ವಿಶ್ವದ ಅತ್ಯುತ್ತಮ ಕನ್ಸೂಮರ್ ಬ್ಯಾಂಕ್, ಭಾರತದ ಅತ್ಯುತ್ತಮ ಬ್ಯಾಂಕ್; ಎಸ್​ಬಿಐಗೆ ಎರಡು ಪ್ರಶಸ್ತಿ

ನವದೆಹಲಿ, ಅಕ್ಟೋಬರ್ 23: ಭಾರತದ ನಂಬರ್ ಪಬ್ಲಿಕ್ ಸೆಕ್ಟರ್ ಬ್ಯಾಂಕ್ ಎನಿಸಿದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾಗೆ (SBI) ಎರಡು ಪ್ರಶಸ್ತಿಗಳು ಸಿಕ್ಕಿವೆ. ಅಮೆರಿಕ ಮೂಲದ ಗ್ಲೋಬಲ್ ಫೈನಾನ್ಸ್ ಸಂಸ್ಥೆಯಿಂದ ಎಸ್​ಬಿಐಗೆ ಎರಡು ಪ್ರಶಸ್ತಿಗಳ ಗೌರವ ಸಿಕ್ಕಿದೆ. 2025ರಲ್ಲಿ ವಿಶ್ವದ ಅತ್ಯುತ್ತಮ ಕನ್ಸೂಮರ್ ಬ್ಯಾಂಕ್ ಪ್ರಶಸ್ತಿ (World’s Best Consumer Bank), ಹಾಗೂ ಭಾರತದಲ್ಲಿ ಅತ್ಯುತ್ತಮ ಬ್ಯಾಂಕ್ (Best Bank in India) ಎನ್ನುವ ಪ್ರಶಸ್ತಿಗಳು ಎಸ್​ಬಿಐಗೆ ದೊರಕಿವೆ. ವಿಶ್ವಬ್ಯಾಂಕ್ ಮತ್ತು ಐಎಂಎಫ್​ನ ವಾರ್ಷಿಕ ಸಭೆಗಳಲ್ಲಿ ಈ ಅವಾರ್ಡ್ ನೀಡಲಾಗಿದೆ.

ಬಹಳ ಜನರು ಮೂಗು ಮುರಿಯುವ ಪಬ್ಲಿಕ್ ಸೆಕ್ಟರ್​ನ ಬ್ಯಾಂಕ್​ವೊಂದು ವಿಶ್ವ ಮಟ್ಟದಲ್ಲಿ ಛಾಪು ಮೂಡಿಸಿರುವುದು ಸಾಧಾರಣ ಸಂಗತಿ ಅಲ್ಲ. ಈ ಪ್ರಶಸ್ತಿಗೆ ಎಸ್​ಬಿಐ ಪ್ರತಿಕ್ರಿಯಿಸಿದ್ದು, ಗ್ರಾಹಕರ ಸೇವೆಯಲ್ಲಿ ತಮ್ಮ ಬ್ಯಾಂಕ್ ತೋರಿರುವ ಬದ್ಧತೆಗೆ ಸಿಕ್ಕ ಮಾನ್ಯತೆ ಇದಾಗಿದೆ ಎಂದು ಹೇಳಿದೆ.

ಇದನ್ನೂ ಓದಿ: ಅಕ್ಟೋಬರ್​ನಲ್ಲಿ ಅತಿಹೆಚ್ಚು ಫಿಕ್ಸೆಡ್ ಡೆಪಾಸಿಟ್ ರೇಟ್ ಕೊಡುವ ಬ್ಯಾಂಕುಗಳು

ವಿಶ್ವದ ದರ್ಜೆಯ ಬ್ಯಾಂಕಿಂಗ್ ಅನುಭವಗಳನ್ನು ಎಸ್​ಬಿಐ ತನ್ನ ವ್ಯಾಪಕ ಪ್ರಮಾಣದ ಗ್ರಾಹಕರ ಸೇವೆಗೆ ಬಳಸಿಕೊಳ್ಳುತ್ತಿದೆ. ತಂತ್ರಜ್ಞಾನ ಮುನ್ನಡೆಯನ್ನೂ ಉಳಿಸಿಕೊಂಡು ದೇಶ ಎಲ್ಲಾ ರೀತಿಯ ಪ್ರದೇಶಗಳಲ್ಲಿ ಸೇವೆಗಳನ್ನು ವಿಸ್ತರಿಸುತ್ತಿದೆ. ಎಸ್​ಬಿಐ ಈ ಸಾಧನೆಗಳನ್ನು ಗುರುತಿಸಿ ಈ ಪ್ರಶಸ್ತಿಗಳನ್ನು ನೀಡಲಾಗಿದೆ ಎಂದು ಸಂಸ್ಥೆ ಹೇಳಿಕೊಂಡಿದೆ.

52 ಕೋಟಿ ಗ್ರಾಹಕರಿಗೆ ಬ್ಯಾಂಕಿಂಗ್ ಸೇವೆ ನೀಡುವುದು, ದಿನಕ್ಕೆ 65,000 ಹೊಸ ಗ್ರಾಹಕರನ್ನು ಸೇರಿಸಿಕೊಳ್ಳುತ್ತಿರುವುದು, ಇದಕ್ಕೆ ತಂತ್ರಜ್ಞಾನ ಮತ್ತು ಡಿಜಿಟಲೀಕರಣದಲ್ಲಿ ಸಾಕಷ್ಟು ಹೂಡಿಕೆಯ ಅಗತ್ಯ ಇದೆ. ಎಸ್​ಬಿಐನ ಮೊಬೈಲ್ ಆ್ಯಪ್ ಅನ್ನು 10 ಕೋಟಿ ಗ್ರಾಹಕರು ಬಳಸುತ್ತಾರೆ. ನಿತ್ಯವೂ ಸಕ್ರಿಯವಾಗಿ ಮೊಬೈಲ್ ಆ್ಯಪ್ ಬಳಸುವ ಗ್ರಾಹಕರ ಸಂಖ್ಯೆ ಒಂದು ಕೋಟಿ ಇದೆ ಎಂದು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಛೇರ್ಮನ್ ಸಿಎಸ್ ಸೆಟ್ಟಿ ತಿಳಿಸಿದ್ದಾರೆ.

ಇದನ್ನೂ ಓದಿ: ಆರು ಲಕ್ಷ ಕೋಟಿ ರೂ..! ಈ ಬಾರಿಯ ದೀಪಾವಳಿ ಸೇಲ್ಸ್ ಹೊಸ ದಾಖಲೆ

ಕೇಂದ್ರ ವಾಣಿಜ್ಯ ಮತ್ತು ಉದ್ಯಮ ಸಚಿವ ಪೀಯೂಶ್ ಗೋಯಲ್ ಅವರು ಎರಡು ಪ್ರಶಸ್ತಿ ಪಡೆದ ಎಸ್​ಬಿಐಗೆ ಅಭಿನಂದನೆ ಸಲ್ಲಿಸಿದ್ದಾರೆ. ಭಾರತದ ಪ್ರಗತಿಗೆ ಎಸ್​ಬಿಐ ಕೊಡುಗೆ ನೀಡುತ್ತಿದೆ ಎಂದು ಗೋಯಲ್ ತಮ್ಮ ಎಕ್ಸ್ ಪೋಸ್ಟ್​ನಲ್ಲಿ ಹೇಳಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ