Trade Unions Nationwide Protest: ಜೂನ್ 26ಕ್ಕೆ ವಿವಿಧ ಕಾರ್ಮಿಕ ಸಂಘಟನೆಗಳಿಂದ ದೇಶದಾದ್ಯಂತ ಪ್ರತಿಭಟನೆ

ಜೂನ್ 26, 2021ರಂದು ಹತ್ತು ಕಾರ್ಮಿಕ ಸಂಘಟನೆಗಳು ದೇಶದಾದ್ಯಂತ ಪ್ರತಿಭಟನೆ ನಡೆಸಲು ನಿರ್ಧರಿಸಿವೆ. ರೈತ ಸಂಘಟನೆಗಳ ಪ್ರತಿಭಟನೆ ಬೆಂಬಲಿಸಿ, ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಈ ಧರಣಿ ಆಯೋಜಿಸಲು ನಿರ್ಧರಿಸಲಾಗಿದೆ.

Trade Unions Nationwide Protest: ಜೂನ್ 26ಕ್ಕೆ ವಿವಿಧ ಕಾರ್ಮಿಕ ಸಂಘಟನೆಗಳಿಂದ ದೇಶದಾದ್ಯಂತ ಪ್ರತಿಭಟನೆ
ಸಾಂದರ್ಭಿಕ ಚಿತ್ರ
TV9kannada Web Team

| Edited By: Srinivas Mata

Jun 15, 2021 | 5:12 PM

ನವದೆಹಲಿ: ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ, ಹತ್ತು ಕಾರ್ಮಿಕ ಒಕ್ಕೂಟಗಳು ರೈತ ಸಂಘಟನೆಗಳ ಜತೆಗೂಡಿ ಜೂನ್ 26, 2021ರಂದು ದೇಶಾದ್ಯಂತ ಪ್ರತಿಭಟನೆ ನಡೆಸಲಿವೆ. ಈಚೆಗೆ ಅನುಮೋದನೆ ನೀಡಿದ ಕೃಷಿ ಕಾನೂನುಗಳನ್ನು, ಕಾರ್ಮಿಕ ಸಂಹಿತೆ ವಾಪಸ್ ಪಡೆಯಬೇಕು ಹಾಗೂ ಬಡವರಿಗೆ ಆದಾಯ ವರ್ಗಾವಣೆ ಯೋಜನೆಗಾಗಿ ಆಗ್ರಹಿಸಿ ಈ ಪ್ರತಿಭಟನೆ ನಡೆಯಲಿದೆ. ಆಲ್ ಇಂಡಿಯಾ ಟ್ರೇಡ್ ಯೂನಿಯನ್ ಕಾಂಗ್ರೆಸ್ (ಎಐಟಿಯುಸಿ), ಸೆಂಟರ್ ಫಾರ್ ಇಂಡಿಯನ್ ಟ್ರೇಡ್ ಯೂನಿಯನ್ಸ್ (ಸಿಐಟಿಯು), ಇಂಡಿಯನ್ ನ್ಯಾಷನಲ್ ಟ್ರೇಡ್ ಯೂನಿಯನ್ ಕಾಂಗ್ರೆಸ್ (ಐಎನ್​ಟಿಯುಸಿ), ಹಿಂದ್ ಮಜ್ದೂರ್ ಸಭಾ (ಎಚ್​ಎಂಎಸ್) ಮತ್ತಿತರ ಸಂಘಟನೆಗಳು ಭಾಗವಹಿಸಲಿವೆ. ಉತ್ತಮ ಉದ್ಯೋಗ, ಒಳ್ಳೆ ಉದ್ಯೋಗ ವಾತಾವರಣ, ಉತ್ತಮ ವೇತನ, ಕೆಲಸದಲ್ಲಿ ಸಮಾನತೆ ಮತ್ತು ಜೂನ್​ 26ನೇ ತಾರೀಕಿಗೆ ರೈತರ ಹೋರಾಟಕ್ಕೆ ಏಳು ತಿಂಗಳು ಪೂರ್ಣ ಆಗುತ್ತಿರುವ ಹೊತ್ತಿನಲ್ಲಿ ಈ ನಿರ್ಧಾರಕ್ಕೆ ಬರಲಾಗಿದೆ.

ಇನ್ನು ಜೂನ್ 26ನೇ ತಾರೀಕಿನಂದು ಹೆಸರಾಂತ ರೈತ ನಾಯಕರಾದ ಸ್ವಾಮಿ ಸಹಜಾನಂದ ಸರಸ್ವತಿ ಅವರು ಮೃತಪಟ್ಟ ದಿನ. ಜೂನ್ 26ರಂದು ರಾಜಭವನಗಳ ಬಳಿ ಧರಣಿ, ಜಿಲ್ಲಾ ಮಟ್ಟದ ಹಾಗೂ ತಾಲೂಕು ಮಟ್ಟದ ಪ್ರತಿಭಟನೆಗಳನ್ನು ದೇಶದಾದ್ಯಂತ ನಡೆಸಲಾಗುವುದು ಎಂದು ಹತ್ತು ಒಕ್ಕೂಟಗಳು ಜಂಟಿ ಹೇಳಿಕೆಯಲ್ಲಿ ತಿಳಿಸಿವೆ. “ಎಲ್ಲ ಸದಸ್ಯರು ಜೂನ್ 26ನೇ ತಾರೀಕಿನ ದೇಶದಾದ್ಯಂತ ನಡೆಸುವ ಧರಣಿಯಲ್ಲಿ ಭಾಗಬಹಿಸುವಂತೆ ಸಿಟಿಯು ಮನವಿ ಮಾಡುತ್ತದೆ,” ಎಂದು ಒಕ್ಕೂಟಗಳು ಹೇಳಿವೆ. ದೇಶದ ಅತಿ ದೊಡ್ಡ ಕಾರ್ಮಿಕ ಒಕ್ಕೂಟಗಳ ಪೈಕಿ ಒಂದಾದ, ಆರೆಸ್ಸೆಸ್ ಜತೆ ಗುರುತಿಸಿಕೊಂಡಿರುವ ಭಾರತೀಯ ಮಜ್ದೂರ್ ಸಂಘ್ (ಬಿಎಂಎಸ್) ಈ ದೇಶವ್ಯಾಪಿ ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳುತ್ತಿಲ್ಲ.

ನಾಲ್ಕು ಕಾರ್ಮಿಕ ಸಂಹಿತೆಯನ್ನು ಮತ್ತು ಮೂರು ಕೃಷಿ ಕಾನೂನು ವಾಪಸ್ ಪಡೆಯಬೇಕು ಮತ್ತು ವಿದ್ಯುಚ್ಛಕ್ತಿ (ತಿದ್ದುಪಡಿ) ಸುಗ್ರೀವಾಜ್ಞೆ, 2021, ತೆರಿಗೆ ಪಾವತಿ ಮಾಡದ ಪ್ರತಿ ಬಡ ಕುಟುಂಬಕ್ಕೆ ತಿಂಗಳಿಗೆ 7,500 ರೂಪಾಯಿ ವರ್ಗಾವಣೆಗೆ ಆಗ್ರಹಿಸಿ ಪ್ರತಿಭಟನೆ ನಡೆಯಲಿದೆ. ನಿರ್ದಿಷ್ಟ ಕಾಲಾವಧಿಯಲ್ಲಿ ಉಚಿತವಾಗಿ ಲಸಿಕೆ ಹಾಕಬೇಕು ಎಂಬ ಬೇಡಿಕೆ ಸಹ ಇದೆ. ಫ್ರಂಟ್​ಲೈನ್ ಕಾರ್ಮಿಕರಿಗೆ 50 ಲಕ್ಷ ರೂಪಾಯಿ ಇನ್ಷೂರೆನ್ಸ್ ಒದಗಿಸಬೇಕು ಮತ್ತು ಕೊವಿಡ್ 19ಗೆ ಮೃತಪಟ್ಟ ಕಾರ್ಮಿಕರ ಕುಟುಂಬಕ್ಕೆ ಸೂಕ್ತ ಪರಿಹಾರ ಒದಗಿಸಬೇಕು ಎಂದು ಆಗ್ರಹಿಸಲಾಗುತ್ತದೆ. ಪಿಎಸ್​ಯುಗಳ ಖಾಸಗೀಕರಣದ ವಿರುದ್ಧ ಕೂಡ ಪ್ರತಿಭಟನೆ ಆಗಲಿದೆ. ಕೊವಿಡ್ ಸಂದರ್ಭದಲ್ಲೂ ಕಾರ್ಯ ನಿರ್ವಹಿಸುತ್ತಿರುವ ರೈಲ್ವೇಸ್, ರಸ್ತೆ ಸಂಚಾರಿ, ಕಲ್ಲಿದ್ದಲು, ರಕ್ಷಣಾ ವಲಯ, SAIL, BHEL, ಟೆಲಿಕಾಂ ಮತ್ತು ಪೋಸ್ಟಲ್​ ಸೇವೆಗಳು, ಬ್ಯಾಂಕ್​ ಮತ್ತು ಇನ್ಷೂರೆನ್ಸ್, ವಿದ್ಯಚ್ಛಕ್ತಿ, ಶಿಕ್ಷಣ ಮತ್ತು ಆರೋಗ್ಯ ಸೇವೆಗಳು, ಇಪಿಎಫ್​ಒ, ಬಂದರು ಮುಂತಾದವುಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವವರನ್ನು ಫ್ರಂಟ್​ಲೈನ್ ಸಿಬ್ಬಂದಿ ಎಂದೇ ಪರಿಗಣಿಸಿ, ಅದಕ್ಕೆ ತಕ್ಕ ಪರಿಹಾರ ನೀಡಬೇಕು ಎಂದಿದ್ದಾರೆ.

ಇದನ್ನೂ ಓದಿ: Labour Codes: ಹೊಸ ಕಾರ್ಮಿಕ ಕಾನೂನಿಂದ ಟೇಕ್ ಹೋಮ್ ವೇತನದಲ್ಲಿ ಇಳಿಕೆ; ಮಾಲೀಕರ ಪಿಎಫ್ ಕೊಡುಗೆ ಏರಿಕೆ

(Central unions including ten trade unions call for nationwide protest on June 26th, 2021 urging to fulfil various demands)

ತಾಜಾ ಸುದ್ದಿ

Follow us on

Related Stories

Most Read Stories

Click on your DTH Provider to Add TV9 Kannada