Insurance tips: ನಿಂತ ಕಾರಿಗೆ ಮಳೆ ನೀರು ಆವರಿಸಿದಾಗ… ಏನು ಮಾಡಬೇಕು, ಮಾಡಬಾರದು? ಇಲ್ಲಿದೆ ಇನ್ಷೂರೆನ್ಸ್ ಟಿಪ್ಸ್

ಬೆಂಗಳೂರು, ಮೇ 20: ರಾಜ್ಯದಲ್ಲಿ ಈಗ ಮಳೆಗಾಲದ ರೀತಿ ಭಾರೀ ಮಳೆಯಾಗುತ್ತಿದೆ. ರಾಜಧಾನಿ ಬೆಂಗಳೂರು ನಗರದ ಹಲವು ಭಾಗಗಳು ಕೆರೆಗಳಂತಾಗಿವೆ. ಅಪಾರ್ಟ್ಮೆಂಟ್​​​ಗಳ ಪಾರ್ಕಿಂಗ್ ಜಾಗಗಳಂತೂ ಅಕ್ಷರಶಃ ಸ್ವಿಮಿಂಗ್ ಪೂಲ್ ಆಗಿ ಹೋಗಿವೆ. ರಸ್ತೆಯಲ್ಲಿ ನಿಲ್ಲಿಸಿದ ಕಾರುಗಳೂ ಕೂಡ ಜಲಾವೃತಗೊಳ್ಳುತ್ತಿವೆ. ಮಳೆ ನೀರಿನ (rain flood water) ಮಧ್ಯೆ ಕಾರು ನಿಂತು ಹೋದರೆ, ಅಥವಾ ನಿಲ್ಲಿಸಿದ್ದ ಕಾರಿಗೆ ನೀರು ಆವೃತಗೊಂಡರೆ ಬಹಳ ಎಚ್ಚರದಿಂದ ಇರಬೇಕು. ಆ ಸಂದರ್ಭದಲ್ಲಿ ಕಾರಿನ ಎಂಜಿನ್ ಸ್ಟಾರ್ಟ್ ಮಾಡಿದರೆ ಕೆಟ್ಟು ಹೋಗುವ ಸಾಧ್ಯತೆ ಇದೆ. ಅದಕ್ಕಿಂತ ಹೆಚ್ಚಾಗಿ, ನಿಮಗೆ ಕಾರಿನ ಇನ್ಷೂರೆನ್ಸ್ (vehicle insurance) ಇದ್ದರೆ ಪ್ರಯೋಜನಕ್ಕೆ ಬರದಂತಾಗಿಬಿಡಬಹುದು.

ನಿಮ್ಮ ಕಾರಿಗೆ ಯಾವ ಇನ್ಷೂರೆನ್ಸ್ ಮಾಡಿಸಿದ್ದೀರಿ?

ಮೊದಲಿಗೆ ನಿಮ್ಮ ಕಾರಿಗೆ ಮಾಡಿಸಿರುವ ಇನ್ಷೂರೆನ್ಸ್ ಪ್ಲಾನ್ ಯಾವ ರೀತಿಯದ್ದು ಎಂಬುದನ್ನು ಗಮನಿಸಿ. ನೀವು ಥರ್ಡ್ ಪಾರ್ಟಿ ಇನ್ಷೂರೆನ್ಸ್ ಕವರೇಜ್ ಮಾತ್ರವೇ ಮಾಡಿಸಿದ್ದರೆ ಫ್ಲಡಿಂಗ್ ವೇಳೆ ಉಪಯೋಗಕ್ಕೆ ಬರುವುದಿಲ್ಲ. ಕಾಂಪ್ರಹೆನ್ಸಿವ್ ಇನ್ಷೂರೆನ್ಸ್ ಪ್ಲಾನ್ ಪಡೆದಿರಬೇಕು.

ಈ ಕಾಂಪ್ರಹೆನ್ಸಿವ್ ಪ್ಲಾನ್​​​ನಲ್ಲಿ ಥರ್ಡ್ ಪಾರ್ಟಿ ವಿಮೆ ಜೊತೆಗೆ ನೈಸರ್ಗಿಕ ವಿಕೋಪಗಳಿಂದ ಕಾರಿಗೆ ಆಗುವ ಹಾನಿಗೂ ಕವರೇಜ್ ಸಿಗುತ್ತದೆ. ಅಪಘಾತ, ಕಳುವು ಇತ್ಯಾದಿಗೂ ಕವರೇಜ್ ಇರುತ್ತದೆ.

ಇದನ್ನೂ ಓದಿ: ಭಾರತೀಯ ಮನೆಗಳಲ್ಲಿದೆ ಜಗತ್ತಿನ ಅತಿಹೆಚ್ಚು ಚಿನ್ನ; ಅವಿಷ್ಟೂ ಸೇರಿಸಿದರೆ ಇವತ್ತಿನ ಮೌಲ್ಯ ಅದೆಷ್ಟು ಅಗಾಧ ಗೊತ್ತಾ?

ಥರ್ಡ್ ಪಾರ್ಟಿ ಇನ್ಷೂರೆನ್ಸ್ ಪ್ಲಾನ್​​ಗಿಂತ ಕಾಂಪ್ರಹೆನ್ಸಿವ್ ಪ್ಲಾನ್​​ನ ಪ್ರೀಮಿಯಮ್ ಹೆಚ್ಚಿರುತ್ತದೆ. ಹೆಚ್ಚಿನ ಜನರು, ಆರ್​​ಟಿಒ ನಿಯಮ ಪಾಲನೆ ಉದ್ದೇಶದಿಂದ ನಾಮಕವಾಸ್ತೆಗೆ ಇನ್ಷೂರೆನ್ಸ್ ಪಾಲಿಸಿ ಪಡೆಯುವುದುಂಟು. ಅಂಥವರು ಕಡಿಮೆ ಪ್ರೀಮಿಯಮ್​​ನ ಥರ್ಡ್ ಪಾರ್ಟಿ ಇನ್ಷೂರೆನ್ಸ್ ಪ್ಲಾನ್ ಪಡೆದಿರುತ್ತಾರೆ. ಕಾಂಪ್ರೆಹೆನ್ಸಿವ್ ಇನ್ಷೂರೆನ್ಸ್ ಪ್ಲಾನ್ ಎಲ್ಲಾ ರೀತಿಯಿಂದ ಅಗತ್ಯವಾದುದು.

ಕಾರಿಗೆ ನೀರು ತುಂಬಿದಾಗ ತೆಗೆದುಕೊಳ್ಳಬೇಕಾದ ಕ್ರಮಗಳಿವು

• ನೀವು ಪಾರ್ಕ್ ಮಾಡಿದ ಕಾರಿಗೆ ಮಳೆ ನೀರು ತುಂಬಿದಾಗ ವಾಹನವನ್ನು ಸ್ಟಾರ್ಟ್ ಮಾಡಲು ಹೋಗಬೇಡಿ.
• ನೀರಿನಲ್ಲಿ ಸಿಲುಕಿರುವ ನಿಮ್ಮ ಕಾರು ಹಾಗೂ ಸುತ್ತಮುತ್ತಲ ವಾತಾವರಣದ ಫೋಟೋ ಮತ್ತು ವಿಡಿಯೋಗಳನ್ನು ರೆಕಾರ್ಡ್ ಮಾಡಿರಿ.
• ನಂತರ, ಇನ್ಷೂರೆನ್ಸ್ ಕಂಪನಿಯನ್ನು ಸಂಪರ್ಕಿಸಿ, ಮಾಹಿತಿ ನೀಡಿ.
• ರಿಜಿಸ್ಟ್ರೇಶನ್ ಸರ್ಟಿಫಿಕೇಟ್, ಇನ್ಷೂರೆನ್ಸ್ ಪಾಲಿಸಿ, ಡಿಎಲ್ ಇತ್ಯಾದಿ ವಿವರ ಸಿದ್ಧವಿಟ್ಟುಕೊಳ್ಳಿ.
• ಇನ್ಷೂರೆನ್ಸ್ ಕಂಪನಿಯ ಪ್ರತಿನಿಧಿ ನಿಮಗೆ ಕರೆ ಮಾಡಬಹುದು. ಅಥವಾ ನೀವೇ ಇನ್ಷೂರೆನ್ಸ್ ಕಂಪನಿಯ ಪೋರ್ಟಲ್​​​ನಲ್ಲಿ ಕ್ಲೇಮ್ ಸೆಕ್ಷನ್​​ಗೆ ಹೋಗಿ ಮಾಹಿತಿ ನೀಡಬಹುದು.
• ಇನ್ಷೂರೆನ್ಸ್ ಕಂಪನಿ ನಮೂದಿಸಿರುವ ಅಧಿಕೃತ ಸರ್ವಿಸ್ ಸೆಂಟರ್ ಅನ್ನು ಸಂಪರ್ಕಿಸಿ ತಿಳಿಸಿ.
• ಸರ್ವಿಸ್​​ಮ್ಯಾನ್ ಅವರನ್ನು ಸ್ಥಳಕ್ಕೆ ಕರೆಸಿ, ವಾಹನಕ್ಕೆ ಏನು ಹಾನಿಯಾಗಿದೆ ಎಂಬುದನ್ನು ಪರಿಶೀಲಿಸಿ, ಅದರ ದುರಸ್ತಿಗೆ ಎಷ್ಟು ವೆಚ್ಚವಾಗಬಹುದು ಎಂಬ ಮಾಹಿತಿ ಪಡೆಯಿರಿ.

ಇದನ್ನೂ ಓದಿ: ದುಡ್ಡು ಉಳಿಸೋಕೆ ಎಐ ಇಟ್ಟು ಕೈಸುಟ್ಟುಕೊಂಡ ಕಂಪನಿ; ಈಗ ಮತ್ತೆ ಮನುಷ್ಯರೇ ಗತಿ

ಇಲ್ಲಿ ಗಮನಿಸಬೇಕಾದ ಸಂಗತಿ ಎಂದರೆ, ನೀರಿನಲ್ಲಿ ಕಾರು ನಿಂತಿದ್ದಾಗ ನೀವು ಎಂಜಿನ್ ಸ್ಟಾರ್ಟ್ ಮಾಡಿ, ಅದು ಕೆಟ್ಟು ಹೋಗಿಬಿಟ್ಟರೆ ಆಗ ಇನ್ಷೂರೆನ್ಸ್ ಕವರೇಜ್ ಸಿಕ್ಕೋದಿಲ್ಲ. ಹೀಗಾಗಿ, ಕಾರು ಸ್ಟಾರ್ಟ್ ಮಾಡುವ ಮುನ್ನ ಈ ಮೇಲಿನ ಕ್ರಮಗಳನ್ನು ಅನುಸರಿಸುವುದು ಬಹಳ ಮುಖ್ಯ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ