ಜಿಎಸ್​ಟಿ ಸಂಗ್ರಹ 1.77 ಲಕ್ಷ ಕೋಟಿ ರೂ; ಕಳೆದ ವರ್ಷಕ್ಕಿಂತ ಶೇ. 7.3ರಷ್ಟು ಹೆಚ್ಚು ತೆರಿಗೆ

ನವದೆಹಲಿ, ಜನವರಿ 1: ಡಿಸೆಂಬರ್ ತಿಂಗಳಲ್ಲಿ ಜಿಎಸ್​ಟಿ ಸಂಗ್ರಹ 1,76,857 ಕೋಟಿ ರೂ ಆಗಿದೆ. ಜನವರಿ 1ರಂದು ಅಧಿಕೃತವಾಗಿ ಬಿಡುಗಡೆಯಾದ ದತ್ತಾಂಶದ ಪ್ರಕಾರ 2023ರ ಡಿಸೆಂಬರ್ ತಿಂಗಳಿಗೆ ಹೋಲಿಸಿದರೆ ತೆರಿಗೆ ಸಂಗ್ರಹದಲ್ಲಿ ಶೇ. 7.3ರಷ್ಟು ಹೆಚ್ಚಾಗಿದೆ. 1,76,857 ಕೋಟಿ ರೂ ಒಟ್ಟು ಜಿಎಸ್​ಟಿ ಸಂಗ್ರಹದಲ್ಲಿ ಕೇಂದ್ರದ ಪಾಲಿನ ಜಿಎಸ್​ಟಿ 32,836 ಕೋಟಿ ರೂ ಇದೆ. ರಾಜ್ಯ ಜಿಎಸ್​ಟಿ 40,499 ಕೋಟಿ ರೂ ಇದೆ. ಐಜಿಎಸ್​ಟಿ 47,783 ಕೋಟಿ ರೂ, ಹಾಗೂ ಸೆಸ್ 11,471 ಕೋಟಿ ರೂ ಆಗಿದೆ.

ಡಿಸೆಂಬರ್​ನಲ್ಲಿ ರೀಫಂಡ್​ಗಳಾಗಿರುವ ಪ್ರಮಾಣ ಹೆಚ್ಚಿದೆ. ವರದಿ ಪ್ರಕಾರ 22,490 ಕೋಟಿ ರೂ ಮೊತ್ತದ ರೀಫಂಡ್​ಗಳಾಗಿವೆ. ಕಳೆದ ವರ್ಷದಕ್ಕಿಂತ ಶೇ. 31ರಷ್ಟು ಹೆಚ್ಚು ರೀಫಂಡ್​ಗಳಾಗಿವೆ. ಇದನ್ನು ಕಳೆದು ಉಳಿದ ನಿವ್ವಳ ಜಿಎಸ್​ಟಿ 1.54 ಲಕ್ಷ ಕೋಟಿ ರೂ ಇದೆ. 2023ರ ಡಿಸೆಂಬರ್​ನಲ್ಲಿ ಆದುದಕ್ಕಿಂತ ಶೇ. 3.3ರಷ್ಟು ಹೆಚ್ಚು ನಿವ್ವಳ ಜಿಎಸ್​ಟಿ ಸಿಕ್ಕಿದೆ.

2024ರ ಡಿಸೆಂಬರ್ ತಿಂಗಳಲ್ಲಿ ಆಂತರಿಕ ವಹಿವಾಟುಗಳ ಮೂಲಕ ಸಂಗ್ರಹವಾದ ಜಿಎಸ್​ಟಿ 1.32 ಲಕ್ಷ ಕೋಟಿ ರೂ. ಹಿಂದಿನ ವರ್ಷದಕ್ಕಿಂತ ಇದರಲ್ಲಿ ಶೇ. 8.4ರಷ್ಟು ಹೆಚ್ಚಳ ಆಗಿದೆ. ಇನ್ನು, ಆಮದುಗಳಿಂದ ಬಂದಿರುವ ತೆರಿಗೆ 44,268 ಕೋಟಿ ರೂ ಇದೆ.

ಇದನ್ನೂ ಓದಿ: ಸ್ಪೇಸ್ ಡಾಕಿಂಗ್ ಆಯ್ತು; 2025ರ ಮೊದಲಾರ್ಧದಲ್ಲಿ ಭಾರತದಿಂದ ಬಾಹ್ಯಾಕಾಶ ಯೋಜನೆಗಳ ಸರಮಾಲೆ

ಡಿಸೆಂಬರ್​ನ ಹಿಂದಿನ ತಿಂಗಳಲ್ಲಿ, ಅಂದರೆ ನವೆಂಬರ್​ನಲ್ಲಿ 1.82 ಲಕ್ಷ ಕೋಟಿ ರೂ ಜಿಎಸ್​ಟಿ ಬಂದಿತ್ತು. ಡಿಸೆಂಬರ್​ನಲ್ಲಿ ಜಿಎಸ್​ಟಿ ಸಂಗ್ರಹ ಕಡಿಮೆ ಆಗಿರುವುದು ಅನಿರೀಕ್ಷಿತವಲ್ಲ. ಕಳೆದ ಕ್ವಾರ್ಟರ್​ನಲ್ಲಿ ಜಿಡಿಪಿ ದರ ಕಡಿಮೆ ಆಗಿರುವುದು ಆರ್ಥಿಕ ಚಟುವಟಿಕೆ ಮಂದಗೊಂಡಿರುವ ಸಂಕೇತವಾಗಿದೆ. ಅದಕ್ಕೆ ಅನುಗುಣವಾಗಿ ಜಿಎಸ್​ಟಿ ಸಂಗ್ರಹವೂ ಕಡಿಮೆ ಇದೆ.

ಈ ಕ್ವಾರ್ಟರ್​ನಲ್ಲಿ ಜಿಡಿಪಿ ಹೆಚ್ಚು ಬೆಳವಣಿಗೆ ಹೊಂದುವ ಸಾಧ್ಯತೆ ಇರುವುದರಿಂದ ಮಾಸಿಕ ಜಿಎಸ್​ಟಿ ಸಂಗ್ರಹದಲ್ಲೂ ಹೆಚ್ಚಳವಾಗುವ ನಿರೀಕ್ಷೆ ಇದೆ ಎಂದು ತಜ್ಞರು ಹೇಳುತ್ತಾರೆ.

2024ರಲ್ಲಿ ಕೊನೆಯ ನಾಲ್ಕು ತಿಂಗಳ ಜಿಎಸ್​ಟಿ ಸಂಗ್ರಹದ ವಿವರ

1. ಸೆಪ್ಟೆಂಬರ್: 1,73,240 ಕೋಟಿ ರೂ
2. ಅಕ್ಟೋಬರ್: 1,87,346 ಕೋಟಿ ರೂ
3. ನವೆಂಬರ್: 1,82,269 ಕೋಟಿ ರೂ
4. ಡಿಸೆಂಬರ್: 1,76,857 ಕೋಟಿ ರೂ

ಇದನ್ನೂ ಓದಿ: ಭಾರತದಿಂದ ಕಾಫಿ ರಫ್ತು; ಮೊದಲ ಬಾರಿ ಒಂದು ಬಿಲಿಯನ್ ಡಾಲರ್ ಮೈಲಿಗಲ್ಲು

ಈ ಹಣಕಾಸು ವರ್ಷದಲ್ಲಿ ಇಲ್ಲಿಯವರೆಗೆ (ಏಪ್ರಿಲ್​ನಿಂದ ಡಿಸೆಂಬರ್) 16,33,569 ಕೋಟಿ ರೂ ಜಿಎಸ್​ಟಿ ಸಿಕ್ಕಿದೆ. ಕಳೆದ ವರ್ಷದಕ್ಕಿಂತ ಶೇ. 9.10ರಷ್ಟು ಹೆಚ್ಚು ತೆರಿಗೆ ಬಂದಿದೆ. ಆದರೆ, 2024-25ರ ಹಣಕಾಸು ವರ್ಷಕ್ಕೆ ನಿಗದಿ ಮಾಡಿರುವ ಗುರಿಗಿಂತ ಜಿಎಸ್​ಟಿ ಸಂಗ್ರಹ ಶೇ. 19ರಷ್ಟು ಕಡಿಮೆ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ