Sensex Points: ಸೆನ್ಸೆಕ್ಸ್ ಮೂರೇ ದಿನದಲ್ಲಿ 1,800 ಅಂಕಗಳ ಏರಿಕೆ; ಸೆನ್ಸೆಕ್ಸ್ ಪಾಯಿಂಟ್ ಹೇಗೆ ಲೆಕ್ಕಹಾಕಲಾಗುತ್ತೆ?

ನವದೆಹಲಿ: ಭಾರತದ ಷೇರು ಮಾರುಕಟ್ಟೆ ಉಚ್ಛ್ರಾಯ ಸ್ಥಿತಿ ತಲುಪಿದೆ. ಬಿಎಸ್​ಇ ಸೆನ್ಸೆಕ್ಸ್ ಮತ್ತು ಎನ್​ಎಸ್​ಇ ನಿಫ್ಟಿ ಸೂಚ್ಯಂಕಗಳು (Sensex and Nifty Index) ಗರಿಷ್ಠ ಮಟ್ಟಕ್ಕೆ ಏರಿವೆ. ಬಾಂಬೆ ಸ್ಟಾಕ್ ಎಕ್ಸ್​ಚೇಂಜ್​ನ ಸೆನ್ಸೆಕ್ಸ್ ಸೂಚ್ಯಂಕ ಕಳೆದ 3 ದಿನಗಳಿಂದ 1,800 ಅಂಕಗಳನ್ನು ಹೆಚ್ಚಿಸಿಕೊಂಡಿದೆ. ಮೊನ್ನೆ ಸೆನ್ಸೆಕ್ಸ್ ಮೊದಲ ಬಾರಿಗೆ 64,000 ಅಂಕಗಳ ಗಡಿ ದಾಟಿ ಹೋಗಿತ್ತು. ಇದೀಗ 65,000 ಅಂಕಗಳ ಗಡಿ ಸಮೀಪ ಲಗ್ಗೆ ಹಾಕುತ್ತಿದೆ. ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್​ನ ನಿಫ್ಟಿ50 ಸೂಚ್ಯಂಕ ಮೊದಲ ಬಾರಿಗೆ 19,000 ಅಂಕಗಳ ಗಡಿ ದಾಟಿ 19,201.70 ಅಂಕಗಳಲ್ಲಿದೆ. ಇವೆರಡೂ ಸೂಚ್ಯಂಕಗಳಿಗೆ ಇದು ಈವರೆಗಿನ ಗರಿಷ್ಠ ಎತ್ತರವಾಗಿದೆ.

ಸೆನ್ಸೆಕ್ಸ್ ಎಂದರೇನು? ಏನದರ ಮಹತ್ವ?

ಸೆನ್ಸೆಕ್ಸ್ ಎಂಬುದು ಸೆನ್ಸಿಟಿವ್ ಇಂಡೆಕ್ಸ್ ಪದಗಳ ಲಘು ರೂಪ. ಬಿಎಸ್​ಇ ಷೇರುವಿನಿಮಯ ಕೇಂದ್ರದಲ್ಲಿ ಲಿಸ್ಟ್ ಆಗಿರುವ ಷೇರುಗಳ ಪೈಕಿ ಆಯ್ದ 30 ದೊಡ್ಡ ಮತ್ತು ಮಧ್ಯಮ ಗಾತ್ರದ ಕಂಪನಿಗಳ ಷೇರುಗಳನ್ನು ಸೆನ್ಸೆಕ್ಸ್ ಸೂಚ್ಯಂಕಕ್ಕೆ ಸೇರಿಸಲಾಗುತ್ತದೆ. 30 ಷೇರುಗಳ ಸೆನ್ಸೆಕ್ಸ್ ಸೂಚ್ಯಂಕ ಒಟ್ಟಾರೆ ಬಿಎಸ್​ಇ ಷೇರುಪೇಟೆಯ ಸ್ಥಿತಿಗೆ ಕನ್ನಡಿ ಹಿಡಿಯುವ ರೀತಿಯಲ್ಲಿ ಪಟ್ಟಿ ಇರುತ್ತದೆ. ಬೇರೆ ಬೇರೆ ವಲಯಗಳಿಗೆ ಪ್ರತ್ಯೇಕವಾದ ಸೂಚ್ಯಂಕಗಳು ಇರುತ್ತವೆ. ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್​ನ ನಿಫ್ಟಿಯಲ್ಲೂ ಇದೇ ರೀತಿಯಲ್ಲಿ ಪ್ರಮುಖ ಸೂಚ್ಯಂಕ ಹಾಗೂ ವಲಯವಾರು ಪ್ರತ್ಯೇಕ ಸೂಚ್ಯಂಕಗಳು ಇರುತ್ತವೆ.

ಇದನ್ನೂ ಓದಿ: Multibagger Stock: ಮಿಂಚಿನಂತೆ ಏರುತ್ತಿರುವ ಡಿದೇವ್ ಪ್ಲಾಸ್ಟಿಕ್ಸ್ ಷೇರು; 1 ವರ್ಷದಲ್ಲಿ 4 ಪಟ್ಟು ಬೆಳೆದಿದೆ ಮಲ್ಟಿಬ್ಯಾಗರ್

ಸೆನ್ಸೆಕ್ಸ್ ಅಂಕಗಳನ್ನು ಹೇಗೆ ನಿರ್ಧರಿಸಲಾಗುತ್ತದೆ?

ಷೇರುಪೇಟೆಯಲ್ಲಿ ಲಿಸ್ಟ್ ಆಗಿರುವ ಕಂಪನಿಯ ಮಾರ್ಕೆಟ್ ಕ್ಯಾಪಿಟಲ್ ಅಥವಾ ಮಾರುಕಟ್ಟೆ ಬಂಡವಾಳವನ್ನು ಷೇರುಸಂಪತ್ತು ಎಂದು ಕರೆಯಬಹುದು. ಆ ಕಂಪನಿಯ ಷೇರುಗಳು ಹಾಗೂ ಅದರ ಬೆಲೆಯ ಮೊತ್ತವೇ ಷೇರುಸಂಪತ್ತು. ಒಂದು ಕಂಪನಿ 1 ಕೋಟಿಯಷ್ಟು ಷೇರುಗಳನ್ನು ಹೊಂದಿದ್ದು, ಪ್ರತೀ ಷೇರಿನ ಬೆಲೆ 100 ರೂ ಆಗಿದ್ದರೆ, ಆ ಕಂಪನಿಯ ಮಾರ್ಕೆಟ್ ಕ್ಯಾಪ್ ಅಥವಾ ಷೇರುಸಂಪತ್ತು 100 ಕೋಟಿ ಆಗುತ್ತದೆ.

ಆದರೆ, ಒಂದು ಕಂಪನಿಯಲ್ಲಿ ಇರುವ ಎಲ್ಲಾ ಷೇರುಗಳೂ ಸಾರ್ವಜನಿಕರಿಗೆ ಲಭ್ಯ ಇರುವುದಿಲ್ಲ. ಕಂಪನಿಯ ಮಾಲೀಕರು ಸೇರಿದಂತೆ ಪ್ರೊಮೋಟರ್​​ಗಳು ಇಂತಿಷ್ಟು ಪ್ರಮಾಣದ ಷೇರುಗಳನ್ನು ಹೊಂದಿದ್ದು, ಅವುಗಳು ಮಾರುಕಟ್ಟೆಯಲ್ಲಿ ವಹಿವಾಟು ಕಾಣುವುದಿಲ್ಲ. ಸಾರ್ವಜನಿಕರಿಗೆ ಲಭ್ಯ ಇರುವ ಷೇರುಗಳಷ್ಟೇ ಪೇಟೆಯಲ್ಲಿ ಬಿಕರಿಯಾಗುವುದು. ಟ್ರೇಡಿಂಗ್​ಗೆ ಸಾರ್ವಜನಿಕವಾಗಿ ಲಭ್ಯ ಇರುವ ಷೇರುಗಳ ಪ್ರಮಾಣದ ಮೇಲೆ ಫ್ರೀ ಫ್ಲೋಟ್ ಫ್ಯಾಕ್ಟರ್ ಗಣಿಸಲಾಗುತ್ತದೆ.

ಹೀಗೆ ಒಂದು ಕಂಪನಿಯ ಫ್ರೀ ಫ್ಲೋಟ್ ಮಾರ್ಟೆಕ್ ಕ್ಯಾಪ್ ನಿರ್ಧಾರವಾದ ಬಳಿಕ ಅದರ ಆಧಾರದ ಮೇಲೆ ಸೆನ್ಸೆಕ್ಸ್ ಮೌಲ್ಯ ನಿರ್ಧಾರವಾಗುತ್ತದೆ.

ಇದನ್ನೂ ಓದಿ: Original Documents: ಬ್ಯಾಂಕ್​ನವರು ನಿಮ್ಮ ಮೂಲಪತ್ರ ಹಿಂದಿರುಗಿಸದಿದ್ದರೆ ಏನು ಮಾಡಬೇಕು? ಇಲ್ಲಿವೆ ಮಾರ್ಗೋಪಾಯಗಳು

ಸೆನ್ಸೆಕ್ಸ್​ನಲ್ಲಿ ಲಿಸ್ಟ್ ಆಗಿರುವ ಕಂಪನಿಗಳ ಒಟ್ಟು ಫ್ರೀ ಫ್ಲೋಟಿಂಗ್ ಷೇರುಸಂಪತ್ತು ಮೊತ್ತವನ್ನು ಎ ಎಂದು ಪರಿಗಣಿಸೋಣ. ಬೇಸ್ ಮಾರ್ಕೆಟ್ ಕ್ಯಾಪಿಟಲೈಸೇಶನ್ ಅನ್ನು ಬಿ ಎಂದು ಪರಿಗಣಿಸಬಹುದು. ಬೇಸ್ ಪೀರಿಯಡ್ ಇಂಡೆಕ್ಸ್ ಮೌಲ್ಯವನ್ನು ಸಿ ಎನ್ನಬಹುದು.

ಇದರಲ್ಲಿ ಬೇಸ್ ವರ್ಷ 1978-79. ಅದರ ಬೇಸ್ ವ್ಯಾಲ್ಯೂ 100 ಇಂಡೆಕ್ಸ್ ಅಂಕಗಳು.

ಈಗ ಸೆನ್ಸೆಕ್ಸ್ ಮೌಲ್ಯ ಎಷ್ಟೆಂದು ನಿರ್ಧರಿಸಲು ಈ ಮುಂದಿನ ಸೂತ್ರ ಅನುಸರಿಸಲಾಗುತ್ತದೆ.

ಸೆನ್ಸೆಕ್ಸ್ ಮೌಲ್ಯ = ಎ/ಬಿ X 100

ಇಲ್ಲಿ ಎ ಎಂಬುದು ಫ್ರೀ ಫ್ಲೋಟಿಂಗ್ ಮಾರ್ಕೆಟ್ ಕ್ಯಾಪ್ ಆದರೆ, ಬಿ ಎಂಬುದು ಬೇಸ್ ವರ್ಷವಾದ 1978-79ರಲ್ಲಿ ಇದ್ದ ಷೇರು ಸಂಪತ್ತು ಮೊತ್ತವಾಗುತ್ತದೆ. ಈ ಸೂತ್ರದ ಪ್ರಕಾರ ಸೆನ್ಸೆಕ್ಸ್ ಅಂಕಗಳು ಎಷ್ಟು ಎಂದು ಲೆಕ್ಕ ಹಾಕಲಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ