ಜಿಯೋ ಭಾರತ್, ಏರ್​ಫೈಬರ್, ಸ್ಮಾರ್ಟ್ ಹೋಮ್, ಇನ್ಷೂರೆನ್ಸ್, ಅನಿಲ ಉತ್ಪಾದನೆ; ರಿಲಾಯನ್ಸ್ ಮಹಾಸಭೆಯ ಮುಖ್ಯಾಂಶಗಳು

ಮುಂಬೈ, ಆಗಸ್ಟ್ 28: ರಿಲಾಯನ್ಸ್​ನ 46ನೇ ವಾರ್ಷಿಕ ಮಹಾಸಭೆ ಇಂದು ನಡೆದಿದ್ದು, ಆರ್​ಐಎಲ್ ಛೇರ್ಮನ್ ಮುಕೇಶ್ ಅಂಬಾನಿ ವಿಡಿಯೋ ಕಾನ್ಫೆರೆನ್ಸ್ ಮೂಲಕ ಭಾಷಣ ಮಾಡಿದರು. ರಿಲಾಯನ್ಸ್ ಸಮೂಹದ ಕಂಪನಿಗಳ ಸಾಧನೆಯನ್ನು ತಿಳಿಸುವುದರ ಜೊತೆಗೆ ಕೆಲ ಹೊಸ ಸೇವೆಗಳನ್ನೂ ಘೋಷಿಸಿದ್ದಾರೆ. ಎಲ್ಲರ ನಿರೀಕ್ಷೆಯ ಜಿಯೋ ಫೈನಾನ್ಸ್ ಸರ್ವಿಸಸ್ ಸಂಸ್ಥೆಯ ಭವಿಷ್ಯದ ರೂಪ ಬಿಚ್ಚಿಟ್ಟ ಅಂಬಾನಿ, ಈ ಹೊಸ ಕಂಪನಿ ಇನ್ಷೂರೆನ್ಸ್ ವಲಯದ ವ್ಯವಹಾರ ಹೊಂದಿರುತ್ತದೆ ಎಂದು ಹೇಳಿದ್ದಾರೆ. ಇನ್ನು, ಜಿಯೋ ಏರ್​ಫೈಬರ್, ಜಿಯೋ ಸ್ಮಾರ್ಟ್ ಹೋಮ್ ಸರ್ವಿಸಸ್ ಇತ್ಯಾದಿ ಸೇವೆಗಳು ಅನಾವರಣಗೊಳ್ಳಲಿವೆ. ಭಾರತ್ ಪೆಟ್ರೋಲಿಯಂ ಸಹಯೋಗದಲ್ಲಿ ರಿಲಾಯನ್ಸ್ ಸಂಸ್ಥೆ ಗ್ಯಾಸ್ ಉತ್ಪಾದನೆಯನ್ನು ಹೆಚ್ಚಿಸಲಿದೆ. ಮುಕೇಶ್ ಅಂಬಾನಿ ಅವರು ಈ ಎಜಿಎಂ ಸಭೆಯಲ್ಲಿ ಮಾಡಿದ ಭಾಷಣದ ಪ್ರಮುಖಾಂಶಗಳು ಇಲ್ಲಿವೆ.

ರಿಲಾಯನ್ಸ್ ವಾರ್ಷಿಕ ಮಹಾಸಭೆಯ ಮುಖ್ಯಾಂಶಗಳು

ಈ ವರ್ಷ ರಿಲಾಯನ್ಸ್​ನಿಂದ 3.4 ಲಕ್ಷಕೋಟಿ ರೂನಷ್ಟು ರಫ್ತಾಗಿದೆ. ಕಳೆದ ವರ್ಷಕ್ಕೆ ಹೋಲಿಸದರೆ ಶೇ. 33.4ರಷ್ಟು ರಫ್ತು ಹೆಚ್ಚಾಗಿದೆ. ಭಾರತದ ಒಟ್ಟಾರೆ ಸರಕು ರಫ್ತಿನಲ್ಲಿ ರಿಲಾಯನ್ಸ್ ಪಾಲು ಶೇ. 9.3ರಷ್ಟಿದೆ. ಈ ಮೊದಲು ಇದರ ಪಾಲು ಶೇ. 8.4ರಷ್ಟಿತ್ತು.

ರಿಲಾಯನ್ಸ್ ಸಂಸ್ಥೆ ಭಾರತದಲ್ಲಿ ಒಟ್ಟಾರೆ 150 ಬಿಲಿಯನ್ ಡಾಲರ್​ನಷ್ಟು (12 ಲಕ್ಷಕೋಟಿ ರೂ) ಹೂಡಿಕೆ ಮಾಡಿದೆ. ಇದು ಭಾರತದ ಯಾವುದೇ ಕಂಪನಿಯ ಮೌಲ್ಯಕ್ಕಿಂತಲೂ ದೊಡ್ಡದು.

ಇದನ್ನೂ ಓದಿ: ರಿಲಾಯನ್ಸ್ ಮಂಡಳಿಗೆ ನೀತಾ ಅಂಬಾನಿ ರಾಜೀನಾಮೆ; ಮಂಡಳಿ ನಿರ್ದೇಶಕ ಸ್ಥಾನಕ್ಕೇರಿದ ಮೂವರು ಮಕ್ಕಳು

ರಿಲಾಯನ್ಸ್​ನ ಒಟ್ಟಾರೆ ಅಧಿಕೃತ ಉದ್ಯೋಗಿಗಳ ಸಂಖ್ಯೆ 3.9 ಲಕ್ಷ

ರಿಲಾಯನ್ಸ್ ಜಿಯೋದ ಒಟ್ಟಾರೆ ಗ್ರಾಹಕರು ಅಥವಾ ಸಬ್​ಸ್ಕ್ರೈಬರ್​ಗಳ ಸಂಖ್ಯೆ 45 ಕೋಟಿ ಗಡಿ ದಾಟಿದೆ.

ರಿಲಾಯನ್ಸ್ ಜಿಯೋದ ಒಬ್ಬ ಬಳಕೆದಾರ ಬಳಸುವ ಡಾಟಾ ಈಗ ಪ್ರತೀ ತಿಂಗಳು ಸರಾಸರಿ 25ಜಿಬಿಯಷ್ಟಿದೆ.

ಜಿಯೋ 5ಜಿ ಈಗ ಭಾರತದ ಶೇ. 96ರಷ್ಟು ಗಣತಿ ಪಟ್ಟಣಗಳಲ್ಲಿ ಇದೆ. ಈ ವರ್ಷದ ಡಿಸೆಂಬರ್​ನಷ್ಟರಲ್ಲಿ ಇಡೀ ದೇಶ ವ್ಯಾಪಿಸಲಿದೆ.

ಭಾರತದಿಂದ ಡಿಜಿಟಲ್ ತಂತ್ರಜ್ಞಾನ ಕ್ಷೇತ್ರದಲ್ಲಿ ಅತಿಹೆಚ್ಚು ಪೇಟೆಂಟ್​ಗೆ ಅರ್ಜಿ ಸಲ್ಲಿಸುವ ಸಂಸ್ಥೆಗಳಲ್ಲಿ ರಿಲಾಯನ್ಸ್ ಒಂದು.

ರಿಲಾಯನ್ಸ್ ಜಿಯೋದಿಂದ ಸ್ಮಾರ್ಟ್ ಹೋಮ್ ಸರ್ವಿಸಸ್​ಗೆ ಚಾಲನೆ

ರಿಲಾಯನ್ಸ್ ಜಿಯೋದಿಂದ 4ಜಿ ಶಕ್ತ ಜಿಯೋ ಭಾರತ್ ಫೋನ್ ಬಿಡುಗಡೆ.

ಸೆಪ್ಟೆಂಬರ್ 19, ಗಣೇಶ ಚತುರ್ಥಿಯಂದು ಜಿಯೋ ಏರ್​ಫೈಬರ್ ಬಿಡುಗಡೆ ಆಗಲಿದೆ.

ಭಾರತದಲ್ಲಿ ಒಂದು ಅತ್ಯುತ್ತಮ ಎಐ ಜೋಡಿತ ಡಿಜಿಟಲ್ ಇನ್​ಫ್ರಾಸ್ಟ್ರಕ್ಚರ್ ಅನ್ನು ಒದಗಿಸುವ ನಿಟ್ಟಿನಲ್ಲಿ ಜನರೇಟಿವ್ ಎಐ ತಂತ್ರಜ್ಞಾನ ಬಳಸಲಾಗುವುದು.

ರಿಲಾಯನ್ಸ್ ರೀಟೇಲ್ ಸಂಸ್ಥೆ 2022-23ರ ಹಣಕಾಸು ವರ್ಷದಲ್ಲಿ 2,60,364 ಕೋಟಿ ರೂನಷ್ಟು ಆದಾಯ ದಾಖಲಿಸಿದೆ. ನಿವ್ವಳ ಲಾಭ 9,181 ಕೋಟಿ ರೂ ಇದೆ.

ರಿಲಾಯನ್ಸ್ ಫೈನಾನ್ಷಿಯಲ್ ಸರ್ವಿಸಸ್ ಸಂಸ್ಥೆ ಇನ್ಷೂರೆನ್ಸ್ ಉದ್ಯಮ ಪ್ರವೇಶಿಸಲಿದೆ. ಇದಕ್ಕಾಗಿ ಜಾಗತಿಕ ಸಂಸ್ಥೆಹಯೊಂದಿಗೆ ಸಹಭಾಗಿತ್ವ ಇರಲಿದೆ.

ಜಿಯೋ ಫೈನಾನ್ಷಿಯಲ್ ಸರ್ವಿಸಸ್​ಗೆ 1,20,000 ಕೋಟಿ ರೂ ಬಂಡವಾಳ ಕೊಡಲಾಗಿದೆ. ಇದರಿಂದ ವಿಶ್ವದಲ್ಲೇ ಅತಿಹೆಚ್ಚು ಆರಂಭಿಕ ಬಂಡವಾಳ ಪಡೆದ ಕಂಪನಿಗಳಲ್ಲಿ ಜೆಎಫ್​ಎಸ್ ಒಂದೆನಿಸಿದೆ.

ಇದನ್ನೂ ಓದಿ: ಟ್ವಿಟ್ಟರ್​ನಲ್ಲಿ ಇಲಾನ್ ಮಸ್ಕ್ ಕತ್ತರಿಹಾಕಿದಂತೆ ನನ್ನ ಆಡಳಿತ ಇರುತ್ತೆ: ಅಮೆರಿಕ ಅಧ್ಯಕ್ಷೀಯ ಅಭ್ಯರ್ಥಿ ವಿವೇಕ್ ರಾಮಸ್ವಾಮಿ

ಕೆಲ ವರ್ಷದ ಹಿಂದಷ್ಟೇ ಕೆಜಿ-ಡಿ6 ಬ್ಲಾಕ್​ನಿಂದ ಅನಿಲ ಉತ್ಪಾದನೆ ಶೂನ್ಯ ಇದ್ದದ್ದು ಈಗ ದಿನಕ್ಕೆ 2 ಕೋಟಿ ಕ್ಯುಬಿಕ್ ಮೀಟರ್​ನಷ್ಟು ತೈಲ ಉತ್ಪಾದನೆಯನ್ನು ಭಾರತ್ ಪೆಟ್ರೋಲಿಯಂ ಜೊತೆ ಸೇರಿ ಮಾಡಲಾಗುತ್ತಿದೆ.

ದಿನಕ್ಕೆ 3 ಕೋಟಿ ಕ್ಯೂಬಿಕ್ ಮೀಟರ್​ನಷ್ಟು ಅನಿಲ ಉತ್ಪಾದನೆ ಆಗುವ ಮಟ್ಟಕ್ಕೆ ಸಾಮರ್ಥ್ಯ ಹೆಚ್ಚಿಸಲಾಗುತ್ತದೆ. ಇದು ಭಾರತದ ಒಟ್ಟಾರೆ ಗ್ಯಾಸ್ ಪ್ರೊಡಕ್ಷನ್​ನಲ್ಲಿ ಶೇ. 30ರಷ್ಟಿರಲಿದೆ.

ರಿನಿವಬಲ್ ಎನರ್ಜಿ ಮತ್ತು ಬಯೋ ಎನರ್ಜಿ ಬಳಕೆ ಮೂಲಕ 2035ರಷ್ಟರಲ್ಲಿ ಕಾರ್ಬನ್ ಮುಕ್ತ ವ್ಯವಸ್ಥೆ ಹೊಂದುತ್ತೇವೆ.

ಇವಿಷ್ಟೂ ಕೂಡ ರಿಲಾಯನ್ಸ್​ನ ಎಜಿಎಂ ಸಭೆಯಲ್ಲಿ ಮುಕೇಶ್ ಅಂಬಾನಿ ಮಾಡಿದ ಭಾಷಣದ ಮುಖ್ಯಾಂಶಗಳಾಗಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ