LIC IPO: ಸರ್ಕಾರಿ ಸ್ವಾಮ್ಯದ ಎಲ್ಐಸಿಯ ಬಹು ನಿರೀಕ್ಷಿತ ಐಪಿಒ 2022ರ ಮೇ 4ರಿಂದ 9ರ ತನಕ

ಭಾರತೀಯ ಜೀವ ವಿಮಾ ನಿಗಮದ ಐಪಿಒ 2022ರ ಮೇ 4ರಿಂದ 9ನೇ ತಾರೀಕಿನ ಮಧ್ಯೆ ಇರುತ್ತದೆ. ಹೂಡಿಕೆ ಹಿಂತೆಗೆತದಲ್ಲಿ ಸರ್ಕಾರಕ್ಕೆ ಇದು ಪ್ರಮುಖವಾಗಿದೆ.

ಸಾಂದರ್ಭಿಕ ಚಿತ್ರ

TV9 Web | Edited By: Srinivas Mata|
Updated on: Apr 26, 2022 | 6:04 AM

ಭಾರತೀಯ ಜೀವವಿಮಾ ನಿಗಮದ (LIC) ಬಹು ನಿರೀಕ್ಷಿತ ಮೆಗಾ ಆರಂಭಿಕ ಷೇರು ಮಾರಾಟವನ್ನು ಘೋಷಿಸಲಾಗಿದೆ ಮತ್ತು ಈ ಇಶ್ಯೂ ಮೇ 4, 2022ರಂದು ಪ್ರಾರಂಭವಾಗಲಿದೆ ಎಂದು ಪಿಟಿಐ ವರದಿ ತಿಳಿಸಿದೆ. ಐಪಿಒಗಾಗಿ ಬಿಡ್ಡಿಂಗ್ ಮೇ 9ರ ವರೆಗೆ ನಡೆಯಲಿದೆ. ಸರ್ಕಾರಿ ಸ್ವಾಮ್ಯದ ಎಲ್‌ಐಸಿಯ ಶೇ 3.5ರ ಪಾಲನ್ನು ಸರ್ಕಾರ ಮಾರಾಟ ಮಾಡುವ ಐಪಿಒ ಮೂಲಕ ಬೊಕ್ಕಸಕ್ಕೆ 21,000 ಕೋಟಿ ರೂಪಾಯಿ ಬರಲಿದೆ. ಇದೀಗ ಶೇ 3.5ರಷ್ಟು ಪಾಲನ್ನು ಮಾರಾಟ ಮಾಡುವುದರಿಂದ ರಷ್ಯಾ- ಉಕ್ರೇನ್ ಮೇಲೆ ಆಕ್ರಮಣ ಮಾಡುವ ಮೊದಲು ಅಂದಾಜು ಮಾಡಿದ ರೂ. 50,000 ಕೋಟಿಗಿಂತ ಕಡಿಮೆ ಇರುತ್ತದೆ. ಎಲ್‌ಐಸಿ ಐಪಿಒ ಮೌಲ್ಯವು ರೂ. 6 ಲಕ್ಷ ಕೋಟಿ. ಹಿಂದಿನ ಸರ್ಕಾರದ ಅಂದಾಜಿನ ಪ್ರಕಾರ, ವಿಮಾದಾರ ಕಂಪೆನಿ ಸುಮಾರು ರೂ. 17 ಲಕ್ಷ ಕೋಟಿ ಮೌಲ್ಯವನ್ನು ಹೊಂದಿರುತ್ತದೆ.

ಸೆಬಿ ನಿಯಮಗಳ ಪ್ರಕಾರ, ರೂ. 1 ಲಕ್ಷ ಕೋಟಿಗಿಂತ ಹೆಚ್ಚಿನ ಮೌಲ್ಯ ಹೊಂದಿರುವ ಕಂಪೆನಿಗಳು ಐಪಿಒದಲ್ಲಿ ಶೇ 5ರಷ್ಟು ಪಾಲನ್ನು ಮಾರಾಟ ಮಾಡಬೇಕು. ಸರ್ಕಾರವು ಸೆಬಿಗೆ ನಿಯಮಾವಳಿಯಿಂದ ವಿನಾಯಿತಿ ಕೋರಿ, ದಾಖಲೆಗಳನ್ನು ಸಲ್ಲಿಸಿದೆ ಎಂದು ಪಿಟಿಐ ವರದಿ ಉಲ್ಲೇಖಿಸಿದೆ. ಸರ್ಕಾರವು ಎಲ್ಐಸಿ ಐಪಿಒ ಗಾತ್ರವನ್ನು ಕಡಿಮೆಗೊಳಿಸಿದ್ದರೂ ಸಹ ಮಾರಾಟವು ಇನ್ನೂ ಭಾರತದ ಷೇರುಪೇಟೆ ಇತಿಹಾಸದಲ್ಲೇ ಅತಿ ದೊಡ್ಡದಾಗಿದ್ದು, ಕಳೆದ ವರ್ಷ ನವೆಂಬರ್‌ನಲ್ಲಿ ಸುಮಾರು ರೂ. 18,300 ಕೋಟಿ ಸಂಗ್ರಹಿಸಿದ್ದ ಒನ್97 ಕಮ್ಯುನಿಕೇಷನ್ಸ್ ಲಿಮಿಟೆಡ್ನ (One 97 Communications Ltd) ಮೀರಿಸಿದೆ.

ಯುದ್ಧವು ಈಕ್ವಿಟಿಗಳ ಬೇಡಿಕೆಯನ್ನು ಕಡಿಮೆಗೊಳಿಸಿದ್ದರಿಂದ ಆ್ಯಂಕರ್ ಹೂಡಿಕೆದಾರರು ಬದ್ಧರಾಗಲು ಇಷ್ಟಪಡುತ್ತಿಲ್ಲ ಎಂದು ಬ್ಲೂಮ್‌ಬರ್ಗ್ ಈ ಹಿಂದೆ ವರದಿ ಮಾಡಿದ್ದು, ವಿದೇಶಿ ನಿಧಿಗಳು ಈ ವರ್ಷ ಭಾರತೀಯ ಷೇರುಗಳಿಂದ 16 ಶತಕೋಟಿ ಡಾಲರ್ಗಿಂತ ಹೆಚ್ಚಿನ ಹಣವನ್ನು ಹಿಂತೆಗೆದುಕೊಂಡವು. ಫೆಬ್ರವರಿಯಲ್ಲಿ ಸರ್ಕಾರವು ಎಲ್ಐಸಿಯಲ್ಲಿ ಶೇ 5ರಷ್ಟು ಪಾಲನ್ನು ಮಾರಾಟ ಮಾಡಲು ಯೋಜಿಸಿತ್ತು. ಆದರೆ ರಷ್ಯಾ-ಉಕ್ರೇನ್ ಯುದ್ಧದ ಕಾರಣದಿಂದಾಗಿ ನಡೆಯುತ್ತಿರುವ ಮಾರುಕಟ್ಟೆಯ ಏರಿಳಿತವು ಐಪಿಒ ಗಾತ್ರವನ್ನು ಕಡಿಮೆ ಮಾಡಿದೆ.

ಎಲ್ಐಸಿಯು 280 ಮಿಲಿಯನ್‌ಗಿಂತಲೂ ಹೆಚ್ಚು ಪಾಲಿಸಿಗಳೊಂದಿಗೆ ಭಾರತದ ವಿಮಾ ವಲಯದಲ್ಲಿ ಪ್ರಾಬಲ್ಯ ಹೊಂದಿದೆ. ಲಭ್ಯವಿರುವ ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, 2020ರಲ್ಲಿ ವಿಮಾ ಪ್ರೀಮಿಯಂ ಸಂಗ್ರಹಣೆಯ ವಿಷಯದಲ್ಲಿ ಇದು ಐದನೇ ಅತಿ ದೊಡ್ಡ ಜಾಗತಿಕ ವಿಮಾದಾರ ಆಗಿದೆ. ಎಲ್ಐಸಿ ಐಪಿಒ ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬಜೆಟ್ ಹೂಡಿಕೆ ಹಿಂತೆಗೆತ ಆದಾಯಕ್ಕೆ ಪ್ರಮುಖ ಭಾಗವನ್ನು ಕೊಡುಗೆ ನೀಡುತ್ತದೆ. ಸರ್ಕಾರವು ಪ್ರಸಕ್ತ ಹಣಕಾಸು ವರ್ಷದಲ್ಲಿ ರೂ. 65,000 ಕೋಟಿಗಳಷ್ಟು ಹೂಡಿಕೆಯ ಸ್ವೀಕೃತಿಗಳನ್ನು ನಿಗದಿಪಡಿಸಿದ್ದು, ಕಳೆದ ಹಣಕಾಸು ವರ್ಷದಲ್ಲಿ ರೂ. 13,531 ಕೋಟಿಗಳನ್ನು ಸಂಗ್ರಹಿಸಿದೆ.

ಇದನ್ನೂ ಓದಿ: LIC IPO: ಸರಿಯಾದ ಸಮಯದಲ್ಲಿ ಎಲ್ಐಸಿ ಐಪಿಒ ಬರಬೇಕು: ಕೇಂದ್ರ ಸರ್ಕಾರಕ್ಕೆ ಆರ್ಬಿಐ ಸಲಹೆ