Income Tax: ಲೆಕ್ಕಕ್ಕೆ ನೀಡದ 175 ಕೋಟಿ ರೂಪಾಯಿ ಪತ್ತೆ ಹಚ್ಚಿದ ಆದಾಯ ತೆರಿಗೆ ಇಲಾಖೆ

ಹೊಸದಿಲ್ಲಿ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಅಧಿಕಾರಿಗಳು ಮತ್ತು ವಾಹನ ಸಂಚಾರ ಡೇಟಾಗಳ ಸಹಾಯದಿಂದ ಲೆಕ್ಕಕ್ಕೆ ನೀಡದ ಆದಾಯವಾದ 175.5 ಕೋಟಿ ರೂಪಾಯಿಯ ಪ್ರಕರಣವನ್ನು ಆದಾಯ ತೆರಿಗೆ ಇಲಾಖೆ ಶನಿವಾರ ಭೇದಿಸಿದೆ. ಪುಣೆ, ನಾಸಿಕ್ ಅಹ್ಮದ್ ನಗರ ಮತ್ತು ಗೋವಾದಲ್ಲಿ ಉಕ್ಕಿನ ತಯಾರಕರು ಮತ್ತು ವ್ಯಾಪಾರಿಗಳದೂ ಒಳಗೊಂಡಂತೆ ನಲವತ್ನಾಲ್ಕಕ್ಕೂ ಹೆಚ್ಚು ಸ್ಥಳಗಳಲ್ಲಿ ಶೋಧ ಕಾರ್ಯಾಚರಣೆ ನಡೆಸಿದ ನಂತರ ಲೆಕ್ಕಕ್ಕೆ ನೀಡದ ಆದಾಯವನ್ನು ಪತ್ತೆ ಹಚ್ಚಲಾಗಿದೆ. ಬುಧವಾರ ನಡೆಸಿದ ಶೋಧದ ಸಮಯದಲ್ಲಿ ದೊರೆತ ಪುರಾವೆಗಳ ಪ್ರಕಾರ, ಸ್ಕ್ರ್ಯಾಪ್ ಮತ್ತು ಸ್ಪಾಂಜ್ ಕಬ್ಬಿಣದ ನಕಲಿ ಖರೀದಿಗಳ ಬುಕಿಂಗ್ ಮಾಡುವಲ್ಲಿ ನಿರತವಾಗಿರುವುದಾಗಿ ‘ನಕಲಿ ಇನ್​ವಾಯ್ಸ್ ವಿತರಕರಿಂದ’ ತೋರಿಸಲಾಗಿದೆ. ಯಾವುದೇ ಸಾಮಗ್ರಿಗಳಿಲ್ಲದೆ ಬಿಲ್‌ಗಳನ್ನು ಪೂರೈಸಿದ್ದನ್ನು ಇನ್​ವಾಯ್ಸ್ ವಿತರಣೆ ಮಾಡುವವರು ತಾವಾಗಿಯೇ ಒಪ್ಪಿಕೊಂಡಿದ್ದಾರೆ. ನಕಲಿ ಇ-ವೇ ಬಿಲ್‌ಗಳನ್ನು ಸಹ ಸೃಷ್ಟಿಸಿದ್ದಾರೆ ಹಾಗೂ ಅದನ್ನು ಸಹಜ ವಹಿವಾಟು ಎಂದು ತೋರಿಸಲು ಮತ್ತು ಜಿಎಸ್‌ಟಿ ಇನ್​ಪುಟ್ ಕ್ರೆಡಿಟ್ ಪಡೆಯಲು ನೀಡಿದ್ದಾರೆ ಎಂದು ಇಲಾಖೆಯಿಂದ ತಿಳಿಸಲಾಗಿದೆ.

“ಜಿಎಸ್‌ಟಿ ಪ್ರಾಧಿಕಾರಗಳ ಬೆಂಬಲದೊಂದಿಗೆ, “ವಾಹನ ಸಂಚಾರ ಟ್ರ್ಯಾಕಿಂಗ್ ಆ್ಯಪ್” ಅನ್ನು ನಕಲಿ ಇ-ವೇ ಬಿಲ್‌ಗಳನ್ನು ಗುರುತಿಸಲು ಬಳಸಲಾಯಿತು. ಈ ಪಾರ್ಟಿಗಳಿಂದ ಗುರುತಿಸಲಾದ ಒಟ್ಟು ಬೋಗಸ್ ಖರೀದಿ ಮೊತ್ತ ಸುಮಾರು ರೂ. 160 ಕೋಟಿಯಾಗಿದೆ,” ಎಂದು ಇಲಾಖೆ ಹೇಳಿದೆ. ನಕಲಿ ಖರೀದಿಗಳ ಪ್ರಮಾಣವು ಗಣನೀಯವಾಗಿ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಕೂಡ ಹೇಳಲಾಗಿದೆ. ಲೆಕ್ಕಕ್ಕೆ ನೀಡದಂಥ ರಿಯಲ್ ಎಸ್ಟೇಟ್ ಹೂಡಿಕೆಗಳು, ನಗದು ಮತ್ತು ಆಭರಣಗಳನ್ನು ಸಹ ಐ.ಟಿ. ಇಲಾಖೆಯಿಂದ ಕಂಡುಹಿಡಿಯಲಾಗಿದೆ. ಶೋಧ ಇನ್ನೂ ನಡೆಯುತ್ತಿದೆ. ಜಿಎಸ್‌ಟಿ, ಸೀಮಾಸುಂಕ ಮತ್ತು ಆದಾಯ ತೆರಿಗೆಯನ್ನು ನಿರ್ವಹಿಸುತ್ತಿರುವ ಅಧಿಕಾರಿಗಳು ಈಗ ಡೇಟಾವನ್ನು ಹಂಚಿಕೊಳ್ಳುತ್ತಿದ್ದಾರೆ. ಈ ಮೂಲಕ ಬಹಿರಂಗ ಮಾಡಿದ ವಹಿವಾಟುಗಳಲ್ಲಿನ ವ್ಯತ್ಯಾಸವನ್ನು ಪತ್ತೆ ಮಾಡುವುದಕ್ಕೆ ಇದರಿಂದ ನೆರವಾಗುತ್ತದೆ. ಮತ್ತು ವಂಚನೆಯ ಶಂಕಿತ ಪ್ರಕರಣಗಳ ಕುರಿತು ಇನ್ನೂ ಹೆಚ್ಚಿನ ತನಿಖೆ ನಡೆಸುವುದಕ್ಕೆ ಸಹಾಯ ಆಗುತ್ತದೆ.

ವಾಣಿಜ್ಯ ವಾಹನಗಳು ಟೋಲ್ ಪ್ಲಾಜಾಗಳ ಮೂಲಕ ಸಾಗಲು ಬಳಸುವ ರೇಡಿಯೋ ಫ್ರೀಕ್ವೆನ್ಸಿ ಟ್ಯಾಗ್‌ಗಳೊಂದಿಗೆ ಸರಕು ಸಾಗಾಣಿಕೆಗೆ (ಇ-ವೇ ಬಿಲ್‌ಗಳು) ನೀಡಲಾದ ಎಲೆಕ್ಟ್ರಾನಿಕ್ ಪರ್ಮಿಟ್​ಗಳನ್ನು ಪರಿಶೀಲಿಸುವ ಮೂಲಕ ಜಿಎಸ್‌ಟಿ ಅಧಿಕಾರಿಗಳು ತೆರಿಗೆ ವಂಚನೆಯ ಪ್ರಕರಣಗಳನ್ನು ಪತ್ತೆ ಹಚ್ಚಲು ಆರಂಭಿಸಿದ್ದಾರೆ ಎಂದು ಮಾಧ್ಯಮವೊಂದರಲ್ಲಿ ಜುಲೈ ತಿಂಗಳಲ್ಲಿ ವರದಿ ಆಗಿತ್ತು. ಜಿಎಸ್‌ಟಿ ನೋಂದಾಯಿತ ವ್ಯಕ್ತಿಗಳು 50,000 ರೂಪಾಯಿಗಿಂತ ಹೆಚ್ಚು ಮೌಲ್ಯದ ಸರಕುಗಳನ್ನು ರಾಜ್ಯದ ಒಳಗೆ ಅಥವಾ ವಿವಿಧ ರಾಜ್ಯಗಳಿಗೆ ಸಾಗಿಸಲು ಇ-ವೇ ಬಿಲ್‌ಗಳು ಅತ್ಯಗತ್ಯವಾಗಿದೆ.

ಇದನ್ನೂ ಓದಿ: ಸೆ.15ರ ಒಳಗೆ ತೆರಿಗೆ ಪೋರ್ಟಲ್ ಸರಿಪಡಿಸಿ: ಇನ್​ಫೊಸಿಸ್​ಗೆ ಕೇಂದ್ರ ಸರ್ಕಾರ ತಾಕೀತು

(Tax Department Detects Rs 175 Crore Worth Of Unaccounted Amount Here Is The Details)