Gold Investment: ನಿಮ್ಮ ಚಿನ್ನಕ್ಕೆ ಶೇ. 16ರಷ್ಟು ರಿಟರ್ನ್ಸ್ ಕೊಡುತ್ತೆ ಈ ಆಪ್
ಗುಲ್ಲಕ್ ಆಪ್ ನಲ್ಲಿ ನಾವು ಖರೀದಿಸುವ ಚಿನ್ನದ ಮೇಲೆ ವಾರ್ಷಿಕವಾಗಿ ಶೇ. 11ರಷ್ಟು ರಿಟರ್ನ್ಸ್ ನೀಡಲಾಗುತ್ತಿದೆ. ಈಗ ಗುಲ್ಲಕ್ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಗೋಲ್ಡ್ ಪ್ಲಸ್ ಸ್ಕೀಮ್ ಪ್ರಕಟಿಸಿದೆ. ಇದರಲ್ಲಿ ಗ್ರಾಹಕರ ಚಿನ್ನಕ್ಕೆ ವಾರ್ಷಿಕವಾಗಿ ಶೇ. 16ರಷ್ಟು ರಿಟರ್ನ್ಸ್ ಸಿಗುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.
Updated on:Jan 05, 2023 | 2:53 PM
ಉಳಿಸುವ ಹಣ ಗಳಿಸುವ ಹಣಕ್ಕೆ ಸಮ ಎಂದು ತಿಳಿದವರು ಹೇಳುತ್ತಾರೆ. ಇಂದಿನ ಅನಿಶ್ಚಿತ ಕಾಲಘಟ್ಟದಲ್ಲಿ ಉಳಿತಾಯ ಪ್ರವೃತ್ತಿ ಆಪದ್ಬಾಂಧವದಂತೆ ಕೆಲಸ ಮಾಡುತ್ತದೆ. ಉಳಿತಾಯಕ್ಕೆ ಹಲವು ಮಾರ್ಗಗಳಲ್ಲಿ ಚಿನ್ನವೂ ಒಂದು. ಒಡವೆಗಾಗಿ ಚಿನ್ನ(Gold) ಖರೀದಿಸುವ ಒಂದು ವರ್ಗವಾದರೆ, ಉಳಿತಾಯದ ದೃಷ್ಟಿಯಿಂದ ಚಿನ್ನ ಖರೀದಿಸುವ ಇನ್ನೊಂದು ವರ್ಗವಿದೆ. ಈ ಎರಡನೇ ವರ್ಗದ ಸಂಖ್ಯೆ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚುತ್ತಿದೆ. ಅದರಲ್ಲೂ ಡಿಜಿಟಲ್ ಗೋಲ್ಡ್ (Digital Gold) ಖರೀದಿ ಹೆಚ್ಚುತ್ತಿರುವುದು ತಿಳಿದುಬಂದಿದೆ. ಚಿನ್ನದ ಮೇಲಿನ ಬೇಡಿಕೆ ಯಾವತ್ತೂ ಕಡಿಮೆಯಾಗದು ಎಂಬುದು ಹೌದು. ಹೀಗಾಗಿ ಇದು ಸುರಕ್ಷಿತ ಹೂಡಿಕೆ ಮಾರ್ಗ ಎನಿಸಿದೆ.
ಡಿಜಿಟಲ್ ಗೋಲ್ಡ್ ಖರೀದಿ ಈಗ ಬಹಳ ಸರಳ. ಪೇಟಿಎಂ ಇತ್ಯಾದಿ ಅನೇಕ ಆನ್ಲೈನ್ ಪ್ಲಾಟ್ ಫಾರ್ಮ್ ಗಳಲ್ಲಿ ಡಿಜಿಟಲ್ ನಮ್ಮಿಚ್ಛೆಯ ಮೊತ್ತದಷ್ಟು ಚಿನ್ನವನ್ನು ಖರೀದಿಸುವ ಅವಕಾಶ ಇದೆ. ಕೆಲ ಆಪ್ಗಳು ಡಿಜಿಟಲ್ ಗೋಲ್ಡ್ ಮೇಲೆ ಬಡ್ಡಿಯನ್ನೂ ನೀಡುತ್ತವೆ. ಅಂಥ ಕೆಲ ಅಪ್ಲಿಕೇಶನ್ ಗಳಲ್ಲಿ ಗುಲ್ಲಕ್ ಕೂಡ ಒಂದು.
ಗುಲ್ಲಕ್ ಆಪ್ನಲ್ಲಿ ನಾವು ಖರೀದಿಸುವ ಚಿನ್ನದ ಮೇಲೆ ವಾರ್ಷಿಕವಾಗಿ ಶೇ. 11ರಷ್ಟು ರಿಟರ್ನ್ಸ್ ನೀಡಲಾಗುತ್ತಿದೆ. ಈಗ ಗುಲ್ಲಕ್ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಗೋಲ್ಡ್ ಪ್ಲಸ್ ಸ್ಕೀಮ್ ಪ್ರಕಟಿಸಿದೆ. ಇದರಲ್ಲಿ ಗ್ರಾಹಕರ ಚಿನ್ನಕ್ಕೆ ವಾರ್ಷಿಕವಾಗಿ ಶೇ. 16ರಷ್ಟು ರಿಟರ್ನ್ಸ್ ಸಿಗುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.
ಗುಲ್ಲಕ್ನಲ್ಲಿ ನೀವು ಚಿನ್ನದ ಮೇಲೆ ಹೂಡಿಕೆ ಮಾಡಿದರೆ ಒಂದು ವರ್ಷದಲ್ಲಿ ಹೆಚ್ಚುವರಿಯಾಗಿ ಶೇ. 4-5ರಷ್ಟು ಚಿನ್ನ ಪ್ರಾಪ್ತವಾಗುತ್ತದೆ. ಹಾಗೆಯೇ, ಚಿನ್ನದ ಮೌಲ್ಯದ ಹಣಕ್ಕೆ ವಾರ್ಷಿಕವಾಗಿ ಶೇ. 5ರಷ್ಟು ಬಡ್ಡಿಯೂ ಸಿಗುತ್ತದೆ. ಇದು ಚಿನ್ನವನ್ನು ಲೀಸ್ಗೆ ಕೊಡುವ ವಿಧಾನವಾಗಿದೆ.
ಹೇಗೆ ಕೆಲಸ ಮಾಡುತ್ತೆ?
ಗುಲ್ಲಕ್ ದೇಶಾದ್ಯಂತ ವಿವಿಧ ಆಭರಣಕಾರರನ್ನು ಈ ಕಾರ್ಯಕ್ಕಾಗಿ ಜೋಡಿಸಿಕೊಂಡಿದೆ. ಇದು ಆಭರಣಕಾರರು ಮತ್ತು ಜನರ ಮಧ್ಯೆ ಕೊಂಡಿಯಾಗಿ ಕೆಲಸ ಮಾಡುತ್ತದೆ. ಇದರಲ್ಲಿರುವ ಆಭರಣಕಾರರು ವಿಶ್ವಾಸಾರ್ಹವೆಂದು ಪರಿಶೀಲಿಸಲಾಗಿದೆ ಎಂದು ಗುಲ್ಲಕ್ ಹೇಳಿಕೊಳ್ಳುತ್ತದೆ.
ಇದನ್ನು ಓದಿ:US Golden Gate Bridge: ಅಮೆರಿಕದ ಗೋಲ್ಡನ್ ಗೇಟ್ ಬ್ರಿಡ್ಜ್ನಿಂದ ಹಾರಿ ಇಂಡೋ-ಅಮೆರಿಕನ್ ಬಾಲಕ ಆತ್ಮಹತ್ಯೆ
ಗುಲ್ಲಕ್ ಆಪ್ನಲ್ಲಿ ಡಿಜಿಟಲ್ ಗೋಲ್ಡ್ ಖರೀದಿಸುವ ಜನರು ಈ ಚಿನ್ನವನ್ನು ತಮ್ಮಿಚ್ಛೆಯ ಆಭರಣಕಾರರಿಗೆ ಲೀಸ್ಗೆ ಕೊಡಬಹುದು. ಈ ಒಪ್ಪಂದಕ್ಕೆ ಪ್ರತಿಯಾಗಿ ಆಭರಣಕಾರರು ಬ್ಯಾಂಕ್ ಗ್ಯಾರಂಟಿ ನೀಡುತ್ತಾರೆ. ಹೀಗಾಗಿ, ಈ ಹೂಡಿಕೆ ಸುರಕ್ಷಿತ ಎಂಬುದು ಗುಲ್ಲಕ್ ಆಶ್ವಾಸನೆ.
ವಿಶೇಷವೆಂದರೆ, ಜನರು ಎಷ್ಟು ಬೇಕಾದರೂ ಚಿನ್ನವನ್ನು ಲೀಸ್ಗೆ ಕೊಡಬಹುದು. ಕನಿಷ್ಠ ಚಿನ್ನ ಅರ್ಧ ಗ್ರಾಮ್ ಇನ್ನಲಾಗಿದೆ. ಇವೆಲ್ಲವೂ ಆಭರಣ ಚಿನ್ನಗಳಲ್ಲ, ಬದಲಾಗಿ ಶುದ್ಧ ಅಪರಂಜಿ ಚಿನ್ನ. ಅಂದರೆ 24 ಕೆರಟ್ ಗೋಲ್ಡ್ ಆಗಿರುತ್ತವೆ.
ಈ ರೀತಿ ಚಿನ್ನವನ್ನು ಆಭರಣಕಾರರು ಲೀಸ್ಗೆ ಪಡೆಯುವ ಪದ್ಧತಿ ಇದೇ ಮೊದಲಲ್ಲ. ಮೊದಲಿಂದಲೂ ಇದು ಸಾಂಪ್ರದಾಯಿಕವಾಗಿ ನಡೆದುಕೊಂಡು ಬಂದಿದೆ. ಕನಿಷ್ಠ ಒಂದು ಕಿಲೋ ಚಿನ್ನವನ್ನು ಪಡೆಯಲಾಗುತ್ತದೆ. ಈ ರೀತಿ ಅರ್ಧ ಗ್ರಾಮ್ ಚಿನ್ನವನ್ನು ಲೀಸ್ಗೆ ಕೊಡುವ ಅವಕಾಶ ನೀಡುತ್ತಿರುವುದು ಇದೇ ಮೊದಲು ಎನ್ನುತ್ತದೆ ಗುಲ್ಲಕ್.
ಗಮನಿಸಬೇಕಾದ ಅಂಶ ಎಂದರೆ ನೀವು ಲೀಸ್ಗೆ ಕೊಟ್ಟ ಚಿನ್ನವನ್ನು ಯಾವಾಗ ಬೇಕಾದರೂ ಹಿಂಪಡೆಯಬಹುದು. ನಿಮ್ಮ ಚಿನ್ನಕ್ಕೆ ಪ್ರತಿಯಾಗಿ ಆ ಮೌಲ್ಯದ ಹಣವನ್ನು ಪಡೆಯಬಹುದು. ಅಥವಾ ಚಿನ್ನವನ್ನು ನಿಮ್ಮ ಮನೆಗೆ ತರಿಸಿಕೊಳ್ಳಬಹುದು.
ಗುಲ್ಲಕ್ ಅನ್ನು ಗೂಗಲ್ ಪ್ಲೇ ಸ್ಟೋರ್ನಿಂದ ಡೌನ್ಲೋಡ್ ಮಾಡಿಕೊಳ್ಳಬಹುದು.
ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 2:53 pm, Thu, 5 January 23
