Tata Apple stores: ದೇಶದಲ್ಲಿ ನೂರು ವಿಶೇಷ ಆ್ಯಪಲ್ ಸ್ಟೋರ್ ಆರಂಭಿಸಲಿದೆ ಟಾಟಾ ಗ್ರೂಪ್; ವರದಿ
ಮಾಲ್ಗಳು ಮತ್ತು ಸ್ಟ್ರೀಟ್ಗಳ ಬಳಿ ಸ್ಟೋರ್ ಆರಂಭಿಸಲು ಜಾಗಕ್ಕಾಗಿ ಟಾಟಾ ಈಗಾಗಲೇ ಮಾತುಕತೆ ಆರಂಭಿಸಿದೆ ಎಂದು ಮೂಲಗಳು ತಿಳಿಸಿವೆ.
ನವದೆಹಲಿ: ಟಾಟಾ ಸಮೂಹವು (Tata Group) ಶೀಘ್ರದಲ್ಲೇ ದೇಶದಾದ್ಯಂತ 100 ಸಣ್ಣ ವಿಶೇಷ ಆ್ಯಪಲ್ ಸ್ಟೋರ್ಗಳನ್ನು (Apple Stores) ಆರಂಭಿಸಲಿದೆ ಎಂದು ವರದಿಯಾಗಿದೆ. ಟಾಟಾ ಒಡೆತನದ ಇನ್ಫಿನಿಟಿ ರಿಟೇಲ್ ಜತೆ ಆ್ಯಪಲ್ ಮಾತುಕತೆ ನಡೆಸುತ್ತಿದೆ. ಇನ್ಫಿನಿಟಿ ರಿಟೇಲ್ ಸದ್ಯ ದೇಶದಲ್ಲಿ ಕ್ರೋಮಾ ಸ್ಟೋರ್ಗಳನ್ನು ನಡೆಸುತ್ತಿದೆ. ಶಾಪಿಂಗ್ ಮಾಲ್ಗಳಲ್ಲಿ, ಖ್ಯಾತ ಸ್ಥಳಗಳು ಮತ್ತು ಸಮೀಪದ ಪ್ರದೇಶಗಳಲ್ಲಿ 500-600 ಚದರ ಅಡಿ ವಿಸ್ತೀರ್ಣದ ಆ್ಯಪಲ್ ಸ್ಟೋರ್ಗಳನ್ನು ತೆರೆಯಲಾಗುವುದು. ಈ ಸ್ಟೋರ್ಗಳು ಆ್ಯಪಲ್ ಪ್ರೀಮಿಯಂ ರಿಸೆಲ್ಲರ್ ಸ್ಟೋರ್ಗಳಿಗಿಂತ ಸಣ್ಣದಾಗಿರಲಿದೆ ಎಂದು ‘ಎಕನಾಮಿಕ್ ಟೈಮ್ಸ್’ ವರದಿ ತಿಳಿಸಿದೆ. ಪ್ರೀಮಿಯಂ ರಿಸೆಲ್ಲರ್ ಸ್ಟೋರ್ಗಳು ಸಾವಿರ ಚದರ ಅಡಿ ವಿಸ್ತೀರ್ಣದ್ದಾಗಿವೆ. ಸಣ್ಣ ಸ್ಟೋರ್ಗಳಲ್ಲಿ ಐಫೋನ್, ಐಪ್ಯಾಡ್ ಮತ್ತು ವಾಚ್ಗಳನ್ನು ಮಾರಾಟ ಮಾಡಲಾಗುತ್ತದೆ ಎಂದು ವರದಿ ತಿಳಿಸಿದೆ.
ಮಾಲ್ಗಳು ಮತ್ತು ಸ್ಟ್ರೀಟ್ಗಳ ಬಳಿ ಸ್ಟೋರ್ ಆರಂಭಿಸಲು ಜಾಗಕ್ಕಾಗಿ ಟಾಟಾ ಈಗಾಗಲೇ ಮಾತುಕತೆ ಆರಂಭಿಸಿದೆ ರಿಟೇಲ್ ಕನ್ಸಲ್ಟೇಂಟ್ ಒಬ್ಬರು ತಿಳಿಸಿದ್ದಾರೆ. ಆ್ಯಪಲ್ನ ಮೊದಲ ಕಂಪನಿ ಮಾಲೀಕತ್ವದ ಸ್ಟೋರ್ ಮಾರ್ಚ್ನಲ್ಲಿ ಮುಂಬೈಯಲ್ಲಿ ಆರಂಭವಾಗುವ ನಿರೀಕ್ಷೆ ಇದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಇದನ್ನೂ ಓದಿ: Tata Group: ಭಾರತದಲ್ಲಿ ಐಫೋನ್ ತಯಾರಿಸುವ ವಿಸ್ಟ್ರಾನ್ ಬೆಂಗಳೂರು ಘಟಕ ಖರೀದಿಗೆ ಟಾಟಾ ಒಲವು
ಕಂಪನಿ ಮಾಲೀಕತ್ವದ ಸ್ಟೋರ್ಗಳಿಂದ ಸಹಭಾಗಿತ್ವ ಹೊಂದಿರುವವರಿಗೆ ಮತ್ತು ಚಿಲ್ಲರೆ ಮಾರಾಟಗಾರರಿಗೆ ಅನುಕೂಲವಾಗಲಿದೆ. ಮಾರಾಟ ಹೆಚ್ಚಾಗಲಿದೆ ಎಂದು ಆ್ಯಪಲ್ ಈಗಾಗಲೇ ಸ್ಥಳೀಯ ಫ್ರಾಂಚೈಸ್ ಸಹಭಾಗಿತ್ವ ಹೊಂದಿರುವವರಿಗೆ ತಿಳಿಸಿದೆ ಎನ್ನಲಾಗಿದೆ.
ದೇಶದಲ್ಲಿ ಜುಲೈ – ಸೆಪ್ಟೆಂಬರ್ ಅವಧಿಯಲ್ಲಿ 17 ಲಕ್ಷ ಐಫೋನ್ ಮಾರಾಟವಾಗಿದೆ ಎಂದು ಸೈಬರ್ಮೀಡಿಯಾ ರಿಸರ್ಚ್ (ಸಿಎಂಆರ್) ತಿಳಿಸಿದೆ. ಭಾರತದಲ್ಲಿ ಮಾರಾಟ ಹೆಚ್ಚಿಸಲು ಮತ್ತು ಉತ್ಪಾದನಾ ಸಾಮರ್ಥ್ಯ ವೃದ್ಧಿಸುವತ್ತ ಆ್ಯಪಲ್ ಚಿತ್ತ ನೆಟ್ಟಿದೆ.
ಮುಂದಿನ ಎರಡು ವರ್ಷಗಳಲ್ಲಿ ಭಾರತದಲ್ಲಿ ಉತ್ಪಾದನೆಯನ್ನು ಮೂರು ಪಟ್ಟು ಹೆಚ್ಚಿಸುವಂತೆ ವಿಸ್ಟ್ರಾನ್, ಪಾಕ್ಸ್ಕಾನ್ ಹಾಗೂ ಪೆಗಾಟ್ರಾನ್ಗಳಿಗೆ ಆ್ಯಪಲ್ ಸೂಚಿಸಿದೆ ಎಂದು ‘ಲೈವ್ ಮಿಂಟ್’ ವರದಿ ತಿಳಿಸಿದೆ. ವಿಸ್ಟ್ರಾನ್, ಪಾಕ್ಸ್ಕಾನ್ ಹಾಗೂ ಪೆಗಾಟ್ರಾನ್ಗಳು ಭಾರತದಲ್ಲಿ ಐಫೋನ್ ತಯಾರಿಸುತ್ತಿವೆ. ಉತ್ಪಾದನೆಯನ್ನು ಮೂರು ಪಟ್ಟು ಹೆಚ್ಚಿಸುವುದರಿಂದ ಭಾರತದಲ್ಲಿ ತಯಾರಿಸಿದ ಐಫೋನ್ ರಫ್ತಿಗೆ ನೆರವಾಗಲಿದೆ ಎಂದು ವರದಿ ಹೇಳಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 2:42 pm, Mon, 12 December 22
