ಪಿಎಫ್ ಹಣವನ್ನು ಸರ್ಕಾರ ಏನು ಮಾಡುತ್ತದೆ, ಎಲ್ಲಿ ಹೂಡಿಕೆ ಮಾಡುತ್ತದೆ? ಇಲ್ಲಿದೆ ಮಾಹಿತಿ

ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯಾದ ಇಪಿಎಫ್​ಒ (EPFO) ಸುಪರ್ದಿಯಲ್ಲಿ ನಿರ್ವಹಣೆ ಆಗುತ್ತಿರುವ ಉದ್ಯೋಗಿಗಳ ಒಟ್ಟು ಸೇವಿಂಗ್ಸ್ ಹಣ ಎಷ್ಟು ಗೊತ್ತಾ? ಬರೋಬ್ಬರಿ 30 ಲಕ್ಷ ಕೋಟಿ ರೂಗೂ ಅಧಿಕ. ಉದ್ಯೋಗಿಗಳ ಇಪಿಎಫ್ ಅಕೌಂಟ್​ಗಳಲ್ಲಿರುವ ಒಟ್ಟು ಹಣ ಇದು. ಇಪಿಎಫ್​ಒ ಈ ಹಣವನ್ನು ಎಲ್ಲಿ ಹೂಡಿಕೆ ಮಾಡುತ್ತದೆ? ಯಾವ ನಿಯಮಗಳ ಪ್ರಕಾರ ಅದು ಹೂಡಿಕೆ ಮಾಡುತ್ತದೆ ಎಂಬ ಪ್ರಶ್ನೆ ಯಾರಿಗಾದರೂ ಬರಬಹುದು. ಕೇಂದ್ರ ಹಣಕಾಸು ಸಚಿವಾಲಯದ ಮಾರ್ಗದರ್ಶಿ ಸೂತ್ರಗಳ ಪ್ರಕಾರ, ಇಪಿಎಫ್​ಒ ಸಂಸ್ಥೆಯು ಪಿಎಫ್ (PF) ಹಣವನ್ನು ಸುರಕ್ಷಿತ ಸಾಲಪತ್ರಗಳು (Debt Instruments) ಮತ್ತು ಷೇರು ಮಾರುಕಟ್ಟೆಯಲ್ಲಿ (Equities) ಹೂಡಿಕೆ ಮಾಡುತ್ತದೆ.

ಇಪಿಎಫ್ ಹಣ ಇಲ್ಲಿ ಹೂಡಿಕೆಯಾಗುತ್ತದೆ

• ಸರ್ಕಾರಿ ಸೆಕ್ಯೂರಿಟಿಗಳು (Government Securities): ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಬಾಂಡ್‌ಗಳು ಹಾಗೂ ಟ್ರೆಷರಿ ಬಿಲ್ಲುಗಳು ಇತ್ಯಾದಿಯಲ್ಲಿ 45% – 65% ಹೂಡಿಕೆ ಮಾಡಬಹುದು.
• ಸಾಲಪತ್ರಗಳು (Debt Instruments & Corporate Bonds): ಸಾರ್ವಜನಿಕ ವಲಯದ ಬ್ಯಾಂಕ್‌ಗಳು, ಸರ್ಕಾರಿ ಸಂಸ್ಥೆಗಳು (Infrastructure Bond), ಬಾಸೆಲ್-III ಬಾಂಡ್‌ಗಳು ಮತ್ತು ಖಾಸಗಿ ಕಂಪನಿಗಳ ಸಾಲಪತ್ರಗಳು ಇತ್ಯಾದಿಗಳಲ್ಲಿ 20% – 45% ಹೂಡಿಕೆ. |
• ಷೇರು ಮಾರುಕಟ್ಟೆ / ಈಕ್ವಿಟಿ (Equities via ETFs): ಈಕ್ವಿಟಿಗಳಲ್ಲಿ 5% – 15% ಹೂಡಿಕೆ ಇರುತ್ತದೆ.
• ಅಲ್ಪಾವಧಿ ಸಾಲಪತ್ರಗಳು (Short-term Debt): ಬ್ಯಾಂಕ್ ಡೆಪಾಸಿಟ್‌ಗಳು, ಕಮರ್ಷಿಯಲ್ ಪೇಪರ್‌ಗಳು ಮತ್ತು ಸಣ್ಣ ಅವಧಿಯ ಮನಿ ಮಾರ್ಕೆಟ್ ಫಂಡ್‌ಗಳಲ್ಲಿ 0% – 5% ಹೂಡಿಕೆ ಮಾಡುತ್ತದೆ.

ಇದನ್ನೂ ಓದಿ: ಪಿಎಂ ಕಿಸಾನ್ ಸ್ಕೀಮ್: 24ನೇ ಕಂತಿನ ಹಣ ಯಾವಾಗ ಬಿಡುಗಡೆ? ಫಲಾನುಭವಿಗಳ ಪಟ್ಟಿಯಲ್ಲಿ ನಿಮ್ಮ ಹೆಸರಿದೆಯಾ ನೋಡಿ

ನೇರ ಷೇರು ಖರೀದಿ ಇಲ್ಲ: EPFO ಯಾವುದೇ ಕಂಪನಿಯ ಷೇರುಗಳನ್ನು ನೇರವಾಗಿ ಮಾರುಕಟ್ಟೆಯಲ್ಲಿ ಖರೀದಿಸುವುದಿಲ್ಲ, ಬದಲಾಗಿ ಭದ್ರತೆಗಾಗಿ ಇಂಡೆಕ್ಸ್ ಆಧಾರಿತ ETF ಗಳ ಮೂಲಕ ಮಾತ್ರ ಹೂಡಿಕೆ ಮಾಡುತ್ತದೆ.

ಸುರಕ್ಷತೆಗೆ ಆದ್ಯತೆ: ಹೂಡಿಕೆ ಮಾಡಲಾಗುವ ಒಟ್ಟು ಹಣದಲ್ಲಿ ಸುಮಾರು ಶೇ. 85 ರಷ್ಟು ಭಾಗವನ್ನು ಅತ್ಯಂತ ಸುರಕ್ಷಿತವಾದ ಸರ್ಕಾರಿ ಬಾಂಡ್‌ಗಳು ಮತ್ತು ಡೆಟ್ ಸೆಕ್ಯುರಿಟಿಗಳಲ್ಲೇ ಮೀಸಲಿಡಲಾಗುತ್ತದೆ. ಹೀಗಾಗಿ, ಇಪಿಎಫ್ ಅಕೌಂಟ್​ಗಳಿಗೆ ಸಿಗುವ ವಾರ್ಷಿಕ ಬಡ್ಡಿ ತೀರಾ ಹೆಚ್ಚು ಇರುವುದಿಲ್ಲ, ಕಡಿಮೆಯೂ ಇರುವುದಿಲ್ಲ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ