NPS: ಎನ್ಪಿಎಸ್ ಖಾತೆಯಿಂದ ಹಣ ವಾಪಸ್ ಪಡೆಯುವುದು ಹೇಗೆ? ಷರತ್ತು, ನಿಯಮಗಳ ಪೂರ್ಣ ವಿವರ ಇಲ್ಲಿದೆ
ಎನ್ಪಿಎಸ್ನಿಂದ ಹಣ ವಾಪಸ್ ಪಡೆಯಬೇಕಾದ ಸಂದರ್ಭದ ಬಂದರೆ ಅದಕ್ಕೆ ಕೆಲವು ನಿಯಮಗಳು ಹಾಗೂ ಷರತ್ತುಗಳಿವೆ. ಅವುಗಳ ಪೂರ್ಣ ವಿವರ ಇಲ್ಲಿದೆ.
ತೆರಿಗೆ ಉಳಿತಾಯ (Tax Saving) ಮಾಡುವ ನಿಟ್ಟಿನಲ್ಲಿ ದೀರ್ಘಾವಧಿಯ ಹೂಡಿಕೆಗೆ (Long Term Investment) ರಾಷ್ಟ್ರೀಯ ಪಿಂಚಣಿ ಯೋಜನೆ (NPS) ಉತ್ತಮ ಆಯ್ಕೆಯಾಗಿದೆ. ಎನ್ಪಿಎಸ್ ಪಿಂಚಣಿಗೆ ಸಂಬಂಧಿಸಿದ ಹೂಡಿಕೆ ಯೋಜನೆ. ಈ ಯೋಜನೆಗೆ ಷೇರುಪೇಟೆ ಜತೆಗೂ ಸಂಬಂಧ ಇದೆ. ಈ ಹೂಡಿಕೆಯಿಂದ ದೊರೆಯುವ ಆದಾಯ ಷೇರುಪೇಟೆ ವಹಿವಾಟನ್ನೂ ಅವಲಂಬಿಸಿರುತ್ತದೆ ಎಂಬುದನ್ನು ಗಮನಿಸಬೇಕು. ಖಾಸಗಿ ವಲಯದ ಉದ್ಯೋಗಿಗಳಿಗೆ ಪಿಂಚಣಿ ಪಡೆಯಲು ಇದೊಂದು ಉತ್ತಮ ಆಯ್ಕೆ ಆಗಿದೆ.
ಆದರೆ ಎನ್ಪಿಎಸ್ನಿಂದ ಹಣ ವಾಪಸ್ ಪಡೆಯಬೇಕಾದ ಸಂದರ್ಭದ ಬಂದರೆ ಅದಕ್ಕೆ ಕೆಲವು ನಿಯಮಗಳು ಹಾಗೂ ಷರತ್ತುಗಳಿವೆ ಎಂಬುದನ್ನು ಗಮನಿಸಬೇಕು. ಎನ್ಪಿಎಸ್ನಲ್ಲಿ ಹೂಡಿಕೆ ಆರಂಭಿಸಿ 5 ವರ್ಷ ಆಗುವ ಮುನ್ನ ಹಣ ಹಿಂಪಡೆಯಲಾಗದು. ಒಂದು ವೇಳೆ ಹಿಂಪಡೆಯಲೇಬೇಕು ಎಂದಿದ್ದಲ್ಲಿ ಭಾಗಶಃ ಮೊತ್ತವನ್ನು ಮಾತ್ರ ವಿತ್ಡ್ರಾ ಮಾಡಬಹುದು. ನಿರ್ದಿಷ್ಟ ಮೊತ್ತಕ್ಕಿಂತ ಕಡಿಮೆ ಇದ್ದರೆ ಮಾತ್ರ ಪೂರ್ತಿ ವಿತ್ಡ್ರಾ ಮಾಡಬಹುದಾಗಿದೆ.
ಅವಧಿಪೂರ್ವ ಹಿಂಪಡೆತಕ್ಕೆ ಇರುವ ನಿಯಮಗಳೇನು?
ಎನ್ಪಿಎಸ್ನಲ್ಲಿ 2.5 ಲಕ್ಷ ರೂ.ಗಿಂತ ಕಡಿಮೆ ಹಣ ಇದ್ದರೆ, ಯಾವುದೇ ಕಡಿತವಿಲ್ಲದೇ ಪೂರ್ತಿ ಹಣ ವಾಪಸ್ ದೊರೆಯಲಿದೆ. ಒಂದು ವೇಳೆ, ಎನ್ಪಿಎಸ್ ಖಾತೆಯಲ್ಲಿ 2.5 ಲಕ್ಷ ರೂ.ಗಿಂತಲೂ ಹೆಚ್ಚು ಹಣ ಇದ್ದು, ಅವಧಿಗೆ ಮುಂಚೆ ವಾಪಸ್ ಪಡೆಯುತ್ತೇವೆ ಎಂದಾದರೆ ಆಗ 80-20ರ ನಿಯಮ ಜಾರಿ ಆಗತ್ತೆ. ಅಂದ್ರೆ ಒಟ್ಟು ಠೇವಣಿಯ ಕೇವಲ ಶೇ 20ರಷ್ಟನ್ನು ಮಾತ್ರ ಇಡುಗಂಟಾಗಿ ಪಡೆಯಬಹುದಾಗಿದೆ. ಉಳಿದ ಶೇಕಡಾ 80ರಷ್ಟು ಮೊತ್ತಕ್ಕೆ ಆನ್ಯುಯಿಟಿ ಪ್ಲಾನ್, ಅಂದರೆ ವರ್ಷಾಶನ ಯೋಜನೆಯನ್ನು ಕೊಳ್ಳಬೇಕಾಗುತ್ತದೆ.
ಇದನ್ನೂ ಓದಿ: Repo Rate Hike: ರೆಪೊ ದರ ಹೆಚ್ಚಳದ ಬಳಿಕ ಎಷ್ಟು ದುಬಾರಿಯಾಗಲಿದೆ ಗೃಹ ಸಾಲದ ಇಎಂಐ? ಇಲ್ಲಿದೆ ಲೆಕ್ಕಾಚಾರ
ಆಂಶಿಕ (ಒಂದು ಭಾಗದ) ಹಿಂಪಡೆತ ಯಾವಾಗ ಸಹಾಯಕ?
ನಿವೃತ್ತಿಯ ವಯಸ್ಸನ್ನು ಗಮನದಲ್ಲಿಟ್ಟುಕೊಂಡು ಎನ್ಪಿಎಸ್ ಯೋಜನೆ ಜಾರಿಗೊಳಿಸಲಾಗಿದೆ. ಇದರಲ್ಲಿ ಹೂಡಿಕೆದಾರರು ನಿವೃತ್ತಿಯ ವಯಸ್ಸನ್ನು ತಲುಪಿದಾಗ ಪಿಂಚಣಿ ದೊರೆಯಲು ಆರಂಭವಾಗುತ್ತದೆ. ಎನ್ಪಿಎಸ್ನಲ್ಲಿ ನಿವೃತ್ತಿಯ ವಯಸ್ಸು 60 ವರ್ಷಗಳು. ಆದರೆ, ಕೆಲವೊಮ್ಮೆ ನಿವೃತ್ತಿಗೂ ಮುಂಚೆಯೇ ಹಣದ ಅವಶ್ಯಕತೆ ಬರಬಹುದು. ಆದ್ದರಿಂದ, ಎನ್ಪಿಎಸ್ನಲ್ಲಿ ಹೂಡಿಕೆದಾರರಿಗೆ ಠೇವಣಿ ಮೊತ್ತದ ಒಂದು ಭಾಗವನ್ನು ಹಿಂಪಡೆಯುವ ಆಯ್ಕೆಯನ್ನು ನೀಡಲಾಗಿದೆ. ಇದಕ್ಕೆ, ಎನ್ಪಿಎಸ್ ಖಾತೆಗೆ ಕನಿಷ್ಠ 3 ವರ್ಷವಾದರೂ ಆಗಿರಬೇಕು. ಖಾತೆಗೆ 3 ವರ್ಷ ಆದ ನಂತರ, ಒಟ್ಟು ಠೇವಣಿಯ ಶೇಕಡಾ 25ರಷ್ಟು ಮೊತ್ತವನ್ನು ಹಿಂಪಡೆಯಬಹುದು. ಎನ್ಪಿಎಸ್ನ ಸಂಪೂರ್ಣ ಅವಧಿಯಲ್ಲಿ, ಠೇವಣಿ ಇಟ್ಟ ಹಣದ ಭಾಗಶಃ ಮೊತ್ತವನ್ನು ಗರಿಷ್ಠ 3 ಬಾರಿ ಹಿಂಪಡೆಯಬಹುದು.
ಭಾಗಶಃ ಮೊತ್ತವನ್ನು ಯಾವಾಗ ಹಿಂಪಡೆಯಬಹುದು?
ಎನ್ಪಿಎಸ್ ಠೇವಣಿಯ ಭಾಗಶಃ ಮೊತ್ತವನ್ನು ಹಿಂಪಡೆಯಬಹುದಾದ ವಿಶೇಷ ಪರಿಸ್ಥಿತಿಗಳು ಹೀಗಿವೆ;
- ಮಕ್ಕಳ ಉನ್ನತ ಶಿಕ್ಷಣಕ್ಕೆ
- 2. ಮಕ್ಕಳ ವಿವಾಹಕ್ಕೆ
- 3. ಸ್ವಂತ ಮನೆ ನಿರ್ಮಾಣಕ್ಕೆ ಅಥವಾ ಫ್ಲ್ಯಾಟ್ ಕೊಳ್ಳಲು
- 4. ಗಂಭೀರ ಕಾಯಿಲೆಗಳ ಚಿಕಿತ್ಸೆಗೆ
- 5. ಅಪಘಾತಗಳ ಸಂದರ್ಭಗಳಲ್ಲಿ
- 6. ಅಧ್ಯಯನ ಅಥವಾ ಉದ್ಯೋಗ/ವ್ಯವಹಾರಗಳಿಗೆ
ಅವಧಿಪೂರ್ವ ಹಿಂಪಡೆತ ಆದರೂ ಆಂಶಿಕ ಹಿಂಪಡೆತವಾದರೂ ಹೂಡಿಕೆದಾರನು ಒಂದು ರದ್ದುಪಡಿಸಿದ (ಕ್ಯಾನ್ಸೆಲ್ಡ್) ಚೆಕ್ ನೀಡಬೇಕಾಗುತ್ತದೆ. ಇದರೊಂದಿಗೆ ಶಾಶ್ವತ ನಿವೃತ್ತಿ ಖಾತೆ ಸಂಖ್ಯೆ (ಪಿಆರ್ಎಎನ್ಐಡಿ), ಕ್ಲೇಮ್ ಫಾರ್ಮ್, ಹಾಗೂ ಕೆವೈಸಿ ದೃಢೀಕರಣದ ದಾಖಲೆಗಳನ್ನೂ ಸಹ ಒದಗಿಸಬೇಕಾಗುತ್ತದೆ.
ಇದನ್ನೂ ಓದಿ: 15 ಲಕ್ಷ ಹೂಡಿಕೆ ಮಾಡಿ ಪ್ರತಿ ತಿಂಗಳು 9,250 ರೂ. ಗಳಿಸಿ; ಹಿರಿಯ ನಾಗರಿಕರಿಗೆ ಆಫರ್
ಅವಧಿಪೂರ್ವ ಹಿಂಪಡೆಯುವಿಕೆ ಒಳ್ಳೆಯದೇ?
ಇದೊಂದು ನಿವೃತ್ತಿಯ ಯೋಜನೆ ಆದ್ದರಿಂದ ಸಾಧ್ಯವಾದಷ್ಟೂ ಅವಧಿಗೆ ಮುಂಚೆ ಇದರಿಂದ ಹೊರಬರುವ ಪ್ರಯತ್ನ ಮಾಡಬೇಡಿ. ಆಪತ್ಕಾಲದಲ್ಲಿ ಮಾತ್ರ ಇದನ್ನು ಬಳಸಿಕೊಳ್ಳಿ. ಸಾಧ್ಯವಾದರೆ, ಪ್ರತೀ ವರ್ಷವೂ ಒಂದು ಕನಿಷ್ಠ ಮೊತ್ತವನ್ನು ಜಮೆ ಮಾಡಿ ನಿಮ್ಮ ಖಾತೆಯನ್ನು ಚಾಲನೆಯಲ್ಲಿಡಿ ಎಂದು ತಜ್ಞರು ಸಲಹೆ ನೀಡಿದ್ದಾರೆ.
(ಮಾಹಿತಿ – ಮನಿ9)
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
