HDFC Merger: ಜುಲೈ 1ರಂದು ಎಚ್ಡಿಎಫ್ಸಿ ವಿಲೀನ; 13ಕ್ಕೆ ಷೇರುಪೇಟೆಗಳಿಂದ ಹೊರಕ್ಕೆ; ಎಚ್ಡಿಎಫ್ಸಿ ಜಾಗಕ್ಕೆ ಅದಾನಿ ಎಂಟರ್ಪ್ರೈಸಸ್, ಎಲ್ಟಿಐ ಮೈಂಡ್ಟ್ರೀಗೆ ಮಣೆಸಾಧ್ಯತೆ
Adani Enterprises May Replace HDFC In Sensex: ಎಚ್ಡಿಎಫ್ಸಿ ವಿಲೀನದ ಬಳಿಕ ಎಚ್ಡಿಎಫ್ಸಿ ಬ್ಯಾಂಕ್ 18 ಲಕ್ಷ ಕೋಟಿ ರೂ ಮೊತ್ತದ ಕಂಪನಿಯಾಗಿ ಹಿಗ್ಗಲಿದೆ. ಎಚ್ಡಿಎಫ್ಸಿ ಷೇರುದಾರರು ಬ್ಯಾಂಕ್ನಲ್ಲಿ ಶೇ. 41ರಷ್ಟು ಪಾಲು ಹೊಂದಿರಲಿದ್ದಾರೆ.
ನವದೆಹಲಿ: ದೇಶದ ಇತಿಹಾಸದಲ್ಲೇ ಅತಿದೊಡ್ಡ ಕಾರ್ಪೊರೇಟ್ ಖರೀದಿ ಒಪ್ಪಂದ ಎಂದು ಪರಿಗಣಿತವಾಗುತ್ತಿರುವ ಎಚ್ಡಿಎಫ್ಸಿ ಮತ್ತು ಎಚ್ಡಿಎಫ್ಸಿ ಬ್ಯಾಂಕುಗಳ ವಿಲೀನ (HDFC- HDFC Bank Merger) ಪ್ರಕ್ರಿಯೆ ಜುಲೈ 1ಕ್ಕೆ ಜಾರಿಯಾಗಲಿದೆ. ಅಂದರೆ ಜುಲೈ 1ರಿಂದ ಎಚ್ಡಿಎಫ್ಸಿ ಮಾಯವಾಗಲಿದ್ದು, ಎಚ್ಡಿಎಫ್ಸಿ ಬ್ಯಾಂಕ್ ಮಾತ್ರವೇ ಉಳಿದಿರುತ್ತದೆ. ಎಚ್ಡಿಎಫ್ಸಿ ಮಂಡಳಿ ಮತ್ತು ಎಚ್ಡಿಎಫ್ಸಿ ಬ್ಯಾಂಕ್ ಮಂಡಳಿ ಸದಸ್ಯರು ಜೂನ್ 30ಕ್ಕೆ ಒಟ್ಟು ಸೇರಲಿದ್ದು, ವಿಲೀನಕ್ಕೆ ಅನುಮೋದನೆ ಕೊಡಲಿದ್ದಾರೆ. ಈ ವಿಚಾರವನ್ನು ಎಚ್ಡಿಎಫ್ಸಿ ಛೇರ್ಮನ್ ದೀಪಕ್ ಪರೇಖ್ ಮಾಧ್ಯಮಗಳಿಗೆ ಇಂದು ತಿಳಿಸಿದ್ದಾರೆ.
ಇದಾದ ಬಳಿಕ, ಜುಲೈ 13ಕ್ಕೆ ಎಚ್ಡಿಎಫ್ಸಿ ಸಂಸ್ಥೆ ಷೇರುಪೇಟೆಗಳಿಂದ ಹೊರಬೀಳುತ್ತದೆ. ಅಂದರೆ ಅದರ ಷೇರು ಡೀಲಿಸ್ಟ್ ಆಗುತ್ತದೆ. ಬಿಎಸ್ಇ ಸೆನ್ಸೆಕ್ಸ್ ಸೂಚ್ಯಂಕ ಹಾಗೂ ಎನ್ಎಸ್ಇ ನಿಫ್ಟಿ ಸೂಚ್ಯಂಕದಿಂದ ಎಚ್ಡಿಎಫ್ಸಿ ಡೀಲಿಸ್ಟ್ ಆಗುತ್ತದೆ. ಆ ಇಂಡೆಕ್ಸ್ಗಳಲ್ಲಿ ಎಚ್ಡಿಎಫ್ಸಿ ಬದಲು ಬೇರೆ ಕಂಪನಿಗಳ ಷೇರುಗಳನ್ನು ಒಳಗೊಳ್ಳುವ ಸಾಧ್ಯತೆ ಇದೆ. ವರದಿಗಳ ಪ್ರಕಾರ, 30 ಆಯ್ದ ಷೇರುಗಳಿರುವ ಸೆನ್ಸೆಕ್ಸ್ನಲ್ಲಿ ಎಚ್ಡಿಎಫ್ಸಿ ಜಾಗಕ್ಕೆ ಅದಾನಿ ಎಂಟರ್ಪ್ರೈಸಸ್ ಸಂಸ್ಥೆಯನ್ನು ಭರ್ತಿ ಮಾಡಲಾಗಬಹುದು. ನಿಫ್ಟಿ50 ಸೂಚ್ಯಂಕದಲ್ಲಿ ಅದರ ಸ್ಥಾನಕ್ಕೆ ಎಲ್ಟಿಐ ಮೈಂಡ್ಟ್ರೀ ಬರುವ ಸಾಧ್ಯತೆ ಇದೆ.
ಇದನ್ನೂ ಓದಿ: Adani Prediction: ಭಾರತದ ಆರ್ಥಿಕತೆ: 2030ಕ್ಕೆ ನಂ. 3, 2050ಕ್ಕೆ ನಂ. 2- ಗೌತಮ್ ಅದಾನಿ ಭವಿಷ್ಯ
ಎಚ್ಡಿಎಫ್ಸಿ ಮತ್ತು ಬ್ಯಾಂಕ್ ವಿಲೀನದಿಂದ ಬೃಹತ್ ಸಂಸ್ಥೆ
ಎಚ್ಡಿಎಫ್ಸಿ ಸಂಸ್ಥೆ ಮೂಲತಃ ಗೃಹ ನಿರ್ಮಾಣ ಕ್ಷೇತ್ರದಲ್ಲಿ ಸಾಲ ಕೊಡುವ ಸಂಸ್ಥೆ. ಎಚ್ಡಿಎಫ್ಸಿ ಬ್ಯಾಂಕ್ಗೆ ಇದು ಮಾತೃ ಸಂಸ್ಥೆ. ತನ್ನ ಅಂಗಸಂಸ್ಥೆಯೊಂದಿಗೆ ಎಚ್ಡಿಎಫ್ಸಿ ವಿಲೀನಗೊಳ್ಳುತ್ತಿದೆ. ಏಪ್ರಿಲ್ 4ರಂದು ಎಚ್ಡಿಎಫ್ಸಿಯನ್ನು ಖರೀದಿಸಲು ಎಚ್ಡಿಎಫ್ಸಿ ಬ್ಯಾಂಕ್ ಒಪ್ಪಿಕೊಂಡಿತ್ತು. ಇದು ಬರೋಬ್ಬರಿ 40 ಬಿಲಿಯನ್ ಡಾಲರ್ (3.27 ಲಕ್ಷ ಕೋಟಿ ರೂ) ಮೊತ್ತದ ಒಪ್ಪಂದವಾಗಿದೆ. ವಿಲೀನಗೊಂಡ ಬಳಿಕ ಎಚ್ಡಿಎಫ್ಸಿ ಬ್ಯಾಂಕ್ನ ಒಟ್ಟು ಆಸ್ತಿ ಮೌಲ್ಯ 18 ಲಕ್ಷ ಕೋಟಿ ರೂ ಆಗಲಿದೆ.
ಇನ್ನೂ ಒಂದು ಸಂಗತಿ ಎಂದರೆ ವಿಲೀನದ ಬಳಿಕ ಎಚ್ಡಿಎಫ್ಸಿ ಬ್ಯಾಂಕ್ನಲ್ಲಿ ಶೇ. 100ರಷ್ಟು ಸಾರ್ವಜನಿಕ ಷೇರುದಾರರ ಪಾಲು ಇರಲಿದೆ. ಎಚ್ಡಿಎಫ್ಸಿ ಮತ್ತು ಎಚ್ಡಿಎಫ್ಸಿ ಬ್ಯಾಂಕ್ ಎರಡೂ ಕೂಡ ಷೇರುಪೇಟೆಯಲ್ಲಿ ಲಿಸ್ಟ್ ಆಗಿದ್ದರಿಂದ ಷೇರುಹಂಚಿಕೆ ಸೂತ್ರ ಜಾರಿ ಮಾಡಲಾಗಿದೆ. ಅದರಂತೆ ಎಚ್ಡಿಎಫ್ಸಿಯ 25 ಷೇರಿಗೆ ಪ್ರತಿಯಾಗಿ ಎಚ್ಡಿಎಫ್ಸಿ ಬ್ಯಾಂಕ್ನ 42 ಷೇರುಗಳು ಸಿಗುತ್ತವೆ. ಈ ಹೊಸ ಷೇರುಗಳು ಜುಲೈ 3ನೇ ವಾರದಂದು ಷೇರುಪೇಟೆಗಳಲ್ಲಿ ಲಿಸ್ಟ್ ಆಗಲಿವೆ. ವಿಲೀನದ ಬಳಿಕ ಎಚ್ಡಿಎಫ್ಸಿಯ ಷೇರುದಾರರು ಎಚ್ಡಿಎಫ್ಸಿ ಬ್ಯಾಂಕ್ನ ಶೇ. 40ಕ್ಕಿಂತ ಹೆಚ್ಚಿನ ಪಾಲು ಹೊಂದಲಿರುವುದು ವಿಶೇಷ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ