Maldives: ಭಾರತದಲ್ಲಿ ಟ್ರೆಂಡ್ ಆಗುತ್ತಿದೆ #UninstallMakeMyTrip; ಯಾಕೆ ಮೇಕ್ ಮೈ ಟ್ರಿಪ್ ಮೇಲೆ ಆಕ್ರೋಶ?

ಬೆಂಗಳೂರು, ಜನವರಿ 8: ಲಕ್ಷದ್ವೀಪ ವಿಚಾರದಲ್ಲಿ ಮೇಕ್ ಮೈ ಟ್ರಿಪ್ ವಿರುದ್ಧ ಆನ್ಲೈನ್​ನಲ್ಲಿ ಆಕ್ರೋಶ ವ್ಯಕ್ತವಾಗುತ್ತಿದೆ. ಮೇಕ್ ಮೈ ಟ್ರಿಪ್ ಆ್ಯಪ್ ಅನ್​ಇನ್ಸ್​ಟಾಲ್ ಮಾಡುವ ಅಭಿಯಾನ ಟ್ರೆಂಡಿಂಗ್ (#UninstallMakeMyTrip) ಆಗುತ್ತಿದೆ. ಲಕ್ಷದ್ವೀಪ್​ಗೆ ಪ್ರಧಾನಿ ನರೇಂದ್ರ ಮೋದಿ ಭೇಟಿ ನೀಡಿದ ಬಳಿಕ ಮೇಕ್ ಮೈ ಟ್ರಿಪ್ ತನ್ನ ಪ್ಲಾಟ್​ಫಾರ್ಮ್​ನಲ್ಲಿ ಲಕ್ಷದ್ವೀಪ್ ಬಗ್ಗೆ ಜನರ ಶೋಧಗಳು ಹೆಚ್ಚಿದ್ದು, ಭಾರತದ ಬೀಚ್​ಗಳ ಬಗ್ಗೆ ಅಭಿಯಾನ ನಡೆಸುತ್ತಿರುವುದಾಗಿ ಹೇಳಿತ್ತು. ಆದರೂ ಕೂಡ ಮೇಕ್ ಮೈ ಟ್ರಿಪ್ (Make My Trip) ವಿರುದ್ಧ ನೆಟ್ಟಿಗರು ಮುನಿಸಿಕೊಂಡಿದ್ದಾರೆ.

ಮೇಕ್ ಮೈ ಟ್ರಿಪ್​ಗೆ ಚೀನಾ ನಂಟು?

ಮೇಕ್ ಮೈ ಟ್ರಿಪ್ ಸಂಸ್ಥೆ ಮಾಲ್ಡೀವ್ಸ್ ಪ್ರವಾಸಕ್ಕೆ ಬುಕಿಂಗ್ ಸ್ವೀಕರಿಸುವುದನ್ನು ನಿಲ್ಲಿಸಿಲ್ಲ ಎಂಬುದು ಬಹಳ ಮಂದಿಯ ಆಕ್ಷೇಪ. ಹಾಗೆಯೇ, ಮೇಕ್ ಮೈ ಟ್ರಿಪ್​ ಚೀನೀ ಬೆಂಬಲಿತ ಕಂಪನಿ. ಸಿಟಿ ಟ್ರಿಪ್ ಎಂಬ ಚೀನೀ ಕಂಪನಿಯು ಮೇಕ್ ಮೈ ಟ್ರಿಪ್​ನ ಪ್ರಮುಖ ಷೇರುದಾರ ಸಂಸ್ಥೆಯಾಗಿದೆ. ಅಂತೆಯೇ ಇದು ಚೀನೀ ಬೆಂಬಲಿತ ಕಂಪನಿ ಎಂದು ಪರಿಗಣಿಸಲಾಗಿದೆ. ಇದು ನೆಟ್ಟಿಗರ ಮುನಿಸಿಗೆ ಕಾರಣವಾಗಿದೆ.

ಇದನ್ನೂ ಓದಿ: Lakshadweep search: ಮೇಕ್ ಮೈ ಟ್ರಿಪ್​ನಿಂದ ಬೀಚಸ್ ಆಫ್ ಇಂಡಿಯಾ ಅಭಿಯಾನ; ಮೋದಿಯ ಲಕ್ಷದ್ವೀಪ ಭೇಟಿ ಪರಿಣಾಮ

ಮೇಕ್ ಮೈ ಟ್ರಿಪ್​ನ ಬೋರ್ಡ್ ಆಫ್ ಡೈರೆಕ್ಟರ್​ನಲ್ಲಿ ಇಬ್ಬರು ಚೀನೀಯರಿದ್ದಾರೆ. ಶಿಯಾಂಗ್ರೋಂಗ್ ಲಿ ಮತ್ತು ಸಿಂಡಿ ಶಿಯೋಫಾನ್ ವ್ಯಾಂಗ್ ಅವರು ಕಂಪನಿಯ ನಿರ್ದೇಶಕಿಯರಾಗಿದ್ದಾರೆ.

ಬಹಳಷ್ಟು ಟ್ರಾವಲ್ ಕಂಪನಿಗಳು ಭಾರತದ ಪರ ನಿಲುವು ತೆಗೆದುಕೊಂಡಿವೆ. ಭಾರತ ವಿರೋಧಿ ದೇಶಗಳ ಜೊತೆ ವ್ಯವಹಾರ ನಿಲ್ಲಿಸಿರುವುದುಂಟು. ಆದರೆ, ಮೇಕ್ ಮೈ ಟ್ರಿಪ್​ನಿಂದ ಇಂತಹ ಯಾವುದೇ ಕ್ರಮ ಬಂದಿಲ್ಲ ಎಂದು ಎಕ್ಸ್ ಬಳಕೆದಾರರೊಬ್ಬರು ಪೋಸ್ಟ್ ಮಾಡಿದ್ದು ಅದು ಸಾವಿರಕ್ಕೂ ಹೆಚ್ಚು ಬಾರಿ ರೀಟ್ವೀಟ್ ಆಗಿದೆ.

ಇದನ್ನೂ ಓದಿ: EaseMyTrip: ವೈಯಕ್ತಿಕ ಲಾಭಕ್ಕಿಂತ ರಾಷ್ಟ್ರ ಹಿತಾಸಕ್ತಿ ಮುಖ್ಯ; ಮಾಲ್ಡೀವ್ಸ್ ಅಲ್ಲ, ಲಕ್ಷದ್ವೀಪ, ಅಯೋಧ್ಯೆ ಪ್ಯಾಕೇಜ್ ಕೊಡ್ತೀವಿ: ಈಸ್ ಮೈ ಟ್ರಿಪ್

ಇದಕ್ಕೂ ಮುನ್ನ ಮತ್ತೊಂದು ಟ್ರಾವೆಲ್ ಬುಕಿಂಗ್ ಪ್ಲಾಟ್​ಫಾರ್ಮ್ ಈಸ್ ಮೈ ಟ್ರಿಪ್ ಮಾಲ್ಡೀವ್ಸ್ ಪ್ರವಾಸದ ಬುಕಿಂಗ್ ನಿಲ್ಲಿಸಲು ಹೆಚ್ಚು ತಡ ಮಾಡಲಿಲ್ಲ. ಇದು ನೆಟ್ಟಿಗರ ಮೆಚ್ಚುಗೆಗೆ ಪಾತ್ರವಾಗಿದೆ. ತಾನು ಇನ್ಮುಂದೆ ಈಸ್ ಮೈ ಟ್ರಿಪ್ ಆ್ಯಪ್ ಮೂಲಕ ಪ್ರವಾಸ ಬುಕ್ ಮಾಡುವುದಾಗಿ ಹಲವು ಮಂದಿ ಅಭಿಪ್ರಾಯ ವ್ಯಕ್ತಪಡಿಸಿರುವುದುಂಟು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ