ಬೆಂಗಳೂರಿನ ಗೆಲಾಕ್ಸ್​ಐ ಕಂಪನಿಯಲ್ಲಿ ಇನ್ಫೋಸಿಸ್ ಹೂಡಿಕೆ; ಬಾಹ್ಯಾಕಾಶ ತಂತ್ರಜ್ಞಾನ ಕ್ಷೇತ್ರಕ್ಕೆ ಕಾಲಿಟ್ಟ ಐಟಿ ದಿಗ್ಗಜ

ಬೆಂಗಳೂರು, ಸೆಪ್ಟೆಂಬರ್ 20: ಭಾರತದ ಮಾಹಿತಿ ತಂತ್ರಜ್ಞಾನ ದಿಗ್ಗಜನಾದ ಇನ್ಫೋಸಿಸ್ ಬಾಹ್ಯಾಕಾಶ ತಂತ್ರಜ್ಞಾನ ಕ್ಷೇತ್ರಕ್ಕೆ ಕಾಲಿಡುತ್ತಿದೆ. ಮಲ್ಟಿ ಸೆನ್ಸರ್ ಸೆಟಿಲೈಟ್​ಗಳನ್ನು ತಯಾರಿಸುವ ಬೆಂಗಳೂರಿನ ಗೆಲಾಕ್ಸ್​ಐ (GalaxEye) ಸ್ಟಾರ್ಟಪ್​ವೊಂದರಲ್ಲಿ ಇನ್ಫೋಸಿಸ್ ಹೂಡಿಕೆ ಮಾಡುತ್ತಿದೆ. ಇನ್ಫೋಸಿಸ್ ತನ್ನ ಇನ್ನೋವೇಶನ್ ಫಂಡ್ ಮೂಲಕ ಎರಡು ಮಿಲಿಯನ್ ಡಾಲರ್ (17 ಕೋಟಿ ರೂ) ಹಣವನ್ನು ಗೆಲಾಕ್ಸ್​ಐಗೆ ಬಂಡವಾಳವಾಗಿ ನೀಡುತ್ತಿದೆ. ಬೆಂಗಳೂರಿನ ಈ ಸ್ಟಾರ್ಟಪ್​ನಲ್ಲಿ ಈ ಹೂಡಿಕೆ ಮೂಲಕ ಇನ್ಫೋಸಿಸ್ ಅಲ್ಪ ಷೇರುಪಾಲನ್ನು ಪಡೆಯಲಿದೆ. ಶೇ. 20ಕ್ಕಿಂತಲೂ ಕಡಿಮೆ ಷೇರುಪಾಲು ಇನ್ಫೋಸಿಸ್​ನದ್ದಾಗುತ್ತದೆ. ಸೆಪ್ಟೆಂಬರ್ 30ಕ್ಕೆ ಒಪ್ಪಂದ ಅಂತಿಮವಾಗಬಹುದು.

ಇನ್ಫೋಸಿಸ್ ಮತ್ತು ಗೆಲಾಕ್ಸ್​​ಐ ಸಂಸ್ಥೆಗಳು ಜೊತೆಯಾಗಿ ಸೇರಿ ಹೊಸ ಸ್ಪೇಸ್ ಟೆಕ್ನಾಲಜಿ ಪರಿಹಾರಗಳನ್ನು ಅಭಿವೃದ್ದಿಪಡಿಸಲಿವೆ. ಬಾಹ್ಯಾಕಾಶ ಕ್ಷೇತ್ರದಲ್ಲಿರುವ ಕಂಪನಿಗಳಿಗೆ ಇದು ಸಹಾಯಕವಾಗಲಿದೆ.

ಇದನ್ನೂ ಓದಿ: ಲಕ್ಷಾಂತರ ಗ್ರಾಹಕರನ್ನು ಕಳೆದುಕೊಂಡ ಜಿಯೋ, ವೊಡಾಫೋನ್, ಏರ್ಟೆಲ್; ಏಕೈಕ ವಿನ್ನರ್ ಬಿಎಸ್ಸೆನ್ನೆಲ್

2021ರಲ್ಲಿ ಐಐಟಿ ಮದ್ರಾಸ್​ನ ಐವರು ವಿದ್ಯಾರ್ಥಿಗಳು ಸೇರಿ ಬೆಂಗಳೂರಿನಲ್ಲಿ ಗೆಲಾಕ್ಸ್​ಐ ಸ್ಟಾರ್ಟಪ್ ಸ್ಥಾಪಿಸಿದ್ದಾರೆ. ಎಲ್ಲಾ ಹವಾಮಾನದಲ್ಲೂ ರಾಡಾರ್ ಮತ್ತು ಆಪ್ಟಿಕಲ್ ಸೆನ್ಸಾರ್ ಬಳಸಿ ಹೈ ರೆಸಲ್ಯೂಶನ್ ಇಮೇಜ್​ಗಳನ್ನು ಸೆರೆಹಿಡಿಯಬಲ್ಲಂತಹ ಸೆಟಿಲೈಟ್​ಗಳನ್ನು ಇದು ತಯಾರಿಸಬಲ್ಲುದು. ಕೃಷಿ, ರಕ್ಷಣಾ ಕ್ಷೇತ್ರದಿಂದ ಹಿಡಿದು ನಗರ ಯೋಜನೆ, ವಿಪತ್ತು ನಿರ್ವಹಣೆವರೆಗೂ ವಿವಿಧ ಕ್ಷೇತ್ರಗಳಲ್ಲಿ ಇದರ ತಂತ್ರಜ್ಞಾನ ಬಳಕೆ ಆಗಬಲ್ಲುದು.

ಗೆಲಾಕ್ಸ್​ಐ ಸಂಸ್ಥೆ ಇತ್ತೀಚೆಗಷ್ಟೇ ವಿವಿಧ ಕಂಪನಿಗಳಿಂದ ಫಂಡಿಂಗ್ ಪಡೆದಿತ್ತು. ಮೇಲಾ ವೆಂಚರ್ಸ್, ಸ್ಪೆಷಾಲೆ ಇನ್ವೆಸ್ಟ್, ಐಡಿಯಾ ಫೋರ್ಜ್, ರೈನ್​ಮ್ಯಾಟರ್ ಮೊದಲಾದ ಸಂಸ್ಥೆಗಳ ಮೂಲಕ 6.5 ಮಿಲಿಯನ್ ಡಾಲರ್ (ಸುಮಾರು 55 ಕೋಟಿ ರೂ) ಬಂಡವಾಳ ಪಡೆದಿತ್ತು. 2025ರಲ್ಲಿ ದೃಷ್ಟಿ ಮಿಷನ್ ಎನ್ನುವ ಸೆಟಿಲೈಟ್ ಅನ್ನು ಉಡಾವಣೆ ಮಾಡಲಿದೆ. ಆ ಕಾರ್ಯಕ್ಕೆ ಫಂಡಿಂಗ್ ಬಳಸಿಕೊಳ್ಳಲಿದೆ. ಇನ್ಫೋಸಿಸ್​ನಿಂದ ಸಿಕ್ಕಿರುವ ಬಂಡವಾಳವನ್ನು ಎರಡೂ ಕಂಪನಿಗಳು ಜಂಟಿಯಾಗಿ ಟೆಕ್ನಾಲಜಿ ಸಲ್ಯೂಶನ್ಸ್​ಗೆ ಬಳಸಲಿವೆ.

ಇದನ್ನೂ ಓದಿ: ಮಾಲ್ಡೀವ್ಸ್ ಸಂಕಷ್ಟಕ್ಕೆ ಭಾರತದಿಂದ ನೆರವು; ಎರಡನೇ ಬಾರಿ ಟ್ರೆಷರಿ ಬಿಲ್ ಪಾವತಿಗೆ ಗಡುವು ವಿಸ್ತರಣೆ

ಸ್ಪೇಸ್ ಟೆಕ್ನಾಲಜಿಗೆಗೆ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮತ್ತು ಡಾಟಾ ಅನಾಲಿಟಿಕ್ಸ್ ಎರಡೂ ಸಂಯೋಜನೆಗೊಂಡರೆ ದತ್ತಾಂಶ ಆಧಾರಿತವಾಗಿ ನಿಖರ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಈ ಕ್ಷೇತ್ರದ ಉದ್ದಿಮೆಗಳಿಗೆ ಸಹಾಯವಾಗಲಿದೆ ಎಂಬುದು ಇನ್ಫೋಸಿಸ್​ನ ಅನಿಸಿಕೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ