ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್​ನಲ್ಲಿ 20 ಕೋಟಿ ಕ್ಲೈಂಟ್ ಅಕೌಂಟ್​ಗಳ ಮೈಲಿಗಲ್ಲು; ಷೇರುಮಾರುಕಟ್ಟೆಗೊಂದು ಹೊಸ ಗರಿ

ಮುಂಬೈ, ಅಕ್ಟೋಬರ್ 31: ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್ ಹೊಸ ಮೈಲಿಗಲ್ಲು ಮುಟ್ಟಿದೆ. ಎನ್​ಎಸ್​ಇನ ಒಟ್ಟು ಕ್ಲೈಂಟ್ ಅಕೌಂಟ್​ಗಳ ಸಂಖ್ಯೆ 20 ಕೋಟಿ ಮುಟ್ಟಿದೆ. ಕೇವಲ ಎಂಟು ತಿಂಗಳಲ್ಲಿ ಮೂರು ಕೋಟಿಗೂ ಅಧಿಕ ಖಾತೆಗಳು ಸ್ಥಾಪನೆಯಾಗಿವೆ. ಶೇ. 18ರಷ್ಟು ಎಸ್​ಎಸ್​ಇ ಡೀಮ್ಯಾಟ್ ಅಕೌಂಟ್​ಗಳು ಮಹಾರಾಷ್ಟ್ರದಿಂದಲೇ ಬಂದಿವೆ. ಮಹಾರಾಷ್ಟ್ರ, ಉತ್ತರಪ್ರದೇಶ, ಗುಜರಾತ್, ರಾಜಸ್ಥಾನ ಮತ್ತು ಪಶ್ಚಿಮ ಬಂಗಾಳ, ಈ ಐದು ರಾಜ್ಯಗಳಿಂದ ಅರ್ಧದಷ್ಟು ಕ್ಲೈಂಟ್ ಅಕೌಂಟ್​ಗಳು ರಚನೆ ಆಗಿವೆ.

ಮಹಾರಾಷ್ಟ್ರದಿಂದ 3.6 ಕೋಟಿ, ಉತ್ತರಪ್ರದೇಶದಿಂದ 2.2 ಕೋಟಿ, ಗುಜರಾತ್ 1.8 ಕೋಟಿ, ರಾಜಸ್ಥಾನ 1.2 ಕೋಟಿ, ಪಶ್ಚಿಮ ಬಂಗಾಳದಿಂದ 1.2 ಕೋಟಿಯಷ್ಟು ಕ್ಲೈಂಟ್ ಅಕೌಂಟ್​ಗಳ ಸ್ಥಾಪನೆ ಆಗಿರುವುದು ತಿಳಿದುಬಂದಿದೆ.

ಇದನ್ನೂ ಓದಿ: ಒಂದೇ ದಿನದಲ್ಲಿ 3.53 ರೂನಿಂದ 2,36,250 ರೂ; ಎಲ್ಸಿಡ್ ಷೇರುಬೆಲೆ ಧಮಾಕ ಕಾಣಲು ಏನು ಕಾರಣ?

ಪ್ರತ್ಯೇಕ ನೊಂದಾಯಿತ ಹೂಡಿಕೆದಾರರ (Unique registered investor) ಸಂಖ್ಯೆಯೂ ಗಣನೀಯವಾಗಿ ಹೆಚ್ಚುತ್ತಿದೆ. 2023ರಲ್ಲಿ 8.35 ಕೋಟಿಯಷ್ಟಿದ್ದ ನೊಂದಾಯಿತ ಹೂಡಿಕೆದಾರರ ಬಳಗ 2024ರ ಆಗಸ್ಟ್ 8ಕ್ಕೆ 10.5 ಕೋಟಿ ಸಂಖ್ಯೆ ಮುಟ್ಟಿದೆ. ಈ ಅಂಕಿ ಅಂಶಗಳು ಭಾರತೀಯ ಈಕ್ವಿಟಿ ಮಾರುಕಟ್ಟೆಯಲ್ಲಿ ಜನರ ಪಾಲ್ಗೊಳ್ಳುವಿಕೆ ದಿನೇ ದಿನೇ ಏರಿಕೆ ಆಗುತ್ತಿರುವುದನ್ನು ತೋರಿಸುತ್ತದೆ.

ಎನ್​ಎಸ್​ಇನಲ್ಲಿ ಕ್ಲೈಂಟ್ ಅಕೌಂಟ್ ಸಂಖ್ಯೆ 20 ಕೋಟಿ ಮುಟ್ಟಿದ್ದು ನಿಜಕ್ಕೂ ಅಸಾಧಾರಣ ಸಂಗತಿ. ಷೇರು ಮಾರುಕಟ್ಟೆಯ ಆಕರ್ಷಣೆ ಹೆಚ್ಚಿರುವುದು ಒಂದೆಡೆಯಾದರೆ, ಡಿಜಿಟಲ್ ಮತ್ತು ತಂತ್ರಜ್ಞಾನ ಆವಿಷ್ಕಾರಗಳು ಹೂಡಿಕೆ ಕಾರ್ಯವನ್ನು ಸುಗಮಗೊಳಿಸಿರುವುದೂ ಕೂಡ ಇನ್ನೊಂದು ಕಾರಣವಾಗಿರಬಹುದು.

ಇದನ್ನೂ ಓದಿ: ಹೀಗೂ ಉಂಟೆ..! ಗೂಗಲ್​ಗೆ 2.5 ಡೆಸಿಲಿಯನ್ ಡಾಲರ್ ದಂಡ ಹಾಕಿದ ರಷ್ಯಾ; ಇಡೀ ವಿಶ್ವದಲ್ಲಿರುವ ದುಡ್ಡು ತಂದು ಸುರಿದರೂ ಸಾಕಾಗಲ್ಲ

ಕೆವೈಸಿ ಪ್ರಕ್ರಿಯೆಯನ್ನು ಸುಲಭಗೊಳಿಸಲಾಗಿದೆ. ವೈಯಕ್ತಿಕ ಹಣಕಾಸು ತಿಳಿವಳಿಕೆ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಅರಿವು ಹೆಚ್ಚುತ್ತಿದೆ. ಮಾರುಕಟ್ಟೆ ಕಳೆದ ಕೆಲ ವರ್ಷಗಳಿಂದ ಅದ್ವಿತೀಯ ಓಟದಲ್ಲಿದೆ. ಷೇರು ಮಾರುಕಟ್ಟೆಯಲ್ಲಿ ಅತೀವ ರಿಸ್ಕ್​ನಿಂದ ಹಿಡಿದು ತೀರಾ ಕಡಿಮೆ ರಿಸ್ಕ್ ಇರುವ ಹಲವು ಆಯ್ಕೆಗಳಿವೆ. ಇಟಿಎಫ್, ಗೋಲ್ಡ್, ಸಿಲ್ವರ್ ಇತ್ಯಾದಿಗಳ ಮೇಲೂ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆಗೆ ಅವಕಾಶ ಇದೆ. ಇವೆಲ್ಲವೂ ಷೇರುಮಾರುಕಟ್ಟೆಯ ಜನಾಕರ್ಷಣೆಯನ್ನು ಹೆಚ್ಚಿಸುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ