಿತಾಯ ಖಾತೆಯ ಹಣಕ್ಕೆ ಪಡೆಯುತ್ತಾರೆ. ಭಾರತದಲ್ಲಿ ವಿವಿಧ ಬ್ಯಾಂಕುಗಳು ಗ್ರಾಹಕರ ಎಸ್ಬಿ ಖಾತೆಗಳಿಗೆ ನೀಡುವ ಬಡ್ಡಿ ಶೇ. 2-3 ಮಾತ್ರ. ಇದಕ್ಕೆ ಹೋಲಿಸಿದರೂ ಆ್ಯಪಲ್ನ ಸೇವಿಂಗ್ಸ್ ಅಕೌಂಟ್ನಲ್ಲಿ ಹೆಚ್ಚು ಬಡ್ಡಿ ಸಿಗುತ್ತದೆ ಎಂಬುದು ಗಮನಾರ್ಹ.
ಆ್ಯಪಲ್ನ ಸೇವಿಂಗ್ಸ್ ಅಕೌಂಟ್ನ ಹಣಕ್ಕೆ ಹೆಚ್ಚು ಬಡ್ಡಿ ಕೊಡಲಾಗುತ್ತದೆ ಎಂಬ ಸುದ್ದಿ ಮತ್ತು ನಿರೀಕ್ಷೆ ಬಹಳ ದಿನಗಳಿಂದ ಇತ್ತು. 2022 ಅಕ್ಟೋಬರ್ನಲ್ಲಿ ಆ್ಯಪಲ್ ಕಂಪನಿ ತನ್ನ ಆ್ಯಪ್ನಲ್ಲಿ ಸೇವಿಂಗ್ಸ್ ಅಕೌಂಟ್ ತೆರೆಯಲು ಜನರಿಗೆ ಅವಕಾಶ ಕೊಡುವ ಮೂಲಕ ಹಣಕಾಸು ಸೇವಾ ಕ್ಷೇತ್ರಕ್ಕೆ ಕಾಲಿಟ್ಟಿತ್ತು. ಆ್ಯಪಲ್ ಪೈಪೋಟಿಗೆ ಬರುತ್ತಿರುವುದು ಕಂಡು ಅಮೆರಿಕದ ವಿವಿಧ ಬ್ಯಾಂಕುಗಳು ಬಡ್ಡಿ ಜಿದ್ದಿಗೆ ಬಿದ್ದಿವೆ. ಹೊಸ ಗ್ರಾಹಕರನ್ನು ಸೆಳೆಯಲು ಮತ್ತು ಇರುವ ಗ್ರಾಹಕರನ್ನು ಉಳಿಸಿಕೊಳ್ಳಲು ಕ್ಯಾಷ್ ಬೋನಸ್, ಅಧಿಕ ಬಡ್ಡಿ ದರ ಸೇರಿದಂತೆ ವಿವಿಧ ರೀತಿಯ ಕಸರತ್ತು ನಡೆಸುತ್ತಿವೆ.
ಆ್ಯಪಲ್ ಕಾರ್ಡ್ ಹೊಂದಿರುವವರು ವ್ಯಾಲಟ್ ಆ್ಯಪ್ನಲ್ಲಿ ಸೇವಿಂಗ್ಸ್ ಅಕೌಂಟ್ ತೆರೆಯಬಹುದು. ಇದಕ್ಕೆ ಯಾವ ಶುಲ್ಕವಾಗಲೀ, ಕನಿಷ್ಠ ಮೊತ್ತವೆಂಬುದಾಗಲೀ ಅಥವಾ ಮಿನಿಮಮ್ ಬ್ಯಾಲನ್ಸ್ ಇಡಬೇಕೆಂದಾಗಲೀ ಇಲ್ಲ. ವ್ಯಾಲಟ್ ಆ್ಯಪ್ನಲ್ಲಿ ಬಹಳ ಸುಲಭವಾಗಿ ಉಳಿತಾಯ ಖಾತೆಯನ್ನು ತೆರೆಯಬಹುದು.
ಇದನ್ನೂ ಓದಿ: Coca Cola: ಸ್ವಿಗ್ಗಿ, ಜೊಮಾಟೋಗೆ ಸೆಡ್ಡು ಹೊಡೆಯಲು ಬರುತ್ತಿದೆಯಾ ಕೋಕಾ ಕೋಲ? ಥ್ರೈವ್ ಜೊತೆ ನಿಂತ ಕೋಲಾ
ಈ ಆ್ಯಪಲ್ ಉಳಿತಾಯ ಖಾತೆಯಲ್ಲಿ 2.5ಲಕ್ಷ ಡಾಲರ್ವರೆಗಿನ (2 ಕೋಟಿ ರೂ) ಮೊತ್ತವನ್ನು ಇರಿಸಬಹುದು. ಈ ಸೇವಿಂಗ್ಸ್ ಅಕೌಂಟ್ನಿಂದಾಗಿ ಜನರಿಗೆ ಹಣ ಉಳಿಸಲು ನೆರವಾಗುತ್ತದೆ. ನಿತ್ಯವೂ ಜನರು ಹಣ ಉಳಿಸಲು ಅನುವಾಗುವ ರೀತಿಯಲ್ಲಿ ಟೂಲ್ಗಳನ್ನು ಅಭಿವೃದ್ಧಿಪಡಿಸುತ್ತಿರುವುದಾಗಿ ಆ್ಯಪಲ್ನ ಅಧಿಕಾರಿಗಳು ಹೇಳುತ್ತಾರೆ.
ಕಳೆದ ವರ್ಷ ಹಣಕಾಸು ಸೇವೆ ಆರಂಭಿಸಿದ ಆ್ಯಪಲ್ಗೆ ಉತ್ತಮ ಆದಾಯಕ್ಕೆ ಎಡೆಯಾಗಿದೆಯಂತೆ. ಸೇವಿಂಗ್ಸ್ ಅಕೌಂಟ್ ಖಾತೆ ಜೊತೆಗೆ ಬಯ್ ನೌ ಪೇ ಲೇಟರ್ ಎಂಬ ಆಫರ್ ಅನ್ನೂ ಮಾರ್ಚ್ನಲ್ಲಿ ಬಿಡುಗಡೆ ಮಾಡಲಾಗಿದೆ. ಈ ಹೊಸ ಫೀಚರ್ ಬಳಸಿ ಜನರು ಕ್ರೆಡಿಟ್ ಕಾರ್ಡ್ನಂತೆ ಕಂತುಗಳಲ್ಲಿ ಹಣ ಕಟ್ಟಲು ಸಾಧ್ಯವಾಗಿಸುತ್ತದೆ. ಇದಕ್ಕೆ ಯಾವುದೇ ಹೆಚ್ಚುವರಿ ವೆಚ್ಚವಾಗಲೀ, ಶುಲ್ಕವಾಗಲೀ, ಬಡ್ಡಿಯಾಗಲೀ ಇಲ್ಲ.
