ಇಂಡಸ್ ಟವರ್ಸ್ನ ಶೇ. 20ರಷ್ಟು ಷೇರುಪಾಲು ಮಾರಿದ ವೊಡಾಫೋನ್; 17,065 ಕೋಟಿ ರೂಗೆ ಬಿಕರಿ; ಷೇರುಪಾಲು ಹೆಚ್ಚಿಸಿಕೊಂಡ ಏರ್ಟೆಲ್
Vodafone sells stake in Indus Towers: ಇಂಡಸ್ ಟವರ್ಸ್ ಸಂಸ್ಥೆಯಲ್ಲಿ ತಾನು ಹೊಂದಿರುವ ಶೇ. 20ರಷ್ಟು ಷೇರುಗಳನ್ನು ವೊಡಾಫೋನ್ ಗ್ರೂಪ್ ಮಾರಿದೆ. 17,065 ಕೋಟಿ ರೂಗೆ ಬಿಕರಿಯಾಗಿದೆ. ಐ ಸ್ಕ್ವಯರ್ಡ್ ಕ್ಯಾಪಿಟಲ್, ಸ್ಟೋನ್ ಪೀಕ್ ಕಂಪನಿಗಳು ಹೆಚ್ಚಿನ ಷೇರುಗಳನ್ನು ಖರೀದಿ ಮಾಡಿವೆ. ಶೇ. 47ಕ್ಕೂ ಹೆಚ್ಚು ಷೇರುಪಾಲು ಹೊಂದಿರುವ ಭಾರ್ತಿ ಏರ್ಟೆಲ್ ಸಂಸ್ಥೆ ಶೇ. 1ರಷ್ಟು ಷೇರು ಖರೀದಿಸಿರುವುದು ತಿಳಿದುಬಂದಿದೆ.
Updated on: Jun 19, 2024 | 12:39 PM
ನವದೆಹಲಿ, ಜೂನ್ 19: ಮೊಬೈಲ್ ಟವರ್ಗಳನ್ನು ಸ್ಥಾಪಿಸುವ ಇಂಡಸ್ ಟವರ್ಸ್ನಲ್ಲಿ ತಾನು ಹೊಂದಿರುವ ಬಹುತೇಕ ಷೇರುಗಳನ್ನು ವೊಡಾಫೋನ್ ಗ್ರೂಪ್ ಮಾರಿದೆ. ವರದಿಗಳ ಪ್ರಕಾರ ಇಂಡಸ್ ಟವರ್ಸ್ನ (Indus Towers) ಶೇ. 20ರಷ್ಟು ಷೇರುಗಳನ್ನು ವೊಡಾಫೋನ್ ಆಫ್ಲೋಡ್ ಮಾಡಿದ್ದು, 17,065 ಕೋಟಿ ರೂ ಗಳಿಸಿದೆ. ಈ ಮೊಬೈಲ್ ಟವರ್ ಇನ್ಸ್ಟಾಲೇಶನ್ ಕಂಪನಿಯಲ್ಲಿ ವೊಡಾಫೋನ್ ಗ್ರೂಪ್ (Vodafone Group) ಶೇ. 21.05ರಷ್ಟು ಪಾಲು ಹೊಂದಿತ್ತು. ಈಗ ಅದರ ಬಳಿ 1.05 ಪ್ರತಿಶತದಷ್ಟು ಷೇರು ಮಾತ್ರವೇ ಉಳಿದಂತಾಗುತ್ತದೆ.
ಬ್ರಿಟನ್ ಮೂಲದ ವೊಡಾಫೋನ್ ಗ್ರೂಪ್ ಇಂಡಸ್ ಟವರ್ಸ್ನ ಸುಮಾರು 53.30 ಕೋಟಿ ಷೇರುಗಳನ್ನು ಮಾರಿದೆ. ಐ ಸ್ಕ್ವಯರ್ಡ್ ಕ್ಯಾಪಿಟಲ್, ಸ್ಟೋನ್ಪೀಕ್ ಮೊದಲಾದ ಇನ್ವೆಸ್ಟ್ಮೆಂಟ್ ಸಂಸ್ಥೆಗಳು ಈ ಷೇರುಗಳನ್ನು ಖರೀದಿಸಿವೆ. ಇಂಡಸ್ ಟವರ್ಸ್ನಲ್ಲಿ ಹೆಚ್ಚಿನ ಷೇರುಪಾಲು ಹೊಂದಿರುವ ಭಾರ್ತಿ ಏರ್ಟೆಲ್ ಸಂಸ್ಥೆ ಶೇ. 1ರಷ್ಟು ಷೇರುಗಳನ್ನು ಖರೀದಿ ಮಾಡಿದೆ. ಇಂಡಸ್ನಲ್ಲಿ ಅದು ಹೊಂದಿರುವ ಷೇರುಪಾಲು ಶೇ. 49ರ ಆಸುಪಾಸಿಗೆ ಬಂದಂತಾಗುತ್ತದೆ.
ಇದನ್ನೂ ಓದಿ: ಅಪ್ಪ, ಹೆಂಡತಿಯನ್ನು ನಿರ್ದಯವಾಗಿ ಹೊರಗಿಟ್ಟ ಗೌತಮ್ ಸಿಂಘಾನಿಯಾರನ್ನು ಹೊರಗಿಡಿ: ರೇಮಂಡ್ಸ್ ಷೇರುದಾರರಿಗೆ ಐಐಎಎಸ್ ಮನವಿ
ಈ ಷೇರು ಬಿಕರಿಗೆ ಮುಂಚೆ ಇಂಡಸ್ ಟವರ್ಸ್ನಲ್ಲಿ ಏರ್ಟೆಲ್ ಶೇ. 47.95, ವೊಡಾಫೋನ್ ಗ್ರೂಪ್ ಶೇ. 21.05ರಷ್ಟು ಪಾಲು ಹೊಂದಿದ್ದವು. ಶೇ. 30.97ರಷ್ಟು ಷೇರುಗಳು ಸಾರ್ವಜನಿಕರ ಬಳಿ ಇವೆ. ಈಗ ವೊಡಾಫೋನ್ ಪಾಲಿನ ಷೇರುಗಳು ಸಾಂಸ್ಥಿಕ ಹೂಡಿಕೆದಾರರ ಪಾಲಾಗಿವೆ.
ಮೊಬೈಲ್ ಟವರ್ಗಳನ್ನು ಸ್ಥಾಪಿಸುವ ಸಂಸ್ಥೆಯಾದ ಇಂಡಸ್ ಟವರ್ಸ್ಗೆ ಟೆಲಿಕಾಂ ಕಂಪನಿಗಳಿಂದಲೇ ಬಹುಪಾಲು ಆದಾಯ ಬರುತ್ತದೆ. ವೊಡಾಫೋನ್ ಐಡಿಯಾದಿಂದ ಶೇ. 35-40ರಷ್ಟು ಆದಾಯವನ್ನು ಇಂಡಸ್ ಟವರ್ಸ್ ಗಳಿಸುತ್ತಿತ್ತು. ಅಷ್ಟೇ ಅಲ್ಲ, ವೊಡಾಫೋನ್ ಐಡಿಯಾ ಸುಮಾರು 10,000 ಕೋಟಿ ರೂ ಹಣವನ್ನು ಇಂಡಸ್ ಟವರ್ಸ್ಗೆ ಕೊಡುವುದು ಬಾಕಿ ಇದೆ. ಈಗ ಶೇ. 20ರಷ್ಟು ಷೇರುಪಾಲು ಮಾಡಿ ಗಳಿಸಿರುವ ಹಣದಲ್ಲಿ ಈ ಸಾಲವನ್ನು ತೀರಿಸುವ ಸಾಧ್ಯತೆ ಇರಬಹುದು.
ಈ ಷೇರು ಮಾರಾಟದ ಬಳಿಕ ಇಂಡಸ್ ಟವರ್ಸ್ ಮತ್ತು ವೊಡಾಫೋನ್ ಐಡಿಯಾ ಕಂಪನಿಗಳ ಷೇರುಬೆಲೆ ಇಳಿಕೆಯಾಗಿದೆ. ಭಾರ್ತಿ ಏರ್ಟೆಲ್ ಷೇರುಬೆಲೆಯೂ ಕಡಿಮೆಯಾಗಿದೆ. ಈ ಷೇರುಕುಸಿತಕ್ಕೆ ಈ ಬೆಳವಣಿಗೆಯೇ ಕಾರಣವಾ ಎಂಬುದು ಸ್ಪಷ್ಟವಾಗಿಲ್ಲ. ಇಂದು ಒಟ್ಟಾರೆಯಾಗಿ ಷೇರು ಮಾರುಕಟ್ಟೆ ಕುಸಿತಗೊಂಡಿರುವ ಹಿನ್ನೆಲೆಯಲ್ಲಿ ಈ ಇಳಿಕೆ ಆಗಿರಬಹುದು ಎನ್ನುವುದನ್ನು ತಳ್ಳಿಹಾಕಲಾಗುವುದಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
