ಜಾಗತಿಕ ಮಾರುಕಟ್ಟೆಯಲ್ಲಿ ಆ್ಯಪಲ್ ಅನ್ನು ಹಿಂದಿಕ್ಕಿದ ಸ್ಯಾಮ್ಸುಂಗ್; ಎಐ ಶಕ್ತ ಪರಿಕರಗಳೇ ಈ ಮುನ್ನಡೆಗೆ ಕಾರಣ

ನವದೆಹಲಿ, ಜೂನ್ 15: ಜಾಗತಿಕವಾಗಿ ಅತಿಹೆಚ್ಚು ಸ್ಮಾರ್ಟ್​​ಫೋನ್​ಗಳನ್ನು ಮಾರಾಟ ಮಾಡುವುದರಲ್ಲಿ (smartphone shipping) ಆ್ಯಪಲ್ ನಂಬರ್ ಒನ್ ಸ್ಥಾನ ಬಿಟ್ಟುಕೊಟ್ಟಿದೆ. ಈ ವರ್ಷದ ಮೊದಲ ಕ್ವಾರ್ಟರ್​​ನಲ್ಲಿ (ಜನವರಿಯಿಂದ ಮಾರ್ಚ್) ಸ್ಯಾಮ್ಸುಂಗ್ ಮೊಬೈಲ್​​ಗಳು ಅತಿಹೆಚ್ಚು ಮಾರಾಟವಾಗಿವೆ. ಒಟ್ಟಾರೆ ಸ್ಮಾರ್ಟ್​​ಫೋನ್ ಮಾರುಕಟ್ಟೆ ಈ ಕ್ವಾರ್ಟರ್​​ನಲ್ಲಿ ಶೇ. 0.4ರಷ್ಟು ಮಾತ್ರ ಬೆಳವಣಿಗೆ ಹೊಂದಿದೆ. ಇದರಲ್ಲಿ ಆ್ಯಪಲ್ ಹಾಗೂ ಚೀನಾದ ಪ್ರಮುಖ ಸ್ಮಾರ್ಟ್​ಫೋನ್ ಕಂಪನಿಗಳ ಬ್ಯುಸಿನೆಸ್ ಅನ್ನು ಸ್ಯಾಮ್ಸುಂಗ್ ಹಿಂದಿಕ್ಕಿ, ಜಾಗತಿಕ ಮಾರುಕಟ್ಟೆಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೇರಿದೆ.

ಇಂಟರ್ನ್ಯಾಷನಲ್ ಡಾಟಾ ಕಾರ್ಪೊರೇಶನ್ ಬಿಡುಗಡೆ ಮಾಡಿದ ಇತ್ತೀಚಿನ ದತ್ತಾಂಶದ ಪ್ರಕಾರ ಜನವರಿಯಿಂದ ಮಾರ್ಚ್​​ವರೆಗಿನ ತ್ರೈಮಾಸಿಕ ಅವಧಿಯಲ್ಲಿ ಜಾಗತಿಕವಾಗಿ 301.4 ಮಿಲಿಯನ್ ಸ್ಮಾರ್ಟ್​​ಫೋನ್​ಗಳು ಮಾರುಕಟ್ಟೆಗೆ ಸರಬರಾಜಾಗಿವೆ. ಆಮದು ತೆರಿಗೆ ವೈಪರೀತ್ಯ, ಜಾಗತಿಕ ರಾಜಕೀಯ ಅನಿಶ್ಚಿತತೆ ಕಾರಣದಿಂದ ಈ ಮೂರು ತಿಂಗಳು ಸ್ಮಾರ್ಟ್​​ಫೋನ್ ಮಾರುಕಟ್ಟೆ ಮಂದ ಬೆಳವಣಿಗೆ ಹೊಂದಲು ಕಾರಣ ಎನ್ನಲಾಗಿದೆ.

ಸ್ಯಾಮ್ಸುಂಗ್​​​ಗೆ ವರದಾನವಾದ ಅದರ ಎಐ ಅಳವಡಿಕೆ

ದಕ್ಷಿಣ ಕೊರಿಯಾ ಮೂಲದ ಸ್ಯಾಮ್ಸುಂಗ್ ಸಂಸ್ಥೆ ಈ ಮೊದಲ ಕ್ವಾರ್ಟರ್​​​ನಲ್ಲಿ 60.6 ಮಿಲಿಯನ್ ಯುನಿಟ್​​ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಹಿಂದಿನ ವರ್ಷದ ಇದೇ ಕ್ವಾರ್ಟರ್​​ಗೆ ಹೋಲಿಸಿದರೆ ಶೇ. 0.6ರಷ್ಟು ಮಾತ್ರವೇ ಹೆಚ್ಚಳ ಆಗಿರುವುದು. ಆದರೆ, ಒಟ್ಟಾರೆ ಸ್ಮಾರ್ಟ್​​ಫೋನ್ ಮಾರುಕಟ್ಟೆ ಗಳಿಸಿರುವ ಶೇ. 0.4ರಷ್ಟು ಹೆಚ್ಚಳಕ್ಕೆ ಹೋಲಿಸಿದರೆ ಸ್ಯಾಮ್ಸುಂಗ್ ಹೆಚ್ಚಿನ ಬೆಳವಣಿಗೆ ತೋರಿದೆ.

ಇದನ್ನೂ ಓದಿ: ವಿರಳ ಭೂಖನಿಜಗಳ ರಫ್ತು: ಜಪಾನ್ ಜೊತೆಗೆ ಒಪ್ಪಂದ ರದ್ದುಗೊಳಿಸಲು ಭಾರತ ಮುಂದು; ಕಾರಣ ಏನು?

ಸ್ಯಾಮ್ಸುಂಗ್ ತನ್ನ ಉತ್ಪನ್ನಗಳಲ್ಲಿ ಎಐ ಅನ್ನು ಅಳವಡಿಸಿದೆ. ಅಧಿಕ ಬೆಲೆ ಮಟ್ಟದ ಪ್ರೀಮಿಯಮ್ ಪ್ರಾಡಕ್ಟ್ಸ್ ಮಾತ್ರವಲ್ಲ ತನ್ನ ಮಧ್ಯಮ ಶ್ರೇಣಿಯ ಉತ್ಪನ್ನಗಳಿಗೂ ಅದು ಎಐ ಪರಿಕರಗಳನ್ನು ಅಳವಡಿಸಿದೆ. ಇದರಿಂದ ಕಡಿಮೆ ಬೆಲೆಗೆ ಗ್ರಾಹಕರಿಗೆ ಉತ್ಕೃಷ್ಟ ಸ್ಯಾಮ್ಸುಂಗ್ ಸ್ಮಾರ್ಟ್​ಫೋನ್​ಗಳ ಲಭ್ಯತೆ ಸಿಕ್ಕಂತಾಗಿದೆ. ಇದು ಸ್ಪರ್ಧಾತ್ಮಕ ಸ್ಮಾರ್ಟ್​​ಫೋನ್ ಮಾರುಕಟ್ಟೆಯಲ್ಲಿ ಸ್ಯಾಮ್ಸುಂಗ್ ಮುಂಚೂಣಿಯಲ್ಲಿ ಇರಲು ಸಾಧ್ಯವಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ