GST: ಜೂನ್​​ನಲ್ಲಿ 1.85 ಲಕ್ಷ ಕೋಟಿ ರೂ ಜಿಎಸ್​​ಟಿ; ಐದು ವರ್ಷದಲ್ಲಿ ಎರಡು ಪಟ್ಟು ಹೆಚ್ಚಿದ ವಾರ್ಷಿಕ ಟ್ಯಾಕ್ಸ್ ಸಂಗ್ರಹ

ನವದೆಹಲಿ, ಜುಲೈ 1: ಭಾರತದಲ್ಲಿ ಒಟ್ಟು ಜಿಎಸ್​​ಟಿ ಸಂಗ್ರಹ (GST collections) 2024-25ರಲ್ಲಿ 22.08 ಲಕ್ಷ ಕೋಟಿ ರೂನಷ್ಟಾಗಿದೆ. ಇದು ಸಾರ್ವಕಾಲಿಕ ದಾಖಲೆ ಎನಿಸಿದೆ. ಹಿಂದೆಂದೂ ಯಾವುದೇ ವರ್ಷದಲ್ಲೂ ಜಿಎಸ್​​ಟಿ ಇಷ್ಟೊಂದು ಸಿಕ್ಕಿರಲಿಲ್ಲ. 2020-21ರ ಹಣಕಾಸು ವರ್ಷದಲ್ಲಿ 11.37 ಲಕ್ಷ ಕೋಟಿ ರೂ ಜಿಎಸ್​ಟಿ ಸಿಕ್ಕಿತ್ತು. ಐದು ವರ್ಷದ ಬಳಿಕ ಈ ಸರಕು ಮತ್ತು ಸೇವಾ ತೆರಿಗೆ ಸಂಗ್ರಹ ದ್ವಿಗುಣಗೊಂಡಿರುವುದು ವಿಶೇಷ.

2021-22ರಲ್ಲಿ ಸರಾಸರಿ ಮಾಸಿಕ ಜಿಎಸ್​​ಟಿ ಸಂಗ್ರಹ 1.51 ಲಕ್ಷ ಕೋಟಿ ರೂ ಇತ್ತು. 2024-25ರಲ್ಲಿ ಅದು 1.84 ಲಕ್ಷ ಕೋಟಿ ರೂಗೆ ಏರಿದೆ.

ಜಿಎಸ್​​ಟಿ ನೊಂದಾಯಿತ ತೆರಿಗೆ ಪಾವತಿದಾರರ ಸಂಖ್ಯೆಯೂ ಗಣನೀಯವಾಗಿ ಹೆಚ್ಚುತ್ತಿದೆ. 2017ರಲ್ಲಿ 65 ಲಕ್ಷ ನೊಂದಾಯಿತ ತೆರಿಗೆ ಪಾವತಿದಾರರಿದ್ದರು. 2024-25ರಲ್ಲಿ ಇವರ ಸಂಖ್ಯೆ 1.51 ಕೋಟಿಗಿಂತಲೂ ಹೆಚ್ಚಿದೆ.

ಇದನ್ನೂ ಓದಿ: LPG Cylinder Price: ವಾಣಿಜ್ಯ ಬಳಕೆಯ ಎಲ್​ಪಿಜಿ ಸಿಲಿಂಡರ್ ಬೆಲೆಯಲ್ಲಿ ಭಾರಿ ಇಳಿಕೆ

2025ರ ಜೂನ್ ತಿಂಗಳಲ್ಲಿ 1.85 ಲಕ್ಷ ಕೋಟಿ ರೂ ಜಿಎಸ್​​ಟಿ ಸಂಗ್ರಹ

ಇವತ್ತು ಬಿಡುಗಡೆಯಾದ ದತ್ತಾಂಶದ ಪ್ರಕಾರ ಈ ಜೂನ್ ತಿಂಗಳಲ್ಲಿ ಒಟ್ಟು ಜಿಎಸ್​​ಟಿ ಸಂಗ್ರಹ 1.85 ಲಕ್ಷ ಕೋಟಿ ರೂ ಎನ್ನಲಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ. 6.2ರಷ್ಟು ಹೆಚ್ಚು ಜಿಎಸ್​​ಟಿ ಆದಾಯ ಸರ್ಕಾರಕ್ಕೆ ಸಿಕ್ಕಿದೆ.

ಹಿಂದಿನ ಎರಡು ತಿಂಗಳಿಗೆ ಹೋಲಿಸಿದರೆ ಜಿಎಸ್​​ಟಿ ಸಂಗ್ರಹ ಇಳಿಕೆಯಾಗಿದೆ. ಏಪ್ರಿಲ್ ತಿಂಗಳಲ್ಲಿ ದಾಖಲೆಯ 2.37 ಲಕ್ಷ ಕೋಟಿ ರೂ, ಮೇ ತಿಂಗಳಲ್ಲಿ 2.01 ಲಕ್ಷ ಕೋಟಿ ರೂ ಜಿಎಸ್​​ಟಿ ಸಿಕ್ಕಿತ್ತು. ಈ ಹಣಕಾಸು ವರ್ಷದಲ್ಲಿ ಮೊದಲ ಬಾರಿಗೆ ಮಾಸಿಕ ಜಿಎಸ್​​ಟಿ ಸಂಗ್ರಹ 2 ಲಕ್ಷ ಕೋಟಿ ರೂಗಿಂತ ಕೆಳಗೆ ಹೋಗಿದೆ.

ಇದನ್ನೂ ಓದಿ: ಜುಲೈನಲ್ಲಿ ಆಧಾರ್, ಪ್ಯಾನ್, ಎಟಿಎಂ, ಕ್ರೆಡಿಟ್ ಕಾರ್ಡ್ ಇತ್ಯಾದಿಯಲ್ಲಿ ನಿಯಮ ಬದಲಾವಣೆಗಳಿವೆ, ಗಮನಿಸಿ

ಜಿಎಸ್​​ಟಿ ಜಾರಿಗೆ ಬಂದು ಇವತ್ತಿಗೆ 8 ವರ್ಷ

ಭಾರತದಲ್ಲಿ ಸರಕು ಮತ್ತು ಸೇವಾ ತೆರಿಗೆ ವ್ಯವಸ್ಥೆ 2017ರ ಜುಲೈ 1ರಂದು ಜಾರಿಗೆ ಬಂದಿತ್ತು. ಇವತ್ತಿಗೆ ಜಿಎಸ್​ಟಿಗೆ ಎಂಟು ವರ್ಷ ಪೂರ್ಣವಾಗಿದೆ. ವಿವಿಧ ಸ್ಥಳೀಯ ತೆರಿಗೆಗಳು ಮತ್ತು ಸೆಸ್​​ಗಳಿಂದ ಸಾಕಷ್ಟು ಗೋಜಲು ಮತ್ತು ಸಂಕೀರ್ಣತೆ ಹೊಂದಿದ್ದ ಟ್ಯಾಕ್ಸ್ ಸಿಸ್ಟಂ ಬದಲು ಬಹಳ ಸರಳ ಹಾಗೂ ನೇರ ಟ್ಯಾಕ್ಸ್ ಸಿಸ್ಟ ಆದ ಜಿಎಸ್​​ಟಿಯನ್ನು ತರಲಾಗಿತ್ತು. ಶೇ. 5ರಿಂದ ಆರಂಭವಾಗಿ ಶೇ. 28ರವರೆಗೂ ಸದ್ಯ ನಾಲ್ಕು ಟ್ಯಾಕ್ಸ್ ಸ್ಲ್ಯಾಬ್​ಗಳನ್ನು ಜಿಎಸ್​​ಟಿ ಸಿಸ್ಟಂ ಹೊಂದಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ