Indian Standard Time: ದೇಶಾದ್ಯಂತ ಏಕರೀತಿಯ ಸಮಯ; ಐಎಸ್​​ಟಿ ಅಳವಡಿಕೆ ಕಡ್ಡಾಯ ಸಾಧ್ಯತೆ

ನವದೆಹಲಿ: ದೇಶಾದ್ಯಂತ ಈಗ ಏಕ ಪ್ರಮಾಣದ ಸಮಯದ (Time sychronisation) ಅಳವಡಿಕೆಯಾಗಲಿದೆ. ಇಂಡಿಯನ್ ಸ್ಟ್ಯಾಂಡರ್ಡ್ ಟೈಮ್ (IST- Indian Standard Time) ಅನ್ನು ಎಲ್ಲೆಡೆಯೂ ಅಳವಡಿಸುವುದನ್ನು ಕಡ್ಡಾಯಪಡಿಸುವ ಸಮಗ್ರ ನೀತಿ ಜಾರಿಗೆ ಸರ್ಕಾರ ಮುಂದಾಗಿದೆ ಎಂದು ಗ್ರಾಹಕ ವ್ಯವಹಾರಗಳ ಸಚಿವಾಲಯದ ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆಂದು ‘ಪಿಟಿಐ’ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ದೇಶಾದ್ಯಂತ ಎಲ್ಲಾ ನೆಟ್ವರ್ಕುಗಳು ಮತ್ತು ಕಂಪ್ಯೂಟರುಗಳು ಐಎಸ್ಟಿಗೆ ಸಮಯ ಹೊಂದಿಕೆ ಮಾಡಬೇಕಾಗುತ್ತದೆ. ಇಂಟರ್ನೆಟ್ ಸೇವಾ ಪೂರೈಕೆದಾರರು, ಟೆಲಿಕಾಂ ಸೇವಾ ಪೂರೈಕೆದಾರರು, ಪವರ್ ಗ್ರಿಡ್, ಬ್ಯಾಂಕ್, ಷೇರು ವಿನಿಮಯ ಕೇಂದ್ರ ಇತ್ಯಾದಿ ಎಲ್ಲಾ ರೀತಿಯ ನೆಟ್ವರ್ಕುಗಳು ಐಎಸ್ಟಿಯನ್ನು ಕಡ್ಡಾಯವಾಗಿ ಅಳವಡಿಕೆ ಮಾಡಬೇಕಾಗಬಹುದು.

ಈ ಒಂದು ಕ್ರಮ ಜಾರಿಗೊಂಡರೆ ಸಾಮಾನ್ಯ ಜನರಿಂದ ಹಿಡಿದು ವೈಜ್ಞಾನಿಕ ಪ್ರಯೋಗಗಳವರೆಗೆ ಪ್ರಯೋಜನವಾಗಲಿದೆ. ದೇಶದ ಭದ್ರತೆಗೆ ಸಹಾಯಕವಾಗಲಿದೆ.

ಸದ್ಯ, ಎಲ್ಲಾ ಟೆಲಿಕಾಂ ಮತ್ತು ಇಂಟರ್ನೆಟ್ ಸರ್ವಿಸ್ ಪೂರೈಕೆದಾರರಿಗೆ ಐಎಸ್ಟಿ ಅಳವಡಿಕೆ ಕಡ್ಡಾಯವಿಲ್ಲ. ಜಾಗತಿಕ ಸಮಯ ಪಾಲಿಸುವ ಗ್ಲೋಬಲ್ ನ್ಯಾವಿಗೇಶನ್ ಸೆಟಿಲೈಟ್ ಸಿಸ್ಟಂ (GNSS) ಇತ್ಯಾದಿಗೆ ತಾಳೆಯಾಗುವ ಸರ್ವರ್ ಗಳನ್ನು ಈ ಸಂಸ್ಥೆಗಳು ಬಳಕೆ ಮಾಡುತ್ತಿವೆ. ಈಗ ಭಾರತೀಯ ಪ್ರಮಾಣ ಸಮಯ ಐಎಸ್ಟಿಯನ್ನು ಎಲ್ಲರೂ ಕಡ್ಡಾಯವಾಗಿ ಅಳವಡಿಸುವ ಕಾನೂನನ್ನು ಸರ್ಕಾರ ಜಾರಿಗೆ ತರುವ ಇರಾದೆಯಲ್ಲಿದೆ.

ಇದನ್ನೂ ಓದಿ: Top Performing Airports: ಅತ್ಯುತ್ತಮ ಕಾರ್ಯನಿರ್ವಹಣೆ; ವಿಶ್ವಮಟ್ಟದಲ್ಲಿ ಎರಡನೇ ಸ್ಥಾನದಲ್ಲಿ ಬೆಂಗಳೂರು ವಿಮಾನ ನಿಲ್ದಾಣ

ನ್ಯಾಷನಲ್ ಫಿಸಿಕಲ್ ಲ್ಯಾಬೊರೇಟರಿ (NPL) ಮತ್ತು ಇಸ್ರೋ ಸಂಸ್ಥೆಗಳ ಜೊತೆ ಗ್ರಾಹಕ ವ್ಯವಹಾರಗಳ ಇಲಾಖೆ (DoCA) ಈ ಸಂಬಂಧ ಒಂದು ಯೋಜನೆಯಲ್ಲಿ ತೊಡಗಿಸಿಕೊಂಡಿದೆ. ಐಎಸ್ಟಿಗೆ ನಿಖರ ಸಮಯ ರೂಪು ಕೊಡುವ ಯೋಜನೆ ಇದಾಗಿದೆ. ಬೆಂಗಳೂರು, ಅಹ್ಮದಾಬಾದ್, ಭುವನೇಶ್ವರ, ಫರೀದಾಬಾದ್ ಮತ್ತು ಗುವಾಹಟಿ, ಹೀಗೆ ದೇಶದ ಐದು ನಗರಗಳಲ್ಲಿರುವ ಲ್ಯಾಬೋರೇಟರಿಗಳಲ್ಲಿ ಸಂಶೋಧನೆಗಳಾಗುತ್ತಿವೆ. ನ್ಯಾನೋಸೆಕಂಡ್ನಷ್ಟು ನಿಖರತೆಯಿಂದ ಕೂಡಿದ ಐಎಸ್ಟಿಯನ್ನು ರೂಪಿಸುವುದು ಈ ಯೋಜನೆಯ ಉದ್ದೇಶ. ವೈಜ್ಞಾನಿಕ ಸಂಶೋಧನೆಗಳಿಗೆ ಇಷ್ಟು ನಿಖರ ಇರುವ ಸಮಯದ ಅವಶ್ಯಕತೆ ಇದೆ.

ಒಟ್ಟಾರೆ, ನಿಖರ ಮತ್ತು ಏಕರೀತಿಯ ಸಮಯದ ಅಳವಡಿಕೆಯಿಂದ ಸಂಚಾರ, ದೂರವಾಣಿ, ಅಂತರ್ಜಾಲ, ಬ್ಯಾಂಕಿಂಗ್ ವ್ಯವಸ್ಥೆ, ಡಿಜಿಟಲ್ ಗವರ್ನೆನ್ಸ್, ಸಾರಿಗೆ, ಹಣಕಾಸು ವಹಿವಾಟು, ರಕ್ಷಣಾ ವ್ಯವಸ್ಥೆ, ಸೈಬರ್ ವ್ಯವಸ್ಥೆಗಳಿಗೆ ಉಪಯೋಗವಾಗುತ್ತದೆ. ಅಲ್ಲದೇ ಭವಿಷ್ಯದ ತಂತ್ರಜ್ಞಾನವಾದ 5ಜಿ, ಕೃತಕ ಬುದ್ಧಿಮತ್ತೆ, ಇಂಟರ್ನೆಟ್ ಆಫ್ ಥಿಂಗ್ಸ್ ಇತ್ಯಾದಿಗೂ ಸಹಾಯವಾಗುತ್ತದೆ.

ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ