Mutual Funds: ಮ್ಯೂಚುವಲ್ ಫಂಡ್; 5 ವರ್ಷಗಳಲ್ಲಿ 50 ಲಕ್ಷ ರಿಟರ್ನ್ಸ್ಗೆ ಎಷ್ಟು ಮೊತ್ತದ ಎಸ್ಐಪಿ ಅಗತ್ಯ? ಇಲ್ಲಿದೆ ಮಾಹಿತಿ
ಐದು ವರ್ಷಗಳಲ್ಲಿ 50 ಲಕ್ಷ ರೂ. ರಿಟರ್ನ್ಸ್ ಗುರಿಯೊಂದಿಗೆ ಹೂಡಿಕೆ ಮಾಡುವಾಗ ಫ್ಲೆಕ್ಸಿ ಕ್ಯಾಪ್ ಅಥವಾ ಮಲ್ಟಿ ಕ್ಯಾಪ್ ಫಂಡ್ಗಳಲ್ಲಿ ಹೂಡಿಕೆ ಮಾಡುವುದು ಉತ್ತಮ. ಯಾಕೆಂದರೆ ಈ ಫಂಡ್ಗಳು ಮಾರುಕಟ್ಟೆಯ ವಿವಿಧ ವಿಭಾಗಗಳ ಷೇರುಗಳಲ್ಲಿ ಹೂಡಿಕೆ ಮಾಡುತ್ತವೆ ಎಂದು ತಜ್ಞರು ಹೇಳಿದ್ದಾರೆ.
Updated on: Jan 03, 2023 | 12:28 PM
ವೈಯಕ್ತಿಕ ಹಣಕಾಸಿನ (Personal Finance) ವಿಚಾರಕ್ಕೆ ಬಂದಾಗ, ಉತ್ತಮ ಅನುಭವ ಉಳ್ಳವರಾಗಿರಬಹುದು ಅಥವಾ ಹೊಸಬರೇ ಆಗಿರಬಹುದು, ಸರಿಯಾಗಿ ವಿವೇಚಿಸಿ ಮತ್ತು ಲೆಕ್ಕಾಚಾರ ಹಾಕಿ ಹೂಡಿಕೆ (Investment) ನಿರ್ಧಾರಗಳನ್ನು ಕೈಗೊಳ್ಳಬೇಕಾಗುತ್ತದೆ. ಸಂಪತ್ತಿನ ವೃದ್ಧಿಗೆ ಸಾಮಾನ್ಯವಾಗಿ ಎಸ್ಐಪಿ (SIP) ಅಥವಾ ವ್ಯವಸ್ಥಿತ ಹೂಡಿಕೆ ವಿಧಾನದ ಮೂಲಕ ಹೂಡಿಕೆಗೆ ಸಲಹೆ ನೀಡಲಾಗುತ್ತಿದೆ. ಎಸ್ಐಪಿ ಮೂಲಕ ದೀರ್ಘಾವಧಿಗೆ ಮಾಡುವ ಹೂಡಿಕೆಯಿಂದ ಹೆಚ್ಚಿನ ರಿಟರ್ನ್ಸ್ ಗಳಿಸಬಹುದು. ಎಸ್ಐಪಿ ಮೂಲಕ ಹೂಡಿಕೆ ಮಾಡಿ ಮುಂದಿನ 5 ವರ್ಷಗಳಲ್ಲಿ 50 ಲಕ್ಷ ರೂ. ಗಳಿಸುವುದು ನಿಮ್ಮ ಗುರಿ ಎಂದಿಟ್ಟುಕೊಳ್ಳೋಣ. ಹಾಗಿದ್ದರೆ ನಿಮ್ಮ ರಿಸ್ಕ್ ಪ್ರೊಫೈಲ್ಗೆ ಅನುಗುಣವಾಗಿ ಪ್ರತಿ ತಿಂಗಳು ಎಷ್ಟು ಮೊತ್ತದ ಎಸ್ಐಪಿ ಹೂಡಿಕೆ ಮಾಡಬೇಕು? ತಜ್ಞರು ನೀಡಿರುವ ಸಲಹೆ ಆಧಾರಿತ ಮಾಹಿತಿ ಇಲ್ಲಿದೆ.
ಯಾವುದೇ ಗುರಿ ಇಟ್ಟುಕೊಳ್ಳದೆ ಸುಮ್ಮನೇ ಹೂಡಿಕೆ ಮಾಡುತ್ತಾ ಹೋಗುವ ಬದಲು, ಗುರಿ ಆಧಾರಿತ ಹೂಡಿಕೆ ವಿಧಾನ ಒಳ್ಳೆಯದು ಎಂದಿದ್ದಾರೆ ‘ಫಿನ್ಟೂ’ ಸ್ಥಾಪಕ ಸಿಎ ಮನೀಶ್ ಪಿ ಹಿಂಗರ್. ಇವರ ಜತೆಗೆ ನಡೆಸಿದ ಸಂದರ್ಶನವನ್ನು ಆಧಾರವಾಗಿಟ್ಟುಕೊಂಡು ‘ಲೈವ್ ಮಿಂಟ್ ಡಾಟ್ ಕಾಂ’ ಎಸ್ಐಪಿ ಹೂಡಿಕೆ ಸಲಹೆ ನೀಡಿದೆ. ಗುರಿ ಆಧಾರಿತ ಹೂಡಿಕೆಯಲ್ಲಾದರೆ ಇಂತಿಷ್ಟು ಮೊತ್ತ ಹೂಡಿಕೆ ಮಾಡಬೇಕೆಂಬ ಲೆಕ್ಕಾಚಾರ ಹಾಕಬಹುದು. ಹೂಡಿಕೆದಾರ ರಿಸ್ಕ್ ಪ್ರೊಫೈಲ್, ಹೂಡಿಕೆ ಸಾಮರ್ಥ್ಯ ಇತ್ಯಾದಿ ಲೆಕ್ಕಾಚಾರಗಳಿಗೆ ಅನುಗುಣವಾಗಿ ಹಣಕಾಸು ಯೋಜನೆಗಳನ್ನು ಸಿದ್ಧತೆ ಮಾಡಿಕೊಳ್ಳಬಹುದು ಎಂದು ಮನೀಶ್ ಹೇಳಿದ್ದಾರೆ.
50 ಲಕ್ಷ ರಿಟರ್ನ್ಸ್ಗೆ ಎಷ್ಟು ಮೊತ್ತದ ಎಸ್ಐಪಿ ಅಗತ್ಯ?
ಐದು ವರ್ಷಗಳಲ್ಲಿ 50 ಲಕ್ಷ ರೂ. ರಿಟರ್ನ್ಸ್ ಗುರಿಯೊಂದಿಗೆ ಹೂಡಿಕೆ ಮಾಡುವಾಗ ಫ್ಲೆಕ್ಸಿ ಕ್ಯಾಪ್ ಅಥವಾ ಮಲ್ಟಿ ಕ್ಯಾಪ್ ಫಂಡ್ಗಳಲ್ಲಿ ಹೂಡಿಕೆ ಮಾಡುವುದು ಉತ್ತಮ. ಯಾಕೆಂದರೆ ಈ ಫಂಡ್ಗಳು ಮಾರುಕಟ್ಟೆಯ ವಿವಿಧ ವಿಭಾಗಗಳ ಷೇರುಗಳಲ್ಲಿ ಹೂಡಿಕೆ ಮಾಡುತ್ತವೆ ಎಂದು ಅವರು ಸಲಹೆ ನೀಡಿದ್ದಾರೆ. ಉದಾಹರಣೆಗೆ, ಐದು ವರ್ಷಗಳಲ್ಲಿ 50 ಲಕ್ಷ ರೂ. ರಿಟರ್ನ್ಸ್ ಗುರಿಯೊಂದಿಗೆ ಫ್ಲೆಕ್ಸಿ ಕ್ಯಾಪ್ ಅಥವಾ ಮಲ್ಟಿ ಕ್ಯಾಪ್ ಫಂಡ್ನಲ್ಲಿ ಹೂಡಿಕೆ ಮಾಡುವುದಿದ್ದರೆ, ವಾರ್ಷಿಕ ಶೇಕಡಾ 15ರ ರಿಟರ್ನ್ಸ್ ಗುರಿಯೊಂದಿಗೆ ಪ್ರತಿ ತಿಂಗಳು 55,750 ರೂ. ಮೊತ್ತದ ಎಸ್ಐಪಿ ಆರಂಭಿಸಬಹುದು ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ: SIP Vs Lumpsum: ಲಂಸಮ್ ಅಥವಾ ಎಸ್ಐಪಿ; 2023ರಲ್ಲಿ ಮ್ಯೂಚುವಲ್ ಫಂಡ್ ಹೂಡಿಕೆಗೆ ಯಾವುದು ಉತ್ತಮ? ತಜ್ಞರ ಸಲಹೆ ಇಲ್ಲಿದೆ
ಎಚ್ಡಿಎಫ್ಸಿ ಫ್ಲೆಕ್ಸಿ ಕ್ಯಾಪ್ ಫಂಡ್, ನಿಪ್ಪಾನ್ ಇಂಡಿಯಾ ಮಲ್ಟಿ ಕ್ಯಾಪ್ ಫಂಡ್ಗಳು ಈ ವರ್ಷ ಕ್ರಮವಾಗಿ ವಾರ್ಷಿಕ ಶೇಕಡಾ 19.40 ಹಾಗೂ ಶೇಕಡಾ 15.90 ಗಳಿಕೆ ದಾಖಲಿಸಿವೆ. ಈ ಫಂಡ್ಗಳ ಕೆಟಗರಿ ಸರಾಸರಿ ಶೇಕಡಾ 2.59 ಹಾಗೂ ಶೇಕಡಾ 5.91 ಆಗಿದೆ. ಈ ಎರಡೂ ಫಂಡ್ಗಳು ಬೇರೆ ಬೇರೆ ಕ್ಷೇತ್ರದ ಷೇರುಗಳಲ್ಲಿ ಹೂಡಿಕೆ ಮಾಡಿ ಉತ್ತಮ ಕಾರ್ಯತಂತ್ರ ರೂಪಿಸಿರುವುರಿಂದ ಮಾರುಕಟ್ಟೆ ಏರಿಳಿತಗಳ ಹೊರತಾಗಿಯೂ ಉತ್ತಮ ಗಳಿಕೆ ದಾಖಲಿಸುತ್ತಿವೆ.
ಫಂಡ್ ಆಯ್ಕೆ ಮಾಡುವ ಮುನ್ನ ಬಹಳ ಎಚ್ಚರಿಕೆಯಿಂದ ಅಧ್ಯಯನ ನಡೆಸಿ ಭಿನ್ನ ಮ್ಯೂಚುವಲ್ ಫಂಡ್ಗಳಲ್ಲಿ ಹೂಡಿಕೆ ಆಯ್ದುಕೊಳ್ಳುಬೇಕು. ಹೂಡಿಕೆ ಗುರಿ, ಮಾರುಕಟ್ಟೆ ಅಪಾಯಗಳಿಂದ ರಕ್ಷಿಸಿಕೊಳ್ಳುವ ಸಾಮರ್ಥ್ಯ ಹಾಗೂ ಇತರ ಅಂಶಗಳನ್ನು ಪರಿಗಣಿಸಿ ಫಂಡ್ ಆಯ್ದುಕೊಳ್ಳಬೇಕು ಎಂದು ಮನೀಶ್ ಸಲಹೆ ನೀಡಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
