ಮ್ಯೂಚುವಲ್ ಫಂಡ್ ಎಸ್​ಐಪಿಯಲ್ಲಿ ನೀವು ಒಂದು ತಿಂಗಳು ಕಂತು ಕಟ್ಟದಿದ್ದರೆ ಏನಾಗುತ್ತೆ?

ಮ್ಯೂಚುವಲ್ ಫಂಡ್​ನಲ್ಲಿ ಹೂಡಿಕೆ ಮಾಡಬಯಸುವ ಜನರಲ್ಲಿ ಹೆಚ್ಚಿನವರು ಎಸ್​ಐಪಿ (Mutual Fund SIP) ಮಾರ್ಗ ಹಿಡಿಯುತ್ತಾರೆ. ಸಿಸ್ಟಮ್ಯಾಟಿಕ್ ಇನ್ವೆಸ್ಟ್​​ಮೆಂಟ್ ಪ್ಲಾನ್​ನಲ್ಲಿ ಜನರು ಆರ್​ಡಿ (RD- Recurring Deposit) ರೀತಿಯಲ್ಲಿ ಪ್ರತೀ ತಿಂಗಳು ನಿಯಮಿತವಾಗಿ ನಿಗದಿತ ಕಂತನ್ನು ಪಾವತಿಸಬಹುದು. ಹೆಚ್ಚಿನ ಮ್ಯೂಚುವಲ್ ಫಂಡ್​ಗಳು ದೀರ್ಘಾವಧಿಯಲ್ಲಿ ವರ್ಷಕ್ಕೆ ಶೇ. 10ರಿಂದ 20ರಂತೆ ಲಾಭ ತರಬಹುದು. ಷೇರುಗಳ ಮೇಲೆ ನೇರವಾಗಿ ಹೂಡಿಕೆ ಮಾಡುವುದು ಹೆಚ್ಚಿನ ಜನರಿಗೆ ರಿಸ್ಕಿ ಎನಿಸಬಹುದು. ಹೀಗಾಗಿ, ಮ್ಯೂಚುವಲ್ ಫಂಡ್ ಬಹಳ ಜನಪ್ರಿಯವಾಗಿದೆ. ಲಂಪ್ಸಮ್ ಹಣ ಇಲ್ಲದಿದ್ದರೆ ಎಸ್​ಐಪಿ ಮೂಲಕ ಹೂಡಿಕೆ ಮಾಡುವುದು ಇನ್ನೂ ಸುಗಮವಾದ ಸಂಗತಿ.

ಎಸ್​ಐಪಿ ಆಯ್ದುಕೊಂಡರೆ ಸಾಲಕ್ಕೆ ಕಂತುಗಳನ್ನು ಕಟ್ಟುವ ರೀತಿಯಲ್ಲೇ ನಿಯಮಿತವಾಗಿ ಎಸ್​ಐಪಿ ಕಂತುಗಳನ್ನು ಪಾವತಿಸಬೇಕು. ಬ್ಯಾಂಕುಗಳ ಸಾಲದ ಕಂತುಗಳನ್ನು ಕಟ್ಟದಿದ್ದರೆ ದಂಡ ವಿಧಿಸಲಾಗುತ್ತದೆ. ನಿಮ್ಮ ಕ್ರೆಡಿಟ್ ಸ್ಕೋರ್​ಗೆ ಹೊಡೆತ ಬೀಳುತ್ತದೆ. ಮ್ಯೂಚುವಲ್ ಫಂಡ್ ಎಸ್​ಐಪಿಯಲ್ಲಿ ಕಂತು ಕಟ್ಟುವುದು ತಪ್ಪಿದರೆ ಇದೇ ರೀತಿ ದಂಡ ಬೀಳುತ್ತಾ? ಕ್ರೆಡಿಟ್ ಸ್ಕೋರ್ ಕಡಿಮೆ ಆಗುತ್ತಾ?

ಇದನ್ನೂ ಓದಿ: ಸಂಬಳ ಕಡಿಮೆಯಾ? ಆದರೂ ಒಂದು ಕೋಟಿ ರೂ ಕೂಡಿಡಬಹುದು; ಇಲ್ಲಿದೆ ಟಿಪ್ಸ್

ಎಸ್​ಐಪಿಯಲ್ಲಿ ಒಂದು ಅಥವಾ ಎರಡು ಕಂತು ಕಟ್ಟದೇ ಹೋದರೆ ತೊಂದರೆ ಇಲ್ಲ. ದಂಡ ವಿಧಿಸಲಾಗುವುದಿಲ್ಲ. ಆದರೆ, ಸತತ ಮೂರು ಕಂತುಗಳನ್ನು ಕಟ್ಟಲು ವಿಫಲವಾದಲ್ಲಿ ನಿಮ್ಮ ಎಸ್​ಐಪಿ ರದ್ದುಗೊಳ್ಳಬಹುದು. ಇದು ಬಹಳ ಮುಖ್ಯ.

ಎಸ್​ಐಪಿ ಕಂತು ಕಟ್ಟಲು ವಿಫಲವಾಗುವುದರಿಂದ ಇತರ ಕೆಲ ಹಿನ್ನಡೆಗಳಾಗಬಹುದು. ನಿಮ್ಮ ಹೂಡಿಕೆಯಿಂದ ಸಿಗಬಹುದಾದ ಲಾಭ ತುಸು ಕಡಿಮೆ ಆಗಬಹುದು. ನಿಮ್ಮ ಹಣಕಾಸು ಶಿಸ್ತು ಸಡಿಲಗೊಂಡಂತಾಗಬಹುದು. ಇವು ಸಣ್ಣಪುಟ್ಟ ಸಮಸ್ಯೆ ಬಿಟ್ಟರೆ ಎಸ್​ಐಪಿ ಕಂತು ಮಿಸ್ ಆಯಿತೆಂದು ಪರಿತಪಿಸಬೇಕಿಲ್ಲ.

ಇದನ್ನೂ ಓದಿ: 40ರ ಬಳಿಕ ಮನೆ ಮಾಡಲು ಹೊರಟಿದ್ದೀರಾ? ಈ ಅಂಶಗಳು ಗಮನದಲ್ಲಿರಲಿ

ಸತತ ಮೂರು ಬಾರಿ ಕಂತು ಕಟ್ಟುವುದು ತಪ್ಪದಂತೆ ಎಚ್ಚರ ವಹಿಸಿ. ಸಾಧ್ಯವಾದಷ್ಟೂ ಪ್ರತೀ ತಿಂಗಳು ನಿಯಮಿತವಾಗಿ ಕಂತು ಕಟ್ಟಿರಿ. ಆಟೊಮ್ಯಾಟಿಕ್ ಪೇಮೆಂಟ್ ಆಗುವಂತೆ ಎಸ್​ಐಪಿ ಸೆಟ್ ಮಾಡಿ. ಪಾವತಿ ದಿನದಂದು ಬ್ಯಾಂಕ್​ನಲ್ಲಿ ಅಷ್ಟು ಫಂಡ್ ಇರುವುದನ್ನು ಖಾತ್ರಿಪಡಿಸಿಕೊಳ್ಳಿ.

ಮ್ಯೂಚುವಲ್ ಫಂಡ್ ಎಸ್​ಐಪಿ ದೀರ್ಘಾವಧಿ ಹೂಡಿಕೆಗೆ ಅತ್ಯುತ್ತಮವಾಗಿದೆ. ಹೀಗಾಗಿ, ನೀವು ಹಣಕಾಸು ಶಿಸ್ತು ಸಾಧಿಸುವುದು ಅನಿವಾರ್ಯವಾಗುತ್ತದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 10:23 am, Fri, 24 May 24