ಲಕ್ಷ ಕೋಟಿ ರೂ ಮೊತ್ತದ ಅನ್ಕ್ಲೇಮ್ಡ್ ಷೇರುಗಳ ವಿಲೇವಾರಿಗೆ ಹೊಸ ಪೋರ್ಟಲ್
Ministry of Corporate Affairs' IEPFA portal to unlock ₹1 lakh crore in unclaimed shares: ಬೇರೆ ಬೇರೆ ಕಾರಣಗಳಿಗೆ ಕ್ಲೇಮ್ ಆಗದೇ ಇರುವ ಷೇರುಗಳು ಹಾಗು ಡಿವಿಡೆಂಡ್ಗಳನ್ನು ಪಡೆಯುವುದು ಬಹಳ ಪ್ರಯಾಸದ ಕೆಲಸ. ಸರ್ಕಾರ ಈಗ ಈ ಪ್ರಕ್ರಿಯೆಯನ್ನು ಸುಗಮಗೊಳಿಸಿದೆ. ಪ್ರತ್ಯೇಕ ಏಕೀಕೃತ ಪೋರ್ಟಲ್ ಆರಂಭಿಸುತ್ತಿದೆ. ಕಂಪನಿಗಳು ಹಾಗೂ ಹೂಡಿಕೆದಾರರಿಗೆ ಮಾರ್ಗ ಸಲೀಸು ಮಾಡಿಕೊಡುತ್ತದೆ ಈ ಹೊಸ ಪ್ಲಾಟ್ಫಾರ್ಮ್.
ನವದೆಹಲಿ, ಆಗಸ್ಟ್ 5: ಮೂಲ ಹೂಡಿಕೆದಾರರು ಮೃತಪಟ್ಟಿದ್ದೂ ಸೇರಿದಂತೆ ವಿವಿಧ ಕಾರಣಗಳಿಗೆ ಕ್ಲೇಮ್ ಆಗದ ಷೇರುಗಳು, ಡಿವಿಡೆಂಡುಗಳನ್ನು ಅವುಗಳ ವಾರಸುದಾರರಿಗೆ ತಲುಪಿಸುವ ಕಾರ್ಯಕ್ಕೆ ಸರ್ಕಾರ ಗಮನ ಕೊಟ್ಟಿದೆ. ಈ ಸಂಬಂಧ ಏಕೀಕೃತ ಪೋರ್ಟಲ್ವೊಂದನ್ನು (Integrated Portal) ಸದ್ಯದಲ್ಲೇ ಬಿಡುಗಡೆ ಮಾಡಲಿದೆ. ಡೆಪಾಸಿಟರಿಗಳು, ಪಬ್ಲಿಕ್ ಫೈನಾನ್ಷಿಯಲ್ ಮ್ಯಾನೇಜ್ಮೆಂಟ್ ಸಿಸ್ಟಂ ಇತ್ಯಾದಿ ವಿವಿಧ ಭಾಗಿದಾರರನ್ನು (stakeholders) ಈ ಪೋರ್ಟಲ್ನಲ್ಲಿ ಮಿಳಿತಗೊಳಿಸಲಾಗುತ್ತದೆ. ಇದರಿಂದ ಹೂಡಿಕೆದಾರರು (investors) ಮತ್ತು ಕಂಪನಿಗಳಿಗೆ ಷೇರುಗಳನ್ನು ಕ್ಲೇಮ್ ಮಾಡುವ ಪ್ರಕ್ರಿಯೆ ಸಲೀಸಾಗುವ ನಿರೀಕ್ಷೆ ಇದೆ.
ಕಳೆದ ವಾರ ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ ನೀಡಿರುವ ಪತ್ರಿಕಾ ಪ್ರಕಟಣೆ ಪ್ರಕಾರ ಐಇಪಿಎಫ್ಎ ಪ್ರಾಧಿಕಾರವು ಈ ಏಕೀಕೃತ ಪೋರ್ಟಲ್ನ ಕೊನೆಯ ಹಂತದ ಪರೀಕ್ಷೆ ನಡೆಸುತ್ತಿದೆ.
ಐಇಪಿಎಫ್ಎ ಬಳಿ ಕ್ಲೇಮ್ ಆಗದೇ ಇರುವ ಷೇರುಗಳು ಮತ್ತು ಡಿವಿಡೆಂಡ್ಗಳ ಮೌಲ್ಯ ಒಂದು ಲಕ್ಷ ಕೋಟಿ ರೂಗೂ ಅಧಿಕ ಎನ್ನಲಾಗಿದೆ. ಡಾಕ್ಯುಮೆಂಟೇಶನ್ ಇಲ್ಲದಿರುವುದು, ಕಂಪನಿಗಳು ಸರಿಯಾದ ವಿವರ ತುಂಬದಿರುವುದು ಇವೇ ಮುಂತಾದ ಕಾರಣಕ್ಕೆ ಈ ಷೇರುಗಳು ಹೂಡಿಕೆದಾರರಿಗೆ ತಲುಪದೇ ಐಇಪಿಎಫ್ ಕಾರ್ಪಸ್ನಲ್ಲೇ ಶೇಖರಣೆ ಆಗಿ ಉಳಿದಿವೆ ಎನ್ನಲಾಗಿದೆ.
ಇದನ್ನೂ ಓದಿ: ಫ್ರಂಟ್ ರನ್ನಿಂಗ್ ಮಾಡುತ್ತಿದ್ದ ಮಾಜಿ ಎಕ್ಸಿಸ್ ಎಂಎಫ್ ಮ್ಯಾನೇಜರ್ ವೀರೇಶ್ ಜೋಶಿ ಬಂಧನ; ಏನಿದು ಫ್ರಂಟ್ ರನ್ನಿಂಗ್?
ಈ ನಿಟ್ಟಿನಲ್ಲಿ ವಿವಿಧ ಸರ್ವಿಸ್ ರಿಕ್ವೆಸ್ಟ್ ನಂಬರ್ಗಳನ್ನು (ಎಸ್ಆರ್ಎನ್) ನಿಗದಿತ ಎಕ್ಸೆಲ್ ಟೆಂಪ್ಲೇಟ್ಗಳೊಂದಿಗೆ ತಡಮಾಡದೆ ಅಪ್ಲೋಡ್ ಮಾಡಬೇಕೆಂದು ಕಂಪನಿಗಳಿಗೆ ಸೂಚನೆ ನೀಡಲಾಗಿದೆ.
ಸುಲಭಗೊಳ್ಳುತ್ತಿರುವ ಕ್ಲೇಮ್ ಪ್ರಕ್ರಿಯೆ
ಈಗ ಕ್ಲೇಮ್ ಆಗದೇ ಉಳಿದಿರುವ ಷೇರು ಮತ್ತು ಡಿವಿಡೆಂಡ್ಗಳನ್ನು ಪಡೆಯುವ ಪ್ರಕ್ರಿಯೆ ಸರಳಗೊಳಿಸಲಾಗುತ್ತಿದೆ. ಈ ಪ್ರಕ್ರಿಯೆಯಲ್ಲಿ ಇರುವ ಎಲ್ಲಾ ಮಾರ್ಗಗಳನ್ನೂ ಒಂದೇ ಸಾಲಿಗೆ ತರಲಾಗುತ್ತಿದೆ. ವಿವಿಧ ಕಡೆ ಅಲೆದಾಡುವ ಬದಲು ಒಂದೇ ಪ್ಲಾಟ್ಫಾರ್ಮ್ನಲ್ಲಿ ಪ್ರಕ್ರಿಯೆ ಇರುತ್ತದೆ.
ಐಇಪಿಎಫ್ಎ ಅಥವಾ ಎಂಸಿಎ21 ಪ್ಲಾಟ್ಫಾರ್ಮ್ನಲ್ಲಿ ನೊಂದಾಯಿಸಿಕೊಂಡು ಆ ಪೋರ್ಟಲ್ನಲ್ಲಿ ಲಾಗಿನ್ ಆಗಬೇಕು. ನಂತರದ ಪ್ರಕ್ರಿಯೆಗಳು ಸುಲಭವೇ ಇರುತ್ತದೆ. ಹೂಡಿಕೆದಾರರು ಮತ್ತು ಕಂಪನಿಗಳಿಗೆ ಈ ಕಾರ್ಯದಲ್ಲಿ ನೆರವಾಗಲು ಒಂದು ಪ್ರತ್ಯೇಕ ಕಾಲ್ ಸೆಂಟರ್ ಅನ್ನೂ ಆರಂಭಿಸಲಾಗುತ್ತಿದೆ.
ಇದನ್ನೂ ಓದಿ: ಭಾರತದಲ್ಲಿ ಅನುಮೋದಿತ ಸೆಮಿಕಂಡಕ್ಟರ್ ಯೋಜನೆಗಳಿಂದ 2,400 ಕೋಟಿ ಚಿಪ್ ತಯಾರಿಕೆ ಸಾಧ್ಯ; ಬೇರೆ ದೇಶಗಳಿಗೆ ಹೋಲಿಸಿದರೆ?
ಅನ್ಕ್ಲೇಮ್ಡ್ ಷೇರುಗಳನ್ನು ಪಡೆಯಲು ಈ ಹಿಂದೆ ಇದ್ದ ಪ್ರಕ್ರಿಯೆ ಹೇಗೆ?
ಈ ಮುಂಚೆ ಒಂದು ಸಣ್ಣ ಮೊತ್ತದ ಅನ್ಕ್ಲೇಮ್ಡ್ ಷೇರುಗಳನ್ನು ಪಡೆಯಲು ಸಾಕಷ್ಟು ಪ್ರಯಾಸ ಪಡಬೇಕಿತ್ತು. ದಾಖಲೆಗಳ ಸಲ್ಲಿಕೆಯಿಂದ ಹಿಡಿದು ನಾನಾ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಬೇಕಿತ್ತು. ಕಂಪನಿಯ ಆರ್ಟಿಎಯನ್ನು ಸಂಪರ್ಕಿಸಿ ಷೇರುಗಳ ಮಾಹಿತಿಯನ್ನು ದೃಢಪಡಿಸುವುದು ಇತ್ಯಾದಿ ವಿವಿಧ ಪ್ರಕ್ರಿಯೆಗಳಿಗೆ ಬಹಳ ಸಮಯ ಹಿಡಿಯುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ