ಅಮೆರಿಕದಲ್ಲಿ ನಾಲ್ಕು ಫ್ಯಾಕ್ಟರಿ ಮುಚುತ್ತಿರುವ ಪೆಪ್ಸಿಕೋ; ನೂರಾರು ಮಂದಿಗೆ ಉದ್ಯೋಗನಷ್ಟ

ನ್ಯೂಯಾರ್ಕ್, ಅಕ್ಟೋಬರ್ 31: ವಿಶ್ವದ ಪ್ರಮುಖ ಪಾನೀಯ ಕಂಪನಿಗಳಲ್ಲಿ ಒಂದಾದ ಪೆಪ್ಸಿಕೋ ಅಮೆರಿಕದಲ್ಲಿರುವ ತನ್ನ ಕೆಲ ಬಾಟ್ಲಿಂಗ್ ಘಟಕಗಳನ್ನು ಮುಚ್ಚಲು ನಿರ್ಧರಿಸಿದೆ. ವೆಚ್ಚ ಕಡಿತ ಹಾಗೂ ಆಡಳಿತಾತ್ಮಕ ದೃಷ್ಟಿಯಿಂದ ನಾಲ್ಕು ಫ್ಯಾಕ್ಟರಿಗಳನ್ನು ಬಂದ್ ಮಾಡುತ್ತಿದೆ. ಹತ್ತಿರಹತ್ತಿರ 400 ಮಂದಿ ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳಲಿದ್ದಾರೆ. ಷೇರು ವಿನಿಮಯ ಕೇಂದ್ರಕ್ಕೆ ಪೆಪ್ಸಿಕೋ ನೀಡಿದ ಮಾಹಿತಿ ಪ್ರಕಾರ ಅಮೆರಿಕದ ಸಿನ್ಸಿನಾಟಿ, ಚಿಕಾಗೋ, ಪೆನ್​ಸಿಲ್ವೇನಿಯಾ ಮತ್ತು ಅಟ್ಲಾಂಟಾದ ಬಾಟ್ಲಿಂಗ್ ಯೂನಿಟ್​ಗಳು ಮುಚ್ಚಲ್ಪಡುತ್ತಿವೆ. ಸಿನ್ಸಿನಾಟಿಯಲ್ಲಿ 136 ಮಂದಿ, ಚಿಕಾಗೋದಲ್ಲಿ 131 ಮಂದಿ, ಪೆನ್​ಸಿಲ್ವೇನಿಯಾದ ಹ್ಯಾರಿಸ್​ಬರ್ಗ್​ನಲ್ಲಿ 127 ಮಂದಿ ಹಾಗೂ ಅಟ್ಲಾಂಟಾದಲ್ಲಿ 45-50 ಮಂದಿಗೆ ಕೆಲಸ ಹೋಗಲಿದೆ.

ಮುಚ್ಚಲಾಗುತ್ತಿರುವ ನಾಲ್ಕು ಘಟಕಗಳ ಪೈಕಿ ಚಿಕಾಗೋ ಯೂನಿಟ್ ಪೂರ್ಣವಾಗಿ ಬಂದ್ ಆಗುತ್ತದೆ. ಇನ್ನುಳಿದ ಮೂರು ಘಟಕಗಳಲ್ಲಿ ಬಾಟ್ಲಿಂಗ್ ಯೂನಿಟ್ ಮಾತ್ರವೇ ಮುಚ್ಚಲಾಗುತ್ತದೆ. ವೇರ್​ಹೌಸ್, ಸೇಲ್ಸ್, ಡೆಲಿವರಿ ಸೇವೆಗಳು ಈ ಮೂರು ಕಡೆ ಮುಂದುವರಿಯಲಿವೆ ಎನ್ನಲಾಗಿದೆ.

ಇದನ್ನೂ ಓದಿ: ಹಣ ನೋಡುವ ದೃಷ್ಟಿ ಜಪಾನೀಯರದ್ದು ವಿಭಿನ್ನ; ಎರಿಗಾಟು ಸೂತ್ರ ತಿಳಿದಿರಿ

ಅಮೆರಿಕದ ನ್ಯೂಯಾರ್ಕ್ ಮೂಲದ ಪೆಪ್ಸಿಕೋ ಸಂಸ್ಥೆ ಅಮೆರಿಕದಲ್ಲಿ 75ಕ್ಕೂ ಹೆಚ್ಚು ಬಾಟ್ಲಿಂಗ್ ಘಟಕಗಳನ್ನು ಹೊಂದಿದೆ. ಹೀಗಾಗಿ, ನಾಲ್ಕು ಘಟಕಗಳನ್ನು ಮುಚ್ಚುತ್ತಿರುವುದು ಕಂಪನಿಗೆ ಆಘಾತಕಾರಿ ಸಂಗತಿಯಲ್ಲ. ಅದರ ಬಿಸಿನೆಸ್ ಕಡಿಮೆ ಆಗುತ್ತಿರುವ ಕಾರಣ, ಅದನ್ನು ಸರಿಹೊಂದಿಸಲು ಹಾಗೂ ಅನಗತ್ಯ ವೆಚ್ಚ ಕಡಿಮೆ ಮಾಡಲು ಬಾಟ್ಲಿಂಗ್ ಪ್ಲಾಂಟ್ಸ್ ಮುಚ್ಚುತ್ತಿದೆ.

ಪೆಪ್ಸಿಕೋಗೆ ಅತಿಹೆಚ್ಚು ಆದಾಯ ಅಮೆರಿಕದಿಂದಲೇ ಬರುತ್ತದೆ. ಇಲ್ಲಿಯೇ ಅದರ ಬಿಸಿನೆಸ್ ಕಡಿಮೆ ಆಗುತ್ತಿದೆ. ಚೀನಾದಲ್ಲೂ ಪೆಪ್ಸಿ ಡ್ರಿಂಕ್ಸ್​ನ ಮಾರಾಟ ಕಡಿಮೆ ಆಗುತ್ತಿದೆ. ಈ ವರ್ಷ ಈ ಎರಡು ದೇಶಗಳಲ್ಲಿ ತನಗೆ ಕಡಿಮೆ ಬ್ಯುಸಿನೆಸ್ ಆಗಬಹುದು ಎಂದು ಸ್ವತಃ ಪೆಪ್ಸಿಕೋ ಅಂದಾಜು ಮಾಡಿದೆ. ಎರಡನೇ ಹಾಗೂ ಮೂರನೇ ಕ್ವಾರ್ಟರ್​ನಲ್ಲಿ ಯುಎಸ್​ಎನಲ್ಲಿ ಪೆಪ್ಸಿಕೋ ಸೇಲ್ಸ್ ಶೇ. 3ರಷ್ಟು ಕಡಿಮೆ ಆಗಿದೆ.

ಇದನ್ನೂ ಓದಿ: ಡಿಜಿಟಲ್ ಗೋಲ್ಡ್ ಸೇರಿ ವಿವಿಧ ರೀತಿಯ ಚಿನ್ನದ ಮೇಲೆ ಕ್ಯಾಪಿಟಲ್ ಗೇನ್ ಟ್ಯಾಕ್ಸ್ ಎಷ್ಟಿದೆ, ವಿವರ ಇಲ್ಲಿದೆ

ಜುಲೈನಿಂದ ಸೆಪ್ಟೆಂಬರ್​ವರೆಗಿನ ಅವಧಿಯಲ್ಲಿ ಕಂಪನಿಯ ನಿವ್ವಳ ಆದಾಯ ಶೇ. 5ರಷ್ಟು ಕಡಿಮೆ ಆಗಿ 2.9 ಬಿಲಿಯನ್ ಡಾಲರ್ ತಲುಪಿದೆ. ಹೀಗಾಗಿ, ಬಾಟ್ಲಿಂಗ್ ಫ್ಯಾಕ್ಟರಿ ಮುಚ್ಚಲು ಮತ್ತು ಉದ್ಯೋಗಿಗಳನ್ನು ಲೇ ಆಫ್ ಮಾಡಲು ಕಂಪನಿ ನಿರ್ಧರಿಸಿದೆ. ಕೆಲಸ ಕಳೆದುಕೊಳ್ಳುವ ಉದ್ಯೋಗಿಗಳಿಗೆ 60 ದಿನಗಳ ಕಾಂಪೆನ್ಸೇಶನ್ ನೀಡಲಾಗುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ