BLR Metaport: ಬೆಂಗಳೂರು ವಿಮಾನ ನಿಲ್ದಾಣದ ಟರ್ಮಿನಲ್ 2 ಮೆಟಾವರ್ಸ್ನಲ್ಲಿ ಲಭ್ಯ; ಇದು ವಿಶ್ವದಲ್ಲೇ ಮೊದಲು
ಅಮೆಜಾನ್ ವೆಬ್ ಸರ್ವೀಸಸ್ ಹಾಗೂ ಪಾಲಿಗಾನ್ ಬ್ಲಾಕ್ಚೈನ್ ಸಹಯೋಗದೊಂದಿಗೆ ‘ಬಿಎಲ್ಆರ್ ಮೆಟಾಪೋರ್ಟ್’ ನಿರ್ಮಿಸಲಾಗಿದೆ. ಇದು ಹೊಸದಾಗಿ ಆರಂಭವಾಗಿರುವ ಟರ್ಮಿನಲ್ 2ರ 3ಡಿ (3D) ಹಾಗೂ ತಾಜಾ ವರ್ಚುವಲ್ ಅನುಭವ ನೀಡುತ್ತದೆ.
Updated on:Dec 14, 2022 | 3:52 PM
ಬೆಂಗಳೂರು: ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (BIAL) ಇತ್ತೀಚೆಗೆ ಉದ್ಘಾಟನೆಗೊಂಡಿರುವ ‘ಟರ್ಮಿನಲ್ 2’ ಅನ್ನು ಇನ್ನು ಮೆಟಾವರ್ಸ್ (Metaverse) ಮೂಲಕ ನೋಡಬಹುದು, ವರ್ಚುವಲ್ ಆಗಿ ಒಳ ಪ್ರವೇಶಿಸಿದ ಅನುಭವ ಪಡೆಯಬಹುದು! ಮೊದಲ ಹಂತದ ‘ಬಿಎಲ್ಆರ್ ಮೆಟಾಪೋರ್ಟ್ (BLR Metaport) ಯೋಜನೆಗೆ ಚಾಲನೆ ನೀಡಿರುವುದಾಗಿ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ (BLR Airport) ಆಡಳಿತ ತಿಳಿಸಿದೆ. ಇದರೊಂದಿಗೆ ಬೆಂಗಳೂರು ವಿಮಾನ ನಿಲ್ದಾಣವು ವಿಶ್ವದಲ್ಲೇ ‘ಮೆಟಾವರ್ಸ್’ನಲ್ಲಿ ಕಾಣಿಸಿಕೊಂಡ ಮೊದಲ ವಿಮಾನ ನಿಲ್ದಾಣವಾಗಿ ಗುರುತಿಸಿಕೊಂಡಿದೆ ಎಂದು ಪ್ರಕಟಣೆ ತಿಳಿಸಿದೆ.
ಜನರಿಗೆ ಸಿಗಲಿದೆ 3ಡಿ ಅನುಭವ
ಅಮೆಜಾನ್ ವೆಬ್ ಸರ್ವೀಸಸ್ (AWS) ಹಾಗೂ ಪಾಲಿಗಾನ್ ಬ್ಲಾಕ್ಚೈನ್ ಸಹಯೋಗದೊಂದಿಗೆ ‘ಬಿಎಲ್ಆರ್ ಮೆಟಾಪೋರ್ಟ್’ ನಿರ್ಮಿಸಲಾಗಿದೆ. ಇದು ಹೊಸದಾಗಿ ಆರಂಭವಾಗಿರುವ ಟರ್ಮಿನಲ್ 2ರ 3ಡಿ (3D) ಹಾಗೂ ತಾಜಾ ವರ್ಚುವಲ್ ಅನುಭವ ನೀಡುತ್ತದೆ.
ಆಸಕ್ತ ಪ್ರಯಾಣಿಕರು ಹಾಗೂ ಸಾರ್ವಜನಿಕರು www.blrmetaport.com ವೆಬ್ಸೈಟ್ಗೆ ಲಾಗಿನ್ ಆಗಿ ತಮ್ಮ ಸ್ಮಾರ್ಟ್ಫೋನ್ ಅಥವಾ ಇತರ ಡಿವೈಸ್ಗಳ ಮೂಲಕ ‘ಟರ್ಮಿನಲ್ 2’ ವರ್ಚುವಲ್ ಅನುಭವ ಪಡೆಯಬಹುದು ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಇದನ್ನೂ ಓದಿ: Bengaluru airport ಕಣ್ಮನ ಸೆಳೆಯುವ ಬೆಂಗಳೂರು ವಿಮಾನ ನಿಲ್ದಾಣದ ಟರ್ಮಿನಲ್ 2; ಹೇಗಿದೆ ವಿನ್ಯಾಸ?
‘ಬಿಎಲ್ಆರ್ ಮೆಟಾಪೋರ್ಟ್’ ಎಂಬುದು ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ, ಅಮೆಜಾನ್ ವೆಬ್ ಸರ್ವೀಸಸ್ ಮತ್ತು ಇಂಟೆಲ್ ಜಂಟಿಯಾಗಿ ಘೋಷಿಸಿದ್ದ ಜಂಟಿ ಅನ್ವೇಷಣಾ ಕೇಂದ್ರದ (JIC) ಫಲಶ್ರುತಿಯಾಗಿದೆ. ಜಂಟಿ ಅನ್ವೇಷಣಾ ಕೇಂದ್ರವು ವಿಮಾನ ನಿಲ್ದಾಣದ ಅಭಿವೃದ್ಧಿ ಮತ್ತು ಡಿಜಿಟಲ್ ಸೊಲ್ಯೂಷನ್ಸ್ ಆವಿಷ್ಕರಿಸುವ ನಿಟ್ಟಿನಲ್ಲಿ ಕಾರ್ಯಾಚರಿಸುತ್ತಿದೆ.
ವಿವಿಧ ಸೇವೆಗಳೂ ಲಭ್ಯ
‘ಬಿಎಲ್ಆರ್ ಮೆಟಾಪೋರ್ಟ್’ ಮೂಲಕ ವಿಮಾನ ನಿಲ್ದಾಣದ ಟರ್ಮಿನಲ್ 2ರ ವರ್ಚುವಲ್ ಅನುಭವ ಮಾತ್ರವಲ್ಲದೆ ಇತರ ಹಲವು ಸೇವೆಗಳೂ ಲಭ್ಯವಿವೆ. ಈ ವ್ಯವಸ್ಥೆಯ ಮೂಲಕ ಪ್ರಯಾಣಿಕರು ವಿಮಾನ ನಿಲ್ದಾಣದ ಸಿಬ್ಬಂದಿ ಜತೆ ಸಂವಹನ ನಡೆಸಬಹುದು. ವಿಮಾನಗಳ ವೇಳಾಪಟ್ಟಿ ಪರಿಶೀಲನೆ, ಶಾಪಿಂಗ್, ಇತರ ಪ್ರಯಾಣಿಕರ ಜತೆ ಸಂಪರ್ಕ ಸಾಧಿಸಲೂ ಸಾಧ್ಯವಿದೆ.
ಇದನ್ನೂ ಓದಿ: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ 2 ಉದ್ಘಾಟನೆಗೊಳಿಸಿದ ಪ್ರಧಾನಿ ಮೋದಿ
ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಹೊಸದಾಗಿ ನಿರ್ಮಾಣವಾಗಿರುವ ಟರ್ಮಿನಲ್ 2 ಅನ್ನು ಪ್ರಧಾನಿ ನರೇಂದ್ರ ಮೋದಿ ನವೆಂಬರ್ 11ರಂದು ಉದ್ಘಾಟಿಸಿದ್ದರು. ಸುಮಾರು 13,000 ಕೋಟಿ ರೂಪಾಯಿ ವೆಚ್ಚದಲ್ಲಿ ಸಿದ್ಧವಾಗಿರುವ ಈ ಟರ್ಮಿನಲ್ ಉದ್ಯಾನ ನಗರಿಯ ಖ್ಯಾತಿಗೆ ಮತ್ತೊಂದು ಗರಿಯಾಗಿದೆ. ಕೆಂಪೇಗೌಡ ವಿಮಾನ ನಿಲ್ದಾಣದಲ್ಲಿ ಹೊಸದಾಗಿ ನಿರ್ಮಾಣವಾಗಿರುವ ಟರ್ಮಿನಲ್ 2ರಲ್ಲಿ ಎರಡನೇ ರನ್ ವೇ, ಮಲ್ಟಿಮೋಡಲ್ ಸಾರಿಗೆ ಕೇಂದ್ರ, ಪ್ರವೇಶ ರಸ್ತೆಗಳ ವಿಸ್ತರಣೆ ಮತ್ತು ಆಂತರಿಕ ರಸ್ತೆ ಮೂಲಸೌಕರ್ಯಗಳು ಪ್ರಯಾಣಿಕರಿಗೆ ಲಭ್ಯವಾಗಲಿವೆ. ಈ ಟರ್ಮಿನಲ್ ಅನ್ನು ಗಾರ್ಡನ್ ಟರ್ಮಿನಲ್ ಎಂದೂ ಕರೆಯಲಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 3:41 pm, Wed, 14 December 22
