ಭಾರತದಲ್ಲಿ ಕಡಿಮೆಯಾದ ನಿರುದ್ಯೋಗ; ಸಂಬಳದ ಕೆಲಸಗಳ ಪ್ರಮಾಣವೂ ಹೆಚ್ಚಳ
Unemployment rate in India: ಭಾರತದಲ್ಲಿ 2024ರ ಜುಲೈನಿಂದ ಸೆಪ್ಟೆಂಬರ್ವರೆಗಿನ ಕ್ವಾರ್ಟರ್ನಲ್ಲಿ ನಗರ ಭಾಗದಲ್ಲಿ 15 ವರ್ಷ ಮೇಲ್ಪಟ್ಟವರ ನಿರುದ್ಯೋಗ ಪ್ರಮಾಣ ಶೇ. 6.4ಕ್ಕೆ ಇಳಿದಿದೆ. ಇದು ಐತಿಹಾಸಿಕ ಕನಿಷ್ಠ ನಿರುದ್ಯೋಗ ದರ ಎನಿಸಿದೆ. ಈ ಅವಧಿಯಲ್ಲಿ ಸಕ್ರಿಯ ಕಾರ್ಮಿಕರ ಅಥವಾ ಉದ್ಯೋಗಿಗಳ ಸಂಖ್ಯೆ ಹೆಚ್ಚಳಗೊಂಡಿದೆ. ವರ್ಕರ್ ಪಾಪುಲೇಶನ್ ರೇಶಿಯೋ ಕೂಡ ಹೆಚ್ಚಿದೆ.
Updated on: Nov 21, 2024 | 3:08 PM
ನವದೆಹಲಿ, ನವೆಂಬರ್ 21: ಭಾರತದಲ್ಲಿ ಇತ್ತೀಚಿನ ವರ್ಷಗಳಲ್ಲಿ ನಿರುದ್ಯೋಗ ದರ ಕ್ರಮೇಣವಾಗಿ ಇಳಿಮುಖವಾಗುತ್ತಿದೆ. ಸರ್ಕಾರ ಬಿಡುಗಡೆ ಮಾಡಿರುವ ದತ್ತಾಂಶದ ಪ್ರಕಾರ 2024ರ ಜುಲೈನಿದ ಸೆಪ್ಟೆಂಬರ್ವರೆಗಿನ ಮೂರು ತಿಂಗಳ ಅವಧಿಯಲ್ಲಿ ನಗರಭಾಗದಲ್ಲಿ ನಿರುದ್ಯೋಗ ದರ ಶೇ. 6.4ರಷ್ಟಿದೆ. ಇದು 15 ವರ್ಷ ಮೇಲ್ಪಟ್ಟ ವ್ಯಕ್ತಿಗಳ ನಿರುದ್ಯೋಗ ಪ್ರಮಾಣವಾಗಿದೆ. ಕಳೆದ ವರ್ಷದ ಇದೇ ಕ್ವಾರ್ಟರ್ನಲ್ಲಿ ಶೇ. 6.6ರಷ್ಟು ನಿರುದ್ಯೋಗ ದರ ಇತ್ತು.
ಇದೇ ವೇಳೆ, ಕಾರ್ಮಿಕರ ಪಾಲ್ಗೊಳ್ಳುವಿಕೆ ದರ (ಎಲ್ಎಫ್ಪಿಆರ್) ಉತ್ತಮಗೊಂಡಿದೆ. ಹಣಕಾಸು ವರ್ಷದ ಈ ಎರಡನೇ ಕ್ವಾರ್ಟರ್ನಲ್ಲಿ ಕಾರ್ಮಿಕರ ದರ ಶೇ. 50.4ರಷ್ಟಿರುವುದು ತಿಳಿದುಬಂದಿದೆ. ಹಿಂದಿನ ವರ್ಷದ ಇದೇ ತ್ರೈಮಾಸಿಕ ಅವಧಿಯಲ್ಲಿ ಇದು ಶೇ. 49.3ರಷ್ಟಿತ್ತು.
ಇಲ್ಲಿ ಕಾರ್ಮಿಕರ ಪಾಲ್ಗೊಳ್ಳುವಿಕೆ ದರ ಎಂದರೆ ಒಟ್ಟಾರೆ ಜನಸಂಖ್ಯೆಯಲ್ಲಿ ಕೆಲಸ ಮಾಡುತ್ತಿರುವ ಮತ್ತು ಕೆಲಸಕ್ಕೆ ಯತ್ನಿಸುತ್ತಿರುವ ವ್ಯಕ್ತಿಗಳ ಸಂಖ್ಯೆಯಾಗಿದೆ.
ಇದನ್ನೂ ಓದಿ: ಪಡಿತರ ವ್ಯವಸ್ಥೆಯಲ್ಲಿ 58 ಲಕ್ಷ ನಕಲಿ ರೇಶನ್ ಕಾರ್ಡ್ ಪತ್ತೆ; ಡಿಜಿಟಲೀಕರಣದಿಂದ ಇನ್ನೂ ಹಲವು ಲಾಭ
ಇನ್ನು, ಕಾರ್ಮಿಕ ಸಂಖ್ಯೆ ಅನುಪಾತ ಅಥವಾ ವರ್ಕರ್ ಪಾಪುಲೇಶನ್ ರೇಶಿಯೋ (ಡಬ್ಲ್ಯುಪಿಆರ್) ಶೇ. 46ರಿಂದ ಶೇ. 47.3ಕ್ಕೆ ಏರಿದೆ. ಡಬ್ಲ್ಯುಪಿಆರ್ ಎಂದರೆ ಒಟ್ಟಾರೆ ಜನಸಂಖ್ಯೆಯಲ್ಲಿ ಕೆಲಸ ಮಾಡುತ್ತಿರುವ ವ್ಯಕ್ತಿಗಳ ಪ್ರಮಾಣವಾಗಿದೆ.
ರೆಗ್ಯುಲರ್ ಜಾಬ್ ಪ್ರಮಾಣ ಹೆಚ್ಚಳ
ಜುಲೈನಿಂದ ಸೆಪ್ಟೆಂಬರ್ವರೆಗಿನ ಕ್ವಾರ್ಟರ್ನಲ್ಲಿ ಒಟ್ಟಾರೆ ಉದ್ಯೋಗಿಗಳ ಪೈಕಿ ನಿಯಮಿತ ಉದ್ಯೋಗಿಗಳು ಅಥವಾ ಮಾಸಿಕ ಸಂಬಳ ಪಡೆಯುವ ಉದ್ಯೋಗಿಗಳ ಪ್ರಮಾಣ ಶೇ. 48.3ರಿಂದ ಶೇ. 49.4ಕ್ಕೆ ಏರಿದೆ.
ರೀಟೇಲ್ ಸೇಲ್ಸ್, ಪ್ರವಾಸೋದ್ಯಮ, ಆತಿಥ್ಯೋದ್ಯಮ, ಹೆಲ್ತ್ಕೇರ್, ರಿಯಲ್ ಎಸ್ಟೇಟ್ ಇತ್ಯಾದಿ ಟರ್ಷಿಯರಿ ಸೆಕ್ಟರ್ಗಳಲ್ಲಿನ ಉದ್ಯೋಗಗಳ ಪ್ರಮಾಣ ಶೇ. 61.5ರಿಂದ ಶೇ. 62.3ಕ್ಕೆ ಏರಿದೆ. ಇನ್ನು, ಕೃಷಿ ವಲಯದಲ್ಲಿ ಉದ್ಯೋಗ ಕಡಿಮೆ ಆಗಿದೆ. ಅಂದರೆ, ಜನರು ಕೃಷಿಯಿಂದ ಹೊರಬಂದು ಬೇರೆ ಫಾರ್ಮಲ್ ಸೆಕ್ಟರ್ನಲ್ಲಿ ಕೆಲಸ ಮಾಡುತ್ತಿರುವುದನ್ನು ಇದು ತೋರಿಸುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
