ಭಾರತ, ಯುಕೆ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಮತ್ತೆ ಮಾತುಕತೆ ಆರಂಭಿಸಲು ನಿರ್ಧಾರ

ನವದೆಹಲಿ, ಫೆಬ್ರುವರಿ 24: ಭಾರತ ಹಾಗೂ ಬ್ರಿಟನ್ ಮಧ್ಯೆ ಮುಕ್ತ ವ್ಯಾಪಾರ ಒಪ್ಪಂದ ಏರ್ಪಡುವ ಸಾಧ್ಯತೆಗೆ ಮತ್ತೆ ಜೀವ ಬಂದಿದೆ. ಕೇಂದ್ರ ವಾಣಿಜ್ಯ ಮತ್ತು ಉದ್ಯಮ ಸಚಿವ ಪೀಯುಶ್ ಗೋಯಲ್ ಅವರು ಭಾರತ ಮತ್ತು ಬ್ರಿಟನ್ ಮಧ್ಯೆ ಎಫ್​ಟಿಎಗಾಗಿ ಮತ್ತೆ ಮಾತುಕತೆಗಳು ಆರಂಭವಾಗಲಿವೆ. ಮಾತುಕತೆಗೆ ಎರಡೂ ದೇಶಗಳು ಒಪ್ಪಿವೆ ಎಂದಿದ್ದಾರೆ. ವರ್ಷಕ್ಕೂ ಹಿಂದೆ ಭಾರತ ಮತ್ತು ಯುಕೆ ಮಧ್ಯೆ ಮಾತುಕತೆಗಳು ಚಾಲನೆಯಲ್ಲಿದ್ದುವು. ಆದರೆ, ಬ್ರಿಟನ್ ಚುನಾವಣೆ ಹಿನ್ನೆಲೆಯಲ್ಲಿ 2024ರ ಮೇ ತಿಂಗಳಲ್ಲಿ ಮಾತುಕತೆ ಪ್ರಕ್ರಿಯೆ ನಿಂತಿತ್ತು. ಒಂದು ವರ್ಷದ ಬಳಿಕ ಈಗ ಸಂಧಾನ ಪುನಾರಂಭಗೊಳ್ಳುವ ಸಾಧ್ಯತೆ ಇದೆ.

ಯುನೈಟೆಡ್ ಕಿಂಗ್ಡಂನ ಉದ್ಯಮ ಕಾರ್ಯದರ್ಶಿ ಜೋನೇತನ್ ರೇನಾಲ್ಸ್ ಅವರು ಭಾರತಕ್ಕೆ ಮೂರು ದಿನಗಳ ಭೇಟಿಯಲ್ಲಿದ್ದಾರೆ. ಈ ಸಂದರ್ಭದಲ್ಲಿ ಅವರು ಮತ್ತು ಪೀಯುಶ್ ಗೋಯಲ್ ಭೇಟಿಯಾಗಿದ್ಧಾರೆ. ಇದಾದ ಬಳಿಕ ಗೋಯಲ್ ಅವರು ಮಾಧ್ಯಮಗಳಿಗೆ ಭಾರತ ಮತ್ತು ಯುಕೆ ದೇಶಗಳು ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಸಂಧಾನ ಮತ್ತೆ ಆರಂಭಗೊಳಿಸುವ ನಿರ್ಧಾರ ಮಾಡಿರುವುದನ್ನು ತಿಳಿಸಿದ್ದಾರೆ.

ಇದನ್ನೂ ಓದಿ: ಭಾರತೀಯ ಕಂಪನಿಗಳಿಗೆ ಪ್ರಸಕ್ತ ಕ್ವಾರ್ಟರ್​ನಲ್ಲಿ ಶೇ. 7-8ರಷ್ಟು ಆದಾಯವೃದ್ಧಿ ನಿರೀಕ್ಷೆ: ಐಸಿಆರ್​ಎ

2022ರ ಜನವರಿಯಲ್ಲಿ ಭಾರತ ಮತ್ತು ಬ್ರಿಟನ್ ಮಧ್ಯೆ ಎಫ್​ಟಿಎಗೆ ಮಾತುಕತೆಗಳು ಆರಂಭಗೊಂಡಿದ್ದವು. 2024ರ ಮೇವರೆಗೆ 14 ಸುತ್ತುಗಳ ಸಂಧಾನಗಳು ನಡೆದಿವೆ. ಈ ವರ್ಷ 15ನೇ ಸುತ್ತಿನ ಮಾತುಕತೆ ನಡೆಯಬಹುದು.

ಏನಿದು ಎಫ್​ಟಿಎ?

ಎಫ್​ಟಿಎ ಅಥವಾ ಮುಕ್ತ ವ್ಯಾಪಾರ ಒಪ್ಪಂದವು ಎರಡು ದೇಶಗಳ ಮಧ್ಯೆ ಅಥವಾ ಹೆಚ್ಚಿನ ದೇಶಗಳ ನಡುವೆ ನಡುವೆ ನಡೆಯುವ ಒಪ್ಪಂದ. ಎರಡು ದೇಶಗಳ ಮಧ್ಯೆ ಮುಕ್ತವಾಗಿ ವ್ಯಾಪಾರ ನಡೆಯಲು ಆಸ್ಪದ ಮಾಡಿಕೊಡುತ್ತದೆ ಈ ಒಪ್ಪಂದ. ಆಮದು ಸುಂಕದಲ್ಲಿ ವಿನಾಯಿತಿ ಅಥವಾ ರಿಯಾಯಿತಿ ನೀಡಲಾಗುವುದು ಈ ಎಫ್​ಟಿಎಯ ಮೂಲ ಆಶಯ.

ಇದನ್ನೂ ಓದಿ: ಅತಿವೇಗದ ಆರ್ಥಿಕತೆ; ಮುಂಬರುವ ವರ್ಷಗಳಲ್ಲೂ ಭಾರತ ಮುಂಚೂಣಿಯಲ್ಲಿ: ಮಧ್ಯಪ್ರದೇಶದಲ್ಲಿ ಪ್ರಧಾನಿ ಹೇಳಿಕೆ

ಭಾರತ ಮತ್ತು ಯುಕೆ ಮಧ್ಯೆ ಸಿದ್ಧವಾಗಿರುವ ಮುಕ್ತ ವ್ಯಾಪಾರ ಒಪ್ಪಂದದಲ್ಲಿ 26 ಅಧ್ಯಾಯಗಳಿವೆ. ಇವುಗಳ ಬಗ್ಗೆ ಮಾತುಕತೆಗಳು ನಡೆಯುತ್ತಿವೆ. ಎರಡೂ ದೇಶಗಳು ತಮ್ಮ ಅನಿಸಿಕೆಗಳನ್ನು ವ್ಯಕ್ತಪಡಿಸಿ, ಎರಡೂ ಕಡೆ ಸಮ್ಮತವಾಗುವ ಅಂಶಗಳನ್ನು ಒಪ್ಪಂದದಲ್ಲಿ ಉಳಿಸಿಕೊಳ್ಳಲಾಗುತ್ತದೆ.

ಪೀಯೂಶ್ ಗೋಯಲ್ ನೀಡಿದ ಮಾಹಿತಿ ಪ್ರಕಾರ ಈ ವರ್ಷವೇ ಭಾರತ ಮತ್ತ ಬ್ರಿಟನ್ ನಡುವೆ ಮುಕ್ತ ವ್ಯಾಪಾರ ಒಪ್ಪಂದ ಜಾರಿಗೆ ಬರಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ