Multibagger Penny Stock: ಒಂದೇ ತಿಂಗಳಲ್ಲಿ ಶೇ 200ರ ರಿಟರ್ನ್ಸ್ ಒದಗಿಸಿಕೊಟ್ಟಿದೆ 2 ರೂ.ಗಿಂತ ಕಡಿಮೆ ಬೆಲೆಯ ಈ ಷೇರು

ಭಾರತೀಯ ಷೇರು ಮಾರುಕಟ್ಟೆಯಲ್ಲಿ ಕಳೆದ ಒಂದು ತಿಂಗಳ ಅವಧಿಯಲ್ಲಿ ಅತಿಹೆಚ್ಚು ರಿಟರ್ನ್ಸ್ ತಂದುಕೊಟ್ಟ ಮಲ್ಟಿಬ್ಯಾಗರ್ ಸ್ಟಾಕ್​​​ಗಳ (Multibagger Stock) ಪೈಕಿ ಜೈಮಾತಾ ಗ್ಲಾಸ್ ಲಿಮಿಟೆಡ್ (Jai Mata Glass Ltd) ಕಂಪನಿಯ ಷೇರು ಮುಂಚೂಣಿಯಲ್ಲಿದೆ. ಈ ಸ್ಮಾಲ್ ಕ್ಯಾಪ್ ಷೇರು ಹೂಡಿಕೆದಾರರಿಗೆ ಒಂದೇ ತಿಂಗಳಿನಲ್ಲಿ ಶೇಕಡಾ 200ರ ರಿಟರ್ನ್ಸ್ ತಂದುಕೊಟ್ಟಿದೆ. ಈ ಷೇರು ನಿರಂತರವಾಗಿ ಉತ್ತಮ ವಹಿವಾಟು ನಡೆಸುತ್ತಿದ್ದು, ಮುಂದಿನ ದಿನಗಳಲ್ಲಿಯೂ ಇದೇ ರೀತಿ ಮುಂದುವರಿಯುವ ನಿರೀಕ್ಷೆ ಇದೆ ಎಂದು ಹೂಡಿಕೆ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

2023ರ ಎಲ್ಲ ಟ್ರೇಡಿಂಗ್​ ಸೆಷನ್​ಗಳಲ್ಲಿಯೂ ಜೈಮಾತಾ ಗ್ಲಾಸ್ ಲಿಮಿಟೆಡ್ ಷೇರು ಅಪ್ಪರ್ ಸರ್ಕ್ಯೂಟ್​​ನಲ್ಲೇ ವಹಿವಾಟು ನಡೆಸಿದೆ. ಷೇರಿನ ಬೆಲೆ 0.49ರಿಂದ 1.58 ರೂ.ಗೆ ಹೆಚ್ಚಳವಾಗುವ ಮೂಲಕ ಶೇಕಡಾ 200ರಷ್ಟು ರಿಟರ್ನ್ಸ್ ತಂದುಕೊಟ್ಟಿದೆ. ಕಳೆದ ಆರು ತಿಂಗಳುಗಳಲ್ಲಿ ಈ ಪೆನ್ನಿ ಸ್ಟಾಕ್ 0.38ರಿಂದ 1.58 ರೂ.ವರೆಗೆ ಮೌಲ್ಯ ವೃದ್ಧಿಸಿಕೊಂಡಿದ್ದು, ಒಟ್ಟಾರೆಯಾಗಿ ಹೂಡಿಕೆದಾರರಿಗೆ ಶೇಕಡಾ 315ರ ಗಳಿಕೆ ತಂದುಕೊಟ್ಟಿದೆ. ದೀರ್ಘಾವಧಿಯ ಹೂಡಿಕೆದಾರರು ಶೇಕಡಾ 225ರ ವರೆಗೆ ರಿಟರ್ನ್ಸ್ ಗಳಿಸಿದ್ದಾರೆ.

ಷೇರು ಹೂಡಿಕೆ ಲೆಕ್ಕಾಚಾರ

ಜೈಮಾತಾ ಗ್ಲಾಸ್ ಲಿಮಿಟೆಡ್​​ನಲ್ಲಿ ಒಂದು ವಾರದ ಹಿಂದೆ ಹೂಡಿಕೆದಾರರೊಬ್ಬರು 1 ಲಕ್ಷ ರೂ. ಹೂಡಿಕೆ ಮಾಡಿದ್ದರು ಎಂದಿಟ್ಟುಕೊಂಡರೆ, ಅವರ ಸಂಪತ್ತು ಈಗ ಈಗಿನ ಷೇರು ಮೌಲ್ಯ ಲೆಕ್ಕಾಚಾರದ ಪ್ರಕಾರ, 1.20 ಲಕ್ಷ ರೂ. ಆಗಿರುತ್ತದೆ. ಒಂದು ತಿಂಗಳ ಹಿಂದೆ 1 ಲಕ್ಷ ರೂ. ಹೂಡಿಕೆ ಮಾಡಿದ್ದರೆ ಅದೀಗ 3 ಲಕ್ಷ ರೂ. ಆಗಿರುತ್ತದೆ. ಆರು ತಿಂಗಳ ಹಿಂದೆ 1 ಲಕ್ಷ ರೂ. ಹೂಡಿಕೆ ಮಾಡಿದ್ದರೆ ಈಗ 4.15 ಲಕ್ಷ ರೂ. ಆಗಿರುತ್ತದೆ. ಒಂದು ವರ್ಷದ ಹಿಂದೆ 1 ಲಕ್ಷ ರೂ. ಹೂಡಿಕೆ ಮಾಡಿದ್ದರೆ ಇದೀಗ 3.25 ಲಕ್ಷ ರೂ. ರಿಟರ್ನ್ಸ್ ಬಂದಿರುತ್ತದೆ. ಈ ಮಲ್ಟಿಬ್ಯಾಗರ್ ಪೆನ್ನಿ ಸ್ಟಾಕ್ ಬಿಎಸ್​​ಇ (ಬಾಂಬೆ ಸ್ಟಾಕ್ ಎಕ್ಸ್​ಚೇಂಜ್) ಯಲ್ಲಿ ಮಾತ್ರ ಲಭ್ಯವಿದೆ.

ಮಲ್ಟಿಬ್ಯಾಗರ್ ಪೆನ್ನಿ ಸ್ಟಾಕ್​​​ ಎಂದರೆ…

ಮಲ್ಟಿಬ್ಯಾಗರ್ ಪೆನ್ನಿ ಸ್ಟಾಕ್ ಅಥವಾ ಷೇರು ಎಂದರೆ ಅತಿ ಕಡಿಮೆ ಬೆಲೆಗೆ ಷೇರು ಮಾರುಕಟ್ಟೆಯಲ್ಲಿ ದೊರೆಯುವ ಷೇರುಗಳಾಗಿವೆ. ಸಾಮಾನ್ಯವಾಗಿ ಹೂಡಿಕೆಯ ಸಂದರ್ಭದಲ್ಲಿ ಅತಿ ಕಡಿಮೆ ಮುಖ ಬೆಲೆಗೆ ಬಿಡುಗಡೆ ಮಾಡಿರುವ ಷೇರುಗಳನ್ನು ಮಲ್ಟಿಬ್ಯಾಗರ್ ಪೆನ್ನಿ ಸ್ಟಾಕ್ ಎಂದು ಕರೆಯಲಾಗುತ್ತದೆ. ಉದಾಹರಣೆಗೆ; ಒಬ್ಬ ಹೂಡಿಕೆದಾರ ನಿರ್ದಿಷ್ಟ ಅವಧಿಗೆ 5 ರೂ. ಹೂಡಿಕೆ ಮಾಡಿ ಒಂದು ಷೇರು ಕೊಳ್ಳುತ್ತಾನೆ ಎಂದುಕೊಂಡರೆ, ಅದು ಆತನಿಗೆ 10 ರೂ. ರಿಟರ್ನ್ಸ್ ತಂದುಕೊಟ್ಟರೆ ಅದನ್ನು ಎರಡು ಬ್ಯಾಗರ್ ಷೇರು ಎಂದು ಕರೆಯಲಾಗುತ್ತದೆ. ಇದೇ ರೀತಿ ಹಲವು ಪಟ್ಟು ರಿಟರ್ನ್ಸ್ ತಂದುಕೊಡುವ ಷೇರುಗಳು ಮಲ್ಟಿಬ್ಯಾಗರ್​​ ಎಂದು ಪರಿಗಣಿಸಲ್ಪಡುತ್ತವೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ