GST: ಮೇ ತಿಂಗಳ ಜಿಎಸ್​ಟಿ ಸಂಗ್ರಹ 1,02,709 ಕೋಟಿ; ಕಳೆದ ವರ್ಷಕ್ಕಿಂತ ಶೇ 65ರಷ್ಟು ಹೆಚ್ಚು, ಏಪ್ರಿಲ್​ಗಿಂತ ಶೇ 27ರಷ್ಟು ಕಮ್ಮಿ

2021ನೇ ಇಸವಿಯ ಮೇ ತಿಂಗಳಲ್ಲಿ ಸಂಗ್ರಹವಾದ ಜಿಎಸ್​ಟಿ ಮೊತ್ತದ ಬಗೆಗಿನ ಅಂಕಿ- ಅಂಶ ಶನಿವಾರ (ಜೂನ್ 5, 2021) ಹೊರಬಂದಿದೆ. ದೇಶದಲ್ಲಿ ಒಟ್ಟು 1,02,709 ಕೋಟಿ ರೂಪಾಯಿ ಸಂಗ್ರಹ ಆಗಿದೆ. ಕಳೆದ ವರ್ಷದ ಮೇ ತಿಂಗಳಿಗೆ ಹೋಲಿಸಿದರೆ ಶೇಕಡಾ 65ರಷ್ಟು ಜಿಎಸ್​ಟಿ ಸಂಗ್ರಹ ಹೆಚ್ಚಳವಾಗಿದೆ. ಅಂದ ಹಾಗೆ ಸತತವಾಗಿ ಕಳೆದ 8 ತಿಂಗಳಿನಿಂದಲೂ ಜಿಎಸ್​ಟಿ ಸಂಗ್ರಹ ಮೊತ್ತವು 1 ಲಕ್ಷ ಕೋಟಿ ರೂಪಾಯಿ ದಾಟುತ್ತಿದೆ. ಕೊರೊನಾ ಎರಡನೇ ಅಲೆಯ ಕಾರಣಕ್ಕೆ ಸೋಂಕಿನ ಪ್ರಕರಣದಲ್ಲಿ ಭಾರೀ ಹೆಚ್ಚಳವಾಗಿ, ಬಹುತೇಕ ರಾಜ್ಯಗಳಲ್ಲಿ ಲಾಕ್​ಡೌನ್ ಅಥವಾ ನಿರ್ಬಂಧವನ್ನು ಘೋಷಿಸಿರುವುದರಿಂದ ಆರ್ಥಿಕ ಚಟುವಟಿಕೆಗಳು ಕಡಿಮೆ ಆಗಿವೆ. ಈ ಮಧ್ಯೆಯೂ ಜಿಎಸ್​ಟಿ ಸಂಗ್ರಹ ಮೊತ್ತವು 1 ಲಕ್ಷ ಕೋಟಿ ರೂಪಾಯಿಯನ್ನು ದಾಟಿದೆ ಎಂಬುದು ಇಲ್ಲಿ ಗಮನಿಸಬೇಕಾದ ಅಂಶ.

ಕಳೆದ ತಿಂಗಳು, ಏಪ್ರಿಲ್​ನಲ್ಲಿ 1.41 ಲಕ್ಷ ಕೋಟಿ ರೂಪಾಯಿಯ ಜಿಎಸ್​ಟಿ ಸಂಗ್ರಹವಾಗಿತ್ತು. ಅದಕ್ಕೆ ಹೋಲಿಸಿದರೆ ಮೇ ತಿಂಗಳಲ್ಲಿ 38 ಸಾವಿರ ಕೋಟಿ ರೂಪಾಯಿಗೂ ಹೆಚ್ಚಿನ ಪ್ರಮಾಣದಲ್ಲಿ, ಅಂದರೆ ಶೇ 27ರಷ್ಟು ಜಿಎಸ್​ಟಿ ಸಂಗ್ರಹ ಕಡಿಮೆ ಆಗಿದೆ. ಮೊದಲೇ ಹೇಳಿದಂತೆ ಮೇ ತಿಂಗಳಲ್ಲಿ ಕೊರೊನಾ ಕಾರಣದಿಂದ ದೇಶದ ಬಹುತೇಕ ರಾಜ್ಯಗಳಲ್ಲಿ ಲಾಕ್​ಡೌನ್ ಘೋಷಣೆ ಮಾಡಲಾಗಿದೆ ಮತ್ತು ಕೆಲವೆಡೆ ಕಠಿಣ ನಿರ್ಬಂಧಗಳನ್ನು ಘೋಷಿಸಿರುವುದರಿಂದ ಆರ್ಥಿಕ ಚಟುವಟಿಕೆಗಳಿಗೆ ತೀವ್ರ ಹಿನ್ನಡೆಯಾಗಿ, ಸರ್ಕಾರಕ್ಕೆ ಬರಬೇಕಾದ ಆದಾಯ ಸಂಗ್ರಹವು ಕಡಿಮೆ ಆಗಿದೆ. ಮೇ ತಿಂಗಳ ಜಿಎಸ್​ಟಿ ಫೈಲಿಂಗ್​ಗಾಗಿ ಜೂನ್ 4ನೇ ತಾರೀಕಿನ ತನಕ ಅವಕಾಶ ಇದೆ. ಈ ಬಗ್ಗೆ ಕೇಂದ್ರದ ಹಣಕಾಸು ಇಲಾಖೆಯಿಂದ ಮಾಹಿತಿಯನ್ನು ಬಿಡುಗಡೆ ಮಾಡಲಾಗಿದೆ.

ಮೇ ತಿಂಗಳಲ್ಲಿ ಸಿಜಿಎಸ್​ಟಿ ರೂ. 17,592 ಕೋಟಿ ಸಂಗ್ರಹ ಆಗಿದೆ. ಎಸ್​ಜಿಎಸ್​ಟಿ ರೂ. 22,653 ಕೋಟಿ, ಐಜಿಸಿಟಿ 53,199 ಕೋಟಿ ರೂಪಾಯಿ (ಇದರಲ್ಲಿ 26,002 ಕೋಟಿ ರೂಪಾಯಿ ವಸ್ತುಗಳ ಆಮದಿನ ಮೇಲೆ ಸಂಗ್ರಹ ಆಗಿರುವುದು ಸೇರಿಕೊಂಡಿದೆ) ಎಂದು ತಿಳಿಸಲಾಗಿದೆ. ಈ ತಿಂಗಳಲ್ಲಿ ಸರ್ಕಾರದಿಂದ ಸಿಜಿಎಸ್​ಟಿ ರೂ. 15,014 ಕೋಟಿ, 11,653 ಕೋಟಿ ರೂಪಾಯಿಯನ್ನು ಐಜಿಎಸ್​ಟಿಯಿಂದ ಎಸ್​ಜಿಎಸ್​ಟಿ ವಿಲೇವಾರಿ ಮಾಡಲಾಗಿದೆ ಎಂದು ಹೇಳಿಕೆಯಲ್ಲಿ ತಿಳಿದೆ. ಅಂದಹಾಗೆ ಮೇ ತಿಂಗಳಲ್ಲಿನ ಜಿಎಸ್​ಟಿ ಸಂಗ್ರಹ ಇನ್ನೂ ಹೆಚ್ಚಾಗಬಹುದು. ಏಕೆಂದರೆ ಯಾವ ವ್ಯವಹಾರಕ್ಕೆ 5 ಕೋಟಿ ರೂಪಾಯಿಗಿಂತ ಕಡಿಮೆ ವಹಿವಾಟು ಇದೆಯೋ ಅಂಥವರಿಗೆ ತೆರಿಗೆ ಪಾವತಿಗೆ ಜುಲೈ ಮೊದಲ ವಾರದ ತನಕ ಅವಕಾಶ ನೀಡಲಾಗಿದೆ.

ಇದನ್ನೂ ಓದಿ: GST revenue collection: 2021ರ ಏಪ್ರಿಲ್​ನಲ್ಲಿ ಸಾರ್ವಕಾಲಿಕ ಗರಿಷ್ಠ ಜಿಎಸ್​ಟಿ 1.41 ಲಕ್ಷ ಕೋಟಿ ರೂ. ಸಂಗ್ರಹ

(GST collection for 2021 May amounts to 1,02,709 crore Rupees. Compare to last year May 65% higher)

Published On - 6:06 pm, Sat, 5 June 21