Online Shopping: ಆನ್ಲೈನ್ ಶಾಪಿಂಗ್; ಬೆಂಗಳೂರಿಗರದೇ ಮೇಲುಗೈ; ಸಣ್ಣ ನಗರವಾಸಿಗಳೂ ಹಿಂದೆಬಿದ್ದಿಲ್ಲ; ಜನರಿಗೆ ಅಮೇಜಾನ್ ಫೇವರಿಟ್
Bengalureans Top In Online Shopping Time Spend: ಮಹಾನಗರಗಳು, ಟಯರ್ 1, ಟಯರ್ 2, ಟಯರ್ 3 ಇತ್ಯಾದಿ ನಗರಗಳಲ್ಲಿ ಜನರ ಶಾಪಿಂಗ್ ವರ್ತನೆ ಮತ್ತು ಅಭಿರುಚಿ ಬಗ್ಗೆ ಇತ್ತೀಚೆಗೆ ಅಧ್ಯಯನ ವರದಿಯೊಂದು ಬಿಡುಗಡೆ ಆಗಿದೆ. ಅದರ ವಿವರ ಇಲ್ಲಿದೆ....
ನವದೆಹಲಿ: ಭಾರತದಲ್ಲಿ ಆನ್ಲೈನ್ ಶಾಪಿಂಗ್ ಸಂಸ್ಕೃತಿ (Online Shopping Culture) ಗಾಢವಾಗಿ ಬೆಳೆಯುತ್ತಿದೆ. ಬಹಳ ಜನರು ಅಂಗಡಿ ಮುಂಗಟ್ಟು, ಮಾರುಕಟ್ಟೆ ಬದಲು ಇಕಾಮರ್ಸ್ ತಾಣಗಳ ಮೂಲಕವೇ ಶಾಪಿಂಗ್ ಮಾಡಲು ಇಚ್ಛಿಸುತ್ತಿದ್ದಾರೆ. ಉತ್ತಮ ಬೆಲೆ, ಡಿಸ್ಕೌಂಟ್, ಸುಲಭ ಬಳಕೆ ಇತ್ಯಾದಿ ಕಾರಣಕ್ಕೆ ಜನರು ಆನ್ಲೈನ್ ಶಾಪಿಂಗ್ನತ್ತ ವಾಲುತ್ತಿದ್ದಾರೆ. ಸೈಬರ್ಮೀಡಿಯಾ ರೀಸರ್ಚ್ (CMR- Cybermedia Research) ಸಂಸ್ಥೆ ಇತ್ತೀಚೆಗೆ ನಡೆಸಿದ ಅಧ್ಯಯನವೊಂದರ ವರದಿ ಬೆಳಕಿಗೆ ಬಂದಿದ್ದು, ಬೆಂಗಳೂರು, ಮುಂಬೈ, ದೆಹಲಿಯಂತಹ ಮಹಾನಗರಿಗಳ ಜನರಷ್ಟೇ ಅಲ್ಲ ಎರಡನೇ ಹಾಗೂ ಅದಕ್ಕೂ ಕೆಳಗಿನ ಸ್ತರದ ನಗರಗಳ ಜನರೂ ಆನ್ಲೈನ್ ಶಾಪಿಂಗ್ಗೆ ಒಲವು ತೋರಿಸುತ್ತಿರುವುದು ಹೆಚ್ಚಾಗಿದೆಯಂತೆ.
ಬೆಂಗಳೂರಿಗರಿಂದಲೇ ಹೆಚ್ಚು ಆನ್ಲೈನ್ ಶಾಪಿಂಗ್…!
ಸೈಬರ್ಮೀಡಿಯಾ ರಿಸರ್ಚ್ (ಸಿಎಂಆರ್) ಅಧ್ಯಯನದ ಪ್ರಕಾರ 2ನೇ ಹಾಗೂ ಅದಕ್ಕೂ ಕೆಳಗಿನ ಸ್ತರದ ನಗರಗಳಲ್ಲಿ ಜನರು ನಡೆಸುವ ಆನ್ಲೈನ್ ಶಾಪಿಂಗ್ನ ಸಮಯವನ್ನು ಸರಾಸರಿಯಾಗಿ ಗಣಿಸಿದರೆ ವಾರಕ್ಕೆ 2 ಗಂಟೆ 25 ನಿಮಿಷ ಆಗುತ್ತದೆ. ಅಂದರೆ ವಾರಕ್ಕೆ 145 ನಿಮಿಷ ಕಾಲವನ್ನು ಸರಾಸರಿಯಾಗಿ ಇವರು ಶಾಪಿಂಗ್ಗೆ ವ್ಯಯಿಸುತ್ತಾರೆ. ಬೆಂಗಳೂರಿನಲ್ಲಿ ಅತಿಹೆಚ್ಚು ಸಮಯವನ್ನು ಆನ್ಲೈನ್ ಶಾಪಿಂಗ್ಗೆ ವ್ಯಯಿಸಲಾಗುತ್ತದಂತೆ. ಈ ವರದಿ ಪ್ರಕಾರ ಬೆಂಗಳೂರಿಗರು ಆನ್ಲೈನ್ ಶಾಪಿಂಗ್ಗೆ ಸರಾಸರಿಯಾಗಿ ವಾರಕ್ಕೆ 4 ಗಂಟೆ 2 ನಿಮಿಷ ಸಮಯ ವ್ಯಯಿಸುತ್ತಾರೆ. ಬೇರಾವುದೇ ನಗರವಾಸಿಗಳು ಇಷ್ಟು ಹೊತ್ತನ್ನು ಆನ್ಲೈನ್ಗೆ ಖರ್ಚು ಮಾಡುವುದಿಲ್ಲ.
ಇದನ್ನೂ ಓದಿ: Sensex Points: ಸೆನ್ಸೆಕ್ಸ್ ಮೂರೇ ದಿನದಲ್ಲಿ 1,800 ಅಂಕಗಳ ಏರಿಕೆ; ಸೆನ್ಸೆಕ್ಸ್ ಪಾಯಿಂಟ್ ಹೇಗೆ ಲೆಕ್ಕಹಾಕಲಾಗುತ್ತೆ?
ಆನ್ಲೈನ್ ಶಾಪ್ಪರ್ಸ್ಗೆ ಅಮೇಜಾನ್ ಫೇವರಿಟ್
ಬೆಂಗಳೂರೇ ಆಗಲೀ ಸಣ್ಣ ನಗರಗಳೇ ಆಗಲಿ ಆನ್ಲೈನ್ ಶಾಪಿಂಗ್ ಮಾಡುವವರಿಗೆ ಅಮೇಜಾನ್ ಮೊದಲ ಫೇವರಿಟ್ ಆಗಿದೆ. ಶೇ. 73ರಷ್ಟು ಮಂದಿ ಅಮೇಜಾನ್ಗೆ ಆದ್ಯತೆ ಕೊಡುತ್ತಾರಂತೆ. ಬಳಿಕ ಫ್ಲಿಪ್ಕಾರ್ಟ್ (ಶೇ. 70), ಟಾಟಾ ಮೀಶೋ (ಶೇ. 30), ರಿಲಾಯನ್ಸ್ನ ಪ್ಲಾಟ್ಫಾರ್ಮ್ಗಳು (ಶೇ. 20) ಹೆಚ್ಚು ಬಳಕೆ ಆಗುತ್ತವೆ.
ಹೊಸ ತಲೆಮಾರಿನವರಿಂದಲೇ ಹೆಚ್ಚಿನ ಶಾಪಿಂಗ್
ಕಳೆದ 6 ತಿಂಗಳಲ್ಲಿ ಆನ್ಲೈನ್ ಶಾಪಿಂಗ್ ಮಾಡಿದವರ ಪೈಕಿ ಮೂರನೇ ಎರಡು ಭಾಗದ ಜನರು 20,000 ರೂವರೆಗೂ ವ್ಯಯಿಸಿದ್ದಾರೆ. ಈ ವಿಚಾರದಲ್ಲಿ ಮಹಾನಗರಗಳು (ಟಯರ್ 1) ಹಾಗೂ ಎರಡನೇ ಸ್ತರದ ನಗರಗಳು (ಟಯರ್ 2) ಸಮಾನವಾಗಿವೆ. ಮುಂಬೈ ಜನರು ಬೆಂಗಳೂರಿನವರಿಗಿಂತ ಹೆಚ್ಚು ಹಣ ವ್ಯಯಿಸಿದ್ದಾರೆ.
ಇದನ್ನೂ ಓದಿ: Home Loan: ಸಾಲಕ್ಕೆ ಇಎಂಐ ಹುಷಾರ್..! 50 ಲಕ್ಷ ಸಾಲ ಪಡೆದು 40 ವರ್ಷ ಇಎಂಐ ಆದರೆ ಕಟ್ಟುವ ಬಡ್ಡಿಯೇ 1.27 ಕೋಟಿ ರೂ
ಆನ್ಲೈನ್ ಶಾಪಿಂಗ್ನಲ್ಲಿ ಬಟ್ಟೆ ಬರೆ, ಫೋನ್ಗಳೇ ಹೆಚ್ಚು
ಆನ್ಲೈನ್ ಶಾಪಿಂಗ್ ಮಾಡುವವರು ಅತಿಹೆಚ್ಚು ಖರೀದಿಸಿದ ವಸ್ತುಗಳೆಂದರೆ ಬಟ್ಟೆ, ಎಲೆಕ್ಟ್ರಾನಿಕ್ಸ್ ಮತ್ತು ಎಲೆಕ್ಟ್ರಾನಿಕ್ ಗ್ಯಾಜೆಟ್ಗಳೇ ಹೆಚ್ಚಂತೆ. ಶೇ. 62ರಷ್ಟು ಮಂದಿ ಕಳೆದ 6 ತಿಂಗಳಲ್ಲಿ ಬಟ್ಟೆಗಳನ್ನು ಖರೀದಿಸಿದ್ದಾರೆ. ಬಿಕರಿಯಾದ ವಸ್ತುಗಳಲ್ಲಿ ಶೇ. 54ರಷ್ಟು ಎಲೆಕ್ಟ್ರಾನಿಕ್ ವಸ್ತುಗಳೇ ಆಗಿವೆ. ಸ್ಮಾರ್ಟ್ಫೋನ್, ಸ್ಮಾರ್ಟ್ವಾಚ್, ಲ್ಯಾಪ್ಟಾಪ್ ಇತ್ಯಾದಿಯವು ಎಲೆಕ್ಟ್ರಾನಿಕ್ ವಸ್ತುಗಳಾಗಿವೆ. ಟಯರ್ 2 ಸಿಟಿ ಎನಿಸಿರುವ ನಾಗಪುರ್ನ ಜನರು ಅನ್ಲೈನ್ನಲ್ಲಿ ಇಂಥ ಎಲೆಕ್ಟ್ರಾನಿಕ್ ವಸ್ತುಗಳ ಖರೀದಿಸುವುದು ಅತಿಹೆಚ್ಚಂತೆ.
ಸ್ಮಾರ್ಟ್ಫೋನ್ ಪೈಕಿ ಜನರಿಗೆ 5ಜಿ ಪ್ರಮುಖ ಮಾನದಂಡವಾಗಿದೆ. ಟ್ಯಾಬ್ಲೆಟ್ ಖರೀದಿಸುವಾಗ ಬ್ಯಾಟರಿ ಬಾಳಿಕೆ, 5ಜಿ ಹೊಂದಾಣಿಕೆ ಮತ್ತು ಆಪರೇಟಿಂಗ್ ಸಿಸ್ಟಂ ಈ ಮೂರು ಅಂಶಗಳು ಖರೀದಿಗೆ ಪ್ರಮುಖ ಮಾನದಂಡಗಳಾಗಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
