ರೇಷನ್ ಕಾರ್ಡ್ ವಿಚಾರಕ್ಕೆ ತಮ್ಮನಿಗೆ ಅಣ್ಣನೇ ಚಾಕು ಹಾಕಿದ್ನಾ? ಒಡವಟ್ಟಿದವರ ದ್ವೇಷದ ಹಿಂದಿರುವ ಕಥೆ ಇಲ್ಲಿದೆ

ಹಾಸನ, ಸೆಪ್ಟೆಂಬರ್​​ 28: ಅವರಿಬ್ಬರು ಒಡಹುಟ್ಟಿದವರು. ಸಾಕಷ್ಟು ಜಮೀನಿದ್ದರೂ ಹಂಚಿಕೆ ವಿಚಾರದಲ್ಲಿ ನಡೆಯುತ್ತಿದ್ದ ಗೊಂದಲದಿಂದ ಒಂದಷ್ಟು ಜಮೀನು ಮಾರಾಟ ಮಾಡಿ ಹಣ ಹಂಚಿಕೊಳ್ಳುವ ಮಾತುಕತೆ ಮಾಡಿಕೊಂಡಿದ್ದರು. ಆದರೆ ಜಮೀನು ಮಾರಾಟ ಮಾಡಿ ತಿಂಗಳೇ ಕಳೆದರೂ ಅಣ್ಣ, ಮಾತ್ರ ತಮ್ಮನ ಪಾಲು ಕೊಟ್ಟಿರಲಿಲ್ಲ. ಹಣ ಕೇಳಿದರೆ ‘ನೀನು ನಿನ್ನ ಹೆಂಡತಿನಾ ಬಿಟ್ಟು ಬಾ, ಆಗ ಹಣ ಕೊಡುತ್ತೇನೆ’ ಎಂದು ಕುಂಟು ನೆಪ ಹೇಳುತ್ತಿದ್ದನಂತೆ. ಜಮೀನು, ಆಸ್ತಿ ಯಾವುದರ ಬಗ್ಗೆಯೂ ಸರಿಯಾಗಿ ವ್ಯವಹಾರ ಮಾಡುತ್ತಿಲ್ಲ ಎಂದು ತಮ್ಮ ಕೋಪಗೊಂಡಿದ್ದ. ಸೆ. 24ರಂದು ರೇಷನ್ ಕಾರ್ಡ್ ಕೇಳಲು ಹೋಗಿದ್ದ ತಮ್ಮನ ಮೇಲೆ ಅಣ್ಣ ಚಾಕು ಇರಿದಿದ್ದಾನೆ. ಮೂರು ದಿನ ಸಾವು ಬದುಕಿನ ನಡುವೆ ಹೋರಾಟ ನಡೆಸಿದ್ದ ತಮ್ಮ ಬಳಿಕ ಸಾವನ್ನಪ್ಪಿದ್ದಾನೆ. ಜೀವ ತೆಗೆದ ಅಣ್ಣ ಹಾಗೂ ಪತ್ನಿ ಜೈಲು ಸೇರಿದ್ದಾರೆ.

ನಡೆದಿದ್ದೇನು?

ಹಾಸನ ಜಿಲ್ಲೆಯ ಬೇಲೂರು ತಾಲೂಕಿನ ಸೋಂಪುರ ಗ್ರಾಮದಲ್ಲಿ ನಡೆದಿರುವ ಈ ಭೀಕರ ಹತ್ಯೆ ಕೇಸ್ ನಿಜಕ್ಕೂ ಬೆಚ್ಚಿಬೀಳಿಸುವಂತಿದೆ. ನ್ಯಾಯಬೆಲೆ ಅಂಗಡಿಯಲ್ಲಿ ರೇಷನ್ ಪಡೆಯುವ ವಿಚಾರಕ್ಕೆ ಶುರುವಾದ ಜಗಳ ಕೊನೆಗೆ ಕೊಲೆಯಲ್ಲಿ ಅಂತ್ಯವಾಗಿದೆ. ದೇವರಾಜ್ ಹಾಗೂ ರಘು (35) ಸಹೋದರರು ಇಬ್ಬರಿಗೂ ಮದುವೆಯಾಗಿದ್ದು, ಬೇರೆ ಬೆರೆ ವಾಸವಾಗಿದ್ದಾರೆ.

ಇದನ್ನೂ ಓದಿ: ಹಾವೇರಿ: ಆಸ್ತಿ ಜಗಳಕ್ಕೆ ಬಲಿಯಾದ ತಾಯಿ-ಮಗ; ಮಾರಕಾಸ್ತ್ರಗಳಿಂದ ಬರ್ಬರ ಹತ್ಯೆಗೈದ ದುಷ್ಕರ್ಮಿಗಳು

ರಘು ಪತ್ನಿ ಕಡೆಯವರು ಹೇಳುವ ಪ್ರಕಾರ ಸಹೋದರರಿಗೆ ಏಳರಿಂದ ಎಂಟು ಎಕರೆ ಜಮೀನು ಇದೆ ಅಂತೆ. ಇದರಲ್ಲಿ ಮೂರು ಎಕರೆ ಭೂಮಿಯನ್ನ ಮಾರಾಟ ಮಾಡಿದ್ದ ಅಣ್ಣ ದೇವರಾಜ್, ಸುಮಾರು 87 ಲಕ್ಷ ರೂ ಹಣವನ್ನ ಒಬ್ಬನ್ನೇ ಇಟ್ಟುಕೊಂಡಿದ್ದನಂತೆ. ರಘು ಹೋಗಿ ಹಣ ಕೇಳಿದರೆ, ‘ನೀನು ಅಂಗವಿಕಲೆಯನ್ನ ಮದುವೆ ಆಗಿದ್ದಿಯಾ, ಅವಳಿಗೆ ಮಕ್ಕಳು ಆಗಿಲ್ಲ. ನಿನಗೆ ಆಸ್ತಿ ಏಕೆ? ಅವಳನ್ನ ಬಿಟ್ಟು ಬಾ ಆಗ ಕೊಡುತ್ತೇನೆ. ಎಂದು ಸಬೂಬು ಹೇಳಿ ಕಳಿಸುತ್ತಿದ್ದನಂತೆ. ಇದರಿಂದ ಕೋಪಗೊಂಡಿದ್ದ ರಘು, ಅಣ್ಣನ್ನೊಂದಿಗೆ ಜಗಳ ಮಾಡಿದ್ದ.

ಮನಸೋ ಇಚ್ಛೆ ತಮ್ಮನಿಗೆ ಚಾಕು ಇರಿದ ಅಣ್ಣ

ಈ ಹಿಂದೆಯೂ ಒಮ್ಮೆ ದಾಳಿ ಮಾಡಿದ್ದ ದೇವರಾಜ್ ಮೇಲೆ ಕೊಲೆ ಯತ್ನ ಕೇಸ್ ದಾಖಲಾಗಿತ್ತಂತೆ. ಸೆಪ್ಟೆಂಬರ್ 24ರಂದು ಅಣ್ಣ, ತಮ್ಮನ ಹೆಸರು ಒಂದೇ ಬಿಪಿಎಲ್ ಕಾರ್ಡ್​ನಲ್ಲಿ ಇದ್ದ ಕಾರಣ ಒಂದು ತಿಂಗಳ ಅಣ್ಣ ರೇಷನ್ ಪಡೆದುಕೊಂಡರೆ, ಇನ್ನೊಂದು ತಿಂಗಳು ತಮ್ಮ ಪಡೆಯುತ್ತಿದ್ದ. ಸೆಪ್ಟೆಂಬರ್ ತಿಂಗಳು ರಘು ಸರದಿಯಾಗಿದ್ದರಿಂದ ಕಾರ್ಡ್ ಕೇಳಲು ಹೋದಾಗ ಜಗಳವಾಗಿದೆ. ಪರಸ್ಪರ ಕಿತ್ತಾಡಿಕೊಂಡ ಸಹೋದರರು ಬೀದಿಗೆ ಬಂದು ಹೊಡೆದಾಟಕ್ಕಿಳಿದಿದ್ದರು. ಮನೆಯಿಂದ ಚಾಕು ತಂದ ದೇವರಾಜ್, ಮನಸೋ ಇಚ್ಛೆ ತಮ್ಮನ ಮೇಲೆ ಅಟ್ಯಾಕ್ ಮಾಡಿದ್ದ. ರಕ್ತದ ಮಡುವಿನಲ್ಲಿ ಬಿದ್ದವನನ್ನು ಕೂಡಲೇ ಬೆಲೂರು ತಾಲೂಕಾಸ್ಪತ್ರೆಗೆ ದಾಖಲು ಮಾಡಿ ನಂತರ ಹಾಸನ ಜಿಲ್ಲಾಸ್ಪತ್ರೆಗೆ ಕರೆತಂದಿದ್ದಾರೆ. ಇಲ್ಲಿಂದ ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದ್ದಿ, ಚಿಕಿತ್ಸೆ ಫಲಕಾರಿಯಾಗದೆ ನಿನ್ನೆ ರಾತ್ರಿ ರಘು ಕೊನೆಯುಸಿರೆಳೆದ್ದಾನೆ.

ಇತ್ತ ಮನೆಯಲ್ಲೂ ಹೆಂಡತಿ ಜೊತೆಗೆ ಜಗಳ

ಆಟೋ ಚಾಲಕನಾಗಿದ್ದ ರಘು, ಬೇಲೂರಿನ ಕೋಮಲಮಣಿ ಎನ್ನುವವರನ್ನ ಮದುವೆಯಾಗಿದ್ದ. ಪತ್ನಿ ವಿಶೇಷಚೇತನ ಮಹಿಳೆಯಾಗಿದ್ದ ಕಾರಣ ತಾನೂ ಒಂದಷ್ಟು ದುಡಿಮೆ ಮಾಡಿ ಮನೆ ಕಟ್ಟಿಕೊಳ್ಳಬೇಕು ಎಂದು ತನ್ನ ಪಾಲಿಗೆ ಬರಬೇಕಿದ್ದ ಸೈಟ್ ಕೇಳಿದರೂ ದೇವರಾಜ್ ಕೊಟ್ಟಿರಲಿಲ್ಲ. ಜಮೀನು ಮಾರಾಟ ಮಾಡಿದರೂ ಬಂದ ಹಣವನ್ನ ಯಾರಿಗೂ ಕೊಟ್ಟಿರಲಿಲ್ಲ. ಇನ್ನು ದೇವರಾಜ್​​ ಮೊದಲ ಹೆಂಡತಿಯನ್ನ ಬಿಟ್ಟು ಎರಡನೇ ಮದುವೆ ಮಾಡಿಕೊಂಡಿದ್ದಾನೆ. ರಘುಗೆ ಮದುವೆಯಾಗಿ ಎಂಟು ವರ್ಷ ಕಳೆದರೂ ಮಕ್ಕಳಾಗಿರಲಿಲ್ಲ. ಆಸ್ತಿ ಬೇಕು ಎಂದರೆ ಅವಳನ್ನು ಬಿಟ್ಟು ಬಾ ಎಂದಿದ್ದ ಅಣ್ಣನ ಮೇಲಿನ ಸಿಟ್ಟಿಗೆ ಕಂಠಪೂರ್ತಿ ಕುಡಿದು ಬಂದು ಪತ್ನಿ ಜೊತೆಗೆ ಜಗಳ ಮಾಡುತ್ತಿದ್ದ ರಘು, ಇತ್ತ ಮನೆಯಲ್ಲೂ ನೆಮ್ಮದಿ ಕಳೆದುಕೊಂಡಿದ್ದ.

ಇದನ್ನೂ ಓದಿ: ಬೆಂಗಳೂರು: ಸಂಪಿಗೆಹಳ್ಳಿ ಸೈಟ್‌ನಲ್ಲಿ ಮಹಿಳೆಯ ಶವ ಪತ್ತೆ ಕೇಸ್; ಪೊಲೀಸರು ಪ್ರಕರಣ ಭೇದಿಸಿದ್ದೇ ಒಂದು ರೋಚಕ ಕಥೆ!

ಆಸ್ತಿ ಮಾರಾಟ ಮಾಡಿ ಬಂದ ಲಕ್ಷ ಲಕ್ಷ ಹಣ ಮತ್ತು ಕೋಟ್ಯಂತರ ರೂ ಬೆಲೆಬಾಳುವ ಜಮೀನು ಎಲ್ಲವನ್ನು ತಮ್ಮನಿಗೆ ಪಾಲು ಕೊಡಬೇಕಿತ್ತು. ಈ ನಡುವೆ ಸಹೋದರಿಯರು ಕೂಡ ಆಸ್ತಿಯಲ್ಲಿ ಪಾಲುಗಾಗಿ ಕೇಸ್ ಹಾಕಿದ್ದರಂತೆ. ಎಲ್ಲರಿಗೂ ಪಾಲು ಕೊಟ್ಟರೆ ತನಗೇನು ಉಳಿಯುತ್ತೆ ಎಂದು ಒಳಗೊಳಗೆ ಲೆಕ್ಕಾಚಾರ ಮಾಡಿದ್ದ ಅಣ್ಣ, ಕಡೆಗೆ ತಮ್ಮನನ್ನು ಕೊಲೆ ಮಾಡಿದ್ದಾನೆ. ಘಟನೆ ನಡೆದ ದಿನವೇ ದೇವರಾಜ್​ನ ಬಂಧನವಾಗಿದ್ದು, ಆತನ ಪತ್ನಿ ಗೀತಾಳನ್ನು ಕೂಡ ಪೊಲೀಸರು ಬಂಧಿಸಿದ್ದಾರೆ.

ಮತ್ತಷ್ಟು ಕ್ರೈಂ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.