ಚ್ಯಾಟ್​​ಜಿಪಿಟಿ ಇಷ್ಟವಾಯ್ತಾ? ಓಪನ್​​ಎಐನಿಂದ ಬರಲಿದೆ ಎಕ್ಸ್, ಫೇಸ್​​ಬಕ್ ರೀತಿ ಹೊಸ ಸೋಷಿಯಲ್ ಮೀಡಿಯಾ ಆ್ಯಪ್

ಕ್ಯಾಲಿಫೋರ್ನಿಯಾ, ಏಪ್ರಿಲ್ 16: ಚ್ಯಾಟ್​​ಜಿಪಿಟಿ ಎನ್ನುವ ಇಂಟೆಲಿಜೆಂಟ್ ಮಾಡಲ್ ಅನ್ನು ಸೃಷ್ಟಿಸಿರುವ ಓಪನ್​​ಎಐ ಸಂಸ್ಥೆ ಈಗ ಎಕ್ಸ್ ಮಾದರಿಯಲ್ಲಿ ಹೊಸ ಸೋಷಿಯಲ್ ಮೀಡಿಯಾ ನೆಟ್ವರ್ಕ್ ರೂಪಿಸುತ್ತಿದೆ ಎನ್ನುವಂತಹ ವರದಿಗಳು ಬರುತ್ತಿವೆ. ‘ದಿ ವರ್ಜ್’ ವೆಬ್​​ಸೈಟ್​​ನಲ್ಲಿ ಪ್ರಕಟವಾದ ವರದಿ ಪ್ರಕಾರ, ಓಪನ್​ಎಐನ ಹೊಸ ಆ್ಯಪ್​​ನ ತಯಾರಿಕೆ ಇನ್ನೂ ಆರಂಭಿಕ ಹಂತದಲ್ಲಿದೆ. ಆಂತರಿಕವಾಗಿ ಈ ಆ್ಯಪ್​ನ ಪ್ರೋಟೋಟೈಪ್ ಸಿದ್ಧವಾಗಿದ್ದು, ಸಿಇಒ ಸ್ಯಾಮ್ ಆಲ್ಟ್​​ಮ್ಯಾನ್ ಅವರು ಇತರ ಮೂಲಗಳಿಂದ ಸಲಹೆ, ವಿಮರ್ಶೆಗಳನ್ನು ಪಡೆಯುವ ಕೆಲಸ ಮಾಡುತ್ತಿದ್ದಾರೆ ಎನ್ನಲಾಗಿದೆ.

ಇಲಾನ್ ಮಸ್ಕ್​​​ಗೆ ಸ್ಯಾಮ್ ಕೊಟ್ಟ ಟಾಂಟಾ ಇದು?

ಇಲಾನ್ ಮಸ್ಕ್ ಮತ್ತು ಸ್ಯಾಮ್ ಆಲ್ಟ್​​ಮ್ಯಾನ್ ನಡುವಿನ ವೈಯಕ್ತಿಕ ಜಿದ್ದಾಜಿದ್ದಿ ಗೊತ್ತಿರಬಹುದು. ಓಪನ್​​ಎಐ ಮೂಲ ಸಂಸ್ಥಾಪಕರಲ್ಲಿ ಇಲಾನ್ ಮಸ್ಕ್ ಅವರೂ ಒಬ್ಬರು. ಆದರೆ, 2018-19ರಲ್ಲೇ ಅವರು ಆ ಸಂಸ್ಥೆಯಿಂದ ಹೊರಬಂದರು. ಓಪನ್​​ಎಐ ಚ್ಯಾಟ್​​​ಜಿಪಿಟಿ ಹೊರತಂದಾಗ ಇಲಾನ್ ಮಸ್ಕ್ ಅವರು ಓಪನ್​​ಎಐನ ಕಟು ಟೀಕಾಕಾರರಾಗಿಯೇ ಹೆಚ್ಚು ತೋರ್ಪಡಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ಅಮೆರಿಕದ ಬೋಯಿಂಗ್ ವಿಮಾನಕ್ಕೆ ಚೀನಾ ಕತ್ತರಿ ಹಾಕಿದ್ದು ಭಾರತಕ್ಕೆ ಅನುಕೂಲವಾಯ್ತಾ?

ಎಕ್ಸ್ ಅನ್ನು ಖರೀದಿಸಿದ ರೀತಿಯಲ್ಲಿ ಓಪನ್​​ಎಐ ಅನ್ನೂ ಖರೀದಿಸಲು ಇಲಾನ್ ಮಸ್ಕ್ ಪ್ರಯತ್ನಿಸಿದ್ದುಂಟು. ಇದಕ್ಕೆ ಸ್ಯಾಮ್ ಆಲ್ಟ್​​ಮ್ಯಾನ್ ತಿರುಗೇಟು ನೀಡಿ, ತಾನೇ ಎಕ್ಸ್ ಅನ್ನು ಖರೀದಿಸುವುದಾಗಿ ಹೇಳಿದ್ದರು. ಈಗ ಸ್ಯಾಮ್ ಅವರು ಎಕ್ಸ್ ರೀತಿಯಲ್ಲಿ ತಮ್ಮದೇ ಹೊಸ ಸೋಷಿಯಲ್ ಮೀಡಿಯಾ ನೆಟ್ವರ್ಕ್ ರಚಿಸಲಿದ್ದಾರೆ.

ಚ್ಯಾಟ್​​ಜಿಪಿಟಿ ಈಗ ಇಮೇಜ್ ಸೃಷ್ಟಿಸುವ ಫೀಚರ್ ಹೊಂದಿದೆ. ಓಪನ್​ಎಐನ ಹೊಸ ಸೋಷಿಯಲ್ ಮೀಡಿಯಾ ಪ್ರೋಟೋಟೈಪ್​​ನಲ್ಲಿ ಇರುವ ವಿವಿಧ ಫೀಚರ್​​​ಗಳಲ್ಲಿ ಇದೂ ಒಂದು.

ಇದನ್ನೂ ಓದಿ: ಕೆಲವೇ ವರ್ಷಗಳಲ್ಲಿ ಅಮೆರಿಕದ ಆರ್ಥಿಕತೆಯನ್ನು ಭಾರತ ಹಿಂದಿಕ್ಕಲಿದೆ: ಜೆಫ್ರೀ ಸ್ಯಾಕ್ಸ್ ಶಾಕಿಂಗ್ ಹೇಳಿಕೆ

ಈಗ ಎಲ್ಲಾ ಪ್ರಮುಖ ಸೋಷಿಯಲ್ ಮೀಡಿಯಾ ಆ್ಯಪ್​​ಗಳು ತಮ್ಮವೇ ಎಐ ಮಾಡಲ್ ಹೊಂದಿವೆ. ಎಕ್ಸ್​​ನಲ್ಲಿ ಗ್ರೋಕ್ ಇದೆ. ವಾಟ್ಸಾಪ್, ಫೇಸ್​​ಬುಕ್​​ನಲ್ಲಿ ಮೆಟಾ ಎಐ ಇದೆ. ಗೂಗಲ್​ನಿಂದ ಜೆಮಿನಿ ಎಐ ತಯಾರಾಗಿದೆ. ಈಗ ಎಐ ಮಾಡಲ್​​ಗಳು, ಚಾಟ್​ಬೋಟ್​​ಗಳು ಆನ್​​​ಲೈನ್​​ನಲ್ಲಿ ಅವಿಭಾಜ್ಯ ಅಂಗಗಳಾಗಿವೆ. ಓಪನ್​​​ಎಐ ಸಂಸ್ಥೆ ಚ್ಯಾಟ್​​ಜಿಪಿಟಿ ರೀತಿಯ ಎಐ ಮಾಡಲ್ ಅನ್ನು ಸೋಷಿಯಲ್ ಮೀಡಿಯಾದ ಯುಐನಲ್ಲಿ ಹೇಗೆ ಇಂಟಿಗ್ರೇಟ್ ಮಾಡುತ್ತದೆ ಎಂಬುದು ಕುತೂಹಲದ ಸಂಗತಿ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ