ಏಪ್ರಿಲ್ನಿಂದ ಅಕ್ಟೋಬರ್ವರೆಗೆ 10 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ತಯಾರಿಕೆ; 10 ಬಿಲಿಯನ್ ಡಾಲರ್ಗೂ ಅಧಿಕ ಸ್ಮಾರ್ಟ್ಫೋನ್ ರಫ್ತು
Smartphone exports from India: ಭಾರತದಲ್ಲಿ ಸ್ಮಾರ್ಟ್ಫೋನ್ ಉತ್ಪಾದನೆ ದಿನೇ ದಿನೇ ಹೆಚ್ಚುತ್ತಿದೆ. ಈ ವರ್ಷದ ಏಪ್ರಿಲ್ನಿಂದ ಅಕ್ಟೋಬರ್ವರೆಗೆ 10.60 ಮೌಲ್ಯದ ಸ್ಮಾರ್ಟ್ಫೋನ್ಗಳನ್ನು ಭಾರತದಿಂದ ರಫ್ತು ಮಾಡಲಾಗಿದೆ. 10 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳ ತಯಾರಿಕೆ ಆಗಿದೆ. ಈ ಪೈಕಿ 7 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ ರಫ್ತಾಗಿದೆ.
ನವದೆಹಲಿ, ನವೆಂಬರ್ 26: ಭಾರತದಲ್ಲಿ ಐಫೋನ್ಗಳನ್ನು ಹೆಚ್ಚೆಚ್ಚು ತಯಾರಿಸುತ್ತಿರುವ ಆ್ಯಪಲ್ ಸಂಸ್ಥೆ ಈಗ ಮತ್ತೊಂದು ಮೈಲಿಗಲ್ಲು ಮುಟ್ಟಿದೆ. ಈ ಹಣಕಾಸು ವರ್ಷದಲ್ಲಿ ಅಕ್ಟೋಬರ್ ತಿಂಗಳವರೆಗೆ ಅದು ತಯಾರಿಸಿದ ಐಫೋನ್ನ ಎಫ್ಒಬಿ ಮೌಲ್ಯ 10 ಬಿಲಿಯನ್ ಡಾಲರ್ ಆಗಿದೆ. ಅಂದರೆ, ಏಪ್ರಿಲ್ನಿಂದ ಅಕ್ಟೋಬರ್ವರೆಗಿನ ಏಳು ತಿಂಗಳ ಅವಧಿಯಲ್ಲಿ 10 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳ ತಯಾರಿಕೆ ಆಗಿವೆ. ಕೇಂದ್ರ ಸಚಿವ ಅಶ್ವನಿ ವೈಷ್ಣವ್ ಈ ವಿಚಾರವನ್ನು ತಮ್ಮ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.
2023-24ರ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇ. 37ರಷ್ಟು ಐಫೋನ್ ಪ್ರೊಡಕ್ಷನ್ ಹೆಚ್ಚಾಗಿದೆ. ಇದು ಭಾರತದಲ್ಲಿ ಆ್ಯಪಲ್ ಇರುವಿಕೆ ಇನ್ನಷ್ಟು ಬಲಗೊಳ್ಳುತ್ತಿರುವುದನ್ನು ಸೂಚಿಸುತ್ತದೆ. ಏಪ್ರಿಲ್ನಿಂದ ಅಕ್ಟೋಬರ್ವರೆಗೆ ತಯಾರಾದ 10 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ನಲ್ಲಿ ಏಳು ಬಿಲಿಯನ್ ಮೌಲ್ಯದ ಫೋನ್ಗಳನ್ನು ರಫ್ತು ಮಾಡಲಾಗಿದೆ. ಮೂರು ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳು ಭಾರತೀಯ ಮಾರುಕಟ್ಟೆಗೆ ವಿತರಣೆ ಆಗಿವೆ. ಭಾರತದಲ್ಲಿ ತಯಾರಾದ ಐಫೋನ್ನಲ್ಲಿ ಶೇ. 70ರಷ್ಟನ್ನು ರಫ್ತು ಮಾಡಿದಂತಾಗಿದೆ.
ಇದನ್ನೂ ಓದಿ: ಮಾರುತಿ ಸುಜುಕಿಯ 30 ಲಕ್ಷ ಕಾರುಗಳ ರಫ್ತು, ಹೊಸ ಮೈಲಿಗಲ್ಲು; ಕಿಯಾದ 1 ಲಕ್ಷ ಸಿಕೆಡಿ ಯೂನಿಟ್ಸ್ ರಫ್ತು
ಸ್ಮಾರ್ಟ್ಫೋನ್ ಪಿಎಲ್ ಸ್ಕೀಮ್ನ ಪರಿಣಾಮ…
ತಮ್ಮ ಎಕ್ಸ್ನಲ್ಲಿ ಈ ಬಗ್ಗೆ ಮಾಹಿತಿ ಹಂಚಿಕೊಂಡ ಅಶ್ವನಿ ವೈಷ್ಣವ್, ಸರ್ಕಾರ ತಂದಿರುವ ಪಿಎಲ್ಐ ಸ್ಕೀಮ್ಗೆ ಕ್ರೆಡಿಟ್ ನೀಡಿದ್ದಾರೆ.
‘ಏಳು ತಿಂಗಳಲ್ಲಿ ಸ್ಮಾರ್ಟ್ಫೋನ್ ಪಿಎಲ್ಐ ಸ್ಕೀಮ್ಗೆ ಮತ್ತೊಂದು ಮೈಲಿಗಲ್ಲು ಬಂದಿದೆ. ಆ್ಯಪಲ್ನಿಂದ 10 ಬಿಲಿಯನ್ ಡಾಲರ್ ಮೌಲ್ಯದ ಐಫೋನ್ಗಳ ತಯಾರಿಕೆ ಆಗಿದೆ. ಇದರಲ್ಲಿ 7 ಬಿಲಿಯನ್ ಡಾಲರ್ ರಫ್ತಾಗಿದೆ. ಏಳು ತಿಂಗಳಲ್ಲಿ ಭಾರತದ ಒಟ್ಟಾರೆ ಸ್ಮಾರ್ಟ್ಫೋನ್ ರಫ್ತು 10.6 ಬಿಲಿಯನ್ ಡಾಲರ್ನ ಗಡಿ ದಾಟಿದೆ,’ ಎಂದು ಕೇಂದ್ರ ಸಚಿವರು ಎಕ್ಸ್ನಲ್ಲಿ ಬರೆದಿದ್ದಾರೆ.
ಸರ್ಕಾರ 2020ರಲ್ಲಿ ಪಿಎಲ್ಐ ಸ್ಕೀಮ್ ಜಾರಿಗೆ ತಂದಿದೆ. ಇದು ಉತ್ಪಾದನಾ ಪ್ರಮಾಣ ಆಧಾರಿತ ಉತ್ತೇಜಕ ಯೋಜನೆ. ಆಯ್ದ ಕಂಪನಿಗಳು ಎಷ್ಟು ಮಾಡುವ ಉತ್ಪಾದನೆಗೆ ಅನುಗುಣವಾಗಿ ಹಣದ ರೂಪದಲ್ಲಿ ಸರ್ಕಾರ ಉತ್ತೇಜನ ನೀಡುತ್ತದೆ. ಮ್ಯಾನುಫ್ಯಾಕ್ಚರಿಂಗ್ ವಲಯದಲ್ಲಿ ಸ್ಮಾರ್ಟ್ಫೋನ್ ಸೆರಿದಂತೆ ಹತ್ತಕ್ಕೂ ಹೆಚ್ಚು ಸೆಕ್ಟರ್ಗಳಿಗೆ ಪಿಎಲ್ಐ ಸ್ಕೀಮ್ ಅನ್ನು ಜಾರಿಗೊಳಿಸಲಾಗಿದೆ.
ಇದನ್ನೂ ಓದಿ: ಐಫೋನ್ ಆಯ್ತು, ಈಗ ನೊಕಿಯಾ ಸರದಿ; ಚೀನಾದಿಂದ ಭಾರತಕ್ಕೆ ವಲಸೆ ಬರುತ್ತಿರುವ ಎಚ್ಎಂಡಿ; ಸಪ್ಲೈಯರ್ಸ್ಗೂ ಕರೆ
ಹಿಂದೆ ಬಂದ ವರದಿಯೊಂದರ ಪ್ರಕಾರ ಸ್ಮಾರ್ಟ್ಫೋನ್ ಪಿಎಲ್ಐ ಸ್ಕೀಮ್ನಿಂದ ಸರ್ಕಾರಕ್ಕೆ ಸಿಕ್ಕಿರುವ ಆದಾಯ 1.10 ಲಕ್ಷ ಕೋಟಿ ರೂ. ಈ ಸ್ಕೀಮ್ನಲ್ಲಿ ಸರ್ಕಾರ ಹಾಕಿರುವ ಬಂಡವಾಳಕ್ಕೆ ಹೋಲಿಸಿದರೆ, ಅದಕ್ಕೆ ಬಂದಿರುವ ಆದಾಯ 19 ಪಟ್ಟು ಹೆಚ್ಚು ಇದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ